To a tamne (18.01.17)
K mjezynarodnemu dnjej joggingowych cholowow chce jedna z Mnichowskich kupnicow wšěm sekt wudać, kotřiž jutře w treningowych cholowach nakupować přińdu. Wabjenska akcija zbudźa wulki wothłós: Wjace hač 2 000 ludźi je připrajiło, zo přińdźe; 8 000 je w interneće swój zajim signalizowało. Poprawny dźeń joggingowych cholowow je sobotu. Kupnica pak chce tołkańcy zadźěwać, dokelž tam sobotu swójby nakupuja.
Konja z wodoweho basenka wuswobodźiła je wohnjowa wobora w Choćebuzu. Kóń bě wčera z pastwy w Depsku ćeknył a do poola skočił. 19 kameradow pool wuklumpa a namjeta do njeho słomjane walčki, po kotrychž móžeše skoćo skónčnje basenk zaso wopušćić. Wšón čas su wohnjowi wobornicy chribjet konja z ćopłej wodu wohrěwali. Wšako traješe akcija něhdźe tři hodźiny.
To a tamne (17.01.17)
Z hrajkanskej pistolu je 17lětny spytał pózdni wobchod w Berlinje-Friedrichs-hainje nadpadnyć – a bu zajaty. Młodostny bě wčera wječor do wobchoda zastupił a z pistolu, kotraž wupadaše kaž prawa bróń, předawarku a štyrjoch kupcow wohrozył. Jako wustróžana sobudźěłaćerka kasu spěšnje dosć njewočini, chcyše so rubježnik zaso zminyć. To jeho kupcaj hrabnyštaj a zadźeržeštaj, doniž policija njepřijědźe a „nadpadnika“ njezaja.
Třo natutkani policisća su w belgiskej stolicy Brüsselu zasadźenje kolegow zawinili. Zastojnicy sedźachu w kofejowni a pijachu alkohol, w uniformje a wobrónjeni. Policajske awto běchu w bliskosći wotstajili. Wopytowarjo pak mějachu zadźerženje wjesołeje trójki za spodźiwne a wołachu policiju. Jako kolegojo přijědźechu, spyta jedyn z třoch ćeknyć. Jim hrozy nětko disciplinarne jednanje.
To a tamne (16.01.17)
Problem zymumrěća chcedźa w Stuttgarće na cyle njeběrokratiske wašnje rozrisać. W zymje dźě trjebaja ludźo ćopłu drastu. A dokelž mnozy tajku nimaja, steji nětko na dróze, hdźež je wjele žiwjenja, drastowe wěšadło, z kotrehož móža so potrěbni posłužować. „Je-li ći zyma, sej něšto ćopłe wzmi! Chceš-li pomhać, wostaj něšto tu!“ steji na připrawjenej tafličce. Po wšěm zdaću tale namołwa skutkuje. Znajmjeńša wisachu tam dźensa wjacore ćopłe kabaty, a zymu mrějacy so rady posłužowachu.
Slědy w sněze su šofera w Pirmasensu přeradźili, kiž bě wopity njezbožo zawinił. Pasant wuhlada sobotu rano chětro wobškodźene awto, kotrež bě do před nim stejaceho jězdźidła zrazyło. Slědy w sněze wjedźechu wottam ke chěži, hdźež nańdźe policija 32lětneho natutkaneho, kiž hišće chětro za alkoholom „wonješe“.
To a tamne (13.01.17)
Jackpot při parkowanskim awtomaće dobył je 48lětny muž w bayerskim Memmingenje. Jako chcyše muž z pjećeurowskej bankowku parkowanski lisćik zapłaćić, wróći jemu defektny awtomat hromadu drobnych pjenjez – dokładnje 201,50 eurow. Sprawny muž wšak woteda pjenjezy na policajskej straži. Awtomat pak je mjeztym zwuporjedźany.
Móšeń z lódzymneje rěki wućahnył je wuchowanski płuwar w Hornjej Pfalcy a je tak žonje z wuskosćow pomhał. 30lětnej bě móšeń z pjenjezami, wupokazom a pjenježnej kartu w Ambergu do rěki Vils padnyła. Jeje synk bě do toho spytał swoju čapku do rěki ćisnyć. Mać drje móžeše tomu zadźěwać, při tym pak jeje móšeń do wody padny. Žona zawoła policija a ta towaršnosć za wuchowanje žiwjenja. Płuwar zalěze do rěki a móžeše 30lětnej móšeń skónčnje přepodać.
To a tamne (12.01.17)
Z wopušu w rěce zamjerzła je liška na Dunaju w Budapesće. Pomocnicy drje móžachu ju wuchować, wopuš pak dyrbjachu jej amputěrować. Móže so stać, zo dyrbja zwěrjeću sylnych zmjerznjenjow dla tež hišće nohu wotewzać. To pak so hakle přichodne dny pokaza. Hač je snano wjelk lišku do lodowych pasli wjedł, njeje znate.
Chětro wjele wusměšowanjow dyrbi sej pólski wonkowny minister Witold Waszczykowski lubić dać, po tym zo bě wón na wopyće w New Yorku wo kraju rěčał, kotryž scyła njeeksistuje. Žurnalistam wón powědaše, zo je jednanja ze San Escobarom wjedł. Měnješe pak karibiski stat San Cristóbal y Nieves. Nětko so jemu w interneće směja a wunamakaja stajnje nowe stawizny wo wonym nowym kraju. Spožčili su Waszczykowskemu tež titul „minister komiki“.
To a tamne (11.01.17)
Bojo so hładkich pućow staj sej mandźelskaj w Badensko-Württembergskej tójšto mjerzanja naparałoj. Dokelž bě so žona wčera w Lörrachu zasněženeje dróhi nastróžiła, dyrbješe jeje muž z awtom jěć, kotrež pak měješe jenož lětnje wobruče. Problem: Wón bě wopity a nima scyła žanu jězbnu dowolnosć. Na parkowanišću kupnicy policisća muža zeznachu, wědźo, zo jězdźić njesmě. Klučik awta wotewzawši wupisachu jemu skóržbu.
Při njewjedrje powalił je so lětstotki stary sławny mamutowy štom w Kaliforniskej, kotryž bě tam jako turistiska atrakcija znaty. Zliwki běchu pódu pod nim podryli, zdźěli pomocnik parka Calaveras Big Trees nowinarjam. Tak mjenowany „pioneer cabin tree“ wuchodnje kaliforniskeje stolicy Sacramento měješe w přewšo sylnym zdónku samo tunl, kotryž móžachu ludźo přeńć.
To a tamne (10.01.17)
Hejataj šoferaj awta staj w pfalcskim Frankenthalu zasadźenje policije zawiniłoj. Wobaj běštaj sej na wuskim puću napřećo přijěłoj, njepřińdźeštaj pak nimo sebje. Dokelž 49lětny muž runje tak kaž 36lětna šoferka wobaj na tym wobstawaštaj, zo tón tamny něhdźe 80 metrow wróćo storči, so tam třištwórć hodźiny ničo doprědka ani dozady njehibaše. Skónčnje wołaštaj policiju. Zastojnicy jimaj radźachu, wěc wzajomnje rozrisać. Jako woni po hodźinje hišće raz za nimaj pohladachu, běštej wobě awće preč.
Wopačny zbrašeny je spytał drogi do Šwicarskeje pašować. Wudawajo so jako wužiwar koleskateho stoła měješe 22lětny wosom kilogramow marihuany w zawku pod sobu schowane. Cłownicy pak jeho w ćahu na italsko-šwicarskej mjezy lepichu. a statne rěčnistwo je „zbrašeneho“ mjeztym wobskoržiło.
To a tamne (09.01.17)
Ekstremnje zeschnyty hodowny štom je so při zapalenju swěčki tak spěšnje wotpalił, zo je bydlensku stwu staršeju mandźelskeju w Mnichowje dospołnje zapusćił. Energija bě tak wulka, zo so škleńca bydlenskich duri pukny a napřećo ležace durje so wułamachu. Ekstremneje horcoty dla pušći so samo dźěl wobmjetka na wjerchu. Škodu trochuje wohnjowa wobora na wjace hac 50 000 eurow. 90lětneho muža dowjezechu do chorownje, dokelž měješe ćeže při dychanju. Mandźelska so njezrani.
Zwada mjez mužomaj při storkanju sněha w hornjofrankskim Hofje je nětko pad za policiju. Jedyn z muži bě sněh před awto susoda zestorkał, štož měješe tón za prowokaciju. Mjetaše tuž sněh tamnemu na dwór. Přiwołana policija wupisa na próstwu wobeju muži w starobje 56 a 75 lět skóržbu nućenja dla.
To a tamne (06.01.17)
Pisany powětrowy balon na nócnym njebju je zasadźenje policije pola Brandenburga nad Habolu zawinił. Wutoru wječor běchu zastojnicy wosebity objekt we wysokosći třoch metrow wobkedźbowali. Po krótkim přesćěhanju policija objekt dosahny, zo by jón identifikowała. Balonej připinjena bě cedlka z telefonowym čisłom wobsedźerja. Kaž so wukopa, bě jón třilětny hólčk ze staršimaj z Delnjosakskeje hižo silwester na jězbu pósłał. Nětko bě wón wězo jara wjesoły, zo bě runje policija jeho balon našła.
Nowolětny koncert w Nürnbergu bě za přihladowarja po wšěm zdaću tak wostudły, zo sej tam wusny. Jako ze sona wotući, wón wokoło so biješe, při čimž 600 eurow drohe nawoči susodki rozbi. Přiwołana policija wšak móžeše jeho změrować, zo w tymle padźe žadyn chłostajomny njeskutk njepředleži.
To a tamne (05.01.17)
Přibrjóh, posypany z plastikowymi jejami, bě překwapjenka dźěćom a staršim na wuchodofriziskej kupje Langeoog. Tam zběrachu domoródni a turisća wčera kilometry daloko město mušlow překwapjenske jejka, pjelnjene z hrajkami. „Jutry na Langeoog“ wobradźił je po wšěm zdaću hodowny wichor, kotryž bě někotre kontejnery tworow z łódźe sunył. „Cyle wěste pak tole hišće njeje“, kaž policija zdźěla. Pad nětko dokładnje přepytuja.
Kožany konopej wosrjedź puća je wutoru blisko Geeste w Emslandźe njezbožo zawiniło. 54lětna šoferka awta bě jón přewidźała a do njeho zrazyła. Na zbožo so jej ničo njesta. Awto je přiwšěm skóncowane. Kak bě so konopej na dróhu dóstał a hač je jón něchtó při transporće zhubił, dotal nichtó njewě. Tón, komuž słuša, njech to policiji přizjewi.
