To a tamne (17.05.17)
Płaćiznu za piwo na oktoberskim swjedźenju smědźa hosćencarjo dale sami postajeć. Namjet nawody swjedźenišća Josefa Schmida, płaćiznu wobmjezować, je Mnichowska měšćanska rada dźensa wotpokazała. Schmid chcyše, zo njeměł literski karan přichodne tři lěta wjace hač 10,70 eurow – to bě loni rekordna płaćizna – płaćić. Wobzamkli pak su, zo hosćencarjo z dawkom stupace kóšty za wěstotu na swjedźenišću sobu přewozmu.
Muž z kosu je w badensko-württembergskim Achernje zasadźenje policije zawinił. Dalši muž zawoła policiju, zo njeznaty z kosu w ruce po centrumje města běha. A zastojnicy nańdźechu woprawdźe tež 38lětneho z kosu. Tu wšak bě sej jenož na wikach nawótřić dał. Při kontroli muža přiwšěm zwěsćichu, zo bě chětro wopity, a kosu nachwilnje sćazachu.
To a tamne (16.05.17)
Tobołu ze 7 000 eurami je dowolnik w Baden-Badenje zhubił – a wróćo dóstał. 61lětny Běłorus bě město kónc tydźenja na jězbje z awtom po Europje wopytał. Tam wón tobołu z pjenjezami a dokumentami na třěchu awta staji. Jako wotjědźe, zaby na tobołu, kotraž so z třěchi suny. W swojej nuzy wobroći so šofer na policiju. Krótko na to namakar tobołu woteda. Přepodachu ju dowolnikej a namakarjej 220 eurow.
Smudźacej so dźěćacej comakaj stej w Kaiserslauternje zasadźenje wohnjoweje wobory a policije zawiniłoj. Młodaj staršej běštaj na hornc zabyłoj, w kotrymž chcyštaj comakaj wuwarić. Jako bě woda wuparjena, so alarmowy system zapiny. Wobornicy comakaj zhašachu. Swójba, kotraž bě při alarmje z bydlenja ćeknyła, so njezranjena nawróći.
To a tamne (15.05.17)
Z traktorom do Pětrohroda podać chce so jako „Trecker-Willi“ znaty rentnar z Delnjeje Sakskeje. Ze swojim runje 18 km/h spěšnym traktorom z małym bydlenskim připowěšakom chce 81lětny Winfried Langner sobotu wotjěć. Za jězbu tam a sem planuje štyri měsacy. Dotalne ekstremne jězby ze 56 lět starym traktorom su legendarne: Lěta 2015 poby wón z nim na sewjernym kónčku Norwegskeje, 2013 na Mallorce.
Ze 14 lětami dostudował je hólc w staće USA Texasu. Minjenu sobotu přepodachu jemu diplom. Carson Huey-You je najmłódši student, kiž je hdy na Texas Christian Universtity studij wuspěšnje zakónčił. Jeho hłowny předmjet bě fyzika, připódla studowaše hišće chinšćinu a matematiku. Hólc bě hižo z dwěmaj lětomaj čitać započał a jako dźesaćlětny złoži maturu.
To a tamne (12.05.17)
Po zwadźe ze staršimaj je 14lětny młodostny ze wsy njedaloko schleswigsko-holsteinskeho Norderstedta z nanowym awtom typa Porsche wotjěł, po tym zo bě sej klučiki hrabnył. Wottam smaleše do směra na Hamburg. Wobsadka policajskeho awta pachoła zadźerža a wza jeho sobu na stražu. Tam wón přizna, zo bě z awtom twochnył, bjez toho zo staršej to wědźeštaj. Nětko wšak dyrbi z chłostanskim jednanjom jězdźenja bjez jězbneje dowolnosće a njewoprawnjeneho wužiwanja awta dla ličić.
41 kilogramow kokaina su cłownicy w chłódźenskim kontejneru w přistawje Bremerhaven namakali. Na čornych wikach bychu drogi wjace hač šěsć milionow eurow wunjesli, kaž z Hamburgskeho cłowneho zarjada rěka. Ličba tajkich namakankow kaž tež sćazane mnóstwa kokaina spochi přiběraja. Drogi běchu w bananowych kartonach z Ekuadora schowane. Kontejner bě za Rusku mysleny.
To a tamne (11.05.17)
Zabłudźeneho ptačka w cockpiće pasažěrskeho lětadła „Dreamliner“ dla je předewzaće British Airways lět z Londona do USA wotprajiło. Kós bě dźiwje lětajo cockpit blokował. Sobudźěłaćerjo na to hodźiny dołho spytachu jeho wućěrić. Tón pak so stajnje zaso chowaše. Pasažěrojo dyrbjachu do druheje mašiny přelězć, zo móhli dale lećeć. Što je so z ptačkom stało, předewzaće njezdźěli.
Pokład dźesać slěbornakow ze 16. lětstotka su ruscy archeologojo w šachowej figurje namakali. Kaž z Moskwy rěkaše, běchu fachowcy při twarskich dźěłach njedaloko katedrale Chrystusa-Wumóžnika w centrumje stolicy na drohotny pokład storčili. Pjenjezy běchu wokoło lěta 1540 w Moskwje a Twjeru zhotowili a za čas carja Iwana Złeho wužiwali.
To a tamne (10.05.17)
Štyrilětny w nócnym wobleku je póndźelu wječor w Zhorjelcu do spěšnohosćenca přišoł. Dokelž njeběštaj staršej pódla, je sobudźěłaćer hosćenca policiju zawołał. Nimale w samsnym času so tež starosćiwa mać pola zastojnikow přizjewi. Krótko po tym móžeše wona swojeho synka wotewzać. Čehodla bě tón z bydlenja twochnył a nimale kilometer w nócnej drasće w měsće po puću był, njezdźělichu.
Ze strachom před zubnym lěkarjom je so pacient w porynsko-pfalcskim Offenbachu dospołnje wopił a sej w čakarni wusnył. 30lětny muž měješe 2,6 promilow alkohola w sebi a hižo na žane namołwy njereagowaše. Bě wšak hižo dospołnje pjany do praksy přišoł. „Termin pola zubneho lěkarja bě tak z blida“, rěka nětko w rozprawje policistow, kotřiž wopiteho wubudźichu a jeho najprjedy raz do chorownje dowjezechu.
To a tamne (09.05.17)
Kabrio staršeju zešrotował je 14lětny młodostny, po tym zo bě z nim hodźiny dołho na awtodróze po puću był. Hólčec bě skradźu ze Sewjerorynsko-Westfalskeje do srjedźneje Frankskeje jěł, dobre 450 kilometrow. Tam pak je so wčera rano na twarskim wotrězku awtodróhi A 7 pola Feuchtwangena nakładneho awta šmórnył. Wón zhubi kontrolu nad wodźidłom a so přećisny. Młodostneho z Duisburgskeje kónčiny dowjezechu do chorownje. Kabrio je jenož hišće šrot.
Jałojca je so wčera po Zwickauwje woměrje wuchodźowała. Ćeknywši burej bě wona popołdnju na sewjeru města po puću a přeprěči tam mjez druhim zwjazkowu dróhu B 93. Po něhdźe třoch hodźinach hakle so wobsedźerjej poradźi, ju w měšćanskim dźělu Crossen zaso popadnyć. Kak bě jemu jałojca ćeknyć móhła, ratar njewě.
To a tamne (08.05.17)
Historisku zběrku rostlin z Francoskeje su sobudźěłaćerjo cła w Awstralskej mylnje spalili. Přičina su krute zakonje, z kotrymiž chcedźa rozpřestrěću nowych chorosćow rostlin a zwěrjatow zadźěwać. Zběrka z 19. lětstotka bě požčonka Pariskeho přirodostawizniskeho muzeja za muzej awstralskeho města Brisbane. Pječa njebě na pakćiku naspomnjene, zo jedna so wo drohotnu zběrku.
Muž na motorowej hawbje njeje tomu zadźěwać móhł, zo jeho žona pjana z awtom jědźe. W bayerskim Nördlingenje bě so muž swojej žonje do puća stupił, dokelž chcyše wopita z awtom wotjěć. Wona pak jědźeše pomału dale, na čož so muž na motorowu hawbu sydny. Po 50 metrach njemóžeše so hižo dźeržeć a padny do přirowa. Test alkohola wunjese pola žony 2,5 promilow. Jězbnu dowolnosć hižo dawno žanu njeměješe.
To a tamne (05.05.17)
Dokelž njemóžeše swoje awto w parkowanskim domje namakać, je rentnar nuzowy knefl stłóčił. Na to přijědźechu wjacore policajske awta, dokelž ličachu z nuzowym padom. Tam pak wuhladachu jeničce zadwělowaneho 77lětneho, kiž sej žadaše, zo maja hnydom za pokradnjenym wozom pytać. Zastojnicy wšak jón spěšnje nańdźechu: Rentnar bě poschod zaměnił. Akcija móhła přiwšěm droha być. Policija nětko pruwuje, hač jedna so wo znjewužiwanje nuzowych připrawow.
Wjace hač dźesać přetołstych policistow su w centralnoaziskim Tadźikistanje ze słužby pušćili. Woni njeběchu so na přikazanych sportowych zwučowanjach wobdźělili, a tak tež ničo njewotbychu. Druzy kolegojo z nadwahu su porno tomu hač do 20 kilogramow wotbyli. Sport je kruty wobstatk słužby.
To a tamne (04.05.17)
Policistam dźěło wolóžił je paduch, po tym zo bě swój wupokaz zhubił. 16lětny bě so z dalšimaj młodostnymaj w nocy na njedźelu w badensko-württembergskim Lörrachu do napojowych wikow zadobył a tam 13 blešow alkohola w hódnoće 500 eurow pokradnył. Policisća namakachu na městnje njeskutka wupokaz teenagera a wopytachu jeho. W jeho stwě nańdźechu dźěl alkohola, zbytk pola sobuskućićela.
Njedowoleny kónctydźenski wulět z awtom změje za 18lětneho njelubozne sćěhi: Praktikant Erfurtskeho awtoweho domu bě sej wóz za wulět „wupožčił“ a z nim na wšě 2 000 kilometrow po puću był. Dokelž činješe to bjez jězbneje dowolnosće, nima nětko jenož mjerzanje ze šefom, ale tež z policiju. Młodostny ma z dwěmaj skóržbomaj ličić. Hač je wón hišće praktikant, njeje znate.
