To a tamne (10.08.18)
Stadło kruwow je nětko policiji pomhało skućićelku nańć. Zastojnicy běchu mjenujcy dweju paduchow awta lepili a jeju přesćěhowali. Podhladna žona ćekny na pastwu, hdźež kruwy za njej běhachu. Widejo je policija w staće Florida wozjewiła. Natočiło bě to helikopter, kiž je wot horjeka zasadźenje delegował. Policisća dyrbja na zemi jenož kruwam sćěhować, pomoc z helikoptera rěkaše.
Zasadźenje samopomjenowaneje społnomócnjeneje soniny na zwjazkowej awtodróze A2 w Delnjej Sakskej, hdźež je stajnje wjele njezbožow, njeje po słowach Zwjazkoweho wobchadneho ministerstwa wuspěšny model. Społnomócnjenu soninu chce Zwjazk hakle zasadźić, jeli Harry Potter zwrěšći, ministerstwo zdźěli. Delnjosakski krajny zarjad za dróhotwar a wobchad bě ju w awće sobu wzał. Wona měješe přichodnym njezbožam na awtodróze zadźěwać.
To a tamne (09.08.18)
Wosebite wochłódźenje swinjam je nětko wohnjowa wobora na awtodróze blisko Lipska zmóžniła. Tam bě so Lkw, ze swinjemi nakładowany, skóncował a stejo wostał. Zo bychu wobornicy zwěrjata na připowěšaku při najwjetšej horcoće wochłódźili, popryskachu je na cyle njekomplikowane wašnje ze zymnej wodu.
Přežadana listynošerka w Horbje blisko Stuttgarta njeje cyle jednorje sta listow roznošowała. Pad bu wujasnjeny, dokelž bě dalša žona njewočinjene listy w kontejneru za staru papjeru našła. Policija tuž přepytowaše a zdźěli, zo bě přistajena póšty jeničce w juliju něhdźe 340 listow wotbyła. Jako zastojnicy jeje bydlenje přepytowachu, namakachu 117 dalšich. To wšak njeje jenički tajki pad. Hižo loni w februaru bě lištonoš priwatneho předewzaća něhdźe 400 listow w lěsu wotbył, dokelž měješe rozkoru ze šefom.
To a tamne (08.08.18)
To a tamne (07.08.18)
Paduch z čołmom k teptanju je policistomaj w sewjerorynsko-westfalskim Bocholće twochnył, kotrajž jeho w dalšim tajkim přesćěhowaštaj. Do toho bě sej jězdźidło blisko přibrjóžneje kofejownje spakosćił, prajo sobudźěłaćerjej, zo měješe ćežki dźeń, zo wotměnu nětko prosće trjeba, a poda so na wodu. Přesćěhańca muža je samo hišće na kraju dale šła. Tež tam bě paduch spěšniši a zastojnikomaj ćekny. Tak drje wón na kóncu dnja cyle tak wočerstwjeny njebě.
Dwulětny hólčk w Kamjencu je minjenu sobotu swojeju staršeju na balkon won zamknył. Wšo wołanje, zo ma durje balkona do bydlenja zaso wočinić, wšak jimaj ničo njepomhaše. Skónčnje wołaštaj policiju wo pomoc. Tej a wohnjowej woborje so skónčnje poradźi, zadwělowaneju nana a mać z łoskoćiweho połoženja wuswobodźić.
To a tamne (06.08.18)
Z pokradnjenej antenu policajskeho awta je młodostny w Kasselu dirigenta hrał. Antena bu při policajskim zasadźenju wotłamana a sobu wzata. Pozdźišo wuhladachu zastojnicy „dirigenta z njewšědnym kiješkom“, kiž swojeho gitaru hrajaceho přećela nawjedowaše. Mužej w starobje 19 a 23 lět wšak běštaj natutkanaj. Policija jeju nachwilnje zaja.
Napohlad njewšědnje wjele nahich muži na parkowanišću wočerstwjenišća je zasadźenje policije zawinił. Zawołała bě ju 23lětna, kotraž chcyše z přećelku na parkowanišću přenocować. Tola telko nahich muži na jednym městnje dla bě wona někak znjeměrnjena. Kaž zastojnicy pozdźišo wujasnichu, jednaše so wo skupinu nurjakow, kotřiž běchu so tam jenož předrasćili. Přenocować pak žona na parkowanišću přiwšěm wjace nochcyše a pytaše sej hinaše městno.
To a tamne (03.08.18)
Zhubjene koleso po sydom lětach wróćo dóstać móže wobsedźer w saksko-anhaltskim Staßfurće. Tam bě policija 37lětneho muža poprawom zadźeržała, dokelž njebě lampa jeho kolesa w porjadku. K tomu wšak nańdźechu zastojnicy tež hišće mjeńše mnóstwo drogi crystal meth. A datowa banka jim nimo toho přeradźi, zo bě muž z lěta 2011 pokradnjenym kolesom po puću. Tuž je hnydom sobu wzachu, a muža přizjewichu na sudnistwje.
Pod hołym njebjom přećopło bě wjewjerčce w sewjerorynsko-westfalskim Bornheimje. Zalěze sej tuž do zymneje pincy, hdźež pak chětro wulku haru ćěrješe. Mějićel domu zawoła policiju, dokelž tukaše na paducha. Zastojnikaj pak nańdźeštaj tam jenož wjewjerčku a donjeseštaj ju wróćo na zahrodu.
To a tamne (02.08.18)
Wołanje wo pomoc je wobydlerjow w Aachenje rano zahe budźiło a wuskutkowało, zo woni policiju wołaja. Ze štyrjomi awtami smalachu zastojnicy na městno pozdatneho njeskutka, hdźež za woporom pytachu. Kedźbliwy policist pak tukaše na blisku chorownju, zwotkelž wołanje słyšeše. Kaž so wukopa, njebě jeho myslička tak wopačna. Hnydom štyri žony su tam w samsnym času wokoło štyrjoch dźěćko porodźili. Krótko na to so wšitko změrowa. Zastojnicy smědźachu so tuž woměrje zaso wotsalić a posrědkowachu młodym maćerjam zbožopřeća.
Wobchod za rybu a zeleninu we Wuppertalu je ze swojimi słódnymi tworami dweju paduchow-chłóšćakow njesměrnje wabił, zo so tam zadobyštaj. Jednoho wšak zatraši alarm, čehoždla ćekny. Tamneho pak nadeńdźechu zastojnicy z morcheju w ruce. Wjacore tyzy šrimpsow bě sej pakostnik hižo zesłodźeć dał.
To a tamne (01.08.18)
Při twarskich dźěłach kóčku přewidźeli a pod garažu mylnje sobu zabetonowali su dźěłaćerjo w badensko-württembergskim Brettenje. Jako wobydlerjo tele dny stajnje zaso mjawčenje słyšachu, su za kóčku pytali. A zawčerawšim wječor ju nańdźechu. Hibać drje so wona hišće móžeše, přez wusku škałbu pak so sama njewuswobodźi. Škałbu su na to najprjedy trochu powjetšili, zo bychu Maine-coon-micku z picu a wodu zastarali. Wčera ju skónčnje wuswobodźichu.
Za přistajenych pohrjebnych předewzaćow płaći to samsne kaž za wšitke tamne powołanja, w kotrychž maja ludźo ćežke zběhać. To postaji nětko Stuttgartske socialne sudnistwo. We wosebitym padźe dźěše wo přistajeneho pochowanskeho instituta, kiž je při zběhnjenju ćěła z łoža trawmu přezběhnjenja poćerpjeł. Tydźenje njemóžeše wón bolosćow dla swoje dźěło wukonjeć. Njezbožowa kasa pak nochcyše płaćić. Nětko ma to nachwatać.
To a tamne (31.07.18)
Z črijemi derje pjelnjeny kamor su paduši w Erfurće spakosćili. Tam bě žona minjenu sobotu přećahnyła. Dokelž njemóžeše wšitko naraz wotnjesć, je kamor w lifće stejo wostajiła. Jako so tón po jězbje do štyrnateje etaže zaso do přizemja nawróći, bě kamor fuk a z nim cyłych dwaceći porow čriji.
Naheho kolesowarja ze spěšnosću 47 kilometrow na hodźinu bě błyskač w Kielu zapopadnył. Policija je wobraz wozjewiła a na to skedźbniła, zo maja tež kolesowarjo spěšnosć wobkedźbować. Na spomnjenym wotrězku je dźě jenož 30 km/h dowolene. Błyskač bě muža, kiž měješe jenož nohajcy a črije wobute, njedawno w 23.14 hodź. lepił. Dokelž pak njewědźa, komu měli chłostanku słać, drje njetrjeba nahi kolesowar ze žanej pokutu ličić.
To a tamne (30.07.18)
Listowu wobalku a w njej 1 425 eurow je muž w delnjofrankskim Marktheidenfeldźe před swojej ležownosću namakał. Sprawny namakar list pola policije woteda. Tak njeje jenož wobsedźerja pjenjez, ale tež kwasny porik wozbožił: Pjenjezy we wobalce běchu mjenujcy za kwasnu jězbu myslene, kaž z gratulaciskeje karty wuchadźeše.
Pozdatne klepanje z rowa na kěrchowje w posaarskim Losheimje je zasadźenje policije a wohnjoweje wobory zawiniło. 56lětny bě tam spodźiwne klepanje słyšał a so wulce starosćeše, zo bu snano něchtó žiwy pohrjebany. Kěrchow su tuž dokładnje přepytali. Tež chorobne awto bu zawołane, zo bychu pomocnicy pozdatny wopor spěšnje zastarali. W rowje, z kotrehož bě muž haru słyšał, pak leži hižo dlěje zemrěta žona. Zasadźenje wukopa so skónčnje jako wopačny alarm.
