To a tamne (26.10.16)

srjeda, 26. oktobera 2016 spisane wot:

Hillary Clinton budźe prezidentka USA. Tak znajmjeńša wěšći to pinguin Flocke w Lubnjowskej Sprjewinej kupjeli. Pinguina, kotryž je dotal skerje na polu kopańcy dobyćerjow wěšćił, běchu so zamołwići dwaj tydźenjej do prezidentskich wólbow USA „woprašeli“. Woni połožichu­ jemu bulej z mjezwočomaj Hillary Clinton a jeje kontrahenta Do­nalda Trumpa k hrajkanju. Flocke roz­sudźi so bjez wahanja za Clinton-bul.

Na policajskej straži dale kradnył je runje lepjeny paduch w sewjerorynsko-westfalskim Güterslohu. Ze swojim přećelom bě so wón do garaže policista zadobył. Tón jeju lepi, jako sej kapsnej lampje­ do zaka tyknyštaj. Lědma, zo běchu jeju na policajsku stražu dowjezli, jedyn­ z njeju w njewobkedźbowanym wokomiku dalšu kapsnu lampu spakosći. Nětko ma so 17lětny dwójneho pa­dustwa dla před sudnistwom zamołwić.

To a tamne (25.10.16)

wutora, 25. oktobera 2016 spisane wot:

Bjez wulkeho zboža wostachu paduši, kotřiž měrjachu so na nakładne awto. W nocy na njedźelu rozrězachu skućićeljo płachtu pólskeho nakładneho awta, kotrež steješe na awtodróhowym parkowanišću w braniborskim Herzsprungu. Šofer w tym času kruće spaše. Lkw transportowaše 14,5 tonow hodownych štomow. Wo te pak pakostnicy njerodźachu a so zminychu. W Braniborskej paduši stajnje zaso płachty nakładnych awtow rozrězuja.

Při pospyće, łožo přez wokno wottransportować, je so 38lětny w badensko-württembergskim Hayingenje ćežko zranił. 73lětny pomocnik přijědźe z traktorom a suny łopač traktora direktnje pod wokno. 38lětny sadźi łožo na łopač, kotraž pak so njejapcy zwróći. Muž padny štyri metry do hłubiny a so na chribjeće ćežko zrani. Najskerje bě so łožo ručicy dótknyło, na čož so łopač zwróći.

To a tamne (24.10.16)

póndźela, 24. oktobera 2016 spisane wot:

Njewšědne to zajeće: W Mnichowje je policija wčera kołpja popadnyła a w policajskim jězdźidle sobu wzała. Starosćiwi wobydlerjo běchu zastojnikow informowali, dokelž kołp wočiwidnje bjez orientacije po hłownej wobchadnej dróze běhaše. Wobsadka policajskeho awta zwěrjo na to popadny a sobu wza. Po krótkej jězbje je we Wuchodnym parku města zaso na swobodu pušći.

Dospołnje pjany listonoš je w Regensburgu z kolesa padnył, jako póštu roznošowaše. Při tym so 45lětny w mjezwoču snadnje zrani. Přiwołanym zastojnikam wšak alkoholowa „chorhojčka“ muža napadny, a test wunjese nimale 3,5 promilow. Chorobne awto dowjeze listonoša do chorownje. Tajkeje wysokeje koncentracije alkohola drje muž swoju jězbnu dowolnosć zhubi. Nimo toho dyrbi wón z wotpowědnymi dźěłoprawniskimi kon­sekwencami ličić.

To a tamne (21.10.16)

pjatk, 21. oktobera 2016 spisane wot:

W čerstwym asfalće tčacy wostał je šofer ze swojim awtom w Augsburgu. Tón bě při nadróžnym twarnišću zawěry ignorował a dale jěł. Tež na wołanje a kiwanje dźěłaćerjow wón njereagowaše. Wón jědźeše ze swojim awtom runu smuhu na runje kładźeny asfalt a so hnydom přilěpi. Zawod za wotwlećenje awtow wóz z horceho kołmaza wuswobodźi. Škodu na awće trochuje policija na tysac eurow. Kak drohe budźe ponowjenje asfalta, njeje hišće znate. Chłostanka 25 eurow budźe drje najmjeńši problem, policija piše.

Pola policista sej zub wukusnył je muž w badensko-württembergskim Kornwestheimje. Zastojnik chcyše 26lětneho kontrolować. Tomu so muž wobaraše a kusny policistej do ruki a chribjeta. Při tym přisadźi prědni zub. To wšak jemu ničo njewunjese: W nachribjetniku muža namakachu podhladne substancy.

To a tamne (20.10.16)

štwórtk, 20. oktobera 2016 spisane wot:

Zhibadło swojeho kolena zhubił je 16lětny młodostny při wobchadnym njezbožu ze swojim mopedom – a ma je mjeztym zaso wróćo. Policisća běchu za zhibadłom pytali a je na městnje njezboža w přirowje tež woprawdźe namakali. Do toho bě młody muž při jězbje na dźěło z mopedom do napřećo přijěduceho awta prasnył a so ćežko zranił. W chorowni zwěsćichu, zo zhibadło pobra­chuje. Te su mužej mjeztym zaso zasadźili. Šeflěkar njeje tajke něšto po swójskim wuprajenju hišće nihdy dožiwił.

Wo toaletowu papjeru prosyła je zakładna šula w španiskim Yepesu swojich šulerjow. Za to njeje w etaće pječa dosć pjenjez. Španiske medije wo tutym padźe mjeztym rozprawjeja, po tym zo běchu so rozhorjeni starši na nje wobroćili. Mjeztym je gmejna připowědźiła, zo kóšty za nuznikowu papjeru přewozmje.

To a tamne (19.10.16)

srjeda, 19. oktobera 2016 spisane wot:

Žałosćaceho ćěšenka do spara kolebał je policist w Hessenskej. Mać bě dźěćo mylnje do awta zamknyła, rěčnica Offenbachskeje policije zdźěli. Durje awta běchu so zaprasnyli, jako 30lětna mać něšto w kófrowej rumnosći pytaše. Kluč ležeše w zamknjenym awće. Žona wołaše policiju, dźěćo započa žałosćić. Policist měješe prawu mysličku: Wón awto tak dołho cunjo čumpaše, doniž sej dźěćo njewusny. Z pomocu narunanskeho kluča awto skónčnje wotewrěchu.

Njetopyrjow dla dyrbja woblubowane dohodowne wiki na Heidelbergskim hrodźe lětsa wupadnyć. Minjene lěta bě so pokazało, zo njetopyrje njeměra wokoło wikow dla ćerpja. Pječa maja prěnje pokazki na to, zo ličba škitanych zwěrjatow woteběra. Njetopyrje maja w hrodźe swój zymski kwartěr. Heidelbergske hrodowe hody tuž lětsa njebudu.

To a tamne (18.10.16)

wutora, 18. oktobera 2016 spisane wot:

Štyri dźiwje swinje w zahrodowym basenku su w Schwäbisch-Gmündźe zasadźenje policije zawinili. Po informacijach policije běchu wone njedźelu do basenka padnyli a njemóžachu so hižo same wuswobodźić. Policisća, wohnjowi wobornicy a skótny lěkar spytachu jim pomhać. Najebać to so dwě swinjeći zatepištej, dalšej dyrbjachu zasparnić. Jenož ranca móžeše pool přez rampu wopušćić. Při basenku nasta škoda 5 000 eurow.

Swoju žonu nachwilnje zhubił je 70lětny hribar w badensko-württembergskim Gingenje. Jako wona na jeho wołanje njereagowaše, muž so starosćejo wo swoju žonu policiju zawoła. Wjacore wobsadki policajskich awtow a samo helikopter za žonu pytachu – podarmo. Ta bě so dawno na dompuć podała. Policija měješe zro­zumjenje: „Štóž so woprawdźe starosći, smě policiju zawołać“, rěčnik zdźěli.

To a tamne (17.10.16)

póndźela, 17. oktobera 2016 spisane wot:

Z nimale tři promilemi alkohola w kreji je policija wčera w hessenskim Heidenrode busoweho šofera lepiła. Do toho bě wobydlerce spodźiwne wašnje jězdźenja napadnyło a tuž přiwoła zastojnikow. Z pomocu jězbneho plana je policija bus a wodźaceho šofera skónčnje našła, kotryž bě z dwěmaj wosobomaj po puću do Wiesbadena. Jězba so na městnje skónči. 45lětnemu jězbnu dowolnosć hnydom sćazachu.

Najstarši wobydler Němskeje je 111lětny Gustav Gerneth ze saksko-anhaltskeho Havelberga. Kaž wón tamnišemu měšćanosće při telefonje zdźěli, nochce na swojich narodninach hižo žadyn wopyt. Jenož ze swójbu chce sej skibku tykanca zesłodźeć dać. Tak a tak je tuchwilu infekta dla trochu słaby. Přiwšěm bydli Gerneth w swójskim bydlenju, hdźež jeho­ swójba sobu zastaruje.

To a tamne (14.10.16)

pjatk, 14. oktobera 2016 spisane wot:

Dary domchowanki z wołtarja pokradnył je njeznaty w katolskej měšćanskej cyrkwi w delnjofrankskim Hammelburgu. Pomocnikam bě při wottwarje dekoracije nadpadnyło, zo tójšto žiwidłow pobrachuje, kaž policija zdźěli. Natočenja widejokamery pokazuja, kak něhdźe 65lětny muž kofej, słódkosće a zela z wołtarja bjerje – a so po tym pokřižuje. Policija nětko za paduchom pyta.

Při hribypytanju zabłudźiłoj stej so žonje w starobje 43 a 62 lět w Durinskej. Kaž policija zdźěli, běštej wonej w Altenburgskim kraju do lěsa šłoj. Jako po wjace hač šěsć hodźinach puć domoj njenamakaštej, zawołaštej policiju. Policajske psy zabłudźenej žonje skónčnje namakachu. Zastojnicy jeju z lěsa přewodźachu.

To a tamne (13.10.16)

štwórtk, 13. oktobera 2016 spisane wot:

Tak sej njewjesta najrjeńši dźeń jeje žiwjenja zawěsće předstajiła njeje. Po puću k jeje přichodnemu mandźelskemu sedźeše wona 20. awgusta w Hofheimje na awtodróze palaceho nakładneho awta dla w paslach. Na wažny termin dypkownje přińć drje bě w tymle wokomiku njemóžne. Čakacy nawoženja zawoła tuž policiju, kotraž njewjestu skónčnje wuswobodźi. Nětko je so mjeztym wudała žona zastojnikam z kwěćelom, słódkosćemi a kartu dźakowała.

Z tak mjenowanym Lübeckskimi Holstenskimi wrotami maja Chinjenjo swoje ćeže. W chinskej fabrice, hdźež suweněry zhotowjeja pomjenowachu znate wrota cyle jednorje Bolstentok. Mjeztym je suweněr z wopačnym mjenom šlagr mjez turistami, tak zo je Lübeckska a Travemündska marketingowa towaršnosć wjace tajkich „wopačnych“ wrotow skazała.

Serbska debata

nowostki LND