To a tamne (31.07.19)
Kopate natykane wosobowe awto je policija na awtodróze A 9 w Hornjej Frankskej zadźeržała. Dwuwosobowy wóz bě tak z domjacej nadobu nakładowany, zo šofer lědma hišće něšto widźeše. Samo wokoło płunoweho pedala a borzdźidła bě wšitko połne čapora. Dokelž njeměješe šofer ani jězbnu dowolnosć ani přizjewjenje awta při sebi, dyrbješe awto najprjedy raz stejo wostajić. Čehodla bě wone tak natykane, njeje znate.
Ćeknjeneho kenguruwa su w parku w Chołmje nad Kwětanečanskim jězorom popadnyli. Wobydlerjo běchu jeho póndźelu wuhladali a policiju informowali. Ta prošeše direktora Zhorjelskeho zwěrjenca wo pomoc. Direktor móžeše skoćo z narkozowym kłokom pohłušić, na čož dowjezechu je do zwěrjenca. Policija pyta nětko za jeho wobsedźerjom. Dźeń a wjace ludźi sej dźensa kenguruwy dźerži.
To a tamne (30.07.19)
Raketymjetak su zastojnicy na Baltimorskim lětanišću we wačoku pasažěra namakali. Tón bě raketymjetak jako suweněr z Kuwaita sobu přinjesł. Jako přisłušnik wójska bě wón po swojim zasadźenju na Bliskim wuchodźe na dompuću do Texasa. Kak je swoju „wosebitu dopomnjenku“, kaž sam praji, přez wěstotne kontrole w Kuwaiće dóstał, njeje znate. Zastojnicy ju wězo nablaku sćazachu. Na zbožo raketymjetak wjace njefungowaše.
Na europske mišterstwa w grilowanju 18. awgusta w posaarskim Eppelbornje je so dotal něhdźe 20 mustwow přizjewiło. Teamy dyrbja w třoch kategorijach swoje kmanosće pokazać: w tradicionalnym grilowanju swinjaceho mjasa, w grilowanju ryby a zeleniny a w zhotowjenju desserta – na přikład maja na grilu tykanc pjec. Doba přizjewjenja skónči so zajutřišim, štwórtk.
To a tamne (29.07.19)
Ze selu a papjerjanymi nósnikami je policija w Delnjej Sakskej dweju wikowarjow drogow přelesćiła. Mužomaj w starobje 31 a 38 lět wumjetuja dowožowanje wopojnych jědow we wjetšim mnóstwje. Paketaj z cyłkownje 55 kilogramami marihuany běštaj skućićelej pola spedicije w Romje wotedałoj. Interpol móžeše posyłku wotpopadnyć a drogi ze selu a nósnikami wuměnić. Jako chcyštaj wobskorženaj paketaj doma w Bad Lauterbergu w južnych Smolinach přijimać, jeju policisća zajachu.
Ćopłu zymsku drastu za sněhakowanje su paduši minjeny tydźeń w sauerlandskim Altena pokradnyli, na najhorcyšim dnju lěta. Muž bě dwě kisće z drastu před pinčne durje stajił. Jako chcyše jej hodźinu pozdźišo zrumować, běštej wobě fuk a z nimaj sněhakowarske cholowy, rubiška, čapki, rukajcy a sněhakowarske nawoči.
To a tamne (26.07.19)
Na kolenach po New Yorku łazyć – tole poskićuje ameriski wuměłc Wiliam Pope.L. Wón pyta wjace hač sto zajimcow, kiž bychu zhromadnje z nim po chódnikach na juhu Manhattana lězli. Wobdźělnicy dyrbja 21. septembra čaru něhdźe třoch kilometrow na tute wašnje zmištrować. Wuměłc chce ze swojej akciju wobdźělnikam wuwědomić, w kajkim straše su, hdyž su swoju „wertikalitu“ zhubili. Pope.L je za tajke akcije znaty.
Něhdźe 50 šulerjow je w bayerskim Starnbergu spytało, policajsku stražu nadběhować a swojeho tam jateho 15lětneho sobušulerja wuswobodźić. Tón bě do toho pjany na šulskej wotchadničce randalěrował. Dokelž njemóžachu jeho zastojnicy změrować, wzachu jeho sobu na stražu. Na to je so spontanje cwólba wutworiła, kotraž chcyše so namócnje do straže zadobyć. Policija třoch z nich zaja.
To a tamne (25.07.19)
Sobujěduceho w kabinje lokomotiwnika sobu wzał je železnicar w Ruskej. Hósć smědźeše mjez Pětrohrodom a Moskwu pódla njeho sedźeć. Lokomotiwnika su mjeztym nachwilnje suspendowali. Sobujěducy bě swoju jězbu na francoskej platformje za sobujěducych Blablacar knihował. Zetkać chcyštaj so w sewjeroruskim měsće, hdźež lokomotiwnik po sobujěduceho přińdźe.
Sobudźěłaćerjam radnicy lód wudał je měšćanosta najhorcyšeho města Němskeje w Geilenkirchenje. Wčera běchu w měsće při nižozemskej mjezy na wojerskim terenje 40,5 stopnjow naměrili. Dyrbjała-li Němska wjedrarnja tole potwjerdźić, by nowy rekord horcoty w Němskej nastajeny był. Dotalny pochadźa ze 40,3 stopnjemi z bayerskeho Kitzingena. Geilenkirchenski měšćanosta Georg Schmitz je sej wěsty, zo rekord připóznaja.
To a tamne (24.07.19)
27 000 eurow za třihanje kerkow a syćenje trawnika je 73lětny w Hamburgu pozdatnym rjemjeslnikam płaćił. Rentnar bě třom mužam pjenjezy hižo do zahajenja dźěłow přepodał, policija zdźěli. Jedyn z nich bě so z mužom na wobjim dźěłow při durjach dojednał. Krótko po zahajenju dźěła so mužojo dopomnichu, zo hišće dalši grat trjebaja a so zminychu.
Wosrjedź horcoty sel na dróhi sypać – tole činja w Nižozemskej. Rěčnica komuny Utrechtse Heuvelrug naprawu wopodstatni: Ze selu móža dróhi chłódźić. Sel ćehnje włóžnotu z powětra, kotraž asfalt chłódźi. Tak tomu zadźěwaja, zo asfalt při wysokich temperaturach rozběži abo so puka. Na awtodróhach njeje tole trjeba, dokelž maja tam hinaši asfalt.
To a tamne (23.07.19)
Pjeć měsacow do hód je so wčera w danskej stolicy Kopenhagenje kóždolětny kongres rumpodichow zahajił. Dźesatki mužow z běłej brodu a w čerwjenym kabaće su sej zajimawosće města wobhladali a sej zhromadnje z čołmom wulećeli. Kongres zarjaduja wot lěta 1957 we wólnočasnym parku sewjernje stolicy. Wobdźělnicy přińdu mjez druhim z Japanskeje, USA a Wulkeje Britaniskeje.
Kuriozneho zmylka dla dyrbja wulosowanje prěnjeho koła Berlinskeho krajneho koparskeho pokala wospjetować. Towarstwje FC Polonia a FC Al-Kauthar njebuštej minjeny pjatk při wulosowanju wobkedźbowanej, Berlinski koparski zwjazk zdźěli. Nětko dyrbja wulosowanje jutře wospjetować. „Wobstejnosće su mjerzace, ale nuznje trěbne. Smy dźakowni, zo su towarstwa tak spěšnje reagowali, zo móhli zmylk skorigować.“
To a tamne (22.07.19)
Chětro drohi kofej nawariłoj staj sej němskej turistaj we Venedigu: Dokelž běštaj warjak při sławnym historiskim mosće Rialto wužiwałoj, dyrbitaj nimale tysac eurow pokuty płaćić – wón 650 a wona 300 eurow. Nimo toho staj namołwjenaj, město wopušćić. Město hižo dlěši čas chětro razne chłostanja prećiwo turistam nałožuje, kotřiž njemóža so zadźeržeć abo na historiskich městach piknikuja. Chcedźa tak herbstwo UNESCO lěpje před masowym turizmom škitać.
Porjadnje wotbyć ma 50 indoneskich policistow na wuchodźe kupy Kava, dokelž su za přesćěhanje złóstnikow přetołsći. Nětko dyrbja dwutydźenski kruty zwučowanski program na policajskej šuli zmištrować, rěčnik policije zdźěla. Tójšto policistow waži 90 kilogramow. To je w Indoneskej, hdźež su mužojo 1,60 metrow wulke, jara wjele.
To a tamne (19.07.19)
Tiger je sej w Indiskej monsunoweho powodźenja dla do domu wućeknył. Tam lehny so do łoža, zwěrjoškitna organizacija Wildlife Trust of India z wotpowědnym fotom w interneće informuje. Narodny park Kaziranga, hdźež je tiger žiwy, je zliwkow dla tuchwilu nimale wšědnje přepławjeny. Zwěrjata dyrbja potom płuwać, zo bychu wyše ležane kónčiny docpěli. Při tym so tójšto z nich zatepi. Jako tiger do domu přińdźe, njebě nichtó doma. Nětko chcedźa jeho w druhim parku zaměstnić.
Předrasćeny jako senator z antikskeho Roma je muž do swětosławneje Romskeje studnje Trevi skočił. Za to su jemu pokutu 550 eurow napołožili. W interneće je widźeć, kak muž před wulkej skupinu turistow w studni tam a sem chodźi a narěč napodobnja. Pozdźišo policist do studnje zalěze a muža wotwjedźe.
To a tamne (18.07.19)
Najnahlišu dróhu swěta maja we Walesu: Ze 37,45 procentami nahłosće je dróha Ffordd Pen Llech w małoměstačku Harlech nowy swětowy rekord nastajiła, kaž Guinnessowa kniha rekordow zdźěla. Dotal bě nowoseelandske město Dunedin z 35 procentami tutón rekord měło. Za nowy rekord přizjewili su so wobydlerjo sami, po tym zo bě so wosobowe awto z přićahnjenymi borzdźidłami po dróze dele sunyło. Zanjesene městačko nadźija so nětko na wjace turistow.
Do pasli zalězła je sej rjedźerka w Kerpenje pola Kölna. Wobydlerjej bydlenja hižo dlěje na to tukaštaj, zo je rjedźerka padušnica. Tuž połožištaj jej bankowku, kotruž sej 52lětna přistajena bjez wahanja do zaka tykny. Přiwołana policija rjedźerku přepytowaše. Nimo bankowki namaka tež wšelake debjenki z druheho bydlenja domu. Padušnicu zajachu.
