To a tamne (13.07.17)
Něhdy bě profi-kopar, nětko je duchowny. Bywšeho koparja Philipa Mulryneja su w irskim Dublinje na katolskeho měšnika wuswjećili. Tole rozprawja rjad dominikanow na swojej internetnej stronje. W Belfasće rodźeny, dźensa 39lětny Mulryne bě kónc 90tych lět zhromadnje z Davidom Beckhamom w mustwje Manchester United za bulom honił. Pozdźišo hraješe wón pola druheho koparskeho ligista Norwich City. Po kóncu karjery studowaše teologiju a filozofiju.
Zadwělowanej powołanskej šulerce je policija w Allgäuju k wuspěšnemu kónčnemu pruwowanju dopomhała. 18lětna bě ze swojim mopedom po puću k powołanskej šuli defekta dla stejo wostała. Jeje mobilny telefon pak ležeše doma. Připadnje jědźeše policajske awto nimo, zasta a dowjeze ju do šule w Kemptenje. Wuslědk: 18lětna je pruwowanje wobstała.
To a tamne (12.07.17)
Po awtodróze do šule nóžkował je dwanaćelětny hólc w Hornjej Pfalcy. Policija dósta wčera wjacore telefonaty, po kotrychž je dźěćo ze šulskej tobołu na A 3 pola Nittendorfa po puću. Zastojnicy je na to sobu wzachu. Kaž so wukopa, bě sej hólc w šulskim busu do Regensburga wusnył. Jako wotući, wón wustróžany na přichodnej staciji wulěze. Hakle po tym pak zwěsći, zo scyła hišće w Regensburgu njeje, a so pěši na puć nastaji.
Lotowe zbožo wunuzować chcyše sej njeznaty paduch w Hornjej Frankskej. W Thiersheimskej kupnicy spakosći wón wčera tyzku ze 450 losami bayerskeje loterije a je na to wšitke zwočinjał. Z dobyćerskimi losami poda so do bliskeho Thiersteina, hdźež jemu jeničce 78 eurow wupłaćichu. Poprawom wšak lubja losy hač do 300 000 eurow. Telko zboža pakostnik njeměješe.
To a tamne (11.07.17)
40 mjeńšin trajace nócne zwonjenje je wobydlerjam bayerskeho Zirndorfa spar rubiło. Techniskeho zmylka dla bě zwón kěrchowa minjenu nóc w 3.35 hodź. zwonić započał. Na to so tójšto wobydlerjow pola policije nócneje hary dla hóršeše. Policija informowaše zamołwiteho, a tón je zwón po 40 mjeńšinach skónčnje wotpinył.
Papagaj je w Aachenje zasadźenje policije zawinił. Susodźa běchu zastojnikow wołali, dokelž běchu z jednoho z bydlenjow křiki, hara, lózyske swary a wudma słyšeć. Jako policisća dojědźechu, přińdźe jim muž z krawjacej hubu napřećo. Zranił bě jeho papagaj, z kotrymž so wadźeše. Nimo toho je po jstwě lětacy ptak něštožkuli spowalał a rozbił. Čehodla staj so papagaj a jeho wobsedźer wadźiłoj, njeje znate, tež nic, štó je komu wudma nadawał.
To a tamne (10.07.17)
Je wona kusnyła abo nic? Kóčka steješe dźensa w srjedźišću procesa wotškódnjenja dla na krajnym sudnistwje w Ingolstadće. Wona bě samo wosobinsce přitomna, zo by napřećostajenje z pječa kusnjenej žonu móžne było. Ta twjerdźi, zo bě so kóčka 9. januara do jeje nohi zakusnyła a bolacu ranu zawostajiła, a žada sej 2 000 eurow wotškódnjenja. Wobsedźerka dwěluje, zo je jeje kóčka žonu kusnyła, wšako móhła to kóčka susodki być.
Zwada štyrjoch maćerjow wo městno za dźěćacy wozyčk w busu je w Bremenje w hotowej bijeńcy z třomi zranjenymi policistami wuwjercholiła. Jedna ze žonow zawoła swojeho muža, kiž z bratrom k busej přińdźe. Jako wjacori policisća přijědźechu, daštaj so mužej do nich. Něhdźe 50 ludźi rozestajenju před busom přihladowaše. Z wulkozasadźenjom so poradźi zwadźenych změrować.
To a tamne (07.07.17)
700 taflow kradnjeneje šokolody je policija wčera w Budyšinje sćazała. Do toho su ju sobudźěłaćerjo kupnicy w Strowotnej studni wołali, po tym zo běchu dweju paduchow w starobje 47 a 49 lět při kradnjenju lepili. Mužej měještaj 30 taflow šokolody při sebi. Njedaloko kupnicy steješe w Pólskej přizjewjene awto, w kotrymž hižo wulke mnóstwo dalšich šokolodow a kradnjenych wěcow ležeše. Jich hódnota wučinja wjace hač tysac eurow.
Nic bjez wačoka, rjekny sej 39lětny a je při spěšnosći 160 km/h na wonkownym schodźenku spěšnika sobu jěł. Do toho bě wón na nastupišću Stuttgartskeho hłowneho dwórnišća hišće woměrje cigaretu kurił, jako ćah z wačokom w nim wotjědźe. 39lětny skoči tuž na schodźenk. Swědk to wobkedźbowaše a zawoła policiju. Hakle po 21 kilometrach ćah pola Vaihingena zsta. Na muža čaka nětko pokuta.
To a tamne (06.07.17)
Z wulkimi mnóstwami lětacych mrowjow bědźachu so wčera wopytowarjo a tenisća we Wimbledonje na kromje Londona. Stajnje zaso dyrbjachu hrajerjo małe zwěrjatka wot drasty wotčesać abo sej je z mjezwoča trěć. Britojo maja za to samo mjeno: Flying Ant Day. Mrowje w hoberskich rojach wotleća, hdyž nowa kralowna hnězdo wopušći. Ćopłe a włóžne wjedro z 30 stopnjemi tomu polěkuje.
Wódne suwadło wupruwowałoj staj policistaj w ameriskim Ashvillu w staće North Carolina. Do toho bě jeju susod wołał, dokelž měješe suwadło, kotrež bě muž składnostnje dnja njewotwisnosće natwarił, za ilegalne. Zastojnikaj pak njemóžeštaj techniske njedostatki namakać a sunyštaj so po skłoninje, kotraž bě z wodu a mydłom preparowana. Medije běchu so na widejowu scenu dohladali, kotraž je mjeztym w interneće widźeć.
To a tamne (05.07.17)
72 kołbaskow w dźesać minutach je 33lětny Kaliforničan do so stykał. Tradicionalne napřemojědźenje hotdogow wotmě so w New-Yorkskim zabawjenskim parku Coney Island. Joey Chestnut, serijowy dobyćer minjenych lět, je tak swój rekord wo dwě kołbasce polěpšił. Přiwšěm njebě wón cyle spokojom, dokelž je w druhej połojcy popušćił. Poprawom chcyše 90 hotdogow zjěsć.
Spodźiwne rejwanje muža pod hołym njebjom a pozdatna rozmołwa ze štomom stej pěška w badensko-württembergskim Steinenje pohnułoj, policiju zazwonić. Alarm pak njebě trěbny. Zastojnikam 62lětny rozłoži, zo słuži „rejwanje“ sebjezakitowanju a wotpočinkej. „Poprawom činju to w lěsu. Tónkróć pak sym čakanje na lěkarski termin za swoje zwučowanja wužił. Druzy čitaja, hdyž dyrbja čakać. Ja zwučuju.“
To a tamne (04.07.17)
Jenož w kupanskich cholowach, z kupanskej čapku a płuwanskimi nawočemi chce 30lětny Joseph Heß 600 kilometrow samlutki po Łobju płuwać, wot čěskeje mjezy hač do Hamburga. Hospodarski inženjer ze Sakskeje planuje za to dźesać dnjow. Sobudźěłaćer Kamjeničanskeje TU dyrbješe sej dowolnosć w 15 institucijach wobstarać. Startować chce wón 4. awgusta w Bad Schandauwje.
Dweju rubježnikow dosahnył je policajski pos w münsterlandskim Dülmenje. Mužej běštaj so z dalšim komplicu do banki zadobyłoj. Swědk něšto słyšeše a zawoła policiju. Ta přijědźe z psom Casperom, kotryž ćěkacych muži přesćěhaše. Prěnjeho kusny do ruki, na čož so tón poda. Krótko po tym Casper tež druheho paducha wučušli. Třeći skućićel pak móžeše ćeknyć, byrnjež z helikopterom za nim pytali.
To a tamne (03.07.17)
Z policajskim awtom na wěrowanje přijěła je njewjesta w Durinskej. Do toho bě šoferka taksija z dwěmaj hosćomaj do kwasneho awta zrazyła. Po protokolowanju njezboža wosta njewjesće runje hišće štwórć hodźiny, zo by na 15 kilometrow zdaleny hród Scharfenstein dojěła. Zastojnicy dołho njewahachu a dowjezechu ju hromadźe z maćerju na hród. „Po poslednich informacijach bě wěrowanje wuspěšne“, rěka w policajskej rozprawje.
Njeplanowany wustup psa na koncerće Wienskeho komorneho orchestra w Turkowskej je jako widejo w interneće wulce prašany. Labrador bě 20. junija na jewišćo amfiteatra w Ephesusu přiběžał a měješe při hudźbje Felixa Mendelssohna Bartholdyja wočiwidnje wjele wjesela. Sydny so pódla huslerja na zemju, zo by so połnje na hudźbu koncentrował. Wopytowarjo spontanje přikleskowachu.
To a tamne (30.06.17)
Psyči problem měješe Mnichowska wohnjowa wobora wčera rozrisać: Pos bě w lifće zawrjeny, jeho wobsedźerjo pak steještaj před nim. Prawdźepodobnje bě so psyči powjaz w durjach zapopadnył, tak zo so hižo njewotewrěchu. Tež sobudźěłaćer klučoweje słužby njemóžeše pomhać. Hakle powołanska wohnjowa wobora blokowane durje skónčnje wočini a Jack Russella wuswobodźi.
Hdyž sy alkohol pił, da awto radšo stejo wostaj. Tole je mužomaj w starobje 26 a 27 lět na awtodróze do mysli přišło. Tak zastaštaj na nuzowej čarje na A 29 pola Cloppenburga a lehnyštaj so spać. Zastojnikaj awtodróhoweje policije dyrbještaj chětro raznje klepać, zo byštaj jeju wubudźiłoj. Test alkohola wunjese 2,3 a 2,8 promilow. Jedyn tamneho winowaše, zo je jěł. Policisća dachu awto ze strašneho parkowanskeho městna wotwlec.
