To a tamne (01.08.18)
Při twarskich dźěłach kóčku přewidźeli a pod garažu mylnje sobu zabetonowali su dźěłaćerjo w badensko-württembergskim Brettenje. Jako wobydlerjo tele dny stajnje zaso mjawčenje słyšachu, su za kóčku pytali. A zawčerawšim wječor ju nańdźechu. Hibać drje so wona hišće móžeše, přez wusku škałbu pak so sama njewuswobodźi. Škałbu su na to najprjedy trochu powjetšili, zo bychu Maine-coon-micku z picu a wodu zastarali. Wčera ju skónčnje wuswobodźichu.
Za přistajenych pohrjebnych předewzaćow płaći to samsne kaž za wšitke tamne powołanja, w kotrychž maja ludźo ćežke zběhać. To postaji nětko Stuttgartske socialne sudnistwo. We wosebitym padźe dźěše wo přistajeneho pochowanskeho instituta, kiž je při zběhnjenju ćěła z łoža trawmu přezběhnjenja poćerpjeł. Tydźenje njemóžeše wón bolosćow dla swoje dźěło wukonjeć. Njezbožowa kasa pak nochcyše płaćić. Nětko ma to nachwatać.
To a tamne (31.07.18)
Z črijemi derje pjelnjeny kamor su paduši w Erfurće spakosćili. Tam bě žona minjenu sobotu přećahnyła. Dokelž njemóžeše wšitko naraz wotnjesć, je kamor w lifće stejo wostajiła. Jako so tón po jězbje do štyrnateje etaže zaso do přizemja nawróći, bě kamor fuk a z nim cyłych dwaceći porow čriji.
Naheho kolesowarja ze spěšnosću 47 kilometrow na hodźinu bě błyskač w Kielu zapopadnył. Policija je wobraz wozjewiła a na to skedźbniła, zo maja tež kolesowarjo spěšnosć wobkedźbować. Na spomnjenym wotrězku je dźě jenož 30 km/h dowolene. Błyskač bě muža, kiž měješe jenož nohajcy a črije wobute, njedawno w 23.14 hodź. lepił. Dokelž pak njewědźa, komu měli chłostanku słać, drje njetrjeba nahi kolesowar ze žanej pokutu ličić.
To a tamne (30.07.18)
Listowu wobalku a w njej 1 425 eurow je muž w delnjofrankskim Marktheidenfeldźe před swojej ležownosću namakał. Sprawny namakar list pola policije woteda. Tak njeje jenož wobsedźerja pjenjez, ale tež kwasny porik wozbožił: Pjenjezy we wobalce běchu mjenujcy za kwasnu jězbu myslene, kaž z gratulaciskeje karty wuchadźeše.
Pozdatne klepanje z rowa na kěrchowje w posaarskim Losheimje je zasadźenje policije a wohnjoweje wobory zawiniło. 56lětny bě tam spodźiwne klepanje słyšał a so wulce starosćeše, zo bu snano něchtó žiwy pohrjebany. Kěrchow su tuž dokładnje přepytali. Tež chorobne awto bu zawołane, zo bychu pomocnicy pozdatny wopor spěšnje zastarali. W rowje, z kotrehož bě muž haru słyšał, pak leži hižo dlěje zemrěta žona. Zasadźenje wukopa so skónčnje jako wopačny alarm.
To a tamne (27.07.18)
Sam ze swojej Cessnu, małej jednopropelerowej mašinu, je so Praski pilot-akrobat Roman Kramařík na woblět zemjekule podał. Hač do 6. septembra chce wón jako prěni čěski lětar globalny kołolět zdokonjeć. Při tym je 26 mjezypřizemjenjow w najwšelakorišich krajach předwidźanych. Prěnje je w Běłohrodźe było. Přelećo europski kontinent zaměri so Kramařík na Bliski wuchod, zwotkelž póńdźe do Indiskeje a Japanskeje, a přeprěčo Pacifik załoži wón do USA.
Njetopyrje w spanskej stwě su w Stuttgarće zasadźenje policije zawinowali. Žona zastojnikow informowaše, zo je so hač do dźesać zwěrjatow do jeje bydlenja w štwórtym poschodźe zabłudźiło. Jako policisća dojědźechu, běchu hišće tři njetopyrje w bydlenju. Z gardinu móžachu kruće škitane zwěrjata popadnyć a w bliskim parku do swobody pušćić.
To a tamne (26.07.18)
Na wulki nawal so sakske stawnistwa přichodny měsac hotuja. Njewšědnje wjele porikow je so 18.8.2018 za stawniski kwas přizjewiło, kaž stawnistwa w Lipsku, Drježdźanach a Kamjenicy zdźělichu. Jeničce w Drježdźanach maja tón dźeń 39 přizjewjenjow. Kaž zamołwići zdźěla, chcedźa składnostnje „palencoweje ličby“ přidatny personal zasadźić.
Pistolu a bombu namakał je muž w hessenskim Ginsheimje njedaloko Mainza, jako w Rynje płuwaše. Na tutym městnje bě woda runje meter hłuboka. Muž wuhlada we wodźe pistolu, ju zběhny a na pobrjoh donjese. Pódla pistole ležeše dalši, njedefinujomny objekt. Přiwołana policija spěšnje spózna, zo jedna so wo 15 kilogramow ćežku britisku bombu z Druheje swětoweje wójny. Fachowcy pistolu a bombu sobuwzachu, po tym zo běchu wotrězk při rěce zaraćili.
To a tamne (25.07.18)
Wulke mnóstwo mjasa su njeznaći kónc tydźenja z předawanskeje budki w hornjopfalcowskim Weidenje pokradnyli. Nětko policija slědźi, hdźe su so runočasnje wjetše grilowanske partyje wotměli. Wobsedźer budki dyrbješe póndźelu zwěsćić, zo pobrachuja tři kašćiki piwa, 60 steakow, 40 hamburgerow a płunowa bleša. „Z tym móžeš cyłu kompaniju zastarać“, rěčnik policije rjekny. Nětko nadźijeja so pokiwow swědkow.
Woblubowane lubosćinske zamki na Kölnskim Hohenzollernskim mosće tam najprjedy raz wostanu. Po rozprawach wo móžnej demontaži železnica zdźěla, zo nima planowane, turistisku atrakciju wotstronić. Rěčnik železnicy bě póndźelu připowědźił, zo dyrbja zamki poněčim wotstronić, zo móhli móst znowa wobarbić a tak přećiwo zerzawcej škitać. Tole pak je nětko wotstorčene.
To a tamne (24.07.18)
Bjez chłostanja drje wostanu fanojo spěwarki Heleny Fischer, kotřiž běchu za čas jeje koncerta w Frankfurće nad Mohanom na awtodróze parkowali, policija zdźěli. Něhdźe sto wopytowarjow běchu swoje awta na A 3 stejo wostajili, zo bychu dypkownje do bliskeho stadiona doběželi. Tež busy zastachu, a dachu wopytowarjam koncerta wulězć. Přiwšěm policija warnowaše, to přichodny króć zaso tak činić.
Wačokownju lětadła wočinił je psyk, jako so mašina lětanišću ruskeje stolicy Moskwy bližeše. Zwěrjo bě so we wačokowni Boeing 737 z klětki wudobyło a mylnje na knefl tłóčiło, z kotrymž so durje wočinja. Hnydom system pilota alarmowaše, kotryž dyrbješe na to nuzowe přizemjenje zahajić, dokelž bě so ćišć we wysokosći 4 000 metrow znižił. Lětadło móžeše přizemić, nichtó so njezrani.
To a tamne (23.07.18)
Nimokulił je so pospyt kuriozneho swětoweho rekorda w Berlinje: Runje 146 daklow je so zhromadnje ze swojimi wobsedźerjemi w měšćanskej štwórći Lichtenrade zhromadźiło. Organizatorojo pospyta běchu 666 daklow wočakowali, zo móhli dotalny rekord 601 dakla, kiž běchu w měrcu w Jendźelskej nastajili, přetrjechić. Najebać to rěčachu zamołwići wo „wulkotnym swjedźenju“.
Pod hesłom „mazane hry za čistu wěc“ su w Brunsbüttelu „Wattolümpiadu 2018“ přewjedli. Wólnočasni sportowcy nastupichu w zdźěla skurilnych kostimach w kopanćy, mjetańcy, wolejbulu a napřemoběhu w błóće Sewjerneho morja. Přiwšěm mějachu wobdźělnicy ze wšeje Němskeje a bliskeho wukraja jenož štyri hodźiny chwile, doniž njebě hrajnišćo zaso wot morja zapławjene. Dochody darichu towaršnosći přećiwo rakej.
To a tamne (20.07.18)
Pod łožom před policiju so schował a tam tčacy wostał je muž w durinskim Steinachu. 28lětny dyrbješe zastojnikow prosyć, zo jeho wuswobodźa. Woni tuž łožo nabok sunychu, pytaneho hnydom sputachu a do policajskeho awta přewodźachu. Běchu dźě k bydlenju muža přijěli, zo bychu jeho zajeli. Nětko dyrbi 28lětny sydom měsacow wohroženja dla w jastwje wotsedźeć.
Muzej pod wodu maja nětko dwaj kilometraj před pobrjohom Floridy w Mexiskim zaliwje. Zajimcy móža z wotpowědnym nurjenskim wuhotowanjom sydom skulpturow 18 metrow hłuboko wobdźiwać. Je to prěni podwódny muzej USA. Zastup do njeho je darmotny. Wustajene eksponaty ameriskich wuměłcow – tak na přikład propeler, oktopus abo podnurjak francoskeho mórskeho slědźerja Jacquesa Cousteawa, ale tež nop – chcedźa kóžde lěto z hinašimi wuměnić.
To a tamne (19.07.18)
Na 2 300 kilometrow dołhi puć do ruskeho Wjelikeho Nowgoroda, 180 kilometrow južnje Pětrohroda, je so kolona konjacych zapřahow wčera w braniborskim Brücku nastajiła. Dlěje hač dwaj měsacaj budźe 18 ćežkich koni z dźewjeć planowymi wozami po puću. Pozastać chcedźa na 70 stacijach. Sobu maja ekstra za akciju zhotowjeny měrowy zwóń, kotryž ma na kóždej staciji zaklinčeć, zo bychu za swobodnu a měrliwu Europu wabili.
Nócneho měšćanostu chcedźa dźensa wječor w Mannheimje wuzwolić. Dohromady dźesać ludźi je so za zastojnstwo přizjewiło. Hłowny nadawk tajkeho měšćanosty je, nócnu klubowu a korčmowu scenu spěchować, bjez toho zo bychu so wobydlerjo postorkowali.
