To a tamne (14.11.17)
W sakskich ministerstwach njeje pohibowanje na kolesu wšudźe „in“, kaž ličby pokazuja. Přerěznje 174 přistajenych zjawneje słužby swobodneho stata dźěli sej jedne koleso. Hospodarske ministerstwo, kotrež je za kolesowanski wobchad zamołwite, ma jeničce tři kolesa. W sakskim krajnym zarjedźe za wobswět, ratarstwo a geologiju porno tomu maja 77 kolesow za słužbne jězby.
Husyca w Mannheimje njeměješe drje wulki lóšt so na tradicionalnym jědźenju husycy na swjedźenju swjateho Měrćina wobdźělić. Gigotajo bě so wona 11. nowembra na terasy jednoho Mannheimskeho bydlenja schowała. Po informacijach policije drje nochcyše so cyle jednorje druhdźe schować. Za pomocu pytajo bě wobydlerka tuž zastojnikow wołała. Tola tež woni w husycy po zdaću žadyn zaćišć njezawostajichu. Dokelž njeje so huso z blaka hibało, dósta wone tam „nachwilny zwěrjeći azyl“.
To a tamne (13.11.17)
Wjace hač 400 lět stary templ w japanskej stolicy ma dinosawrija za stražowarja. Nimale dwaj metraj wysoka statuwa steji pódla hale w lěće 1600 załoženeho templa Shoganji. Skurilnu ideju měješe prěni duchowny Ryo Kasuga. Wón chce templ sčinić kóždemu zajimawy a wučby buddhizma šěrić. Zdobom wabi templ z planetarijom. Tež duchowni druhdźe wabja za swoje temple. Tak jedyn z nich rappuje, dalši wobhospodarja baru.
W Strasbourgu nimaja lětsa zbožo z hodownym štomom. Prěnja jědla bě so při podrězanju rozłamała. Druha steješe jenož někotre dny na centralnej městnosći Place Kléber, doniž njezwěsćichu 15 centimetrow dołhu škałobu w zdónku. Měšćanosta hodowneje stolicy – kaž so elsaske město rady mjenuje – z wěstotnych přičin rozsudźi štom podrězać. Jědlu čisło tři su mjeztym stajili.
To a tamne (10.11.17)
We wosebitym, z tryskowym ćěrjenjom wuhotowanym wobleku je Richard Browning z 41,53 kilometrami na hodźinu po jězorje wuchodnje Londona smalił. Tak je wón najspěšniši čłowjek swěta, kiž je spěšnosć z wosebitym woblekom docpěł. Browning bě z wuslědkom přewšo spokojom, je pak hnydom připowědźił, zo chce spěšnosć hišće raz přetrjechić.
80lětny Sewjerorynsko-Westfalčan je so wjac hač 30 króć do chorownje zadobył a tam w stwach pacientow drohoćinki kradnył. Wuměnkar je za swoju starobu chětro sportowski. Wšako je prawidłownje přez wonkownu fasadu na balkony zalězł. Wottam bě jemu lochko so do jstwow dóstać. Nětko je jeho policija tola lepiła. Poslednje zadobywanje wšak dyrbješe 80lětny přiznać, k tamnym wón mjelči.
To a tamne (09.11.17)
Zasłuženy dowol porjadnje skazyła je mać swojemu synej w Kölnje. Wona bě policiju zawołała a zdźěliła, zo je 22lětny syn po wšěm zdaću sympatizant teroristiskeje milicy IS a zo poda so nětko do Egyptowskeje. Hišće na lětanišću zastojnicy młodeho muža zadźeržachu. Ale kaž so wukopa, chcyše wón woprawdźe jeno swój dowol w Egyptowskej přežiwić. Skónčnje policija jeho zaso pušći. Lětadło pak bě mjeztym bjez njeho wotlećało.
Rěčna asistentka Alexa předewzaća Amazon je w Pinnebergu pola Hamburga zasadźenje policije zawiniła. Asistentka bě w nocy wótře hudźbu zapinyła. Jako zastojnicy durje bydlenja wočinichu, pak zwěsćichu, zo bě Alexa sama doma. Kak a po kotrym puću je swój přikaz wuwjedła, njeje jasne. Wobsedźer bydlenja „smě“ zasadźenje nětko zapłaćić.
To a tamne (08.11.17)
We wuchodofriziskim Friedeburgu skići so ludźom njewšědny napohlad. Na terenje pjeriznarnje Onken ćaha wosebita lokomotiwa hdys a hdys mobilny kurjenc po 200metrowskej kolijowej čarje. 1 000 kokošow tam wšědnje něhdźe 900 jejow nanjese. Su-li kokoše trawu we wjesnym dźělu Marx wotžrali, ćehnje lokomotiwa kurjenc cyle jednorje po łuce połsta metrow dale.
Wowka bě dwanaćelětnej takrjec po- dowolowy wućek. Holca bě na wotpočnišću w porynsko-pfalcskim Mogendorfje na wróćojězbje swójby z dowola na nuznik šła. Staršej pak to pytnyłoj njejstaj, dokelž bě wona we wulkim awće na cyle zadnim sydle sedźała, a jědźeštaj z třomi dalšimi dźěćimi dale. Mjeztym běchu sobudźěłaćerjo parkowanišća wowku informowali, kotraž z dwě hodźinje zdaleneho Würzburga po holcu přijědźe.
To a tamne (07.11.17)
Komu jenož koleso słuša? Zastojnik bě sej je minjenu srjedu wot pasanta w Berlinje wupožčił, zo móhł wikowarja drogow přesćěhać. Krótko do toho bě z wukazom zajeća pytaneho skućićela na dróze spóznał. Kedźbliwy policist tuž składnosć wuži a móžeše wikowarja drogow z pomocu kolesa dosćahnyć a zajeć. Dotal pak zastojnik wobsedźerja kolesa podarmo pyta. W chwatku bě wón zabył sej mjeno pomocliweje wosoby napisać.
Pjeć kilogramow ćežka cukini je so w badensko-württembergskim Brettenje wo nachwilnu napjatosć postarała. 81lětny muž bě policiju zawołał a twjerdźił, zo leži na jeho zahrodźe bomba. Kaž pak so wukopa, jednaše so wo 40 centimetrow dołhu cukini. Po wšěm zdaću běchu ju njeznaći přez žiwy płót na zahrodu wuměnkarja ćisnyli.
To a tamne (06.11.17)
W zachodźe domskeho parkował je 82lětny w Badensko-Württembergskej. Poprawom chcyše wróćo do swojeje garaže jěć, trjechił pak je napřećo ležace schodźišćo wjaceswójbneho domu. Wuměnkar bě spinadło a płunowy pedal zaměnił, a tak steješe skónčnje mjez sćěnomaj we wochěži susodow.
Mylnje na Wšěch swjatych w poprawom zawrjenej kupnicy w Stuttgarće nakupować chcyštaj mužej w starobje 28 a 42 lět. Po wšěm zdaću njejstaj na swjaty dźeń mysliłoj. Njewotwisnje jedyn wot tamneho dóstaštaj so wobaj přez defektne zachodne durje do kupnicy a hakle při kasy pytnyštaj, zo we wobchodźe scyła žanoho personala njebě. Jako alarm zaskoči, zawołaštaj policiju. Tež zastojnicy zwěsćichu defekt durjow. Mužej wšak dyrbještaj twory zaso do polcow zestajeć a kupnicu z prózdnej tobołu wopušćić.
To a tamne (03.11.17)
Metoda młodeho muža, piwowu blešku wočinić, je so wo porjadny chaos postarała. W Osnabrückskim kinje bě sej 29lětny popjerjowu sprayjowu tyzu za to k pomocy wzał. Při tym dósta so šćipaty płun z kartuše sprayjoweje tyzy, na čož 200 ludźi kinowu žurlu wopušći. Hakle po połhodźinskim přewětrenju žurle móžachu sej wopytowarjo skónčnje film tola hišće wobhladać.
Šimpansa Robby je po 46 žiwjenskich lětach swój hobby našoł a nětko moluje. Tola nic z porstami, kaž bychmy to snano wočakowali, ale kaž prawy wuměłc ze seršćowcom. Skótna lěkarka bě Robbyjej tónle hobby zmóžniła a jemu seršćowcy, barby a stafelaju sobu přinjesła. Šimpansa bydli w cirkusu Belly delnjosakskeho Celle, hdźež pak hižo před publikumom njewustupuje. Swój wólny čas wupjelnja tuž nětko z molowanjom.
To a tamne (02.11.17)
Mać sy na wšě časy. Tole pokazuje 98lětna Ada Keating z Wulkeje Britaniskeje, kotraž je k 80lětnemu synej do starownje ćahnyła. Tak móže so bóle wo njeho starać, kaž praji. Syn bě cyłe žiwjenje pola maćerje bydlił, jenož lěto přebywaše sam w starowni. Kóždy wječor móže Ada Keating swojemu synej nětko zaso dobru nóc přeć. Dale so wo to stara, zo wón rano sčasom za snědanskim blidom sedźi. Zhromadnje hladataj wonaj telewiziju abo hrajetaj hry, přeradźi Ada.
Wosebita narodna jědź Schäufele je na tym wina, zo dyrbjachu na posedźenju měšćanskeje rady w frankowskim Zirndorfje wažne wobzamknjenja přestorčić. Wjac hač połojca měšćanskich radźićelow bě mjenujcy na wotewrjenju wobchoda, hdźež poskićachu delikatesu Schäufele. Tak njemóžachu so wězo na posedźenju wobdźělić.
To a tamne (01.11.17)
Z widłowym staplowakom dohromady něhdźe 40 awtow wobškodźił je wopity muž w nocy na njedźelu w Lübeckskim přistawje. Škoda móhła hač do miliona eurow wučinjeć, trochuje policija. Zastojnicy běchu na 32 tonow ćežki staplowak zalězli, 28lětneho skućićela zadźerželi, sputali a sobu wzali.
Po 42 lětach pytanja su Floru Stevens z ameriskeho města Monticello nětko připadnje w starowni našli. Tam njebě wona ženje wjace hač dwě słowje prajiła. Jako pak jej wobraz z lěta 1975 pokazachu, zawoła wona „ja“. W starowni znajachu mjeztym 78lětnu z mjenom Flora Harris. Kaž z medicinskich podłožkow wuchadźa, přebywaše wona hižo we wjacorych hladarnjach. Demency dla njemóže wo swojim dóńće hač do dźensnišeho rozprawjeć. Mandźelski bě ju 1975 k lěkarjej dowjezł. Wot toho časa bě zhubjena. Sheriff Monticella je zbožowny. Nětko wón skónčnje wě, zo so Florje derje dźe.
