To a tamne (09.06.15)
W zwučowanskim lěhwje za wubědźowanje zwěrjećeje „Miss Germany“ je tuchwilu 20 dejkow we wuchodofriziskim Leerje. Tam přihotuja so na mjezynarodne wurisanje, kotrež budźe zajutřišim w Oldenburgu. Dejki smědźa telko syna žrać, kelkož chcedźa, zo bychu dostojnje wupadali. Nimo toho je wšědnje myja, šrofuja a samo frizěruja.
Na teren němskeje tajneje słužby BND w Berlinje su so w nocy třo mužojo zabłudźili, kotřiž pytachu z pomocu nawigaciskeho nastroja najkrótši puć k přichodnej staciji podzemskeje železnicy. Nětko pruwuja, kak móžeše so tole stać, wšako je kompleks kruće wobstražowany a z wysokim płotom wobdaty.
To a tamne (08.06.15)
Sydomnaće muži je so po swjedźenju w Schleswigsko-Holsteinskej do małotransportera tłóčiło, kotryž ma poprawom jenož městno za šesćoch. Nimo toho mějachu hišće městno za piwowe ławki a kašćiki. Hač na šofera běchu wšitcy pjeni. Policistam bě awto w Plönje w nocy na njedźelu napadnyło, dokelž zdawaše so chětro ćežke być. Při kontroli nańdźechu sedźacych a ležacych muži. Pjećo smědźachu ze šoferom dale jěć, ći tamni dyrbjachu sej taksi skazać.
Hnydom dwójce dospołnje wopiteho za wodźidłom awta je policija młodeho muža w sewjerorynsko-westfalskim Troisdorfje lepiła. 31lětny bě tak pjany, zo móžeše při alkoholowej kontroli lědma hišće stać. Jězbnu dowolnosć jemu na to wzachu. Hodźiny pozdźišo bě samsny muž zaso z awtom po puću. Tónkróć zastojnicy klučiki sćazachu.
To a tamne (05.06.15)
Queen raz cyle blisko dožiwić smědźa štyrjo Němcy kónc junija w Berlinje. Na wopyće britiskeje kralowny změja woni składnosć, Elizabeth II. wosobinsce zeznać. Britiske wulkopósłanstwo je štyrjoch wobdźělnikow z cyłkownje 1 200 kandidatow za zetkanje z 89lětnej wuzwoliło. Dobyćerjo wobdźěla so mjez druhim na zahrodowej party wulkopósłanca, maja pak wšelke prawidła dodźeržeć: Selfieje z kralownu su absolutnje tabu.
Muža z drastoweho kontejnera wuswobodźiła je Berlinska wohnjowa wobora. Wón bě w nocy na štwórtk w Friedrichshainje přez wěko do kontejnera zalězł. Te pak njehodźa so wotnutřka wotewrěć, dokelž so awtomatisce zamkaja. Wobydler bě muža wobkedźbował a wołaše wohnjowu woboru. Wona kontejner namócnje wočini a nańdźe w nim „zadobywarja“, kiž bě so mjeztym spać lehnył.
To a tamne (04.06.15)
Z transparentami, demonstracijemi a internetnymi akcijemi so wobydlerjo starownje w bayerskim Forchheimje hrožacemu spotorhanju swojeho domu wobaraja. Město bě wukazało twarjenje wotstronić, dokelž su stwy přemałe. Přetwar njeje ze statiskich přičin hižo móžny. Nastać ma nowotwar z apartementami. Wobydlerjo hladarnje so boja, zo zhubja swoju zhromadnosć, socialne kontakty a dotal zwučenu wokolinu.
Hdyž maš awto bjez přizjewjenja a zawěsćenja, čisłowe taflički kradnjene, wodźiš jězdźidło bjez dowolnosće, za to chětro natutkany – to napadnješ. 34lětny pak tarnowaše swój transporter z módrej swěcu na třěše a poda so na awtodróhu. Přiwšěm mějachu nimojěducy policisća podhlad, zo njesedźi za wodźidłom awta kolega a zadźeržachu je. Šoferej hrozy nětko chłostanske jednanje.
To a tamne (03.06.15)
Kolesowarja na awtodróze zadźeržała je policija pola Nossena. Z Bołharskeje pochadźacy muž bě jězdnju wotlěwa doprawa přeprěčił. Při tym šmórny so jeho awto. Najebać to 50lětny na kromje dale jědźeše. Policistam wón rozłoži, zo je na wulěće do Mnichowa. Kolesowar dyrbi so nětko strašneho zasahnjenja do wobchada dla zamołwić.
Lěta dołho bjez jězbneje dowolnosće, bjez přizjewjenja a zawěsćenja swojeho awta bě muž w Bayerskej po puću. Wón drje sej mysleše, zo wšo to njetrjeba, hdyž jenož jara pomału jězdźi. Policisća běchu jeho awto při spěšnosći 20 km/h zadźerželi, a wone njebě ani přizjewjene ani zawěsćene. Muž twjerdźeše, so stajnje tak pomału jězdźi a tuž žane papjery njetrjeba. Zastojnicy jeho powučichu: Jězbna dowolnosć hač do 6 km/h drje žana trěbna njeje, přizjewjenje a zawěsćenje jězdźidła pak přeco.
To a tamne (02.06.15)
Na wšě 37 milionow eurow zarunanja žada sej muž wot Berlinskeho hotela, dokelž bě so před nim na zalodźenej dróze wobsunył a sej nohu złamał. Wotpowědne jednanje su na Berlinskim krajnym sudnistwje zahajili. Muž argumentuje, zo dyrbješe jako předewzaćel złamaneje nohi dla twarski wulkoprojekt w Aziji wotprajić. Při tym je pječa 37 milionow eurow přisadźił.
Dospołnje wopiteho jěža su w nižozemskim Arnheimje namakali. Tón bě do toho z rozbiteje palencoweje bleše wšón jejkowy liker wušlapał, kaž Arnheimska zwěrjatownja zdźěla. Takle wopity ležeše jěž na puću, hdźež bychu jeho bjezmała přejěli. Wón bě tak pjany, zo so ani hižo njezakuli, jako jeho sobudźěłaćerjo nuzoweje zwěrjaceje słužby zběhnychu. Nětko ma so w zwěrjatowni wuspać. „Hdyž je zaso strózby, jeho w přirodźe wusadźimy“, wottam rěkaše.
To a tamne (01.06.15)
Marihuanu w płokanskej mašinje zabył je 19lětny w Frankfurće nad Mohanom. Sobudźěłaćerjo wobchoda za elektroniku wzachu staru mašinu sobu, po tym zo běchu nowu přiwjezli. Jako so do zawoda wróćichu, čujachu woni sylnu wóń a namakachu w płokawje titku z 50 gramami wopojneho jěda. Z wurěču, zo je drastu w mašinje zabył, chcyše sej młody muž drogi zaso wotewzać. To pak čakaše hižo policija, zo by jeho sobu wzała.
Hotowu drohoćinku našli su sobudźěłaćerjo recyclingoweje firmy mjez elektroniskimi nastrojemi, kotrež bě wudowa po smjerći muža přiwjezła: prěni kompjuter Apple z lěta 1976. Runje 200 eksemplarow tohole typa běchu swój čas twarili. Firmje so poradźi, nastroj za 180 000 eurow zajimcej předać. Połojca wunoška přisteji po zasadach firmy darićelce. Ta pak njebě mjeno zawostajiła.
To a tamne (29.05.15)
Wobchad awtodróhi haćiło je wojerske lětadło wčera mjez Berlinom a Mnichowom. Po A 9 transportowachu mašinu typa Eurofighter do hornjobayerskeho Manchinga, hdźež chcedźa ju zwuporjedźeć. Dokelž bě nastroj šěrši hač jědnaće metrow, njemóžachu jón awta přesćahnyć. Wodźer wosebiteho nakładneho wozydła, kotrež njepohibowaše so spěšnišo hač 60 km/h, tuž wospjet na šěršich městnach zastawaše, zo móhli za nim jěduce awta nimo jěć. Lětadło bě so při manewru wobškodźiło.
Z mlokom palace so awto hašał je wodźer nakładneho awta pola Kulmbacha. Kaž policija zdźěli, bě so wobruč horceho borzdźidła dla zapaliła. Šofer spěšnje reagowaše a da něšto mloka z wulkeho tanka wuběžeć, zo by z nim woheń hašał. Jako policija dojědźe, bě wón płomjenja hižo podusył a tak móžnym wjetšim škodam zadźěwał.
To a tamne (28.05.15)
Swoje stare ručne tobołki wotbyć a město toho hinaše dóstać móža žony njedźelu, 7. junija, w Berlinje. K akciji namołwja syć susodskeje pomocy Polly & Bob. Štóž žanu tobołu njenamaka, dóstanje kupon, kotryž za přichodnu bursu tajkeho razu płaći. Kotra žona smě při swojoraznej akciji w jednej piwowej zahrodźe w Friedrichshainje jako prěnja tobołku wuzwolić, to chcedźa wulosować.
Prototyp prěnjeho domjaceho nastroja swěta k zwěsćenju samodruhosće chcedźa w New Yorku přesadźować. Ameriska grafikowa designerka Margaret Crane bě test kónc 60tych lět minjeneho lětstotka wunamakała, informuje awkciski dom Bonhams. Bě to jedne z najrewolucionarnišich wunamakanjow, kotrež je žiwjenje tójšto ludźi a wosebje žonow zasadnje změniło, kaž w zdźělence domu rěka. Bonhams nadźija so 8 300 eurow.
To a tamne (27.05.15)
Plahowar nukli w durinskim Saalfeldźe změje přichodnje snano tójšto dorosta. Něhdźe 150 jeho nukli skakaše po jeho zahrodźe, po tym zo běchu njeznaći pukloty zwočinjeli. Kaž policija zdźěli, je 43lětny wobsedźer swoje zwěrjata sam zaso łójił a do puklotow stykał. Dokelž wón nukle hewak po splahu dźělene dźerži, je lochce móžno, zo wone jemu po wjacorych hodźinach na swobodźe bórze bohaty dorost wobradźa.
Samopaslena atrapa bomby za dźěćace narodniny je so w Dortmundźe wo zasadźenje policije postarała. Pěšcy nańdźechu blisko kazina tobołu z podhladnym wobsahom. Policija wokolinu zašlaha a skaza rumowarjow bombow. Młoda žona so přizjewi a situaciju rozjasni. Wona bě atrapu spasliła a w tobole schowała a nalěpk „dźěćace narodniny“ na nju zlěpiła. Policiji wšak za swjećenjom njebě.
