To a tamne (18.07.16)
Rój wosow je na koparskej hrě w Ekuadorje sudnikow, přihladowarjow kaž tež wobě mustwje wuhnał a tak partiju přetorhnył. Agresiwne wosy lećachu wčera po stadionje přistawneho města Guayaquil, kaž telewizijne wobrazy dokumentuja. Spočatnje ćěkaše sudnik na kromje hrajnišća a biješe wokoło so. Jemu slědowachu koparjo, hłowny sudnik a skónčnje přihladowarjo. Po dwěmaj hodźinomaj so wosy zminychu. Dalša hra po tym wotmě so bjez problemow.
Ze swojim ultralochkim lětadłom znje- zbožił a na dubje wisajo wostał je 91lětny muž we Wulkej Britaniskej. Senior wisaše wčera pjeć metrow wysoko na štomje pola Edenbridga na juhowuchodźe kraja. Wohnjowi wobornicy dyrbjachu lětadło zawěsćić, prjedy hač móžachu 91lětneho z rěblom wuchować a do chorownje dowjezć.
To a tamne (15.07.16)
Mjedwjedź je so do awta zamknył, a to w małoměstačku njedaloko Denvera w USA. W interneće wozjewjeny widejo pokazuje, kak policisća zwěrjo kedźbliwje z kófroweho ruma na swobodu pušća. Njeje ani tak wulki. Přiwšěm je cyłe awto zapusćił. Samo wodźidło je rozkusane. Wobsedźerka awta chcyše poprawom na dźěło jěć, nětko pak dyrbi najprjedy škody wotstronić. „W awće smjerdźi hórje hač za mokrym psom“, wona praji.
Nic bjez mojeje tobołki! Nimale dwě třećinje žonow Němskej – 59 procentow – bydlenje tak derje kaž ženje bjez ručneje tobołki njewopušća. To je woprašowanje apotekoweho portala wunjesło. Hišće wjace, 72 proc., ma wobsah tobołki za priwatny a druhim napřećo za „absolutnje tabu“. Njezadźiwa tuž, zo by 47 proc. žonow emocionalnje jara trjechiło, by-li so tobołka zhubiła.
To a tamne (14.07.16)
Dejnera dla, kotryž njesłodźeše, je w Hennigsdorfje sewjernje Berlina k bijeńcy dóšło. Njespokojny 20lětny bě swój dejner do wotpadkow ćisnył a so pola hosćencarja hóršił. Tón jeho hrabny a won ćisny. Młodostny so ze swojim 45lětnym nanom nawróći, kiž hosćencarjej z pjasću do mjezwoča dyri. Syn rozmjeta nimo toho grat, talerje a ketchupowe bleše. Policija wšak nětko přećiwo wšitkim třom ranjenja ćěła dla přepytuje.
Horor za kóždeho młodeho nana: Po puću do porodneje kliniki je so na awtodróze njedaloko Olomouca je so jeho awto zapaliło. Wón a žona kaž tež šěsćlětny syn móžachu so runje hišće wuchować. Wohnjowa wobora podusy płomjenja. A sanitetarjo starachu so wo žonu, kotraž měješe hižo hrona. Dowjezechu ju do chorownje, hdźež wona krótko na to strowe dźěćko porodźi.
To a tamne (13.07.16)
9 895 eurow měsačnje dóstawa frizer francoskeho prezidenta Françoisa Hollandea jako mzdu. Tole wozjewi francoska wotkrywanska nowina La Canard Enchaîné, złožowaca so na jeho dźěłowe zrěčenje. Rěčnica prezidentskeho palasta informaciju wobkruća a skedźbni na dołhe dźěłowe časy muža: Wón ma Hollandea wšědnje rano kaž tež do kóždeho wažneho termina frizěrować, samo kónc tydźenja. Na jězbach premiera z přenocowanjom je tohorunja stajnje pódla.
W rybarskim saku francoskeho kutera zapopadnył je so portugalski podnurjak před britiskim pobrjohom. Kaž francoska mórska prefektura zdźěli, bě podnurjak „Tridente“ na zhromadnym manewru z britiskej marinu, jako dósta so do saka kutera „Daytona“. Sak pak móžachu spěšnje wotstronić a so z łódźu skontaktować. Nichtó so njezrani. W Kielu twarjeny podnurjak je 68 metrow dołhi a wot lěta 2010 w słužbje.
To a tamne (12.07.16)
Na jězbu z balonom wokoło zemje je so ruski dyrdomdejnik Fjodor Konjuchow podał. 65lětny startowaše dźensa rano w zapadoawstralskim Northamje, 100 kilometrow sewjerowuchodnje přistawneho města Perth. Konjuchow chce rekord Američana Steva Fosseta přewinyć, kiž bě zemsku kulu lěta 2002 w běhu 13 dnjow wobkružił, a planuje cyłkownu čaru 33 000 kilometrow.
Najwjetši orchester swěta zetka so minjeny kónc tydźenja w Frankfurće nad Mohanom, hdźež je zhromadnje hudźił. Němski institut za rekordy je dokładnje 7 548 hudźbnikow zličił a tak informaciju zarjadowarja wobkrućił. Nětko chcedźa hoberski orchester do knihi „Swětowe rekordy w Němskej“ kaž tež do Guinnessoweje knihi rekordow zapisać. Dotal najwjetši orchester swěta bě lěta 2013 w awstralskim měsće Brisbane ze 7 224 hudźbnikami hrał.
To a tamne (11.07.16)
Na wopačnym lětanišću přizemiło je lětadło ze 130 pasažěrami w USA. Dolećeć měješe mašina předewzaća Delta Air Lines poprawom w Rapid City, druhim najwjetšim měsće stata South Dakota. Město toho pak přizemi na 15 kilometrow zdalenym wojerskim lětanišću Ellsworth. Wojacy reagowachu zadźiwani a kontrolowachu mašinu z pomocu psa. Na to smědźeše lětadło zaso wotlećeć. Podawk chcedźa nětko přepytować. Pilotaj staj pušćenaj.
Wjace hač 3 200 ludźi je so w britiskim Hullu zeslěkało, zo bychu so z módrej abo zelenej barbu pomolować dali. Za fotografa Spencera Tunicka pozěrowachu wobdźělnicy z 20 krajow na wažnych blakach města. Je to najwjetši wuměłski projekt Wulkeje Britaniskeje scyła. Nastate wobrazy chcedźa wozjewić.
To a tamne (08.07.16)
Šěsć kilometrow dołhu čaru juchi je ratar w Belgiskej zawostajił. Smjerdźata maćizna z wotewrjeneho juchoweho tanka pryskaše na fasady, awta, zahrodki a samo na rowy kěrchowa w Glabbeeku wuchodnje Brüssela. Wohnjowa wobora měješe hodźiny dołho činić, fasady a dróhi zaso wurjedźić. Zličbowanku dóstanje wězo ratar.
Policajski pos je w Hornjej Pfalcy muža wučušlił, za kotrymž policija hižo dlěje pytaše. 25lětny bě zastojnikam napadnym, dokelž bjez wěstotneho pasa jědźeše. Jako chcychu jeho zadźeržeć, stupi tón na płun. Honjeńca skónči so na polu, po tym zo bě muž kontrolu nad awtom zhubił. Na to ćěkaše pěši dale, tež přez rěku, a schowa so w lěsu. Tam wšak jeho policajski pos namaka. Přičina ćěkanja bě spěšnje jasna: Přećiwo mužej předležeštej hnydom dwaj wukazaj zajeća.
To a tamne (07.07.16)
Na zadk molowane woči móhli howjada w Africe před nadpadami lawow škitać. Tole lubja sej slědźerjo po prěnich pospytach w Botswanje. Skradźu so bližace lawy maja tak zaćišć, zo su je howjada hižo wuhladali, a so zaso zminu. Tak znajmjeńša rěka teorija wědomostnika Neila Jordana na Sydneyskej uniwersiće. Wón bě zadźerženje lawow na hońtwje dlěši čas dokładnje wobkedźbował.
Cyłe jastwo ewakuować dyrbja wot dźensnišeho w sewjerorynsko-westfalskim Münsteru. Na wšě 515 jatych ma so po najspěšnišim puću do druhich chłostarnjow přepołožić, kaž wottam zdźěleja. Zamołwići kraja su přeměstnjenje wčera wukazali, dokelž běchu zwěsćili, zo hrozy so 160 lět stare a pod pomnikoškitom stejace twarjenje wosrjedź města sypnyć. Ewakuowanje po nuzowym planje ma jutře wotzamknjene być.
To a tamne (06.07.16)
Lubowanu ilegalnu plantažu konopje swojeho syna je nan w Awstralskej spalił, po tym zo běštaj so nan a syn zwadźiłoj. Syn zawoła na to policiju. A ta jemu wuwědomi, zo wšak je plahowanje drogi ilegalne, jeje zničenje pak nic. Dokelž bě woheń wšitke dopokazy zničił, njejsu młodeho muža wobskoržili.
Prominentnosć druhdy ničo njepomha – to dyrbješe čěski ministerski prezident Bohuslav Sobotka na filmowym festiwalu w Karlovych Varach bolostnje nazhonić. Wón sedźeše z mandźelskej w kinowej žurli, jako jeho wopytowarka na to skedźbni, zo na jeje městnje sedźi. Jako dopokaz dźeržeše jemu lisćik pod nós. Tak premierej Sobotce ničo druhe njezby, hač sej druhe městno pytać.
To a tamne (05.07.16)
Z awtowym zběhadłom je policija w Badensko-Württembergskej šupa z nuzy wuswobodźiła. Zwěrjo bě mjez zahrodkowej budku a murju domskeho zatłusnjene, čehoždla wobydler policiju zawoła. Z pomocu zběhadła budku po třištwórć hodźinje trochu wuzběhnychu. Šup wosta njezranjeny a so spěšnje zminy.
Swojeho nana do wuskosćow přinjesł je wosomlětny pachoł, kiž nochcyše bjez swojich hrajkanskich pistolow do dowola jěć. Jako 47lětny nan na Bremenskim lětanišću swój kófer woteda, wudyri alarm. Při přeswětlenju wačoka běchu zastojnicy dwě pistoli wuhladali. Potrjecheny dźěl lětanišća zawrěchu. Krótko na to alarm zaso zběhnychu. Hólc přizna, zo bě pistoli skradźu do kófra nana tyknył.
