To a tamne (31.03.17)
To a tamne (30.03.17)
Stracha před žrawcami dla so mnozy ludźo w awstralskim Sydneyju w morju njekupaja, ale radšo w zjawnych poolach blisko přibrjoha. Tola tež tam čakaše na płuwarjow nětko 70 centimetrow dołhi žrawc. Po zdaću bě so tón přez přiliw do swimmingpoola dóstał, kaž ze Sydneyja rěkaše. Žrawca pak popadnychu a sadźichu jeho zaso do morja.
Z najlěpšim wotpohladom je 85lětny wuměnkar w bayerskim Bad Brückenauwje spytał postawu swjateje Marije wučisćić a ponowić. Postawa z pěskowca na cyrkwinskim naměsće bě jemu přešěra. Tuž je ju ze seršćowcom a barbu trochu wobdźěłał. Sobudźěłaćer farskeho zarjada to wobkedźbowaše a informowaše policiju. Tej pak muž rozłoži, zo je jenož derje měnił. Přiwšěm nasta škoda něhdźe sto eurow. Fachowa firma chce so nětko wo 1,40 metrow wulku figuru starać.
To a tamne (29.03.17)
Pod wliwom drogow stejace papagaje indiskich burow chětro wobćežuja a wulke škody na makowych polach zawinjeja. Ptaki su tak wotwisne, zo njemóža je burja samo wjace z bubonami abo praskotakami wućěrić. Tež antilopy so přewšo rady do maka dadźa. W Indiskej je dowolene za medicinu mak plahować, kotryž twori zakład opiuma. Burja so boja, zo zhubja plahowansku licencu. Tak nětko wysoke płoty wokoło swojich polow nastajeja a saki nad nimi připrawjeja.
Wón chcyše jenož łódźe na rěce wobdźiwać, skónčnje pak so z awtom do wody suny. Tole sta so 59lětnemu šoferej, kiž je póndźelu na nachilenej rampje při Rynje blisko města Bonna pozastał. Pušći pak nohu ze spinadła, a awto zajědźe do rěki. Na zbožo móžeše so muž sam wuchować. Awto pak so 60 metrow dale prawdźepodobnje podnuri.
To a tamne (28.03.17)
Swoje kašće wuhotuja w Nowoseelandskej čłonojo tak mjenowanych Coffin-klubow sami. To wobradźa jim wjeselo, pomha přećiwo samoće a kóždy rowny mebl ma swój wosobinski raz. Tónle hobby pěstuje mjez druhim 91lětna Geraldine Langford, kotraž pasli tuchwilu na swójskim kašću. Wuhotuje jón z akwarelemi městnosćow, po kotrychž je z mužom rady pućowała.
Z ironiju a namjetom recepta je sakska Lěwica na nadpad stronskeho běrowa w rudnohórskim Dippoldiswaldźe reagowała. Njeznaći běchu na wonkownu sćěnu jeja a běły kał mjetali. „Z trochu rafinesu a přidawkami kaž morcheju, cyblu, solotju, tukom a połnožitnym chlěbom móhł z toho słódny burger nastać“, rěkaše komentar běrowoweho teama. „Přichodnu darićelsku akciju zežiwidłow“ měli skućićeljo tuž přizjewić.
To a tamne (27.03.17)
Mobilny nuznik by so w Augsburgskim starym měsće sobotu nimale wo powodźenje postarał. Młodostni w starobje 15 do 18 lět běchu jón do tamnišeho Lechkanala ćisnyli, štož swědcy wobkedźbowachu. Z kranom dyrbjachu nuznik skónčnje ze zatykaneho kanala wućahnyć. Wšako hrožeše nahromadźena woda stare město zapławić. Kak wulku škodu je nuznik načinił, njeje jasne. Za mjetarjemi nuznika policija nětko pyta.
Z colu je so policiji w delnjosakskim Badbergenje zańdźeny pjatk poradźiło woheń podusyć. Tam bě so awto 48lětneje žony palić započało. Na zbožo pak bě wona runje za kónc tydźenja nakupować była a měješe w kófrowym rumje mjez druhim pjeć litrow słódkeho napoja. Z nim zastojnicy płomjenja spěšnje zhašachu, a wohnjowu woboru njetrjebachu hižo na pomoc wołać.
To a tamne (24.03.17)
Hrajkowa pistola w šuli je wčera wulke zasadźenje policije zawiniła. Wjacore dźesatki zastojnikow, tež z wosebitych jednotkow, so wobdźělichu. Swědka bě policiju informowała, dokelž bě widźała, kak wosoba z pistolu do šule w bayerskim Gunzenhausenje dźe. Šulske nawodnistwo bu informowane a wšitcy dyrbjachu twarjenje wopušić. Při přepytanju šule napadny zastojnikam 15lětny hólc, kotrehož zajachu. Kaž so wukopa, měješe wón hrajkowu pistolu při sebi. Za čo ju trjebaše ze zdźělenki njewuchadźa.
Podchłódźeneho nukla je policija w delnjosakskim Stadthagenje wuchowała. Zastojnicy wuhladachu skoćatko w nocy na puću. Dokelž wone po wšěm zdaću chětro zymu mrěješe, sadźichu je na motorowu hawbu, hdźež móžeše so zhrěć. Nukl wostanje nětko w zwěrjatowni, doniž so jeho wobsedźer njepřizjewi.
To a tamne (23.03.17)
Swojeje lubosće k słódkosćam dla ma paduch w Tokiju nětko z chłostanjom ličić. Wón je so do něhdźe 40 běrowow w měsće a wokolinje zadobył. Nimo pjenjez pytaše mjez druhim tež za šokolodu, lodom, pudingom a brěčkami. Dokelž pak je so při zadobywanju zranił, nańdźe policija jeho slědy. Na cholesterin bohata krej jeho skónčnje přeradźi.
Z chětro rozmjerzanej maćerju njeje paduch w bayerskim Nördlingenje zawěsće ličił. Něšto dnjow po tym zo běchu jeje jědnaćelětnemu synej mountainbike pokradnyli, wuhlada wona 18lětneho z nim w conje za pěškow. Žona na městnje reagowaše, hrabny jeho a dowjedźe młodostneho na policajski rewěr. Tam młodostny padustwo přizna. „Mać jědnaćelětneho bě po wšěm zdaću chětro přeswědčiwje jednała, zo je paduch dobro- wólnje sobu šoł“, policija zdźěli.
To a tamne (22.03.17)
Pochowanske předewzaće je mylnje wopačne ćěło pochowało. Tole hakle napadny, jako chcychu so swójbni w Steiermarce z 90lětnym zemrětym rozžohnować. W kašću pak ležeše 86lětny muž, staršeho běchu hižo před třomi dnjemi pochowali. Pohrjebny institut so za zmylk zamołwi, pochowane ćěło zaso wuhrjeba a dowjeze je do krematorija. 86lětneho su na to do poprawneho rowa połožili. Nětko chcedźa kruty protokol wjesć, a jón mataj stajnje dwaj sobudźěłaćerjej podpisać.
Nopawa, z kotrejež běchu 1 000 twjerdych pjenjez wuoperowali, je nětko zemrěła. 25lětna žónka z mjenom Omsin, štož rěka lutowanske swinko, je wčera na sćěhi zajědojćeneje kreje zahinyła. Cyłkownje pjeć kilogramow twjerdych pjenjez měješe nopawa w žołdku, čehoždla njeje hižo płuwać móhła.
To a tamne (21.03.17)
Štóž dyrbi w chinskej stolicy Pekingu na zjawny nuznik a trjeba papjeru za njón, ma najprjedy raz swoje mjezwočo skenować dać. Přičina toho je přiběrace padustwa nuznikoweje papjery. Tomu maja skenery nětko zadźěwać, kaž nowiny pišu. Trjeba-li něchtó krótko za sobu papjeru, ma na nju někotre mjeńšiny čakać. Štóž sej časćišo tajku žada, tomu připrawa hižo žanu njepřewostaja.
Produkciju awtow marki BMW staj dźěłaćerjej w Mnichowskej tworni přetorhnyłoj. Wonaj běštaj so chětro wopiłoj a nimo toho joint kuriłoj. Krótko do kónca pózdnjeje słužby pak wobaj kolaběrowaštaj, na čož kolegojo nuzoweho lěkarja zawołachu. Dohromady 40 mjeńšin tam hižo ničo njeběžeše. Škodu trochuje zawod na srjedźnu pjećcyfrowu sumu.
To a tamne (20.03.17)
Swojeho dwulětneho synka zabyłoj staj kónc tydźenja mandźelskaj w Budyskej dźěćacej kofejowni Valentin na Róžowej. Do toho bě sej swójba z pjeć dźěćimi rjany dźeń w kofejowni popřała. Na dompuću pak nichtó njepytny, zo jedne dźěćo pobrachuje. Hakle doma zwěsćichu, zo dwulětny Lukas w awće njesedźi. Bjezposrědnje na to zawoła nan Budysku policiju. Zastojnicy hólčka nańdźechu a so wo njeho luboznje starachu, doniž njebě swójba zaso zjednoćena.
Wabjenski film za poćehnjenje, hdźež so blondinka a šup z mjenom Tomaš we łožu hrajkatej, je po měnjenju coologiskeje zahrody w Moskwje přejara erotiski. Tuž sej žadachu film hižo njewozjewić a wotpowědne sceny a wobrazy w interneće wotstronić. Coo bě šupa Tomaša za wabjenski film ekstra wupožčił.
