To a tamne (12.03.18)
Wo njewšědnym „wuswobodźenju jateho“ rozprawja policija w badensko-württembergskim Neckargemündźe. Tam bě nan ze swojim synom na policajski rewěr přišoł. Jědnaćelětny bě na kolesowarskej šćežce ručne puta namakał a sej je sam připinył, mějo je za hrajku. Pozdźišo pak zwěsći, zo njehodźa so puta hižo wočinić. Dokelž so tež žadyn z policajskich klučikow njehodźeše, spaslichu zastojnicy ze stareho kamoroweho klučika tak mjenowany „dietrich“. Z nim móžachu puta skónčnje wotamknyć. Zwotkel wone pochadźachu, njebě jasne.
Rubježnika popadnył je muž w Augsburgu, jako při čerwjenej ampli čakaše. 17lětny kriminelny bě runje loto-filialu nadpadnył a bě na ćěkańcy. 25lětny słyšeše w swojim awće wołanje wurubjeneje předawarki a rubježnika hnydom přesćěhaše. Po někotrych stach metrow jeho dosćahny a přepoda 17lětneho policiji.
To a tamne (09.03.18)
Kedźbliwa kóčka je swoju wobsedźerku w hessenskim Rüsselsheimje před paduchom škitała. Zadobywar bě w nocy na srjedu ćeknył, dokelž tam micka žałosćeše. Štyrilětna Nala tak wótře mjawčeše, zo wobsedźerka wotući a za njej pohlada. Při tym runje hišće widźeše, kak so paduch z jeje bydlenja we wjaceswójbnym domje zminje. Pokradnył wšak přespěšeneje ćěkańcy dla ničo njebě.
Jenož w spódnich cholowach wosnje wokoło chodźacy muž je sej w badensko-württembergskim Pforzheimje na policajsku stražu wućeknył. Wón bě so prawdźepodobnje sam z bydlenja wuzamknył a zymu mrějo po měsće błudźił. Zastojnikam 29lětny rozłoži, zo časćišo wosnje wokoło běha. Jeho mać na zbožo móžeše pomhać, dokelž wobsedźi tohorunja kluč bydlenja. Wona muža na policiji wotewza a přewodźeše jeho domoj.
To a tamne (08.03.18)
Mrowje su w badensko-württembergskim Aalenje alarm zawinili. Warnowanska připrawa w internaće bě woheń signalizowała. Na to přijědźechu kameradojo z třomi jězdźidłami, za wohenjom pak podarmo pytachu. Kaž so wukopa, su mrowje na alarmje wina byli. Wone běchu w alarmowej připrawje po puću, kotraž dźeržeše je mylnje za kur. Wohnjowi wobornicy móžachu so tuž změrowani zaso na dompuć nastajić.
Harowacych mórskich lawow dla ma Kölnski zwěrjenc nětko mjerzanje na šiji. Susodka bě so pola města hóršiła, zo mórske lawy w nocy haruja. Wjednistwo coowa wšak njemóže sej rozkłasć, čehodla dyrbjeli mórske lawy w nocy haru činić. Nimo toho dyrbi kóždy, kiž w susodstwje zwěrjenca bydli, z tym ličić. Přiwšěm chcedźa nětko z kameru wobkedźbować, što so tam w nocy stawa.
To a tamne (07.03.18)
Wjele lět wopačny drohokamjeń wobdźiwali su wopytowarjo čěskeho narodneho muzeja po informacijach medijow. Pjećkaratowy diamant bě dotal jedyn z najwažnišich eksponatow zběrki drohokamjenjow w Praze. Při inwenturje so nětko wukopa, zo jedna so wo škleńčanu podobiznu. Prawdźepodobnje běchu paduši diamant hižo před lětdźesatkami pokradnyli a z tunjej kopiju narunali. Tež pola dalšich kamjenjow maja dwěle.
Klučik ručnych putow wotłamała je 29lětna žona w Kamjenicy, jako ju policisća zajachu. Chětro so wobarajo je wona tež policistku snadnje zraniła. Dokelž njemóžachu zastojnicy puta hižo wjace wotamknyć, dyrbješe wohnjowa wobora žonu z wosebitymi klěšćemi wuswobodźić. 29lětna bě policistomaj na dwórnišću napadnyła. Při kontroli wona zwěsćištaj, zo předleži wukaz zajeća přećiwo njej wjacorych deliktow dla.
To a tamne (06.03.18)
W kamorje schowany lubkar je w Bremerhavenje dwójne zasadźenje policije zawinił. 38lětna žona bě jeho kónc tydźenja sobu domoj wzała. Jako njedźelu rano jeje žiwjenski partner přińdźe, so wona do njeho da, zo njeby lubkowarja w kamorje wuhladał. Zwada so tak přiwótři, zo dyrbjachu susodźa policiju wołać. Zastojnicy chětro agresiwny porik zajachu. Krótko na to tam policiju znowa wołachu: Njeznaći běchu so do bydlenja zadobyli, zo bychu lubkarja wuswobodźili, kiž njemóžeše ze zamknjeneho bydlenja.
Nakusana makowa całta je dopokazała, zo bě paduch w Kielu handy sobudźěłaćerki pjekarnje pokradnył. Mobilny telefon bě so tam srjedź nowembra z dźěłarnje zhubił. Jako paduch znowa do pjekarnje přińdźe, zawoła žona policiju. Ta móžeše z pomocu DNA dopokazać, zo bě pakostnik w zadnjej rumnosći był, hdźež wot njeho nakusana całta ležeše.
To a tamne (05.03.18)
Pjenjezy w hódnoće 30 000 eurow su bjez swojeho wobsedźerja w Mnichowje z ćahom po puću byli. Muž bě po puću na wiki twjerdych pjenjez ćah wopušćił, drohotny wačok pak jědźeše dale hač na kónčnu staciju. Tam je železnicarka toboły połne pjenjez wuhladała a woteda je na Mnichowskim hłownym dwórnišću. Tam móžeše sej je zběrar pjenjez hišće w prawym času do zahajenja wikow wolóženy wotewzać.
Psycu z liščeje jamy wuswobodźiła je wohnjowa wobora w sewjerorynsko-westfalskim Mühlheimje. Foxterrier „Hope“ bě so při přechodźowanju z wobsedźerku w lěsu njejapcy zminył, po tym zo drje bě něšto wučušlił. Kameradojo trjebachu nimale pjeć hodźin, zo bychu zmjerznjenu zemju wokoło liščeje jamy wotstronili a žałosćacu 16lětnu psycu wobsedźerce skónčnje přepodać móhli.
To a tamne (02.03.18)
Chětro njelepje je so šofer awta při tankowanju w durinskim Bad Liebensteinje počinał. Najprjedy raz bě so tak špatnje stupił, zo při tankowanju display njewidźeše. Je tuž meter doprědka zajěł, njemyslo na to, zo honač hišće w jězdźidle tči. Wustróžany 71lětny wróćo storči – a zrazy do za nim stejaceho awta. Jako znowa doprědka zajědźe, je tež hišće bencinowu staciju wobškodźił. Cyłkowna škoda wučinja 4 000 eurow.
W policajskim awće do šule přijěł je šěsćlětny w Mnichowje. Mały sonjer bě w busu zastanišćo šule zaspał a dale hač ke kónčnej staciji jěł. Tam napadny wón busowemu šoferej, kiž je wobsadku policajskeho awta wo pomoc prosył, dokelž so šěsćlětny tam njewuznaješe. Adresu šule w tobole hólca namakawši zastojnicy jeho tam dowjezechu.
To a tamne (01.03.18)
Rukajcy kradnyłoj staj mužej w kupnicy w Braunschweigu, prawdźepodobnje kruteho zmjerzka dla. Wšako pokazowaše termometer pod minus dźesać stopnjow. Kupnicowy detektiw bě wobkedźbował, kak pakostnikaj rukajcy do nachribjetnika tykataj, a zawoła policiju. Při kontroli nachribjetnika 18lětneho namakachu nimo toho grat za wotstronjenje wěstotnych etiketow. Paduch chětro wokoło so biješe, jeho kumpan móžeše ćeknyć.
Klawn je zhromadnje z policiju w Ludwigshafenje dwaj ćeknjenej cirkusowej cebraj přesćěhał a skónčnje zaso popadnył. Wobydlerjo běchu policiju informowali, zo zwěrjeći po měsće běhatej. Tak přijědźe pjeć policajskich awtow. Zhromadnje z klawnom namakachu zastojnicy cebraj při haćiku, hdźež so paseštej. W kolonje policajskich jězdźidłow přewodźachu jej wróćo do cirkusa.
To a tamne (28.02.18)
Njerjanu překwapjenku dožiwi mać w awstralskim Adelaide. Jako chcyše jabłuko do pomazkoweje tyzy dźowki tyknyć, wuhlada wona małkeho hada. Na zbožo tyzu spěšnje zaso začini. Přiwołany fachowc Rolly Burell jej wobkrući, zo bě to eksemplar jara jědojteho bruneho hada. Tež hdyž je hišće młody, móže jeho kusnjenje čłowjeka morić.
Prošu nawi njesćěhować, steji na tafličce při nowowuhotowanym najězdźe na awtodróhu pola hornjofrankskeho Ebersdorfa. Wobchadne wodźenje su na tym městnje přetwarili, a tak wone informacijam nawija hižo njewotpowěduje. Z wjacorymi lampami a warnowanskej tafličku policija šoferow, kotřiž so dźeń a bóle na nawi spušćeja, tam nětko na strašne městno skedźbnja.
To a tamne (27.02.18)
Z błyšćatymaj wočomaj a ze sympatiskim hłosom wotmołwja Josie Pepper na prašenja pasažěrow na Mnichowskim lětanišću. Přećelna „rodźena Francozowka“ napadnje z wosebitym šarmom, byrnjež roboter była. 1,20 metrow wulka a 28 kilogramow ćežka Josie ma swoje mjeno po lětanišću „Franz Josef Strauß“. Dotal wšak wona jenož jendźelsce rěči, bórze pak chce tež němčinu nałožować.
Poł lěta bě wona zhubjena, nětko je so swójbje nawróćiła, štož bě wulke wjeselo. Rěč je wo psycy z mjenom Rapunzel. Po wšěm zdaću bě wona 400 kilometrow wot frankskeho Hösbacha pola Aschaffenburga do Šwicarskeje pućowała, hdźež su ju wuchowanscy sanitetarjo nětko zranjenu našli. Dokelž měješe Rapunzel wosebity chip, móžachu wobsedźerku spěšnje wuslědźić. „Na zbožo njeje Rapunzel žanu psychisku škodu poćerpjeła“, so jeje knjeni raduje.
