To a tamne (02.08.16)

wutora, 02. awgusta 2016 spisane wot:

Jeno na zwjenu jěducy je 78lětny wodźer awta w Awstriskej přiwšěm spěšnje po puću był. Zo bjez prědnjeje wobruče jězdźi, ani pytnył njebě, wón policistam zamyleny rozłoži, po tym zo běchu jeho njedaloko wsy Wattens na awtodróze A 12 zadźerželi. Jězbnu dowolnosć jemu sćazachu a pósłachu jeho k lěkarjej. Po­trjechene aluminijowe zwjeno bě hižo hač na połojcu wotjězdźene. Šoferojo běchu policiju alarmowali. Starca zadźeržeć njebě scyła tak lochko, dokelž wón spochi druhe awta přesćahowaše.

Z 3 000 kwadratnych metrow wulkim grafitom chce 40lětny Eduardo Kobra w Rio de Janeiru nowy swětowy rekord nastajić. Wobraz na sćěnje twarjenja blisko přistawa pokazuje portrety ludźi ze wšeho swěta. Kobra je sobu najznaćiši nadróžny wuměłc Brazilskeje.

To a tamne (01.08.16)

póndźela, 01. awgusta 2016 spisane wot:

Na wšě 7 620 metrow z lětadła do hłubiny skočił je Luke Aikins z USA – a to bjez padaka. Tak je „skydiver“ nowy rekord nastajił. Tajki zwažliwy skok sej do njeho hišće nichtó zwěrił njebě. Akcija nad juhokaliforniskej pusćinu njedaloko Los Angelesa traješe dobrej dwě mjeńšinje. Aikinsa přewodźachu třo parašutisća. Sekundy do přizemjenja so wón na chribjet wobroći a padny do 30 króć 30 metrow wulkeho saka 60 metrow nad zemju. Wokomiki pozdźišo Aikins ze saka wulěze a swoju žonu wobjimaše.

Skóncowaneho zamka dla njemóžeše muž w Heidelbergu minjenu nóc nuznik hižo wopušćić. Wón wołaše tak dołho wo pomoc, doniž susodka policiju njezawoła. Zastojnicy móžachu drje z generalnym klučom do bydlenja samostejaceho. Durje wustupa pak dyrbjachu wohnjowi wobornicy wočinić.

To a tamne (29.07.16)

pjatk, 29. julija 2016 spisane wot:

Ničo za słabe čuwy: Wosebje zmužići turisća smědźa so w chinskim Shanghaiju 340 metrow nad zemju přechodźować. Tam su wčera na 88. poschodźe 420 metrow wysokeje wěže Jin Mao wonkowny škleńčany chódnik přepodali. Tón je 60 metrow dołhi a runje 1,20 metrow šěroki. Zastup płaći 40 do 50 eurow. Ludźo su z pasom zawěsćeni, přetož škleńčany chódnik nima žane wobłoženje. Za to je wuhlad na milionowe město pječa wulkotny.

Dospołnje pjany po cuzej zahrodźe wjacore koła jězdźił je wodźer awta wčera rano zahe w Braunsdorfje we wokrjesu Wódra-Sprjewja. 56lětny wšak měješe tež 3,29 promilow alkohola w kreji. Wopity bě z jězdnje zajěł a přez polo skónčnje na zahrodu, při čimž hišće płót wobškodźi. Wobsedźer zahrody bě policiju wołał. Jězbnu dowolnosć dyrbješe muž jej hnydom přewostajić.

To a tamne (28.07.16)

štwórtk, 28. julija 2016 spisane wot:

Na dosć rabiatne wašnje je so wobydler w hornjopfalcowskim Nabburgu nowej wirtuelnej hrě Pokémon wobarał. Wón biješe z drjewjanym retlom na parkowace awto a načini tak 500 eurow škody. Po informacijach muža so po wudyrjenju noweho hibanja wokoło internetneje hry wodnjo a w nocy hrajerjo Pokemóna z awtami a wótrej hudźbu před jeho domom zetkawaja. Prawdźepodobnje tam fiktiwne „monstery“ honja.

Před třomi lětami ćeknjena kóčka je zaso pola swojeje wobsedźerki w Berlinje. Sobudźěłaćerce towarstwa za škit zwěrjatow bě před něšto dnjemi wuhłódnjena kóčka na dróze napadnyła. Žona wza ju sobu do zwěrjatownje. Tam zwěsćichu, zo ma zwěrjo chip pod kožu. Tak móžachu wobsedźerku wuslědźić a jej mjeztym 16lětnu „Mauzi“ přepodać. Kóčka bě so w lěću 2013 zhubiła.

To a tamne (27.07.16)

srjeda, 27. julija 2016 spisane wot:

Na wšě šěsnaće hodźin je muž w kontejneru stareje drasty na swoje wuswobodźenje čakać dyrbjał. 44lětny bě w Gorknitzu pola Drježdźan kontejner přeslědźił a so při tym do njeho sunył, zdźěli policija. Wusłyšawši wołanje a klepanje muža w železnym sudobju, poinformowa wobydler susodneho domu wohnjowu woboru. Policija nětko pospytaneho „padustwa mjenje hódnych wěcow“ dla přećiwo njemu přepytuje.

Před třomi tydźenjemi z rězarnje ćeknjena kruwa w Kaiserslauternje policiju přeco hišće za nós wodźi. Šoferojo běchu skoćo wčera w měsće wuhladali, na čož policiju wołachu. Jako zastojnicy pijědźechu, skoćo do lěsa ćekny. Tam bjez wuspěcha za nim pytachu. Před třomi tydźenjemi běchu samo helikopter podarmo zasadźili. Dokelž kruwa tež po kolijach běhaše, dyrbjachu nachwilnje čaru zaraćić.

To a tamne (26.07.16)

wutora, 26. julija 2016 spisane wot:

W zwadźe smjerdźateju nohow dla je muž sobujěducemu w ćahu plistu wottyknył. W ćahu z Basela do Berlina dóńdźe wčera k rozestajenju, jako bě sej 54lětny črije zuł a noze na prózdne sedło pódla 32lětneho wupřestrěł. Tón so smjerda dla hóršeše a noze skónčnje z ławki suny. Na to so wobaj wurěčowaštaj, doniž so młódši z njeju z plistu za smjerdźatej noze „njepodźakowa“. Na dwórnišću w Göttingenje policija mužomaj dalejězbu zakaza. 32lětny dósta skóržbu ranjenja ćěła a 54lětny křiwdźenja dla.

Z basketballoweho saka wuswobodźić dyrbješe Bremenska wohnjowa wobora 17lětneho młodostneho. Tón bě na sćežor zalězł a so z nohu w saku zapopadnył. Tež sobuhrajerjo jemu pomhać njemóžachu. Wohnjowi wobornicy tuž přijědźechu a stajichu młodostnemu rěbl, po kotrymž wón dele zalěze.

To a tamne (25.07.16)

póndźela, 25. julija 2016 spisane wot:

Z awtom maćerje je sej wčera 13lětny w durinskim Unterwellenbornje wulećał, ale bórze do štoma prasnył. Jězba skónči so njejapcy w lěwej křiwicy, jako so młody šofer tež hišće z mobilnym telefonom zaběraše. Nimo toho steješe pachoł pod wliwom alkohola. Při zražce so wón na zbožo jenož lochko zrani. Mać jeho na městnje njezboža wotewza a staraše so wo to, zo awto wotwleku.

Wša próca bě na kóncu tola podarmotna: Třo mužojo su w bayerskim Weidenje něhdźe tysac prózdnych blešow z wulkowobchoda pokradnyli a we wjacorych wulkich měchach wottransportowali. Ze swojimi hoberskimi wačokami wšak trójka wobsadce policajskeho awta napadny. Po krótkim přesćěhanju zastojnicy pakostnikow dosahnychu. Prózdne bleše běchu 232 eurow hódne. Policija přepytuje nětko padustwa dla.

To a tamne (22.07.16)

pjatk, 22. julija 2016 spisane wot:

Tež na najwotležanišich twarnišćach njejsu dźěłaćerjo před kontrolemi čornodźěła dla wěsći. Hłowny cłowny zarjad w Augsburgu je swojich zastojnikow wčera na 2 224 metrow wysoki Nebelhorn pola bayerskeho Oberstdorfa pósłał, hdźež tuchwilu nowy panoramowy hosćenc nastawa. Mjez 37 dźěłaćerjemi su cłownicy woprawdźe wjacore přeń­dźenja zakonjow zwěsćili. Dokelž powjaznica twarskich dźěłow dla njejězdźeše, wšak dyrbjachu woni pěši na horu.

Přechutnje brał je Stuttgarćan kriminalku w telewiziji a je policiju wołał. 46lětny bě na schodźe wjaceswójbneho domu słyšał, kak něchtó žonu wudrěwuje, dokelž bě mandźelstwo łamała. Wuchadźejo z toho, zo jedna so wo njeskutk, wołaše muž policiju. Durje bydlenja pak wočiništej sotře w starobje 14 a 16 lět, kotrejž běštej film hladałoj.

To a tamne (21.07.16)

štwórtk, 21. julija 2016 spisane wot:

Wot dweju elefantow ze seršćowcom na běłu płachtu molowanej wobrazaj stej w zwěrjencu čěskeho Ústíja nad Labem na předań. Něšto mjeńši wobraz płaći 19 eurow, wjetši 33 eurow. Molowanje ma dwě lěpšinje: Zwěrjeći stej zaběranej a coologiska zahroda ma přidatne dochody. Te móža za slědźenja na polu chorosćow elefantow wužiwać. Z njewšědnej akciju chcedźa pokročować.

Njewšědnje mało dźěła měješe policija po padustwje w Nürnbergu: Skućićel ležeše we łožu wopora a kruće spaše. Po- družnik bě wčera wječor při durjach swojeho bydlenja wobškodźenja zwěsćił. Wšitcy kamory běchu přeborkane, a paduch we łožu ležo kruće spaše. Wobydler zazwoni policiju, kotraž 27lětneho paducha wubudźi. Dokelž steješe wón wočiwidnje pod wliwom drogow a bě zamyleny, dowjezechu jeho do psychiatrije.

To a tamne (20.07.16)

srjeda, 20. julija 2016 spisane wot:

Awtodróhowu kokoš Gerdu su w Drježdźanach skónčnje popadnyli. Zmužitemu wodźerjej awta je so wčera wječor poradźiło, wo čož běchu so policisća tydźenje dołho prócowali. Šofer bě Gerdu na srjedźnym pasmje awtodróhi wuhladał. Wón zasta, wulěze z awta, hrabny pjerite skoćatko a donjese je policiji. Ta přewostaji „problemowu kokoš“ hladarce zwěrjatow, kotraž ma so nětko wo to starać, zo Gerda wjace njećeknje. Kokoš bě policiju stajnje zaso zaběrała, dokelž wosrjedź awtodróhi wokoło běhaše.

W sławnej studni Trevi wosrjedź Roma je so žona kupała, napodobnjejo hrajerku Anitu Ekberg w filmowym klasikarju Federica Fellinija „La Dolce Vita“. Za to wšak dyrbješe 64lětna hišće na městnje 450 eurow pokuty płaćić. Na internetnym wideju je widźeć, kak policist žonje kaza, ze studnje zalězć.

Serbska debata

nowostki LND