To a tamne (13.08.21)
Z helikopterom k lodarni lećał je 34lětny w Kanadźe, zo by tam lodowu tortu kupił. Wón přizemi na wjele wužiwanym parkowanišću před wobchodom w městačku Tisdale w centralnej Kanadźe. Z helikoptera wulěze žona, kotraž poda so do lodarnje a tam tortu kupi. Dokelž njejednaše so wo nuzowe přizemjenje, dyrbi so 34lětny nětko před sudnistwom zamołwić, byrnjež licencu za mašinu měł.
Zabyteho handyja dla móžachu w Frankfurće nad Mohanom paducha awta zajeć. 26lětny sedźeše hižo we wozu, kotryž chcyše pokradnyć, jako jeho wobsedźer lepi a narěča. Na to paduch twochny. Jako wobsedźer z policiju telefonowaše, so paduch nawróći, dokelž bě swój mobilny telefon w awće ležo wostajił. Muž pak skućićela kruće dźeržeše, doniž policija njepřijědźe. Při sebi měješe wón spakosćenu žonjacu tobołku.
To a tamne (12.08.21)
Nowu złotu medalju dóstanje japanska olympiadnica Miu Goto, po tym zo bě měšćanosta jeje ródneho města Nagoya Takashi Kawamura při witanju sportowcow w radnicy města do medalje kusnył. To je organizaciski komitej rozsudźił. Goto bě měšćanosće swoju złotu medalju wokoło šije powěsnyła, na čož 72lětny trofeju do ruki wza a do njeje kusny. Wobrazy sceny zbudźichu rozhorjenosć. Kawamura je so mjeztym zamołwił.
Nuznikowy připowěšak za prominentnych su w Hornjej Frankskej pokradnyli. Něhdźe 40 000 eurow drohi připowěšak běchu na zarjadowanju mebloweho wobchoda w Kulmbachu wužiwali a po tym při dróze wotstajili. Jako chcychu jón nazajtra wotewzać, bě wón preč. Za transport tajkeho připowěšaka wšak je wjetše nakładne awto trěbne. Policija nětko za swědkami pyta.
To a tamne (11.08.21)
Kóčku z palaceho bydlenja wuchowała je wohnjowa wobora w Frankfurće nad Mohanom. Do toho bě w kuchni wjaceswójbneho domu woheń wudyrił. Wobydlerjo móžachu dom hišće wopušćić, jenož kóčka wosta w palacym bydlenju. 17lětna dźowka podarmo za njej pytaše a dyrbješe skónčnje bjez swojeje micki z bydlenja. Wohnjowa wobora ju skónčnje namaka. Dokelž bě so z kurom zajědojćiła, dósta wona samo kislikowu masku.
Zo by wutrajnosć baterije pruwował, je muž ze swojim e-scooterom po awtodróze A 2 jěł. Policija jeho zadźerža, po tym zo běchu jej to wjacori šoferojo přizjewili. Zastojnikam 24lětny rjekny, zo je elektriski roler dźeń do toho kupił a zo chcyše wědźeć, kak dołho aku dźerži. Zo njesmě na awtodróze scyła jězdźić, njebě jemu znate. Dokelž njeměješe předpisane zawěsćenje za roler, dyrbješe dale nóžkować.
To a tamne (10.08.21)
Samsny problem w mnohich nawigaciskich nastrojach wosobowych awtow zbudźa w Bayerskej zadźiwanje policije: Tež wčera běchu „nawije“ šoferow na awtodróze A 9 do směra na Mnichow w hornjobayerskim Allershausenje njetrjebawši z awtodróhi na wobjězdku wjedli, dokelž bě wobchad pječa haćeny. Tomu pak scyła tak njebě. Minjene dny běchu so tam tajke pady kopili.
Swojeho jědnaćelětneho syna na awtodróhowym parkowanišću zabył je 44lětny na awtodróze A 2 pola Bielefelda. Na přestawce bě pachoł awto skradźu wopušćił. Hakle po wjacorych kilometrach nan pytny, zo hólc w awće njesedźi, po tym zo bě so toho bratr za nim prašał. Mjeztym pak steješe nan sam w haćenym wobchadźe. Policisća „sćerpnje čakaceho“ na parkowanišću namakachu a jeho na policajskej straži nanej přepodachu.
To a tamne (09.08.21)
Za Günthera Jaucha wudawał je so 23lětny w ćahu w Schwabskej. Do toho bě so agresiwnje napřećo sobujěducym zadźeržał a so kontroli jězdźenki spjećował. Tež přiwołanym policistam napřećo wón agresiwnje wustupowaše a nochcyše jim wupokaz pokazać. Město toho twjerdźeše, zo rěka Güther Jauch. Zastojnicy dyrbjachu jeho sputać. Jeno z wulkej nuzu móžachu jeho identitu zwěsćić.
Z jejemi a piwom nadběhowali su ludźo čěskeho ministerskeho prezidenta Andreja Babiša při wólbnym bojowym wustupje w toho domizniskej wsy Pruhonice pola Prahi. Škitarjo wućeknychu sej z Babišom do bliskeje kofejownje. Babiš rjekny sćelakej CNN, zo běchu jeho přećiwnicy naprawow koronawirusa dla atakowali a na hłowje trjechili. W Čěskej wola za dwaj měsacaj nowy parlament. Babiš ma dobre wuhlady, wólby dobyć.
To a tamne (06.08.21)
Z internetnym přesadźowanjom swojeje baseballoweje čapki je pomocnik po zapławjenjach 48lětny Markus Wipperfürth wulki wothłós zbudźił. Mjeztym skića jemu wjace hač 133 000 eurow na platformje eBay za dotrjebanu staru čapku. Kaž rěčnik eBayja wobkrući, je poskitk seriozny. Pjenjezy chcedźa woporam wulkeje wody přewostajić. Ratar z kónčiny blisko Kölna hižo tydźenje w Porynsko-Pfalcy pomha a wo tym na Facebooku 400 000 ludźom rozprawja.
Njestrašna skulptura w formje ručneje granaty w kófrje je na lětanišću w Frankfurće nad Mohannom zasadźenje policije zawiniła. Lětadło njesmědźeše wotlećeć. Sobudźěłaćer wačokarnje bě spodźiwny předmjet pod roentgenowym nastrojom wuhladał. Fachowcy hakle zwěsćichu, zo jedna so wo wuměłsku skulpturu a zo z njeje žadyn strach njewuchadźa.
To a tamne (05.08.21)
Znjewužiwanja wohnjoweje wobory dla su 31lětneho w Augsburgu k pokuće 6 000 eurow zasudźili. Muž bě wohnjowu woboru z nuzowym čisłom k swojemu bydlenju wołał, po tym zo bě so sam wuzamknył. Wobornikam bě napowědał, zo njewě, hač hišće něšto na kuchinskich kachlach steji, byrnjež wědźał, zo tomu tak njeje.
Našijneho rjećazka dla su wčera radnicu durinskeho Steinbacha-Hallenberga ewakuowali. Debjenka bě w pakćiku, kotryž bě přistajena sobu na dźěło přinjesła. Při tym jej napadny, zo bě pakćik wot jej njeznateje firmy. Dokelž tukachu na škódnu maćiznu, wołachu fachowcow wohnjoweje wobory a krajneho kriminalneho zarjada. Skónčnje so wukopa, zo jedna so wo našijny rjećazk, kiž bě žona spočatk lěta internetnje skazała – a mjeztym na to zabyła.
To a tamne (04.08.21)
Hoberskeje hromady spowróćanych napojowych kašćikow dla njemóžachu wobydlerjo domu w porynsko-pfalcskim Brohlu-Lützingu ležownosć wjace wopušćić. Z prózdnymi blešemi pjelnjene kašćiki běchu so kónc tydźenja ze susodneho składu wikowarja napojow na dwór před domom powróćili a zašlahachu zachod. Po informacijach policije ležeše tam wjace hač 500 kašćikow. Pomocnicy wobydlerjow z wuskosćow wuswobodźichu.
Wjace hač 300 metrow po wopłóčkowym kanalu je žołma dešćikoweje wody třoch dźěłaćerjow w badensko-württembergskim Heidenheimje sobu torhnyła. Mužojo wuńdźechu ze snadnymi zranjenjemi. Štwórty kolega bě jich hišće před přiběracej wodu po zliwku warnował. Woni pak njemóžachu spěšnje dosć reagować a wuchowachu so hakle na brjoze rěki Brenz.
To a tamne (03.08.21)
Z awtom nana na hrajkanišćo jěł je dźewjećlětny hólčec w Frankfurće nad Mohanom. Jězba skónči so po 50 metrach, jako wón do parkowaceho awta prasny. Štyri lěta młódši bratr sedźeše na pódlanskim sydle. Kak běštaj hólcaj ke klučikej awta z awtomatiskej kolesynu přišłoj, chce policija hišće zwěsćić. Při zražce so na zbožo nichtó njezrani. Wěcna škoda wučinja přiwšěm wjacore tysacy eurow. Nan móžeše swojeju synow hišće na městnje njezboža přewzać.
Wopity šofer je na zwjazkowej dróze pola Schwerina ze swojim busom do małotransportera zrazył a jón z dróhi storčił. Transporter so přećisny a ležeše skónčnje na třěše. Jeho 53lětna wodźerka so na noze zrani. Pola 38lětneho šofera linijoweho busa naměri policija něšto wjace hač promil alkohola w kreji. Jězbnu dowolnosć jemu nablaku sćaza.
To a tamne (02.08.21)
Lockdowna dla je Awstralčanka na loterijowy lisćik zabyła a hakle po dwěmaj tydźenjomaj pytnyła, zo je milionarka. Ličby běchu hižo 21. julija wulosowali. „Lockdowna dla pak njejsym lisćik scyła kontrolowała.“ Jako so skónčnje na lisćik dohlada, dyrbješe zwěsćić, zo je milion awstralskich dolarow (618 000 eurow) dobyła. Z pjenjezami chce najprjedy swój dom wotpłaćić a potom dowol planować.
W nutřkownych rumnosćach awtodróhoweho mosta je policija technoparty rozpušćiła. Wobydlerjo sewjerorynsko-westfalskeho Engelskirchena běchu so nócneje hary dla hóršili. Policisća zwěsćichu, zo přińdźe hara z katakombow mosta. Tam bě wšitko profesionalnje wuhotowane: bara, hudźbna připrawa ze swěcu a milinowymi agregatami. 20lětny bě w socialnych syćach na party přeprosył. Jako zastojnicy přijědźechu, bě so hižo 20 ludźi zhromadźiło. Tež dalšich sto hosći, kotřiž hišće přijědźechu, je policija domoj pósłała. Rozpušćena bu party na kóncu kaženja domoweho porjada dla.
