Hodownu kriminalku Serbskich Nowin 2025 napisał: naš fotograf Bojan Benić
PRĚNI DŹĚL: NAWRÓT PŘIPOŁDNJA
Foto šěrjachu najprjedy w pućowanskej skupinje we wsy: Žonu w sněze, serp w ruce, jeje fala bě popryskana z kreju. Samalutka steješe na polu mjez Pozdecami a Baćonjom – w kónčinje, kotraž je skerje baćonow a wostudłeje zymy dla znata hač za hrózbne njeskutki kaž mordarstwo. Něšto pak na foće njetrjechi.
Žona njećěka. A so njechowa. Prosće steji a hlada do kamery, kaž by na něšto čakała. Abo na někoho.
Jako policija dojědźe, pak bě so žona hižo zminyła.
Zwostałoj staj tu jenož muž, zdźěla ze sněhom pokryty a z čisće přerěznjenym kyrkom, a blečk z rozdrjebjenych kamilkacych kćenjow, do sněha stłóčenych.
Ludźo z wokoliny běchu šokowani, ale jenož skrótka.
„To je připołdnica“, jedna ze staršich žonow praji, bjeztoho zo by so wulce prócowała, mjelčišo rěčeć. „Přeco za tymi chodźi, kotřiž připołdniši měr njedodźerža.“
DRUHI DŹĚL: LEGENDY W PÓDŹE
