To a tamne (29.04.15)
Nimale 300 000 cigaretow, schowane w blidowych platach, su cłownicy njedaloko Drježdźan w małotransporteru našli. 37lětny šofer bě při kontroli na parkowanišću při awtodróze A 4 jenož 200 cigaretow a wosobinske wěcy pokazał. Při přeswětlenju awta pak napadnychu zastojnikam spodźiwnosće w 23 składowanych drjewjanych platach. Po dokładnym přepytowanju nańdźechu w nich 271 000 ilegalnych cigaretow.
Hoberskeho nawala dla su planowanu hromakowu party w braniborskim Beelitzu wotprajili. Na wšě 20 000 ludźi bě so internetnje za podawk 9. meje přizjewiło. Tak je so měšćanosta na policiju wobroćił, ličo z wobchadnym chaosom. Ta jemu radźeše, najebać hižo předatych 2 500 zastupnych lisćikow, swjedźeń wotprajić. Zarjadowarjo liča přiwšěm z něhdźe 10 000 wopytowarjemi.
To a tamne (28.04.15)
39 lět běše David Moore na ćěkańcy, doniž so pola policije njepřizjewi. 1976 bě wón w North Carolina z jastwa ćeknył. Nětko je so we wulkej nuzy pola policije přizjewił, dokelž trjebaše nuznje lěkarsku pomoc. Jako ćěkanc njemóžeše so pola chorobneje kasy přizjewić, nimo toho su jemu pjenjezy wušli. Nadźija so, zo dóstanje zaso w jastwje medicinsku pomoc. Bě hižo 1971 a 1973 z jastwa ćeknył.
W Zwickauwje staj so mužej při pospyće, mopedowy motor reparować, w garaži zraniłoj. Z njewujasneje přičiny dóńdźe k rozbuchej, jako spytaštaj z horcopowětrowej pistolu metal sćoplić. Jednoho z mužow dyrbjachu z helikopterom do wosebiteje kliniki transportować, tamneho z podhladom na zajědojćenje z kurom do chorownje. Kriminalna policija nětko přepytuje.
To a tamne (27.04.15)
Po nócnym Mnichowje wuchodźował je so dwuapołlětny hólc. Mały kadla bě minjenu nóc skradźu z łoža zalězł a bosy z bydlenja twochnył, kaž policija zdźěli. Pěšk wokoło 3 hodź. płakaceho hólčka na dróze wuhlada a zawoła policiju. Ta měješe při pytanju za staršimaj swoju lubu nuzu, dokelž znaješe dźěćo jako mjeno staršeju jenož „mamu“ a „papu“. Zastojnicy zastarachu je z mlokom a policajskej knihu, doniž so staršej njepřizjewištaj.
Zwada mjez susodami je w Ludwigsburgu tak eskalěrowała, zo dyrbješe policija přijěć. 27lětny bě so z woknom ze susodami wurěčował a na kóncu samo horncy a pónoje na nich mjetał. Na zbožo so nichtó njezrani. Sudobjo pak trjechi parkowace kaž tež awto policije. Zastojnicy muža nachwilnje zajachu, připowědźejo jemu skóržbu.
To a tamne (24.04.15)
Na bananowej bělizce wobsunył je so wčera 25lětny muž při dźěle na Lipšćanskim wikowym arealu, při čimž sej podkoleno złama. Ćežko zranjeneho dowjezechu jeho do chorownje. Dźěłaćer znjezboži, jako chcyše na staplowak zalězć. Policiji běchu zdźělili, zo je so pod nim zatłusnył, štož so jako wopačne wopokaza. Na wikach započachu so wčera ratarske wiki Agra.
Awstralska spěwarka Kylie Minogue sej z wopyta w Berlinje stajnje figuru woponoweho zwěrjeća stolicy sobu nosy. „Njewopušću Berlin ženje bjez Berlinskeho mjedwjedźa. To njeje žadyn žort.“ praji spěwarka. „Wšojedne hač wulki abo mały, mjedwjedź dyrbi sobu.“ Nětko ma zaso jednoho wjace, po tym zo bě wčera na wabjenskej akciji w němskej stolicy a wuwabi wulke zadźiwanje mjez pasantami, kotřiž njeběchu z njej ličili.
To a tamne (23.04.15)
Swój kompjuter zatřělił je muž w USA. Do toho bě so 37lětny w Denveru w staće Colorado přez měsacy mjerzał, zo so programy kompjutera stajnje zaso dospołnje zwjezu. Nětko wza nastroj, staji jón na hasku za domom a třěli wosom króć do njeho, kaž policija zdźěla. Ta jemu bróń wotewza, dokelž je tam wužiwanje třělbow w zjawnosći zakazane.
Telewizijne wusyłanje „Germany‘s next topmodel“ z Heidi Klum wuskutkuje so na jědźne zadźerženje mnohich młodych holcow. To zwěsći Mjezynarodny institut za młodźinsku a kubłansku telewiziju. Fachowcy běchu so 241 pacientow, kotřiž maja jědźne mylenja – dokelž su suchušcy abo maja bulimiju – woprašeli. Třećina potrjechenych rjekny, zo bě wusyłanje priwatneho sćelaka ProSieben rozsudne za wuwiće chorosće. Najwjace pacientow běchu młode žony a holcy.
To a tamne (22.04.15)
Dokelž dyrbješe spěšnje něšto jěsć, je koparski sudnik w bayerskim Aufkirchenje hru krótkodobnje přetorhnył a sej całtu wobstarał. Hakle po tym wón partiju zaso zahwizda. Kaž 72lětny sudnik-diabetikar zadźiwanym nowinarjam rjekny, hrožeše strach, zo so zwjeze.
Drohe misnjenje: Runje z ciwilnym jězdźidłom awtodróhoweje policije je so motorski z Choćebuza po A 24 pola Neuruppina honił. 23lětny smalak zastojnikam po tym wujasni, zo bě wjesoły měć runohódneho partnera. Motorski bě město dowolenych 130 kilometrow na hodźinu hač do 212 km/h jěł. To ma za njeho sćěhi: Jězbnu dowolnosć dyrbi tři měsacy wotedać, pjenježna pokuta wučinja znajmjeńša 630 eurow.
To a tamne (21.04.15)
Nimale tři hodźiny je ćeknjeny byk železniski wobchad mjez Sindelfingenom a Böblingenom njedaloko Stuttgarta lemił. Skoćo bě z pastwy twochnyło a běhaše po měsće. Agresiwnje da so wone do pěškow a policistow, kotřiž chcychu je popadnyć. Nichtó so na zbožo njezrani. Skónčnje zaběža so byk na kolije. Skótnemu lěkarjej so poradźi jeho pohłušić. Za wottransport byka na pastwu pak trjebachu kran a nakładne awto.
Za sławnej mórskej potworu Nessie w Šotiskej móžeš nětko tež wirtuelnje pytać. Předewzaće Google je ze swojimi kamerami při jězoru Loch Ness było. Wot dźensnišeho móža jón ludźo přez słužbu Street View přepytać. Runje dźensa před 81 lětami, 21. apryla 1934, bě nowina Daily Mail snadź najsławniše foto Nessie wozjewiła. Zamołwići wočakuja nětko tež wjace wopytowarjow při jězoru.
To a tamne (20.04.15)
Njelubeho sobujěduceho, pawka w awće dla, je 30lětny šofer w Tübingenje znjezbožił. Kaž policija zdźěli, bě so zwěrjatko w křiwicy na šofera pušćiło. Tón so tak stróži, zo z dróhi zajědźe. Při tym šmórny so wóz wobhrodźenja na kromje jězdnje. Šofer wuńdźe ze stróželemi. Škoda na awće wučinja 4 500 eurow.
Cyły skład starych bróni su twarscy dźěłaćerjo při ponowjenju bydlenskeho domu w Limbachu-Oberfrohnje w Zwickauskim wokrjesu našli. Pod špundowanjom schowane ležeše šěsć pistolow, rozebrany karabiner, nimale 70 patronow a šěsnaće prózdnych magacinow pistole. Policija trochuje, zo pochadźeja brónje z lěta 1930. Nětko chcedźa zwěsćić, komu móhli wone słušeć. To drje budźe chětro wobćežne. Dom słuša bydlenskej towaršnosći. Dotal tež njewědźa, štó bě brónje tam składował. Policija wšitko sćaza.
To a tamne (17.04.15)
Do wodoweje hrjebje skočiło je girafowe młodźo Nakuru při swojim prěnim zjawnym wustupje w Hamburgskej coologiskej zahrodźe. Šok w dźesać stopnjow zymnej wodźe drje wone tak spěšnje njepřewinje, rjekny jeho hladarka nowinarjam. Pjeć ludźi pomhaše girafu wuchować. Na zbožo njebě so wona zraniła.
Muku město přilubjenych smartphonow chcyše wobšudnik wobsedźerjej wobchoda za mobilne telefony w Hannoveru podsunyć. Za 38 pječa originalnje zapakowanych telefonow žadane 14 000 eurow bě mějićel wobchoda hižo přihotował, jako w poslednim wokomiku dwělowaše. Jebak hrabny pjenjezy a chcyše ćeknyć. Z pomocu wobchodoweho detektiwa pak jeho zadźeržachu. Přiwołana policija namaka w tyzkach jenož muku.
To a tamne (16.04.15)
Noticna cedlka Güntera Schabowskeho, něhdyšeho čłona politběrowa SED, z historiskeje nowinarskeje konferency 9. nowembra 1989, bu po lětdźesatkach zaso namakana a je wot dźensnišeho w Bonnskim Domje stawiznow wustajena. Schabowski připowědźi tehdy nowy pućowanski zakoń NDR, po kotrymž směli ludźo do zapada pućować směć. Hišće samsnu nóc Berlinska murja padny. Papjerku da wón pozdźišo znatemu. Wot toho časa bě wona zhubjena.
Strowe pjatniki – wšitko holcy – je žona w staće USA Texasu porodźiła. Po informacijach kliniki w Houstonje je to prěni raz w stawiznach USA, zo su so při porodźe tajkeho razu jenož holcy narodźili. 31lětnu mać běchu do toho z hormonami lěkowali. Dźěći, kotrež přińdźechu w 28. tydźenju samodruhosće na swět, waža mjez 900 a 1 000 gramami.
