To a tamne (30.05.17)
Trawmu wutřěla dla je belgiski premierminister Charles Michel na sportowym wubědźowanju poćerpjeł. 41lětny politikar steješe pódla belgiskeje princesny Astrid, sotry krala Philippe, jako je wona njedźelu rano z pistolu w ruce běh „20 kilometrow po Brüsselu“ startowała. Michel ma nětko wjacore lěkarske terminy. Na woblubowanym ludowym běhu je so 40 000 sportowcow wobdźěliło.
Wosrjedź nocy wohnjowu woboru wopytać chcyše dwulětny pjerach w hornjobayerskim Egmatingu. Z barikom a pólku w ruce wón wčera wokoło 2.30 hodź. po chódniku běžeše. Pěšk małeho nócneho pućowarja wuhlada a zazwoni policiju. A tej móžeše hólčk dosć derje rjec, hdźe bydli. Nětko wšak přemysluje, hač by so tola radšo z policistom stał.
To a tamne (29.05.17)
2 100 kilometrow bosy běžeć chce Aldo Berti z Čorneho lěsa. Dźensa rano je so wón na Rujanach na puć podał. Za 86 dnjow chce Berti šwicarski klóšter Einsiedeln docpěć a tak nowy rekord w bosyběhanju nastajić. Na swojim pućowanju chce 53lětny pjenjezy za dźěćace pomocne organizacije zběrać.
Pjenjezy dešćowali su so sobotu na awtodróze A 9 blisko bayerskeho Ingolstadta. Motorski bě plastowu titu zhubił, w kotrejž bě 9 000 eurow dnjowych dochodow wobchodnika. Z wětřikom lětachu papjerjane pjenjezy po jězdni, a 36lětny zadwělowany spyta je sam zezběrać. Swědcy pak wołachu policiju, kotraž awtodróhu na to zawrě. Zastojnicy při zběranju pjenjez pilnje pomhachu. Najebać wulku prócu na kóncu přeco hišće 1 500 eurow pobrachowaše: Te drje běchu so z wětřikom zhubili.
To a tamne (26.05.17)
Šěsć pilatkow dla je policija při rěce Mosel awtodróhu zawrěła. Młode kački běchu sej wčera w Trieru runje wjele wužiwanu awtodróhu A 602 za swój wulět wupytali, a šoferojo běchu zdźěla k strašnym borzdźenskim manewram nuzowani. Awtodróhowa policija potrjecheny wotrězk tuž zawrě a spłóšiwe pilatka popadny. Při bliskim pobrjohu Mosele je zaso pušći, hdźež wótře kwakotacej staršej na nje hižo čakaštej.
Třěchu swojeho domu mylnje zapalił je muž w Sewjerorynsko-Westfalskej, jako w zahrodce z płunopalakom njerodź zaničowaše. Při tym so kerk zapali, na čož so płomjenja spěšnje na třěchu doma rozpřestrěchu, kotraž so zapali. Wohnjowej woborje so poradźi, wjetšej škodźe zadźěwać. Dom w měsće Schloß Holte-Stukenbrocku pola Gütersloha je na zbožo dale wužiwajomny.
To a tamne (24.05.17)
Paducha při swojim łožu dožiwił je wčera rano młodostny w Dortmundźe. Skućićel měješe hižo jeho mobilny telefon w ruce. Ćahaše pak hišće za elektrokablom, štož 17lětneho wubudźi. Tón bě runje tak wustróžany kaž paduch, kiž handy pušći a so z terasowymi durjemi zminy. Do toho wšak so młodostnemu hišće poradźi skućićela fotografować. Policija móžeše 25lětneho, kiž bě jej derje znaty, tuž spěšnje zajeć.
Jara krótki puć k městnu wohenja měješe wohnjowa wobora wčera w Kölnje: Na třěše jeje hišće zaróštowaneje noweje gratownje bě woheń wudyrił. Wobornik jón wuhlada a swojich kolegow alarmowaše. Ći wšak mějachu to spočatnje za žort. Hakle po tym zo bě jich kolega přeswědčił, chwatachu přez dwór. Na třěše gratownje paleše so smołowcowy papjerc (Teerpappe). Płomjenja běchu spěšnje podušene, a nichtó so njezrani.
To a tamne (23.05.17)
Chrobłaj paduchaj staj spjacemu mužej w Ludwigshafenje mandźelski pjeršćeń pokradnyłoj. 44lětny bě sej na parkowej ławce we wječornym słóncu tak kruće wusnył, zo móžeštaj njeznataj jemu pjeršćeń z porsta sćahnyć. Mjezwočo pomolowaštaj jemu na to z barbjenčkom. Jako muž wotući, so paduchaj zminyštaj.
Priwatne lětadło bywšeje rock’n’rolloweje legendy Elvisa Presleyja (1935–1977) tuchwilu na internetnej awkciji přesadźuja. Najwyši poskitk za lětanjanjekmany nastroj bjez motorow a z wobškodźenjemi je 126 000 dolarow, kaž awkciski dom w kaliforniskim Agoura Hills zdźěla. Kónčna płaćizna lětadła typa Lockheed drje budźe wyša. Lětadło je luksurioznje wuhotowane. Sedła su z čerwjenym somotom poćehnjene. Mikrožołma a telewizor njepobrachujetej. Mašina steji dlěje hač 30 lět na lětanišću w New Mexiku.
To a tamne (22.05.17)
Dospołnje přewjerćał je muž w Bayerskej, dokelž njemóžeše swoje trjebane awto předać. Do toho bě wóz internetnje poskićał. Jako zajimc na parkowanišću w Rehauwje jězdźidło wulkich wobškodźenjow dla na kóncu tola njekupi, so wón rozmjerza a so dwójce z awtom na zajimca a toho přewodźerku měrješe. Wobaj móžeštaj so wuwinyć. Njemdry šofer ma nětko ze skóržbu ličić.
Fanojo „pěkneho wojaka Šwejka“ su satiriskeho rjeka z antiwójnskeho romana Jaroslava Hašeka do bronzy zwěčnić dali. Podobizna Josefa Šwejka, Praskeho šelma, kiž w Prěnjej swětowej wójnje w awstrisko-madźarskim wójsku słužeše, sedźi wot soboty na ławce před radnicu čěskeho města Kralupy nad Vltavou, 30 kilometrow wot Prahi zdaleneho. Postawa orientuje so na hrajerju Rudolfje Hrušínskim, kiž bě Šwejka legendarnje hrał.
To a tamne (19.05.17)
Bjez swěcy při kolesu je rubježnik policiji runu smuhu do rukow jěł. 28lětny bě póćmje w Hammje po puću, jako jeho zastojnicy runje tohodla zadźeržachu. Zdobom pak spóznachu jeho jako rubježnika, kotrehož bě sudnistwo k třom lětam jastwa zasudźiło. K postajenemu terminej w jastwje wšak wón přišoł njebě, čehoždla za nim z wukazom zajeća pytachu. Policisća dowjezechu kolesowarja tuž direktnje do jastwa.
Z knihu je nócny portjej w hotelu w Aschaffenburgu wobrónjeneho rubježnika wućěrił. Skućićel bě 57lětneho po informacijach policije rano z dołhim nožom wohrozył. Jako jemu portjej rjekny, zo nima žane pjenjezy w kasy, rubježnik tež hišće spray na njeho pryskaše. To pak jemu njepomhaše: Nadpadnjeny hrabny sej knihu a ćisny ju za rubježnikom, kiž na to twochny.
To a tamne (18.05.17)
Hranica 30 stopnjow je přewinjena: Němska wjedrarnja w Offenbachu je wčera dotal najhorcyši dźeń lěta naměriła. Termometer wjedroweje stacije Geilenkirchen pola Aachena pokazowaše 30,1 stopjeń. W Trieru a Saarbrückenje naměrichu 30 stopnjow, nimale telko w Kölnje a Karlsruhe. Kónc tydźenja ma so zaso wochłódnić, po tym zo je njewjedrowa fronta na wuchod dale ćahnyła.
Perfektnje schował je so štyrilětny hólc a tak zasadźenje policije zawinił. Wón bě na swojich narodninach ze staršimaj „pytaj mje!“ hrał a so w staršiskim domje w pfalcskim Enkenbachu-Alsenbornje chětro derje schował. Na wołanje narodninskich hosći pak njereagowaše. Po poł hodźinje njewuspěšneho pytanja alarmowaštaj staršej policiju. Jako zastojnicy dojědźechu, bě pachoł hižo ze swojeho schowa wulězł a daše sej narodninski tykanc słodźeć. Hdźe bě so schował, wón wězo njepřeradźi.
To a tamne (17.05.17)
Płaćiznu za piwo na oktoberskim swjedźenju smědźa hosćencarjo dale sami postajeć. Namjet nawody swjedźenišća Josefa Schmida, płaćiznu wobmjezować, je Mnichowska měšćanska rada dźensa wotpokazała. Schmid chcyše, zo njeměł literski karan přichodne tři lěta wjace hač 10,70 eurow – to bě loni rekordna płaćizna – płaćić. Wobzamkli pak su, zo hosćencarjo z dawkom stupace kóšty za wěstotu na swjedźenišću sobu přewozmu.
Muž z kosu je w badensko-württembergskim Achernje zasadźenje policije zawinił. Dalši muž zawoła policiju, zo njeznaty z kosu w ruce po centrumje města běha. A zastojnicy nańdźechu woprawdźe tež 38lětneho z kosu. Tu wšak bě sej jenož na wikach nawótřić dał. Při kontroli muža přiwšěm zwěsćichu, zo bě chětro wopity, a kosu nachwilnje sćazachu.
To a tamne (16.05.17)
Tobołu ze 7 000 eurami je dowolnik w Baden-Badenje zhubił – a wróćo dóstał. 61lětny Běłorus bě město kónc tydźenja na jězbje z awtom po Europje wopytał. Tam wón tobołu z pjenjezami a dokumentami na třěchu awta staji. Jako wotjědźe, zaby na tobołu, kotraž so z třěchi suny. W swojej nuzy wobroći so šofer na policiju. Krótko na to namakar tobołu woteda. Přepodachu ju dowolnikej a namakarjej 220 eurow.
Smudźacej so dźěćacej comakaj stej w Kaiserslauternje zasadźenje wohnjoweje wobory a policije zawiniłoj. Młodaj staršej běštaj na hornc zabyłoj, w kotrymž chcyštaj comakaj wuwarić. Jako bě woda wuparjena, so alarmowy system zapiny. Wobornicy comakaj zhašachu. Swójba, kotraž bě při alarmje z bydlenja ćeknyła, so njezranjena nawróći.
