To a tamne (14.08.19)
Na cyły tydźeń přidatnych prózdnin wjeselić smědźa so šulerjo w hessenskim Bensheimje. W tamnišej šuli běchu hakle tele dny zwěsćili, zo je wohnjowa připrawa defektna. Připrawu dyrbja tuž kompletnje wuměnić. Dokelž nimaja žane přidatne rumnosće, kotrež móhli krótkodobnje za wučbu wužiwać, ma 17 rjadownjow Karla Kübeloweje šule tydźeń dlěje lětnje prózdniny.
Prinz Harry a jeho mandźelska Meghan staj dźělenaj – znajmjeńša w Londonskim kabineće wóskowych figurow. Meghan steji nětko pódla Davida Beckhama a jeho mandźelskeje Victorije. Kabinet chcył tak „moderne nastajenje britiskeje wójwodki k žiwjenju a jeje wosobinsku njewotwisnosć najebać wšitke kralowske winowatosće wotbłyšćować“.
To a tamne (13.08.19)
Wóz ze sydom pčolacymi ludami wotpalił je pčołar w braniborskim Neustadće nad rěku Dosse, po tym zo bě we wozu swój kurjak zabył. 81lětny bě wčera z tak mjenowanym smokerom w pčolacym wozu dźěłał. Jako chcyše sej něšto wobstarać, je zabył kurjak sobu wzać. Tak so wóz zapali a zniči, a z nim spali so sydom pčolacych ludow. Stary bydlenski wóz, kiž pódla steješe, so tohorunja wotpali. Škoda wučinja 5 000 eurow.
Bywšeho jateho su w awstriskim Linzu na šulu za jastwowych stražnikow přiwzali. Předchłostanja muža – mjez nimi dwě lěće jastwa w Němskej – njeběchu nikomu na justicnej šuli napadnyli. Požadar sam je swoje dotalne chłostanja wězo zatajił. Wukopało so wšitko hakle je, po tym zo bě znaty muža šulu wo předchłostanjach informował. Tak su wobšudnika nablaku ze šule wupokazali.
To a tamne (12.08.19)
Zwažliwe wulěty na lodowcach, lochkomyslne skakanje wot balkona k balkonej: Mnozy turisća w dowolu njezrozumliwe a hłupe wěcy činja, při kotrychž móžeš jeno z hłowu wić. W italskich narodnych parkach su zakazali, w kupanskich šlapkach pućować. Jeli so ludźo po tym nimaja, dyrbja z pokutu hač do 2 500 eurow ličić. Zamołwići parkow nochcedźa tak žane pjenjezy zasłužić. Jim je wěstosć turistow wažna. Ličba zranjenych je so mjeztym jasnje pomjeńšiła.
Islandska turistiska centrala je wjacore lóštne kampanje zahajiła. Jedna tajka je, zo maja wopytowarjo Islandskeje w interneće spřisahać, zo budu z přirodu zamołwiće wobchadźeć. K wosom kaznjam mjez druhim słuša, zo su na kóžde wjedro a kóždy dyrdomdej wotpowědnje nastajeni. Prawidło čo. 3 na přikład rěka: „Budu smjerć rjane fota třěleć, bjeztoho zo za nje wumru.“
To a tamne (09.08.19)
Hólcaj w starobje 12 a 13 lět je policija w Bonnje štwórtk rano w třoch lepiła, jako z awtom na parkowanišću tam a sem jězdźeštaj. Swědka bě zastojnikow na to skedźbniła. Kaž 13lětny policistomaj rozjasni, chcyštaj w awće jenož hudźbu słyšeć, ale naraz bě so ručne borzdźidło pušćiło. Tak staj awto jenož zaso prawje zaparkować chcyłoj. Stawizničce hólčeca wšak policija cyle njewěrješe a dowjeze wobeju k maćerjomaj. Najskerje běštaj pachołaj wostudu pasłoj ...
Dwanaće lět stary pućowanski bus je policija wčera na awtodróze pola Berlina zadźeržała, dokelž měješe naboku wulku dźěru w nuzniku. Dno busa bě tak zerzawe, zo móhło so lochce přełamać. Nimo toho zwěsćichu zastojnicy dalše 14 njedostatkow. Na přikład zhubješe jězdźidło wolij, sydła běchu defektne a wěstotne pasy wjace njefungowachu.
To a tamne (08.08.19)
Jako wulki zmylk wopokazało je so ilegalne wotstronjenje chłódźaka. Muž bě jón w juhošpaniskej Almeríji do skały ćisnył. Přećel jeho při tym filmowaše a wozjewi widejo na Twitteru. Policija pak tež socialne syće wobkedźbuje a skućićela tak wuslědźi. Před wočemi zastojnikow dyrbješe wobswětowy hrěšnik chłódźak po skaliznach zaso horje ćahnyć, štož bu tohorunja filmowane. Nimo wysokeho pochłostanja ma muž dalši problem. Wón dźěłaše mjenujcy we wobchodźe, hdźež domjace nastroje předawaja. Jasne tuž, zo šef jemu nablaku wupowědźi.
Na dźensnišim swětowym dnju kóčkow so tale dobra powěsć wulkotnje hodźi. Wohnjowym wobornikam w Offenburgu je so poradźiło z pomocu wody měsac staru micku ze štyri metry hłubokeho kanaloweho šachta wuswobodźić a jej tak žiwjenje wuchować.
To a tamne (07.08.19)
Za zawrjenski čas pěstowarnje we wuchodowestfalskim Espelkampje běchu so tam paduši zadobyli a sej drastu płokali. Po wšěm zdaću mějachu woni chwile dosć, wšako běchu sej tež hišće zežiwidła z chłódźaka zesłodźeć dali. Nasyćeni a čisće woblečeni běchu dom z jenož mało namakanymi pjenjezami zaso wopušćili. Dźěl wupłokaneje mužaceje drasty pak prosće ležo wostajichu. Po wotewrjenju pěstowarnje předwčerawšim su zamołwitym slědy zadobywanja napadnyli.
Zo njeje nawigaciska app stajnje wužitna, dyrbješe 16lětny wčera blisko Zwickauwa zwěsćić. Poprawom chcyše z ćahom k přećelce, ale bě předaloko jěł. Z kolesom nastaji so tuž na wróćopuć a poda adresu do swojeho smartphona. App pak wodźeše jeho na awtodróhu A 72. Po štyrjoch kilometrach jeho policija zadźerža a je młodostneho k přećelce dowjezła.
To a tamne (06.08.19)
Hnydom dźesać jězdźidłow při zaparkowanju swojeho awta wobškodźiła je 75lětna šoferka w Magdeburgu. Prěni pospyt drje bě so jej radźił. Dokelž pak zwěsći, zo awto křiwje steji, chcyše to změnić. Jako wona wróćo storči, wobškodźi hižo prěnjej awće. Naposledk zhubi kontrolu nad swojim wozom, kotryž jenož hišće w kruhu po parkowanišću jězdźeše a tak dalše sydom a tež jeje awto wobškodźi.
Wosobinski poćah mjez pjećlětnym a jeho nanom we Würzburgu je wobškodźeny. Hólčk bě minjeny pjatk na policiju zawołał a přizjewił, zo je jeho nan dwójce čerwjenu amplu přejěł a zo dyrbi policija jeho do jastwa tyknyć. Na zbožo móžeše zastojnik pjećlětneho při telefonje změrować a situaciju złahodnić.
To a tamne (05.08.19)
Město do parkowanskeho domu staj so francoskaj mandźelskaj w Mnichowje na schody podzemskeje dóstałoj. 66lětny šofer bě zachod železnicy w nutřkownym měsće wčera dopołdnja z parkowanskim domom zaměnił. Snano je jeho kłok, pokazowacy na parkowanišćo za zbrašenych, zamylił. Zranił so na zbožo nichtó njeje, awto pak dyrbjachu wotwlec.
Ze skokom do rěki Mosel chcyše pjany šofer awta bjez jězbneje dowolnosće policiji w porynsko-pfalcskim Bernkastelu-Kuesu wućeknyć. Policajskej patruli bě wčera w rańšich hodźinach napadnyło, zo awto jara njewěsće jědźe. Po přesćěhanju drje wone zasta, ale sobujěducaj ćeknyštaj. Jeju su lepili a nachwilnje zajeli. Tež šofer zastojnikam twochny, skoči do Mosele a spyta ju přeprěčić. Wohnjowa wobora we wuchowanskim čołmje pak muža z wody wućahny.
To a tamne (02.08.19)
Při policajskej kontroli sćazane słódkosće smědźa sej chowancy dźěsćownje w Passauwje słodźeć dać. W aprylu běchu wobchadni policisća na awtodróze w Bayerskej w dwěmaj awtomaj dohromady 15 nakupowanskich titow połne słódkosćow namakali. Wosoby w awtomaj běchu zastojnikam w zwisku z kradnjenjom hižo znate. Dokelž njemóžachu pakostnicy dopokazać, zo běchu słódkosće kupili, je zastojnicy sćazachu, njemóžachu pak wobsedźerja plackow zwěsćić. Tuž su słódkosće – něhdźe sto kilogramow šokolody a gumijowych barikow – nawodnicy dźěsćownje přepodali.
To a tamne (01.08.19)
Chětro napadny nalěpk na kófrje je paducha wačokow w ćahu přeradźił. Sobujěduca 26lětna parowaše swój kófer, po tym zo bě na nuzniku była. Železnicar, kotrehož wo tym informowaše, móžeše so dopominać, zo bě muž runje w Bad Oeynhausenje z kófrom z intercityja wulězł. Na to informowachu nawodu naslědneho ćaha. A woprawdźe: W regionalnym ekspresu do Hamma železnicar wopisany wačok nańdźe. W Hammje policija paducha hižo wočakowaše. Kófer su žonje mjeztym zaso wróćili.
Cyłu kuchnju pokradnyli su njeznaći mužej w Hornjej Frankskej. Muž bě kuchnju při přećahu do druheho bydlenja nachwilnje na chódniku wotstajił. Jako chcyše ju po štyrjoch hodźinach bjez dohlada do noweho bydlenja dowjezć, bě kuchnja fuk. Wona měješe po informaciji wobkradnjeneho hódnotu 500 eurow.
