To a tamne (06.01.21)
Při zražce ze sněhowym mužom bu ćah w Köthenje wobškodźeny. Intercity Němskeje železnicy bě njedźelu do figury zajěł, kotraž při kolijach steješe. A lokomotiwa so wobškodźi. Policija pyta nětko za swědkami a skedźbnja na to, zo přebytk we wobłuku kolijow žiwjenje wohroža. To wšak dyrbješe bohužel tež sněhowy muž nazhonić.
Dokelž njeje žona na wučinjene zetkanje přišła, so 59lětny w Münsteru chětro rozhněwa. Najprjedy da so do sobudźěłaćerja spěšnohosćenca a je na to samo přiwołaneju zastojnikow nadběhował. Skónčnje so jimaj poradźi roznjemdrjeneho muža přemóc. Přiwšěm staj so lochko zraniłoj. Skućićel ma nětko z chłostanskim jednanjom ličić.
To a tamne (05.01.21)
Mobilna sawna na kromje puća je policajske zasadźenje wuskutkowała. Swědcy w saarlandskim Wallerfangenje běchu pozdatnje naheho muža w sudźe wuhladali a so na tym postorkowali. Zawołana policija pak njemóžeše žane přeńdźenje zwěsćić, sud bě na připowěšaku awta derje připrawjeny a muž w kupanskich cholowčkach. Sawna pod hołym njebjom njeje zakazana. Wón njetrjeba tuž ze žanymi konsekwencami ličić.
Dotal njeznaty dobyćer lota z Badensko-Württembergskeje je swoju poslednju šansu zapasł so přizjewić a sej 11,3 miliony eurow hódne dobyće wotewzać. Tele pjenjezy du nětko do hornca wosebitych wulosowanjow. Hižo wot apryla 2017 běchu za dobyćerjom pytali. Najebać prawidłowne namołwy njeje so nichtó přizjewił. Tajki pad dotal na juhozapadźe Němskeje hišće dožiwili njejsu.
To a tamne (04.01.21)
Žonu ze swójskeho balkona wuswobodźić dyrbješe minjeny tydźeń wohnjowa wobora w Mnichowje. Dwulětny synk bě ju z bydlenja wuzamknył. Poprawom chcyše mać jenož wonka telefonować, zo njeby spjace dźěćo myliła. Syn pak přiwšěm wotući a durje balkona začini. Tuž dyrbješe žona wohnjowu woboru wo pomoc prosyć.
Poprawom měješe to za porik w Awstriskej jedyn z najrjeńšich dnjow žiwjenja być. Tola wony dźeń skónči so z katastrofu. Što bě so stało? Porik krosnowaše na horu Falkert w Korutanskej. Na wjeršku staji 27lětny skónčnje prašenje, hač nochcytaj so zmandźelić, čemuž 32lětna rady přizwoli. Po wšěm zdaću sonow wo přichodnym zhromadnym žiwjenju dla so žona wobsuny. Slubjeny drje chcyše ju hišće dźeržeć, štož so jemu njeporadźi a 32lětna sunje so 200 metrow po horje dele. Na zbožo je ju wobhospodar hěty namakał a wuchował. Zranjeneho muža dyrbješe helikopter do doła dowjezć.
To a tamne (30.12.20)
Kołp na železniskej čarje je na sewjeru Hessenskeje zapozdźenje ćahow wuskutkował. Zwěrjo je so patoržicu ze swojim přećelom-kołpjom na čarje mjez Kasselom a Göttingenom zabłudźiło, zdźěli rěčnik zwjazkoweje policije. Přećel je so po wšěm zdaću milinowoda dla zahinył. Tamny kołp sedźeše samlutki zdźěla na kolijach čary, tak zo njemóžeše hižo žadyn ćah jěć. Wohnjowa wobora je kołpja skónčnje popadnyła a preč dowjezła.
Policija w kóždej nuzy pomha a samo w nocy dźěći dohladuje, jelizo to staršej njemóžetaj. Znajmjeńša bě tomu w nocy na wutoru tak, jako nan šěsć dźěći w oberfrankskim Schönwaldźe zasadźensku centralu zawoła. Jeho žona je chora a dyrbješe nuznje do chorownje. Wón pak bě na nócnej słužbje a njemóžeše wottam preč. Samozrozumliwje policija přichwata a starosćiwym dźěćom samo bajku předčita. Kaž zastojnicy zdźělichu, bě zbytna nóc měrna a dźěći spachu.
To a tamne (29.12.20)
Podhladne wačoki před policajskej stražu w Pforzheimje su so jako słódka překwapjenka wukopali. Njeznaty bě pjatk wječor kófer a wjacore kisty před stražu wotstajił a tak wulke zasadźenje policije zawinował. Kónčinu wokoło twarjenja zaraćichu, fachowcy za rozbuchadła dyrbjachu ze Stuttgarta přijěć. Po dwěmaj hodźinomaj bě alarm nimo: W kófrje a kistach běchu słódkosće a hrajki. Čehodla bě muž wěcy tam stajił a so potom spěšnje zminył, nětko přepytuja.
Wosamoćeny starc je w italskej Bologniji patoržicu wječor policiju wołał, zo móhł sej z někim na hody připić. Dźěći su daloko preč a wón čuje so deprimowany, 94lětny skoržeše. Na to so třo policisća k njemu podachu. Starc powědaše anekdoty wo swojich wójnskich dožiwjenjach a wopyt carabinierijow z widejowym telefonatom znatym hordźe prezentowaše.
To a tamne (28.12.20)
Pilneho „hodowneho palčika“ su policisća w braniborskim Werderu nad Habolu patoržicu wječor wustróžili. Wobydlerka bě zastojnikow alarmowała, dokelž bě w parkowacym transporteru elektriski šrubowak słyšała. Tukajo na padustwo chwatachu zastojnicy k městnu a nańdźechu w awće 27lětneho, kiž w poslednim wokomiku dary za swójbu pasleše. Zasadźenje skónči so z posměwkom.
Dźesaćlětny hólc je prěni dźeń hód z awtom přiwuzneho po Rotterdamje jězdźił, doniž jeho policist njezadźerža. Zastojnikej bě mały šofer napadnył, kotrehož hłowa lědma nad wodźidło sahaše. Wobsedźer awta na pódlanskim sedle rozłoži, zo je hólc přez hody z Rumunskeje přijěł. Dokelž hižo derje z awtom jědźe, bě wón dźěsću jězbu po měsće popřał. Policija piše, zo so „ničemu wjace njedźiwa“ a zo płaći akcija wobsedźerja 280 eurow.
To a tamne (23.12.20)
Spěwace a rejwace rjadniske sotry w Francoskej zbudźeja w interneće wjele kedźbnosće. Pod hesłom „Zhromadnje hač do kónca“ su mały musical zhotowili, z kotrymž zběraja pjenjezy za sobusotru, kotraž chce klóšter w Semur-en-Brionnaisu ze starobnych přičin wopušćić. Z pjenjezami chcedźa klóšter na juhu kraja wotpowědnje přetwarić, zo móhła sotra dale w nim bydlić.
Rujacy jeleń je w Bayerskej zasadźenje policije zawinował. Žona w allgäuskim Günzachu bě policiju informowała, dokelž bě w lěsu někoho wo pomoc wołać słyšała. Na to pósłachu wjetšu ličbu policistow a helikopter ze specialnej kameru, zo bychu lěs přeslědźili. Dwě hodźinje pozdźišo akciju skónčichu. Helikopter bě jenož slědy jelenja wuhladał. Po dorěči z hajnikami su sej nětko wěsći, zo bě rujacy jeleń „z wulkej wěstosću“ na akciji wina.
To a tamne (22.12.20)
W milinowodźe wisajo wostał je jako rumpodich předrasćeny muž, kiž bě w Kaliforniskej z motorizowanym parašutom po puću. Pomocnicy móžachu jeho njedaloko Sacramenta njezranjeneho wuchować. Sanki pak njemóže wón nětko wjace wužiwać. Wohnjowi wobornicy jemu radźachu so tola zaso tradicionalnje na sanjach wot konjow ćahnyć dać.
Zwada, štó trjebany čajowy měšk zrumuje, je w durinskim Sömmerda k bijeńcy mjez mandźelskimaj wjedła. 52lětna žona ćisny čajowu kanu za mužom a kopny jemu do genitalijow, jako chcyše ju ze jstwy ćahnyć. Wona 77lětnemu wumjetowaše, zo bě ju do mjezwoča bił a zo chcyše ju po schodźe dele storčić. Policija wšak nětko přećiwo woběmaj zranjenja ćěła dla přepytuje.
To a tamne (21.12.20)
W dźěćacym stanje před policiju chował je so paduch w sewjerorynsko-westfalskim Hagenje. Swědcy běchu zastojnikow k twarjenju firmy wołali, dokelž běchu swětło kapsneje lampy w domje widźeli. Policisća ze słužbnym psom twarjenje přepytachu a nańdźechu slědy paduchow. Skónčnje pos před dźěćacym stanom zašćowka, w kotrymž 51lětneho paducha wuhladachu. Tež dalšeju kumpanow nańdźechu a wšěch třoch zajachu.
Nic mjenje hač 4,4 promile alkohola w kreji měješe šofer njedaloko Flensburga, jako jeho zastojnicy kontrolowachu. 44lětny bě šoferce na awtodróze A 7 napadnył, dokelž njewěsće jědźeše. Zastojnicy jeho na parkowanišću kontrolowachu. Muž drje je pomały skutkował, móžeše pak na wšitke prašenja policistow wotmołwić. Dokelž skoržeše na brjušebolenje, dowjezechu jeho do chorownje.
To a tamne (18.12.20)
Wohnjostroj cyle hinašeho razu planuja silwester w Kölnje: Město třělenja raketow a praskotatow měli wobydlerjo nowe lěto tak witać, zo wot połnocy pjeć mjeńšin dołho swěcu zapinaja a zaso hasnu. Město lubi sej tak „najwjetši swěcowy wohnjostroj swěta“. Wabjensku akciju za njón su dźensa zahajili. Praskotaki njejsu zasadnje zakazane, přiwšěm su ludźo namołwjeni so jich wzdać.
Tempowi hrěšnicy su Braniborskej tež loni tójšto dochodow wobradźili. Jeničce krajnemu etatej su 49,8 milionow eurow přepokazali. To bě 674 000 eurow wjace hač lěta 2018. Pjenjezy pochadźeja z pokutow a porokow z popłatkom. Policija je loni cyłkownje 1,7 milionow ranjenjow předpisaneje spěšnosće registrowała. Chłostali su tež ignorowanje čerwjeneje ample a předpisaneho wěstotneho pasa.
