To a tamne (18.08.22)

štwórtk, 18. awgusta 2022 spisane wot:

Nahi muž je so w nocy na srjedu na puć do cyrkwje w Aalenje podał. Kaž 50lětny policiji rozjasni je wón konop kurił a chce nětko nahi, kaž je so narodźił, do Božeho domu hić. Zastojnicy pak dowjezechu muža domoj. W bydlenju přepoda 50lětny policistam tež hišće dobrowólnje sudobjo, kotrež bě z konopju napjelnjene.

Pola mnohich turistow woblubowane konjace kuče na kupje Mallorca njesmědźa strowoty zwěrjatow dla při horcoće wjace jězdźić, wozjewi zawčerawšim radnica stolicy španiskeje kupy Palma. Zakaz zwoprawdźeja, jelizo španiska wjedrowa słužba Aemet najniši žołty warnowanski schodźenk wuwoła. Tón płaći wot něhdźe 36 stopnjow celsiusa.

To a tamne (17.08.22)

srjeda, 17. awgusta 2022 spisane wot:

W stolicy Nepala Kathmandu tuchwilu žane wotpadki njewotwozyja, dokelž při wulkej deponiji bydlacy protestuja. Wobydlerjo wokoło Banchare Danda deponije hižo někotre tydźenje nakładne awta zadźerža, kotrež chcedźa tam wotpadki dowjezć, kaž lokalne medije rozprawjeja. Wobydlerjo strukturnje słabeje kónčiny wokoło smjećoweje deponije su chudźi a ćerpja pod smjerdom kaž tež zanjerodźenjom wulkeho mnóstwa wotpadkow dla, kotrež tam jenož deponuja a njerecycluja. Z protestom žadaja sej lěpše žiwjenske wuměnjenja.

Zwěrjeću překwapjenku mějachu minjeny kónc tydźenja wobydlerjo Berlinskeho bydlenja. Tam je jich liška wopytała. Ludźo su zwěrjo sobotu rano na balkonje našli, policija zdźěli. Potom pak je liška na třěchu domu ćeknyła. Policisća zamóžachu ju pak zaso na balkon wabić. Přez bydlenje a po schodach je zwěrjo potom zaso won na dróhu běžało. Liška bě spłóšiwa a njeje nikoho nadpadnyła, w zdźělence dale rěka.

To a tamne (16.08.22)

wutora, 16. awgusta 2022 spisane wot:

Předrasćeny jako policist je młody muž při hłownym dwórnišću Hagen wustupował. Policisća pak su 21lětneho w nocy na sobotu lepili, jako měješe wón dźěle policajskeje uniformy zwoblěkane, policija wčera zdźěli. Tak chcyše młody muž zaćišć zbudźić, zo je zastojnik. Jako wopodstatnjenje mjenowaše wón produkciju krótkich widejow za swój account w socialnych medijach. Při tym by so wosoby naprašował. Nětko pak je policija přećiwo 21lětnemu jednanje znjewužiwanja powołanskich pomjenowanjow a drasty dla zahajiła.

W Čěskej je wubědźowanski wóz formule 1 na awtodróze jěł a so wo kedźbnosć postarał. Policija je přepytowanja k po­zdatnje ilegalnej jězbje zahajiła, zdźěli wčera rěčnica přisłušneho policajskeho prezidija w Praze. Zastojnicy zawěsćichu wšitke wideja podawka, kotrež buchu dotal w socialnych medijach wozjewjenje.

To a tamne (15.08.22)

póndźela, 15. awgusta 2022 spisane wot:

Zhubjeneho barika je policija w Mannheimje z awtodróhi wuchowała a swojemu wobsedźerjej wróćiła. Šofer motorskeho bě dar za połdralětnu dźowku spřećeleneje swójby při jězbje po zwjazkowej awtodróze A 6 zhubił, policija minjeny pjatk zdźěli. Zo njeby so barikej ničo stało, su zastojnicy wobchad skrótka zadźerželi a jeho z jězdneje wuchowali. Hač na někotre blaki njeje so zwěrjatku ničo stało. Jako dopomnjenku na swoje njewšědne wuchowanje ma barik nětko wopon policije na bančiku připinjeny.

Po třoch měsacach smědźa so kóčki w badensko-württembergskim Walldorfje zaso swobodnje pohibować. Dwě njedźeli zašo hač předwidźane je so dźensa jónkrótny lockdown za kóčki zakónčił. Młodźata wot wotemrěća wohroženych chocholikow (Haubenlerche) su dźakowano wjedrowemu połoženju tak daloko wuwite, zo hižo riziko njewobsteji, zo móhli je kóčki napadnyć.

To a tamne (12.08.22)

pjatk, 12. awgusta 2022 spisane wot:

Jako štom předrasćeny muž je w bayerskim Ingolstadće kolesowarku wustróžił, a to tak jara, zo je 45lětna padnyła a so zraniła. Žona bě ze swojim mandźelskim w měšćanskim parku po puću, jako so z plastowymi łopjenami zdrasćeny muž naraz pokaza. Wón drje jej hišće pomoc poskići, potom pak so naraz zminy. Policija pyta nětko za swědkami tuteje kuriozneje situacije.

Dwaj měsacaj po zajeću Jasona Alexanera před domom spěwarki Britney Spears su něhdyšeho mandźelskeho spěwarki ranjenja domjaceho měra a ranjenja ćěła dla wobwinowali. Napřećo statnemu rěčnistwu je Alexander wumjetowanja při­znał, zo by so procesej wuwinył. Jeho su mjeztym pušćili. Wón dyrbi pak wotstawk sto metrow k Spears dodźeržeć. Spěwarka bě so 2004 na swojeho přećela wudała, mandźelstwo dźeržeše 55 hodźinow.

To a tamne (11.08.22)

štwórtk, 11. awgusta 2022 spisane wot:

Z hamorom su policisća w Hövelhofje pola Paderborna dwaj měsacaj stare dźěćo ze zamknjeneho awta wuswobodźili. 33lětna mać bě dźěćo mylnje zamknyła a na klučiki w awće zabyła. Starosćo so wo swoje dźěćo wołaše žona nuzowe čisło policije. Jedyn z policistow z nuzowym hamorom wokno šofera kedźbliwje rozbi, zo njeby dźěćo zranił. Přiwšěm wołachu tež wuchowansku słužbu.

200 eurow pokuty napołožić chcedźa w chorwatskim dowolowym měsće Baška na juhu kupy Krk kóždemu turistej, kiž sej z pomocu trjenja lěhadło při brjoze morja „rezerwuje“. Tole su zamołwići za turizm města připowědźili. Dotal njeje jasne, kak chcedźa zakaz přesadźić, wšako dyrbiš ludźi při wupołoženju trjenja lepić. Na kupje Teneriffa sćelu wjacori hotelownicy swojich sobudźěłaćerjow, kotřiž trjenja při poolu prosće zhromadźa.

To a tamne (10.08.22)

srjeda, 10. awgusta 2022 spisane wot:

Spěwacy honač je w durinskim Fried­richroda zasadźenje policije zawinował. 51lětny bě so wčera rano pola policije přizjewił a rjekł, zo słyši we wobłuku lěsneje kupjele dźěćo za maćerju wołać. Na městnje so potom wukopa, zo njepochadźeja zwuki wot žałosćaceho dźěsća, ale wot honača. „Muž so pola zastojnikow za misnjenje a za zawinowanje policajskeho zasadźenja zamołwi, policisća reagowachu z humorom“, policija piše.

Wobchadnej njezboži a 11 000 eurow škody je kuna na awtodróze A 17 zawinowała. Zwěrjo běžeše póndźelu wječor 53lětnemu šoferej pola wotjězda Gorbitz před wosobowe awto. Šofer na to raznje zaborzdźi, zhubi kontrolu nad awtom a zrazy do nabóčneho wobhrodźenja. Krótko po tym zrazy 44lětny na samsnym městnje do kuny. Zwěrjo zražku njepře­žiwi. Nichtó so njezrani.

To a tamne (09.08.22)

wutora, 09. awgusta 2022 spisane wot:

Padušnicu nakupowanskich wozyčkow su w braniborskim Nowym měsće nad rěku Dosse lepili. Sobudźěłaćerjam kupnicy bě 71lětna wospjet napadnyła, dokelž přińdźe prawidłownje nakupować a so po tym z wozyčkom wotsali. Přistajeny jej sćěhowaše a zwěsći, zo steješe na kilometer zdalenym statoku, hdźež žona bydleše, hižo 13 wozyčkow. Policija je sej žonu mjeztym na stražu skazała.

Swojej maćeri w Mnichowje žiwjenje wuchował je syn – w Londonje. Warnowanska připrawa za kur bě jeho na mobilnym telefonje alarmowała, mjeztym zo mać w Mnichowje spaše a alarm njesłyšeše. Muž informowaše policiju, kotraž kolegow w Mnichowje a tak wohnjowu woboru wołaše. Žona bě na jědź na kachlach zabyła a sej wusnyła. Jědź so zapali a alarmowu připrawu zbudźi. Wohnjowa wobora móžeše žonu wuswobodźić.

To a tamne (08.08.22)

póndźela, 08. awgusta 2022 spisane wot:

Dospołnje přećeženej nakładnej awće je policija na awtodróze A 2 pola Hamma našła. Kaž rěčnik policije zdźěli, transportowaštej awće šokolodu. Jedyn wóz wažeše dźesać tonow, tamny wjace hač dwanaće, byrnjež byštej najwjace 7,5 tonow wozyć směłoj. Transportna firma dyrbješe třeće awto organizować a šokolodu překładować. Předewzaću hrozy pjenježna pokuta 300 eurow.

Jenož krótke bě wjeselo 14lětneho, po tym zo bě na hermanku w delnjofrankskim Marktheidenfeldźe pistolu-hrajku dobył. Policija jemu hrajku wotewza. Do toho bě sobudźěłaćer hermanka pachoła namołwjał, bróń hakle doma wupakować. 14lětny pak tole ignorowaše a z brónju, kotraž wupada kaž prawa pistola, po swjedźenišću běhaše. Wón smě sej bróń na policajskej straži wotewzać. Předawarjow proša, tajke hrajki wjace njepředawać.

To a tamne (05.08.22)

pjatk, 05. awgusta 2022 spisane wot:

Mylnje nuzowe borzdźidło ćahnył je ­dowolnikar z Bayerskeje w powjaznicy w Awstriskej a je tak wjetšu wuchowansku akciju zawinował. 50lětny z Nürnbergskeje kónčiny chcyše so při jězbje w powjaznicy Dachstein-Krippenstein njedaloko Obertrauna kruće dźeržeć. Při tym hrabny pak nuzowe borzdźidło. Tole njezawinowaše jenož hnydomny stop kabiny, ale tež techniski defekt. 38 pasažěrow dyrbjachu z powjazami wuchować.

Po šěsć tydźenjach su zhubjeneho muža z Němskeje na kupje Mallorca namakali. Policisća 61lětneho wuhladachu, kiž ­ćerpi na demencu. Mandźelska bywšeho policista bě doma w Sewjerorynsko-Westfalskej lisćinu muža namakała. Na njej bě wón napisał, što chcył w swojim žiwjenju hišće zdonkonjeć, mjez druhim jězbu na Mallorcu. Bjez kóždeho słowa bě muž do lětadła zalězł a wotlećał.

nowostki LND