Rjedźenske robotery so tele dny na Berlinskim Hłownym dwórnišću wubědźuja. Cyłkownje štyri wšelake nastroje toho razu srěbaja, trěja a rjedźa. Najlěpšemu roboterej kiwa zrěčenje Němskeje železnicy za dwulětnu testowu dobu. Při tym hladaja zamołwići na to, kak porjadnje roboter rjedźi, kak derje sam nawigěruje a kak lochko hodźi so posłužować. Roboter ma personal dwórnišća podpěrać a ma tež njedźelu a w nocy dźěłać.
Lěni listonoš je přez lěta wjace hač poł tony listow nakopił, město toho zo by je roznosył. Policija namaka njedaloko města Vicenza w sewjernej Italskej mjez druhim zličbowanki, dawkowe informacije, wabjenja a chłostanki. 56lětnemu listonošej wobswědčichu „njelóšt“. Je to dotal najwjetša namakanka njeroznošenych listow w Italskej. Nětko chcedźa je adresatam posrědkować.
Wužiwar drogow je so ze skóržbu blamował a dyrbi sej nětko wusměšowanja w interneće lubić dać. 43lětny bě so pola policije w Rostocku přizjewił a rjekł, zo jemu dealer město marihuany jenož jednoru trawu předawa. A wón bě dealerej za „drogi“ swój drohotny časnik přewostajił. Tón wšak je nětko fuk. Nimo toho ma muž skóržbu ranjenja zakonja wo wopojnych jědach dla na starosći. „Tak hłupy tola nichtó być njemóže“, rěka jedna z reakcijow na Twitteru.
Čehodla sej lochko činić, hdyž tež ćežko dźe: Mjez stabami železnych wrotow tčacy wostał je pjany w Mnichowje, jako chcyše do dwora. Wohnjowa wobora jeho wuswobodźi, po tym zo běchu wobydlerjo rano zahe wołanje muža słyšeli. Lochce zdrasćeny bě tón hižo chětro přemjerznjeny. Na kóncu so wukopa, zo njeběchu wrota ani zamknjene.
Z klasiskej hudźbu chcedźa wšědnej hektice w podzemskej železnicy japanskeje stolicy Tokija wotpomhać. Wobhospodarjer tuž wot najnowšeho we wagonach klawěrne kruchi komponista Fryderyka Chopina wothrawa, kaž japanska powěsćerna Kyodo zdźěla. Ideja za to je so zrodźiła, jako bě lokomotiwnik mylnje tajku hudźbu město ertneje připowědźe wothrał. Na to su sobujěducy jara pozitiwnje reagowali.
W čerwjenym winje kupać móža so hosćo w jednej z New-Yorkskich wellnessowych kupjelow. Manhattanske Aire Ancient Baths tole nimo masaže poskićuje. Antioksidaciske srědki španiskeho wina Tempranillo pječa strowoće tyja a zadźěwaja zestarjenju kože. 30mjeńšinske kupanje pak płaći hač do 550 dolarow. Fachowcy a dermatologojo dwěluja, hač ma wino woprawdźe tajke wuskutki.
Rabatowa akcija za nutelu je we wjacorych francoskich kupnicach wulke tumulty zawinowała. Rjećaz kupnicow Intermarché bě šokolodźany maz wo 70 procentow potuńšił. Na to so ludźo do wobchodow nawalichu, sej škleńcy mjez sobu z ruki torhachu a zadźeržachu so kaž „dźiwje zwěrjata“. Samo personal wohrožachu. W sewjerofrancoskim městačku Ostricourt dyrbješe policija zakročić, dokelž bě we wobchodźe k bijeńcy dóšło.
Wjace hač dwaj milionaj eurow stej so z pjenježneho transportera w Schleswigsko-Holsteinskej zhubiłoj. Jězdźidło bě z Hamburga do Kiela po puću, při awtodróhowym hosćencu pak šoferaj k přestawce zastaštaj. Pozdźišo, jako w Kielu pjenježne kasety wurumowaštaj, wonaj hakle pytnyštaj, zo 2,3 miliony eurow pobrachuja. Kak běchu so pjenjezy zhubili, njeje hač do dźensnišeho jasne.
Dźiwja ranca je w Dillingenje nad Dunajom ludźi znjeměrniła a 10 000 eurow škody načiniła. Spočatnje běchu ju wobydlerjo na zahrodach wuhladali. Na to poda so ranca do nutřkowneho města, wobškodźi parkowace awto, běžeše přez derje wopytanu apoteku a do drastoweho wobchoda, hdźež so skónčnje wucychnowa. Kupcy a personal ćeknychu na horni poschod. Přiwołani policisća dźiwje swinjo zatřělichu. Nichtó so njezrani.
Dźěćo na chódniku porodźiła je žona w Berlinje-Reinickendorfje. Poprawom chcyše wona runje do chorownje hić, dokelž měješe hrona. Dale hač před chěžine durje pak njepřińdźe. Wohnjowa wobora nochcyše nadrobnosće mjenować. Přiwšěm rěčnik wobkrući, zo buchu wobornicy „poroda před domom“ dla wołani. Mać a dźěćko dowjezechu do chorownje. Woběmaj so derje dźe, kaž rěkaše.
Njewšědny swětnišćowy objekt je wot najnowšeho na njebju widźeć: Nižozemske předewzaće Rocket Lab je ze swojej prěnjej raketu nimo komercielnych satelitow tež naddimensionalnu diskotekowu kulu do swětnišća pósłało. Něhdźe meter wulka „hwězda čłowjestwa“ ze 65 reflektowacymi płoninami je po informacijach předewzaća při schadźenju a chowanju słónca po wšěm swěće bjez pomocnych srědkow widźeć.
Něhdźe 50 000 eurow škody staj Markneukirchenjanaj načiniłoj, jako spytaštaj kachle zatepić. Dokelž běštaj młodostnaj w starobje 17 a 22 lět drjewo „njefachowsce“ wužiwałoj, dóńdźe z rozpłunjenju a wohenjej. A tón so po bydlenju rozšěri. Młodostneju dowjezechu do chorownje, dokelž běštaj zajědojćenje z kurom poćerpjełoj. Wohnjowa wobora płomjenja we wjaceswójbnym domje podusy.
3 000 kilometrow dołha probowa jězba je mechanikarjej awtoweje porjedźernje w Hannoveru chłostanku 1 000 eurow wunjesła. Hamtske sudnistwo měješe za dopokazane, zo bě wón awto na njewoprawnjene wašnje wužiwał. Napadnyła tale wěc bě, jako dósta wobsedźerka jězdźidła pokutu z Pólskeje, po tym zo bu wone we Waršawje wot błyskača fotografowane. Žona pak tam ženje hišće była njeje, a tak wobskorži montera. 49lětny wšak so wusprawni, zo hdys a hdys „dlěše“ probowe jězby přewjeduje.
Jězbu 17lětneho z traktorom do šule je policija w delnjosakskim Cloppenburgu skónčiła. Młodostny jej napadny, jako najebać čerwjenu swěcu ample dale jědźeše. Šuler měješe drje jězbnu dowolnosć za traktor, ale jeničce za dźěło na polu abo w lěsu. Pachoł dyrbješe traktor tuž stejo wostajić a do šule nóžkować.
Pjaneho pilota předewzaća British-Airways je policija bjezposrědnje do wotlěta pasažěrskeje mašiny zajała. Zastojnicy wotwjedźechu 49lětneho direktnje z cockpita Boeing 777 na lětanišću Gatwick. Muž bě jednomu z třoch pilotow jědnaćehodźinskeho lěta na Mauritius napadnył, dokelž za alkoholom smjerdźeše. Mjeztym je zaso na swobodźe. Mašina móžeše z dwuhodźinskim zapozdźenjom startować, po tym zo běchu druheho pilota namakali.
Hoberska zličbowanka je štyrjoch turistow z Japanskeje w hosćencu we Venedigu chětro rozhoriła. Woni dyrbjachu za štyri steaki, fritěrowane mórske płody a wodu 1 100 eurow zapłaćić. Mjeztym je měšćanosta Venediga Luigi Brugnaro připowědźił, zo chcył „wohańbjacy podawk“ pruwować. A dyrbjało-li so to wobkrućić, wón zamołwitych pochłosta.
Čerstwe stopy w sněze su policistow w Kielu direktnje k schowej dweju paduchow wjedli. Mužej běštaj so do hosćenca zadobyłoj a tam pjenježnu kasetu pokradnyłoj. Alarmowa připrawa wubudźi 38lětneho wobsedźerja hosćenca, kiž na to rozbite wokno wuhlada. Přiwołani zastojnicy wšak spóznachu při rozbitym woknje čerstwe stopy w sněze. Dyrbjachu je tuž jenož přez wjacore dróhi hač k pincy jednoswójbneho domu slědować, a hižo paduchow z rubiznu mějachu: W kasy pak njebě ani dźesać eurow.
Ze spakosćenym mobilnym telefonom sam fotografował so je paduch w Berlinje. Do toho bě so do bydlenja zadobył, hdźež pokradny pjenjezy a handy. Mjeztym je policija internetny kontakt k handyjej nawjazała a wobrazy namakała. Nětko proša wo pokiwy, štó móhł to być.
„Najmudriše dźěćo swěta“ smě so 13lětny Egyptowčan Abdel Rahman Hussein mjenować. Titul spožčichu jemu njedawno po wubědźowanju matematikarjow w Malajziji. Tam bě 3 000 młodych matematikarjow z 13 krajow nastupiło. Abdel Rahman doby wubědźowanje w starobnej klasy hač do 14 lět, po tym zo bě wón 320 komplikowanych nadawkow w runje wosom mjeńšinach z hłowy, bjez pomocnych srědkow, wuličił.
Nowe spekulacije wo splahu přichodneho dźěsća je Kate, mandźelska britiskeho princa Williama, zbudźiła. Na wotewrjenju kubłanskeho centruma za medicinske fachowe mocy bě 36lětna róžojty šat woblečena. Tole maja medije za schowanu pokazku na to, zo je z holčku samodruha. Běrowy wjetarjow znajmjeńša dožiwichu wulki nawal. Kate a William wočakujetaj třeće dźěćko.