To a tamne (20.04.18)
Něhdźe 2 300 zběrarjow twjerdych pjenjez je so w Berlinje-Charlottenburgu nastupiło, zo bychu sej nowy pjećeurowski pjenjez Zwjazkoweje banki kupili. Wot wčerawšeho wudawa pjenježny institut nowu ediciju „Subtropiske pasmo“, wobstatk pjećdźěloweje serije „Klimowe cony zemje“. Hižo rano w 4 hodź. so zajimcy nastupichu. Nawala dla předawaja kóždemu jenož jedyn pjenjez wob dźeń.
Drjewjane třěski w cyrkwi lětaja zajutřišim, njedźelu, we Wjernarjecach pola Załomja. Tamniša ewangelska wosada zarjaduje Božu słužbu rjemjeslnikow. Z rudnohórskeho Seiffena přijědźe tružer Christian Werner. Wón demonstruje zhotowjenje w hodownym času woblubowanych drjewjanych zwěrjatow a chce wo swojim dźěle a wěrje porěčeć.
To a tamne (19.04.18)
Blachowy kašćik z pozdatnje radioaktiwnym wobsahom je we Freitalu wulkozasadźenje wohnjoweje wobory zawinował. Žona bě ze symbolom radioaktiwity woznamjenjene sudobjo pola mobila za škódne maćizny wotedała, na čož sobudźěłaćerjo wohnjowu woboru alarmowachu. Pomocnicy namakachu pak w tyzce jenož zběrku mineralijow
40 kilogramow twjerdych pjenjez wšelakich krajow su w starym zamróžaku wulkowikow w Dortmundźe našli. Sobudźěłaćerjo firmy běchu čapor z prózdnje stejaceho składźišća wurumowali a při tym wjacore toboły z pjenjezami namakali. Policija njewuzamkuje, zo pochadźeja pjenjezy z chłostajomneho njeskutka.
To a tamne (18.04.18)
Nócny spěwar je susodam w badensko-württembergskim Lörrachu dny dołho spar rubił, doniž njeje policija přijěła. Ludźo běchu zastojnikow wołali, dokelž 29lětny stajnje zaso w nócnych hodźinach swoje arije zanošowaše. Policisća na to pola spěwarja klinkachu a jemu do swědomja rěčachu. 29lětny hnydom přilubi, zo swoje nócne spěwanje přichodnje wostaji a dźěše spać.
Žónske koleso z motorom trawusyčawy wudospołnił je 37lětny w mecklenburgskim Groß Teetzlebenje. Policisća jeho zadźeržachu, jako runje nimo smaleše. „Tak je z kolesa motorizowane jězdźidło nastało, za kotrež nima muž ani jězbnu ani wužiwansku dowolnosć“, policija piše. Kolesowarjej dalejězbu zakazachu. Test zastojnikow měrješe spěšnoć 52 km/h. Kreatiwny muž dóstanje nětko skóržbu jězdźenja bjez dowolnosće dla.
To a tamne (17.04.18)
Dweju paduchow pčołkow je policija w Israelu wuslědźiła, po tym zo běchu pčołki jeju nadpadnyłoj. Wobsadce policajskeho awta běštej mužej napadnyłoj, kotrajž na kromje dróhi do so biještaj. Jako zastojnicy bliže přińdźechu, widźachu, zo běštaj mužej dospołnje rozkałanaj a zo wokoło so biještaj, zo byštaj njemdre insekty wućěriłoj. W awće namakachu zastojnicy tři kołče. Jednoho z paduchow dowjezechu do chorownje, druheho na policajsku stražu.
Z nakładnym awtom na kolesowarskej šćežce zwrěšćił je šofer w schwabskim Donauwörthće. Do toho bě před mostom zastał, kotryž bě za jeho awto přeniski. Město toho, zo by so zawróćił a za druhim pućom pytał, spytaše wón móst na kolesowarskej šćežce wobjěć. Tam pak wosta 37lětny tčacy. Pomocnicy trjebachu tři hodźiny, zo bychu awto wućahnyli.
To a tamne (16.04.18)
Starosćejo so wo swoju 80lětnu dźowku je 105lětna žona policiju wo pomoc prosyła. Seniorka bě zastojnikow w Langelsheimje w Goslarskim wokrjesu prosyła, w bydlenju 80lětneje pohladać, hač je wšitko w porjadku, dokelž so dźowka cyły dźeń pola maćerje přizjewiła njebě. Policisća nańdźechu 80lětnu čiłu a strowu. Wona bě dlěje hač planowane po puću była a njebě so wotzjewiła.
Při błyskowodźe třěchi wisajo wostał je šup w badensko-württembergskim Rudersbergu. Wobydlerjo běchu jeho minjenu sobotu wuhladali a wohnjowu woboru wołali. Wobornicy přijědźechu z dźewjeć kameradami a dołhim rěblom, zdźěli nawoda. Jako šup to widźeše, so tola hišće sam wuswobodźi. Na to padny z dźesać metrow wysokeje třěchi. Po wobkedźbowanju wobydlerjow so šup wočiwidnje njezranjeny po łuce zminy.
To a tamne (13.04.18)
Chětro hłódni drje běchu paduši, kotřiž su so w badensko-württembergskim Ottenhöfenje do rěznistwa zadobyli. Tam so njeznaći porjadnje wucychnowachu a spakosćichu dohromady wosom kilogramow swinjaceho mjasa kaž tež 28 wšelakich słódnych kołbasow. Ze swojej čerstwej rubiznu móžachu so zminyć. Škoda wučinja wjacore sta eurow.
Čućiwy nós policistki je ju ke konopjowej plantaži wjedł. Na přechodźowanju w schleswigsko-holsteinskim Hohenlockstedće zwěsći wona intensiwnu wóń konopje, sapacu z jednoswójbneho domu. Jeje kolegojo dom na to přepytachu a namakachu w dohromady pjeć stwach najmodernišu plantažu z 200 rostlinami a 140 sadźenkami, 600 gramow zapakowaneje marihuany a samo dwě pistoli. Sudnik pósła 36lětneho předchłostaneho plahowarja nablaku do jastwa.
To a tamne (12.04.18)
Po nadpadźe zamołwił je so 15lětny młodostny w Sewjerorynsko-Westfalskej. Z kuchinskim nožom w ruce bě wón w Neukirchenje-Vluynje nad Rynom do kioska zastupił a sej pjenjezy žadał. Přistajeny to wotpokaza, hólc so zamołwi a ćekny. Krótko na to wšak 15lětny we wobchodźe zazwoni, želniwje připowědźejo, zo chce so nawróćić a so stajić. Po puću ke kioskej jeho policisća wuslědźichu a nachwilnje sobu wzachu.
Pilny domownik je na hrodźe Neuenbürg w Badensko-Württembergskej mylnje wohnjowy alarm zawinił. Awtomatiska alarmowa připrawa je prawdźepodobnje na mróčele procha reagowała, kotryž bě domownik při mjećenju w kólni hrodu načinił. A hižo přijědźechu policisća a wohnjowi wobornicy na městno pozdatneho wohenja. Na zbožo móžachu pak hnydom zaso wotjěć.
To a tamne (11.04.18)
Tikotaceje pomazkoweje tyzy dla su w Balingenje pola Stuttgarta dźěłowu agenturu ewakuowali. Dwě hodźinje pozdźišo móžachu fachowcy za znješkódnjenje municije ludźi změrować: W metalowej tyzy ležeše časnik. 31lětny wopytar bě jón do tyzy połožił, ale je tyzu na zarjedźe zabył. Sobudźěłaćerjo tikotacy kašćik namakachu a wołachu policiju. Ta wšak muža nachwilnje zaja a cyły areal wokoło agentury zaraći.
Dźiwja ranca wosrjedź města je ludźi w porynsko-pfalcskim Neustadće znjeměrniła. Wobydler bě ju na třěše garaže wuhladał a hajnika informował. Jako tón přińdźe, skoči dźiwje swinjo z pjeć metrow wysokeje třěchi a smaleše po Hłownym torhošću do nutřkowneho města. Tam nadběhowaše hajnika a zrazy z hłowu do wjacorych wukładnych woknow. Skónčnje móžachu rancu do dwora hosćenca zamknyć, hdźež pak ju zatřělichu.
To a tamne (10.04.18)
Hinak hač někotryžkuli dorosćeny je so dźěćo w delnjosakskim Bergenje přikładnje zadźeržało: Po tym zo bě ze swojim kolesom njewotpohladnje do parkowaceho awta zrazyła a wóz wobškodźiła, dwanaćelětna holca poł hodźiny podarmo na wobsedźerja čakaše. Tež w bance, před kotrejž awto steješe, njewědźachu, komu wone słuša. Tuž dźěše na policajsku stražu, hdźež so wukopa, zo je limuzina słužbne awto měšćanosty. „To móhł sej tón abo tamny dorosćeny přikład wzać“, policija zadźerženje holcy chwaleše.
Chrobły paduch je dźěćom w Mecklenburgsko-předpomorskim Warenje myto pokradnył, kotrež měješe jim na kóncu detektiwneje hry kiwać. Slědujo wot staršich wupołožene papjerjane šlebjerdki dóńdźechu dźěći skónčnje k jewišću pod hołym njebjom, hdźež měješe přizamknjene koleso stać. Tam pak ležeše jenož hišće skóncowany zamk.
To a tamne (09.04.18)
Jutrowne jejka na parkowace awto mjetali su dźěći w bayerskim Ambergu. Štyri dźěći w starobje jědnaće do 13 lět mjetachu twjerde zwarjene jeja z balkona bydlenja na parkowany wóz, město toho zo bychu je jědli. Při tym nasta wěcna škoda 1 500 eurow, kaž wobsedźer awta trochuje. Hač bě dźěćom prózdnin dla wostudłe abo hač běchu hižo přewjele jejkow jědli, njejsu jemu přeradźili.
Zwada wo městno w sněhakowarskim lifće je so w awstriskim Obertauernje z třomi zranjenymi skónčiła. Tam bě so sydom šulerjow z Wulkeje Britaniskeje z bayerskim nanom a toho 16lětnym synom zwadźiło, dokelž njemóžachu so dojednać, štó smě jako prěni do gondle zalězć. Za čas jězby na horu so dale wadźachu a skónčnje z pjasćemi a kijemi do so bijachu. 16lětny hólc Bayera sej samo łochć złama.
