To a tamne (26.09.19)
Kedźbu, w Sakskej su zaso łosy (Elche) po puću. Jedna žónka w lěsach wokoło Zhorjelca za partnerom pyta, kaž Radijo Łužica tele dny informowaše. Připosłucharjo su so tam mjenujcy přizjewili a powědali, zo běchu tajkeho wołojelenja při awtodróze A 4 wuhladali. Kaž fachowc towaršnosće za škit přirody a slědźenje Lutra w Hamoru wobkrući, so łosy tuchwilu kóća, a tak je bjeze wšeho móžno, zo ludźo tele zwěrjata tuž hdys a hdys wuhladaja.
Pospyt, so w towaršnosći integrować, je z Afriki pochadźacy muž po wšěm zdaću cyle wopak interpretował. Tak je wón puć w italskim Venedigu mjetł a sej wot pasantow za to pjenjezy wuprosył. Policija pak napołoži jemu pokutu 350 eurow. Wjacori wobydlerjo, kotřiž wo tymle padźe zhonichu, sej integraciski pospyt porno tomu jara chwalachu a so na policiji za Afričana zasadźichu. Tak njetrjebaše wón pokutu zapłaćić.
To a tamne (25.09.19)
Z piwom najhóršemu zadźěwał je šofer wčera w Bayerskej. Jako poča jeho awto njezwučene zwuki wot so dawać, wón na awtodróze A 3 zasta, zo by za zmylkom pohladał. Wočini motorowu hawbu, a to jemu hižo płomjenja napřećo sapachu. Na zbožo měješe někotre bleše piwa sobu. Z drohotnej ječmjenjowej brěčku je muž woheń skónčnje zhašał. A wohnjowa wobora njebě hižo trěbna.
Wjac hač 3 700 eurow je 19lětna młodostna na Mnichowskim hłownym dwórnišću we wočinjenym kašćiku za zamknjenje našła. Poprawom chcyše tam swój wačok nutř zamknyć, nańdźe pak móšnju. W njej bě hoberska suma pjenjez, samo mjeno wobsedźerja móšnje bě podate. Pinčnik oktoberskeho swjedźenja bě sej, kaž pozdźišo rjekny, w ćahu wusnył. Kak je so jeho móšnja do mjenowaneho kašćika dóstała, pak njemóžeše sej rozkłasć.
To a tamne (24.09.19)
Medicinsku pomoc trjebał a lubosć namakał je Awstričan minjeny kónc tydźenja na oktoberskim swjedźenju w Mnichowje. Tam jeho 27lětna sanitetarka zastara, dokelž bě so na noze zranił. Wot młodeje pomocnicy cyle přemóženy so muž jeje hišće w sanitetnym awće wopraša, hač chce so z nim woženić. Poskitk drje wona hnydom njepřiwza, ale po wšěm zdaću njebě cyle wotchilena, znajmjeńša staj sej wučiniłoj so najprjedy raz zetkać.
Wopušćeny wodomjetak wosrjedź Drježdźan je wčera policiju zaběrał. Kaž zastojnicy na to zwěsćichu, słušeše jězdźidło Hamburgskej policiji, a zhonichu tež, zo šofer w bliskim hotelu wotpočuje, dokelž je jězdźenski čas překročił. Wón bě z wodomjetakom po puću z Awstriskeje do braniborskeho Luckenwalde, hdźež tajke jězdźidła wuporjedźeja.
To a tamne (23.09.19)
Měsac po rozžohnowanskej ceremoniji z islandskim lodowcom Okjökull nětko tež Šwicarjo žaruja. Wčera wopominachu swój lodowc Pizol, kotryž je dale a mjeńši. Organizatorojo su sej wot wobdźělnikow přeli, so žarowansku drastu woblec. Wot Züricha 100 kilometrow zdaleny lodowc lětsa posledni raz wuměrja. Wšako tón hižo wjele lodu njewopřijima. Wina na tym je klimowa změna, kaž lodowcowa iniciatiwa měni.
Dołhi rynk awtow sobotu rano při Drive-in-hosćencu Mc-Donalds njeje so ani kuska dale pohibował. Prěni w rynku – 52lětny šofer – bě sej wusnył. Wodźer jězdźidła za nim, jeho kedźbliwje wubudźi a wědźeše tež hnydom přičinu „mučnoty“. Kaž so wukopa, bě 52lětny chětro natutkany. Policija jemu hišće na městnje klučik awta wotewza, zwěsćiwši 1,26 promilow alkohola w jeho kreji.
To a tamne (20.09.19)
Kedźbu, němske piwo je sylne! Tak warnuje konsulat USA w Mnichowje swojich ameriskich wobydlerjow před wopytom na Oktoberskim swjedźenju, kotryž tam tónle kónc tydźenja zahaja. Dale su krótke wideja natočili, kak měli so ludźo na swjedźenju zadźeržeć. K tomu słuša mjez druhim na blidach njerejować abo piwowe karany njemjetać. Tohorunja skedźbni konsulat na paduchow. Něhdźe 500 wupokazow su wopytowarjo loni zhubili abo bu pokradnjenych.
Emocionalna wadźeńca wokoło kozy je Mnichowske zarjadniske sudnistwo wčera zakónčiło. Kozoł z mjenom Hui Buh budźe přichodnje dale na burskim statoku bydlić a nic w bydlenju. Skoržiłoj běštej žona a jeje dźowka, kotrymajž bě krajny zarjad zwěrjo wzał. Wonej stej kozoła z ruku wotćahnyłoj a Hui Buh spaše sobu we łožu dźowki. Zarjad měješe to za njezamołwite zadźerženje.
To a tamne (19.09.19)
Hubjeneho zadźerženja dla staj dwaj turistaj w italskim měsće Venedig wysoku pokutu dóstałoj. Tam staj mužej z Čěskeje nahej do kanala skočiłoj a so wochłódniłoj. Zdobom spytaštaj pasantow na so skedźbnić. Kóždy z nich dyrbješe za přeńdźenje chłostanje we wysokosći 3 000 eurow zapłaćić. W italskich historiskich městach dźiwaja zastojnicy na porjad. Hakle w juliju dyrbještej muž a žona z Berlina 1 000 eurow zapłaćić, dokelž stej sej na znatym Rialto-mosće kofej wariłoj.
W padźe pokradnjeneho złoteho hajzla w jendźelskim Cheltenhamje bu dalši muž zajaty, kotremuž wumjetuja, zo je pomhał 5,4 miliony eurow hódnu drohoćinku rubić. Po přesłyšowanju pak bu zaso pušćeny. Do toho su zastojnicy hižo 66lětneho muža zajeli. Złoty nuznik wuměłca Maurizioa Cattelana wostanje dale zhubjeny.
To a tamne (18.09.19)
Přismudźene całty su wčera lětanišćo Lipsk/Halle nachwilnje zlemili. Sylneho kura w pjekarni dla su wohnjowe sensory w 9 hodź. reagowali a wohnjowu woboru alarmowali. Na to su potrjecheny terminal ewakuowali, rěčnik lětanišća zdźěli. W pjekarni wšak so jenož całty a tykanc smudźachu. Dale so ničo stało njeje. „Wohnjowy alarm je wohnjowy alarm“, rěčnik praji. Po hodźinje móžachu zaso pasažěrow wobstarać. Wjacore lěty so zapozdźichu.
Z ćahom sam po puću był je štyrilětny hólc w Saksko-Anhaltskej. Do toho bě wón swojimaj staršimaj twochnył a sam do ćaha zalězł. Mały hólc žonje w ćahu mjez Wittenbergom a Halle napadny. Wona wza hólca k sebi a přepoda jeho na dwórnišću w Halle policiji. Zastojnicy informowachu staršeju, kotrajž přeco hišće podarmo za nim pytaštaj.
To a tamne (17.09.19)
Časowy skok do zašłosće je sej sobudźěłaćer železnicy na Lipšćanskim hłownym dwórnišću dowolił: Wón změni taflu z časami wotjězdow a informowaše pućowacych, zo njejědźe přichodny ćah do Kamjenicy, ale do Karl-Marx-Stadta. Wón chcyše na to dopominać, zo nošeše město nimale 40 lět mjeno Karla Marxa. Wotpowědujo tomu bě regionalna železnica, kotraž čaru wobhospodarja, staru parnu lokomotiwu před ćah powěsnyła.
Zwada wo pokład Wikingow w Šotiskej zaběra nětko tamniše sudnistwo. Cyrkej je namakarja pokłada Dereka McLennana wobskoržiła. Muž bě před pjeć lětami z pomocu metaloweho detektora pokład na polu našoł, kotryž cyrkwi słuša. Za wjace hač dwaj milionaj eurow muž pokład pozdźišo Šotiskemu narodnemu muzejej předa. Cyrkej njedósta ničo. Pokład wopřija wjace hač sto eksponatow, kotrež běchu Wikingojo swój čas rubili.
To a tamne (16.09.19)
Toaletu z ryzy złota su z britiskeho Blenheimoweho palasta pokradnyli. W pyšnym hrodźe njedaloko Oxforda je so bywši britiski premierminister Winston Churchill narodźił. Policija je 66lětneho muža zajała. Toaleta w hódnoće 1,1 miliony eurow je pak dale zhubjena. Drohotny hajzl je italski wuměłc Maurizio Cattelan zhotowił. Nuznik bě we wobłuku wuměłskeje přehladki wustajeny.
Cyłu tonu morchejow je nakładne awto na awtodróze A 2 zhubiło. Zelenina rozdźěli so na 200 metrow njedaloko Porta Wetfalica w Sewjerorynsko-Westfalskej. Policija dyrbješe dwě čarje do směra na Hannover wjacore hodźiny zawrěć, zo móhli morcheje zrumować. Čehodla je awto tworu zhubiło, hišće njewědźa.
To a tamne (13.09.19)
Do rěki zajěł je małotransporter w předpomorskim Löcknitzu pola Greifswalda. Kaž policija zdźěli, bě na snadnej skłoninje parkowany transporter naraz preč, jako so žona po wobstaranjach nawróći. Awto bě w tym času do rěki Randow jěło. Niłkeho stawa wody dla njeje so na zbožo dospołnje podnuriło, tak zo móžeštej je wohnjowa wobora a traktor wućahnyć. Šoferka wšak twjerdźi, zo bě ručne spinadło přićahnyła a chód zapołožiła.
Bjez čriji a bjez fungowacych borzdźidłow je šofer nakładneho awta na awtodróze A 20 po puću był, jako jeho policisća zadźeržachu. 44lětny transportowaše 21 tonow zorna w měchach. Při kontroli so wukopa, zo bě Lkw hižo w meji při TüVje přepadnył a njeby scyła wjace jěć směł. Tak dyrbješe jón muž stejo wostajić a měchi na druhe awto překładować. Na šofera čaka nětko bolostna pokuta.
