To a tamne (19.12.18)
Z bijeńcu wjacorych staršich je so adwentnička zakładneje šule w Italskej skónčiła. Dwě maćeri běštej so w zwadźe wo najlěpše městno do so dałoj, zo móhłoj předstajenje šulerjow w měsće Gela na Sicilskej nahrawać. Žonje sej nadawaštej, storkaštej a biještej so. Jedne z dźěći, kotrež w kole před stólcami stejachu, wonej samo powalištej. Ze stracha wo swoje, na jandźelki předrasćene dźěći wjacori starši na to z nimi ze žurle ćeknychu. Hakle policija zamó žonje na to změrować.
Po słowje brał je njeznaty wobchadne znamjo při železniskim přechodźe w Bayerskej „Prošu motor wotstajić“. Tak staji wusłuženy motor wosoboweho awta direktnje pod taflu. Motor wšak by darmotnje w přijimarni starych maćiznow wotbyć móhł abo za to snano hišće něšto dóstał. Gmejna pola Coburga dyrbi jón nětko na swoje kóšty zrumować.
To a tamne (18.12.18)
Z tyzku połnej słódkosćow je přistajena tankownje w Hessenskej wobrónjeneho rubježnika wuhnała. Ze šawlom zakukleny muž bě ju wčera wječor we Viernheimje z pistolu wohrozył a sej wot njeje pjenjezy žadał. 59lětna wza na to tyzku ze słódkosćemi a ćisny ju na rubježnika, na čož so tón zminy. Žonje, kiž bě sama w tankowni, so ničo njesta.
Wulka myš je milinowu syć radnicy w sewjerorynsko-westfalskim Marlu dospołnje zlemiła. Myš bě w pincy twarjenja minjeny kónc tydźenja wjacore kable rozkusała a krótkospjeće zawiniła. Kable počachu so na to samo smudźić, štož wjedźeše k dospołnemu wupadej miliny. Doniž njejsu hawariju sporjedźeli, wostanje radnica z wobydlerskim běrowom a knihownju za wopytowarjow a přistajenych zawrjena, wottam rěkaše.
To a tamne (17.12.18)
Ćeknjene cebry před Sakskim krajnym sejmom su dźensa w Drježdźanach zasadźenje policije zawinowali. Zwěrjata běchu prawdźepodobnje z bliskeho hodowneho cirkusa ćeknyli. Tam chcychu pruwować, hač cebry woprawdźe pobrachuja. W samsnym času spytachu je wjacori zastojnicy popadnyć a tomu zadźěwać, zo na dróhu běža.
Tysacy litrow mloka su we Westfalskej na dróze přimjerznyli. Njeznaći běchu sobotu wječor honače wotstajeneho mlokoweho připowěšaka wotwjertnyli. Šofer bě jón wotstajił, zo móhł dalše mloko pola burow we wokolinje wotewzać. Jako so wróći, bě něhdźe 15 000 litrow mloka na dróhu wuběžało a při štyrjoch stopnjach minus hładku podłohu wutworiło. Dwaceći wohnjowych wobornikow je ze selu a wodu jězdnju zaso wurjedźiło. Policija nětko přepytuje.
To a tamne (14.12.18)
Z tandemowym skokom z wysokosće 4 300 metrow je 102lětna Awstralčanka Irene O’Shea nětko najstarša parašutistka swěta. Staruška z nakromneje štwórće wulkoměsta Adelaide je zwažliwu akciju bjez problemow přetrała. Na prašenje, hač trjeba telko adrenalina, wona rjekny: „Sym cyle normalny čłowjek.“ Prawowka, kotraž je na kiješk pokazana, bě hižo składnostnje swojich stotych narodnin jónu z parašutom skočiła.
Třo pomocliwi policisća su 96lětnemu šoferej awta koleso wuměnili. Rentner bě w poruhrskim Wittenje po puću k wažnemu lěkarskemu terminej, jako dyrbješe skóncowaneho kolesa dla stejo wostać. Na to narěča wón policistow, kotřiž runje šoferow kontrolowachu. Woni njejsu dołho wahali a su rezerwowe koleso přišrubowali. Lěkarski termin zastojnicy telefonisce přestorčichu.
To a tamne (13.12.18)
Chětro hłupje je so paduch w Kölnje zadźeržał, jako spyta swoju rubiznu runje tomu předać, kotrehož bě runje wobkradnył. Tak je wobsedźerjej frizerskeho salona štyri truhanske aparaty poskićił. Tón pak nastroje spózna: Jenož hodźiny do toho bě je paduch w hinašim salonje spakosćił, kotryž pak samsnemu mějićelej słuša. 51lětny wołaše policiju, a ta paducha hnydom sobu wza.
Sprawna žona je młodemu nanej z Afghanistana dočasnu hodownu překwapjenku wobradźiła. 26lětny bě móšeń z wjace hač 2 000 eurami zhubił, jako w badensko-württembergskim Waldkirchenje z kolesom jědźeše. Pjenjezy bě sej přez lěta nalutował, zo móhł po wosom lětach doma swójbu z dwěmaj dźěsćomaj wopytać. Z kartku chorobneho zawěsćenja w móšni móžachu jeho identifikować a jemu pjenjezy přepodać.
To a tamne (12.12.18)
Pytajo za čłonom rockeroweje skupiny je so policija mylnje do bydlenja 88lětneje žony zadobyła. Zastojnicy běchu čisło domu w Lüdenscheidźe zaměnili. Kaž statne rěčnistwo wobkrući, bě ćežko wobrónjena specialna jednotka rano w šesćich durje bydlenja wułamała a samo slepjacu granatu na balkon ćisnyła. Staruška pak jara měrnje reagowaše. Načinjenu škodu su jej hišće samsny dźeń narunali. Přiwšěm bě racija wuspěšna: Rockera móžachu w druhim bydlenju zajeć.
Přepilny bě sobudźěłaćer zawoda za wotstronjenje wotpadkow w badensko-württembergskim Remstalu. Cyle přikładnje wuprózdni wón wotpadkowej sudobi před zachodom cirkusa. W nimaj pak běchu lampowe rjećazy cirkusa, kotrež chcychu sobudźěłaćerjo hišće za wječorne předstajenje spójšeć. Nastata škoda: 5 000 eurow.
To a tamne (11.12.18)
Samotwarjeneje atrapy błyskača dla dyrbi so muž w Kölnje před sudnistwom zamołwić. Muž bě so lěta dołho z městom wadźił, žadajo sej kontrole wukazaneje spěšnosće 30 km/h před swojim domom. Dokelž město njereagowaše, sej muž atrapu błyskača natwari a staji ju na zahrodu před domom, zo by šoferow nuzował tam pomału jězdźić. Statne rěčnistwo jemu nětko wumjetuje, zo je sej hamtske prawa přiswojił.
Jeno ze zastupnym lisćikom móža ludźo lětsa patoržicu požadane Bože słužby ewangelskeje wosady w Essenje wopytać. Hłowna přičina su wěstotne předpisy, po kotrychž njesmě nichtó w cyrkwi stać, zamołwići zdźěleja. Nastork, zawjesć darmotne lisćiki, běchu loni „njerjane diskusije“, jako dyrbjachu wopytowarjow při durjach přepjelnjeneje cyrkwje wotpokazać.
To a tamne (10.12.18)
Něhdźe 1 100 wobdźělnikow w čerwjenym kabaće a z čapku na hłowje je wčera na mjeztym 10. Mikławšowym běhu w Michendorfje južnje Berlina startowało. To je nimale runje telko kaž loni, organizatorojo zdźěleja. Zajimcy móžachu so rozsudźić, hač chcedźa połtřeća, pjeć abo dźesać kilometrow zmištrować. Nimo toho bě stafla za sportowske swójby zarjadowana. Tež dźěći mějachu swoje wubědźowanje, wšako bě so 120 z nich přizjewiło. Mikławšowy kostim znajmjeńša bě za wšěch běharjow winowatosć.
Wosrjedź sławneho Španiskeho schodu w Romje stejo wostał je 27lětny ze swojim awtom. Kaž nowiny rozprawjeja, bě wón kontrolu nad wodźidłom zhubił a hakle na baroknych schodach stejo wostał. Awto bě chětro skóncowane, schód z 18. lětstotka bu hač na čornu smuhu borzdźidła lědma wobškodźeny.
To a tamne (07.12.18)
Wuměłska figura z mjenom Hyäne Fischer, štož podoba so mjenu šlagroweje spěwarki Heleny Fischer, chce klětu na Eurovision song contesće w Israelu za Awstrisku nastupić. Kaž tamniši rozhłosowy sćelak ORF zdźěli, chcedźa požadanje nětko dokładnje pruwować, wšako cyle jasne njeje, wo koho so nastupajo młodu žonu jedna. Dotal wupada za tym, zo tči dźiwadźelnica feministiskeje sceny z Wiena za požadanjom.
Elvis je žiwy! Tomu je znajmjeńša w hessenskim městačku Friedbergu tak, hdźež wjesela so wobydlerjo nětko nad figuru znateho spěwarja na amplach. Tři signalowe lampy wokoło Elvisa Presleyjoweho naměsta su specielnje wuhotowane. Hdyž so zelena lampa za pěškow swěći, pokazuje so jim kral rock ’n’ rolla w swojim znatym rejwanskim stilu.
To a tamne (06.12.18)
Wuwučować zakazali su wučerce w USA, dokelž bě dźěćom 1. lětnika přeradźiła, zo je rumpodich jenož wunamakanka. Na prašenja šulerjow wona doda, zo tež jutrowny zajac njeeksistuje. Direktor šule, sam nan štyrjoch dźěći, reagowaše zludany a je wučerku domoj pósłał. Mjeztym su jej zakazali w šulskim wobwodźe stata New Jersey, hdźež bě wjacore lěta skutkowała, dale wučerić.
„Hdys a hdys po awtodróze smalić je tola rjenje.“ To praji 26lětny policistam, po tym zo běchu jeho ze 140 km/h na Berlinskej měšćanskej awtodróze lepili, hdźež je jenož 80 km/h dowolenych. Nimo toho jědźeše muž chětro agresiwnje a njedźiwaše na wěstotny wotstawk. Sudnik nětko wukaza, mužej jězbnu dowolnosć kaž tež awto sćazać. Tón wšak hižo přispomni, zo ma hišće dalše štyri awta.
