25 tonow železniskich kolijow su paduši w mecklenburgsko-předpomorskim Salemje pokradnyli. Kolije słušachu k železniskej čarje, kotruž tuchwilu demontuja, zdźěli za wottwar zamołwita firma. Dźěłaćerjo běchu kolije před dnjemi wutwarili a šěsć metrow dołhe dźěle składowali. Kóždy tajki waži 325 kilogramow. Paduši su prawdźepodobnje ćežku techniku wužiwali. Cyłkownu hódnotu kolijow trochuja na 4 000 eurow.
Spodźiwny sudniski pad: Hessenske zarjadniske sudnistwo měješe dźensa rozsudźić, hač dyrbi Zwjazkowa banka žonje pjenjezy narunać, kotrež bě wona sama roztřihała. Mjeztym 90lětna žada sej 18 500 eurow. Prěnja instanca je tole wotpokazała, dokelž bě dźě žona wotpohladnje jednała. Dokelž pak móhło być, zo bě zawjerćana, dyrbi nětko zarjadniske sudnistwo rozsudźić.
Preč ćisnjeny dźěl póstniskeho kostima je we wuchodnej Hessenskej zasadźenje policije zawinił. Žona bě njedźelu w rěčce čłowječu ruku wuhladała a policiju zawołała, zo je ćěło namakała. Policija na to městno namakanki pola Bad Hersfelda zašlaha. Kriminalny technikar pak móžeše ludźi změrować: Ruka bě dźěl karnewaloweho kostima.
Z wótrej municiju chcedźa přichodne dny w čěskim městačku na dźiwje swinje třěleć. Při tym měrja so hajnicy na populaciju wosrjedź Mníšeka pod Brdy, ležaceho něhdźe 30 kilometrow juhozapadnje Prahi. W parku podłu rěčki, kotryž je mjez joggerami a wobsedźerjemi psow woblubowany, žiwori črjóda dźiwich swini. Za čas hońtwy budźe ludźom přistup do parka „kruće zakazany“, wšako jedna so wo „riskantnu naležnosć“.
Běrnjaca solotej město pjenjez: Rubježnik dyrbješe so při nadpadźe w Berlinskim měšćanskim dźělu Britz z darmotnej jědźu spokojić. W nocy na sobotu wohrožeše wón dwě přistajenej kioska. 56lětna sobudźěłaćerka jemu rozłoži, zo su dochody dnja hižo wotewzate. A jeje 24lětna kolegina poskići njeznatemu běrnjacu solotej a napojej. Ze skromnym rubjenstwom so muž na kolesu zminy.
Dospołnje překwapjeny bě hrajer lota w Posaarskej, jako zhoni, što bě w Hrě 77 woprawdźe dobył. Poprawom bě wón ze 77 000 eurami ličił, štož je pola šěsć prawych ličbow z wašnjom. Štož pak njewědźeše: Loterijowe předewzaće dyrbješe kónc tydźenja, prěni króć w stawiznach, nakopjeny jackpot rozdźělić, byrnjež nichtó sydom prawych ličbow njeměł. Tak zwyši so dobyće Posaarčana na dobre 902 961,80 eurow.
Štyri metry dołheho pytona su na parkowanišću w šwabskim Lorchu namakali. Dokelž ludźo njewědźachu, hač je reptil mortwy abo hač so zymy dla njehiba, wołachu skótneho lěkarja. Tón móžeše jenož hišće smjerć hada zwěsćić. Kak je pyton, kotryž swoje wopory zadusy, na parkowanišćo přišoł, nichtó njewě.
We wjacorych domach runočasnje swěcu hasnył je šofer awta w Hagenje. Chětro wopity a přespěšnje jěducy njezamó 25lětny srjedu wječor w křiwicy awto dodźeržeć. Prasny do parkowaceho awta a do milinoweho kašćika, na čož we wokolinje milina wupadny. Wobydlerjo runje hišće widźachu, kak muž do druheho awta skoči a wotjědźe. Swoje je stejo wostajił. Něšto pozdźišo wšak steješe policija před jeho durjemi. Jeho, na kóncu tola njewuspěšnej ćěkańcy dopomhał je znaty, kiž je winika sobu wzał.
Zadwělowana mać je w Landshuće policiju wołała, dokelž nochcyše jeje sydomlětna dźowka do łoža hić. Wonej běštej so wadźiłoj, při čimž holca mać ranješe a wěcy na nju mjetaše. Hakle zastojnicy 28lětnu mać a dźowku změrowachu. Policistk je holcu skónčnje pod „hamtskim dohladom“ do łoža přewodźała.
100 000 dolarow dóstanje bjezdomny w USA jako myto za pomoc při přesćěhanju złóstnika. 55lětny Matthew Hay-Chapman bě policiji w San Franciscu rozsudny pokiw dał. Srjedź januara bě wuwołany złóstnik w južnej Kaliforniskej z jastwa ćeknył. Chapman jeho na parkowanišću spózna, po tym zo běchu foto złóstnika w telewiziji pokazali.
Kóčka w Žitawje je so wo zasadźenje policije a wohnjoweje wobory postarała, dokelž bě najskerje prochsrěbak zapinyła. Wotnarjerjo bydlenjow we wjaceposchodowym domje běchu so minjenu póndźelu hóršili, słyšo z bydlenja cyły dźeń haru. Přenajer zawoła tuž policiju a wobornikow. Skónčnje so wukopa, zo je cyły dźeń prochsrěbak běžał. Najskerje bě kóčka rano na njón skočiła.
Najrjeńšu a najwukonliwišu kruwu su dźensa w mecklenburgsko-předpomorskim Karowje wuzwolili. Něhdźe sto kruwow bě so wo titul „Miss Karow 2016“ wubědźowało. Při tym je jury twar ćěła, nohi a wumjo we wšelkich starobnych klasach hódnoćiła. Tež kruwy z Braniborskeje so wobdźělichu. Hač do redakciskeho kónca dobyćerka hišće jasna njebě. Wólby su wjeršk lětušeje přehladki „Rind aktuell“ plahowanskeho zwjazka howjadow.
Tak mjenowany geocache, schowany objekt w přirodźe, je w Hessenskej zasadźenje policije zawinił. Swědcy běchu skupinu ludźi při štomje wobkedźbowali, kotřiž so napadnje spěšnje wotsalichu. Při štomje wuhladachu na to z grotom zwjazanej role z plasty. Přiwołana policija skaza wosebitu jednotku, zo by podhladny objekt rozbuchnyła. Z pomocu röntgenoweho nastroja pak geocache jako tajki identifikowachu. Geocaching je hra, při kotrejž dyrbiš w přirodźe schowany předmjet z pomocu GPS-nastroja namakać.
Nowu „kralownu kćenjow“ pyta krajny zwjazk Sakski sad. Kralownu chcedźa, mjeztym 20. króć, 7. meje w Röhrsdorfje we wokrjesu Sakska Šwica-wuchodne Rudne horiny krónować. Přizjewić móža so zajimče wot 18 lět. Kralowna budźe so potom na wšelakich wikach a wustajeńcach prezentować.
Z prawej „dalokodiagnozu“ je słucharka rozhłosowemu moderatorej z nuzy pomhała. Rozhłosownik Christian Stübinger bě wutoru rano w sćelaku Radio Energy Hamburg skoržił, zo ma wulke brjušebolenje a jara wysoki puls. Tole słyšawši hladarka chorych w sćelaku zazwoni, mějo podhlad, zo ma „Stübi“ slepe črjewo zahorjene. Wón wusyłanje hnydom přetorhny, poda so k lěkarjej a bu hišće samsny dźeń operowany.
81lětny italski rentnar dyrbi do jastwa, dokelž bě lěta 2008 we wobchodźe DVD pokradnył. Tehdy bě sobudźěłaćer wobchoda starca při kradnjenju lepił. Wonaj so chětro rozestaještaj, při čimž so sobudźěłaćer zrani. Sudnistwo měješe to za ćežke rubježnistwo a zasudźi starca k dwěmaj lětomaj jastwa. Dokelž bě wón zapasł, sčasom wo wusadźenje chłostanja prosyć, su jeho nětko w měsće Pescara zajeli.
Wosrjedź jězby městno měnjałoj a tak zražku zawiniłoj staj šofer nakładneho awta a jeho sobujěducy na awtodróze A 71 pola Erfurta. Při akciji zjězdźe Lkw na prawej stronje z jězdnje. Šofer storhny wodźidło nalěwo, na čož awto do za nim jěduceho Lkw-ja zrazy. Tež wosobowe awto njemóžeše so wuwinyć. Skónčnje hišće transporter do nich prasny. Cyłkowna škoda: 22 500 eurow.
Pobrachowaceho sakskeho dialekta dla je žona z wnučkowym trikom w delnjosakskim Braunschweigu pola 80lětneje zwrěšćiła. Pozdatna sotrowča bě ju telefonisce wo 45 000 eurow za nowe bydlenje prosyła. Staruška pak sej žadaše, zo měła wona wosobinsce přińć. Hakle po tym jej napadny, zo njebě přiwuzna sakski dialekt rěčała. Přiwuzni w Drježdźanach jej na to wobswědčichu, zo drje jedna so wo pospytane wobšudnistwo.