To a tamne (17.04.15)
Do wodoweje hrjebje skočiło je girafowe młodźo Nakuru při swojim prěnim zjawnym wustupje w Hamburgskej coologiskej zahrodźe. Šok w dźesać stopnjow zymnej wodźe drje wone tak spěšnje njepřewinje, rjekny jeho hladarka nowinarjam. Pjeć ludźi pomhaše girafu wuchować. Na zbožo njebě so wona zraniła.
Muku město přilubjenych smartphonow chcyše wobšudnik wobsedźerjej wobchoda za mobilne telefony w Hannoveru podsunyć. Za 38 pječa originalnje zapakowanych telefonow žadane 14 000 eurow bě mějićel wobchoda hižo přihotował, jako w poslednim wokomiku dwělowaše. Jebak hrabny pjenjezy a chcyše ćeknyć. Z pomocu wobchodoweho detektiwa pak jeho zadźeržachu. Přiwołana policija namaka w tyzkach jenož muku.
To a tamne (16.04.15)
Noticna cedlka Güntera Schabowskeho, něhdyšeho čłona politběrowa SED, z historiskeje nowinarskeje konferency 9. nowembra 1989, bu po lětdźesatkach zaso namakana a je wot dźensnišeho w Bonnskim Domje stawiznow wustajena. Schabowski připowědźi tehdy nowy pućowanski zakoń NDR, po kotrymž směli ludźo do zapada pućować směć. Hišće samsnu nóc Berlinska murja padny. Papjerku da wón pozdźišo znatemu. Wot toho časa bě wona zhubjena.
Strowe pjatniki – wšitko holcy – je žona w staće USA Texasu porodźiła. Po informacijach kliniki w Houstonje je to prěni raz w stawiznach USA, zo su so při porodźe tajkeho razu jenož holcy narodźili. 31lětnu mać běchu do toho z hormonami lěkowali. Dźěći, kotrež přińdźechu w 28. tydźenju samodruhosće na swět, waža mjez 900 a 1 000 gramami.
To a tamne (15.04.15)
Wosrjedź awtodróhi parkować smědźa wopytowarjo 13. junija składnostnje planowaneho Dnja Zwjazkoweje wobory w sewjerohessenskim Fritzlaru. Wočakowanych 100 000 hosći dla njewidźa tam žaneje hinašeje móžnosće hač 26 kilometrow dołhi wotrězk A 49 do wobeju směrow zawrěć a jako hoberske parkowanišćo zarjadować. Busy maja wopytowarjow do kaserny wozyć.
Trójniki porodźiła je kruwa w badensko-württembergskim Fischerbachu. Je to mała sensacija, kaž fachowcy ratarskeho ministerstwa informuja. Móžnosć tajkeho poroda wučinja runje 0,007 procentow. Spočatnje so starosćachu, zo móhli ćelatka přesłabe być. Mjeztym pak wone zhromadnje z tamnymi na pastwje ratarja skakaja. Fachowcy chcedźa nětko wobkedźbować, hač maja ćelata-trójniki wosebje wuski zwisk mjez sobu.
To a tamne (14.04.15)
Wusnjeneho sobudźěłaćerja lětanišća dla je lětadło předewzaća Alaska Airlines zaso přizemić dyrbjało. Muž bě sej w kófrowym rumje pasažěrskeje mašiny drěmnył a hakle po wotlěće zaso wotućił. Pilot kłapanje pod nim słyšeše a so zawróći, kaž lětanske předewzaće zdźěla. Muža dowjezechu do chorownje. Nětko přepytuja, čehodla bě sej runje w lětadle wusnył.
27 kilometrow bjez lokomotiwnika dozady jěł je ćah w Bangladeshu. Lokomotiwnik bě na dwórnišću wulězł a pomocnikej kazał, motor ćaha hižo startować. Tón pak system wopak posłužowaše, tak zo ćah dozady jědźeše. Jako lokomotiwnik tole pytny, ćah hižo z dwórnišća smaleše. Po něšto času to tež ludźo pytnychu a ćah zhromadnje z kontrolerom jězdźenkow zadźeržachu. Lokomotiwnika na to pušćichu.
To a tamne (13.04.15)
Z kolijow wuskočiła je tramwajka w pólskim měsće Łódźi, z kotrejž bě statny prezident Bronisław Komorowski runje po puću na wólbnobojowe zarjadowanje. „Někotři drje nětko tukaja, zo jedna so wo sabotažu“, žortowaše liberalnokonserwatiwny politikar w sćelaku TVP. Stražnicy pólskeho prezidenta na to k busej přewodźachu. Při njezbožu so nichtó njezrani.
Štyri lěta po tsunamiju je wrak japanskeho rybarskeho čołma pobrjóh USA docpěł. W nim nańdźechu sudobjo ze žiwymi makrelemi, kotrež běchu japanscy rybarjo do katastrofy popadnyli. Tsunami bě 11. měrca 2011 čołm sobu storhnył. Wot toho časa bě wona 8 000 kilometrow hač k pobrjohej stata Oregon po puću. Ryby přepodadźa akwarijej.
To a tamne (10.04.15)
Stres a hněw namócnje přewinyć – tajki serwis poskićeja wot spočatka měrca tež w Mnichowje. Prěni projekt tohole razu wobsteji hižo w Halle nad Solawu. We wosebitych rumnosćach móža ludźo za wěsty popłatk wuhotowanje běrowa abo bydlenja rozbić. W Mnichowje su předewšěm běrowy prašane, kaž jich wobhospodarjer zdźěla. Fachowcy maja swoje dwěle. Woni radźa, za přičinami hněwa pytać a problem měrniwje rozrisać.
Z awtom do parkoweho hata starownje zajěła je 78lětna žona w Krefeldźe. Při wuparkowanju stupi wona z tajkej mocu na pedal płuna, zo awto přez kerčinu a ławku zajědźe, doniž w haće stejo njewosta. Při tym hišće dalše awto wobškodźi. Žonu móžachu wuswobodźić. Wona klučiki awta nětko dobrowólnje woteda.
To a tamne (09.04.15)
Njewšědnu wuchowansku akciju je pos we Warsteinje zawinił. 16lětny Yorkshire-terrier bě so w nocy na wutoru zhubił. Wutoru wječor słyšeše pěšk psa w kanalizaciji žałosćić. Prawdźepodobnje bě nimale slepe skoćo do sto metrow dołheje roły zalězło a so tam zatłusnyło. Přiwołana twarska firma dyrbješe samo dróhu horje ryć, zo móhła psa wuswobodźić. Hač zawěsćernja kóšty dźěłow přewozmje, hišće njewědźa.
K hotowej bijeńcy je při tankowni w badensko-württembergskim Ellwangenje dóšło. 48lětny rjedźeše po tankowanju hišće wokna swojeho awta. Za nim čakacemu 28lětnemu traješe to předołho. Dokelž starši šofer namołwu młódšeho, zo měł wotjěć, ignorowaše, dóńdźe k werbalnemu a skónčnje namócnemu rozestajenju, při čimž so 28lětny zrani. Tón je nětko staršeho šofera wobskoržił.
To a tamne (08.04.15)
Wróny su w Japanskej mały chaos zawinili, wužiwajo metalowe dźěle na milinowym sćežoru za twar hnězda. Tak dóńdźe ke krótkospjeću. We wjace hač 160 domjacnosćach na kupje Shikoku wupadny na to milina, kaž nowiny rozprawjeja. Tež ample křižowanišća so naraz hasnychu, štož wjedźeše k wobchadnemu njezbožu.
Sto litrow lěpka na křižowanišću w Aucklandźe, najwjetšim měsće Nowoseelandskeje, je šoferam dźensa tójšto mjerzanja načiniło. Policija dyrbješe křižowanišćo w powołanskim wobchadźe lěpka dla zawrěć, zo móhli wohnjowi wobornicy lěpk wotstronić. Tole wjedźeše k haćenjam w druhich dźělach města. Štó bě telko lěpka zhubił, hišće přepytuja.
To a tamne (07.04.15)
17lětny šuler z New Yorka bu na wšitkich wosom ameriskich elitowych uniwersitach tak mjenowaneje IVY league přiwzaty. Wone su požadanje a nastawk rodźeneho Nigeričana, kiž bě ze staršimaj před wosom lětami do USA přićahnył, přiwzali. 17lětny chce sej wšitke wysoke šule woměrje wobhladać, tenděruje pak hižo na uniwersitu w Yale, kaž telewizijnemu sćelakej CNN rjekny.
Měsacy dołho je čěska policija pytała za zhubjenymi mólbami mjezynarodneho zetkanja molerjow na hrodźe Valtice. Nětko je so wukopało, zo bě je zarjadnik hrodu, na kotrymž so forum „Wulki format“ wotmě, we wobłuku rjedźenskeje akcije zrumował. Policija bě skerje na rubježnistwo tukała. Wolóženje, zo su mólby w hódnoće 170 000 eurow zaso našli, je wulke. Zo je tak drohe wěcy zrumował, zarjadnik zawěsće wědźał njeje.
To a tamne (02.04.15)
Dlěša hač 2 000 metrow bě kołbasa, kotruž su rěznicy składnostnje měšćanskeho swjedźenja w serbiskim městačku Turja zhotowili. 28 swini dyrbjachu za to zarězać, zo bychu trěbne 3 400 kilogramow mjasa měli. Dale předźěłachu 60 kilogramow sele, 25 kilogramow papriki kaž tež po dźesać kilogramach čorny popjer a kobołk. Lěto wob lěto spytaja w Turi dlěšu kołbasu zhotowjeć.
Při twarskich dźěłach za nakupowanišćo su w awstriskim Tullnje nad Dunajom dospołny zdźeržany kosćowc kamela ze 17. lětstotka našli. Zwěrjo słušeše pozdatnje k wójsku Osmanow, kotřiž 1683 Wien woblěhowachu. Samo na sebi buchu kamele tehdy z wojerskich přičin zjědźene abo na hinaše wašnje wužiwane. Dospołne kosćowcy su tuž jara rědke. Móžno tež je, zo je kamel jako eksot do Awstriskeje přišoł a tam zahinył.
