Zmije pušćeć
Smječkecy. Na łuce za Bjeńšec twarskim statokom stupaja njedźelu, 5. oktobra, zmije do njebja. Zmijepušćenje je mjeztym dobra tradicija, kotraž tež mnohe swójby z wokolnych wsow do Smječkec wabi. Wot 15 hodź. móžeće sej tam słódny plinc popřeć.
Wotměnjawy tydźeń z Krabatom
Němske Pazlicy. We wobłuku rybarskeho swjedźenja w Němskich Pazlicach wotewru jutře, pjatk, Krabatowy tydźeń, kiž traje hač do 12. oktobra. Tak wotměje so sobotu w Mortkowje nazymski a winowy swjedźeń. Sobotu a njedźelu přeproša w Čornym Chołmcu na domchowanku. Póndźelu powěda Krabat w Jitku stawiznički ze swojeho žiwjenja. 7. oktobra předstaja we Wojerowskim Domowinskim domje, kak móžeš BOOKii-pisak wužiwać. A 11. oktobra zarjaduja nazymske wiki w Koćinje.
Popserbja wustupja
Přihotuja nowe poskitki
Do Krabatoweho młyna
Poskićuja dźěłarnički
Wojerecy. „Što činiš noweho na jewišću?“. Tak mjenuje so rjad zetkanjow, na kotrychž steja dźěłarnički kaž tež wuměna wo dźiwadłowym dźěle z dźěćimi w srjedźišću. Projekt spěchuje lajske dźiwadło a skići kreatiwne rěčne rumy. Serbske šulske towarstwo a ZARI jón zhromadnje přewjedźetej. Přeprošeni su wšitcy, kotřiž z dźěćimi dźěłaja: kubłarjo, wučerjo kaž tež starši, wšojedne hač dźiwadłowu skupinu hižo maja abo hač chcedźa nowu wutworić. Terminaj stej 30. septembra we Wojerecach w Domje Domowiny a 24. oktobra w Budyskim NSLDŹ. Přizjewjenja a dalše informacije pod: .
W rejowanju so wuspytać
Kulow. Rejowanske dźěłarnički poskićuja Kulowske rejwanske skupiny jutře, sobotu, wot 10 do 17 hodź. w sportowni. Wšitcy, kotřiž rady rejuja abo chcedźa sej rejwanje wotkryć, su lubje witani. Mjez druhim zwučuja jazzowe, moderne a dźěćace reje kaž tež musical. Wot 15 do 17 hodź. budźe zjawna prezentacija. Wobdźělenje płaći dźesać eurow za kóždu dźěłarničku.
Domchowanka w młynje
Do piwarnje pohladnyć
Kulow. Mjeztym hižo 33. swjedźeń piwarnje swjeća wot pjatka do njedźele, 26. do 28. septembra, w Kulowje. Tři dny změni so piwarnja na městno wjesela, kulinariskich wosebitosćow a njezapomnitych dožiwjenjow. Na wopytowarjow čaka čerstwe točene Kulowske piwo wšitkich družin. Kóždy dźeń změja live-hudźbu. Sobotu wot 14 hodź. móža sej zajimcy piwarnju wobhladać. Tam jim mjez druhim rozłoža, kak piwo warja. Samsny dźeń w 15 hodź. zahaja piwarniski wjacebój ze žortnymi wubědźowanjemi. Njedźelu popołdnju poskićuja kofej a tykanc.
Druhim žiwjenje wuchować
Łaz (AK/SN). Při twarjenju domizniskeho a kulturneho towarstwa we Łazu pódla tamnišeje šule maja wot njedawna zjawny defibrilator. Z nim w nuznym padźe druhemu žiwjenje wuchowaš. 2 000 eurow drohi nastroj financowaše towarstwo ze swójskimi srědkami a z pomocu Wuchodosakskeje lutowarnje.
Prawje pomhać zwučować
Radwor/Minakał. We wobłuku tydźenja wožiwjenja přepodadźa štwórtk, 25. septembra, w Radworskej gmejnje nowej defibrilatoraj. Z nimaj móža ludźom w nuzowym padźe pomhać, jeli wutroba nadobo wjac njebije. W 17 hodź. přepodadźa tajki defibrilator w Radworskej „Slaviji“. Tamny nastroj přepodadźa w 17.30 hodź. w Minakałskim medicinskim centrumje na Hłownej dróze 16. Tam maja wot 18 hodź. wšitcy zajimcy składnosć, za zwučowanje a přepruwowanje swojich kmanosćow wožiwjenja. K tomu wšitkich přeproša.
Prof. Hasinger přednošuje
Chrósćicy. Móžne konflikty mjez twarom milinowych wětrnikow a wutwarom Astrocentruma Łužica su jedna z temow přichodneho posedźenja Chróšćanskeje gmejnskeje rady. Wona budźe štwórtk, 25. septembra, w 19 hodź. w gmejnskej sydarni. Nimo toho přednošuje designowany direktor DZA prof. dr. Günther Hasinger.
Wólbny bój w Serbach
Koslow. Kandidatka za zastojnstwo wjesnjanosty w Njeswačidle, Anett Pötschke ze Šešowa, přewjedźe dwaj ze swojich pjeć terminow wólbneho boja w serbskimaj wjeskomaj. Dźensa, póndźelu, w 17 hodź., předstaji so bjezstronska gmejnska radźićelka a mišterka za wóčnu optiku wobydlerjam Koslowa a wšitkim zajimcam w domje wjesneho towarstwa. Jutře, wutoru, we 18.30 hodź. pak móža ju wobydlerjo w Dobrošicach na dworje Róžeńčanskeje dróhi 2 zeznać, jeje so prašeć a z njej diskutować. Na wobě zarjadowani su wobydlerjo wutrobnje přeprošeni.
Radźićeljo wuradźuja
Nowoslicy. Přichodne posedźenje gmejnskeje rady Ralbicy-Róžant wotměje so jutře, wutoru, we 18.30 hodź. w kulturnym domje w Nowoslicach. Kaž z dnjoweho porjada wuchadźa, chcedźa předewšěm wo hłownych wustawkach gmejny diskutować. Nimo toho dorozumja so wo přichodnych terminach a wjesnjanosta poda swoje informacije.
Swobodne městna za jězbu
Pančicy-Kukow. Za swoju jězbu 27. septembra do čěskich Warnoćic a do Kumwałda ma Domowinska skupina Pančicy-Kukow hišće swobodne městna. Bus wotjědźe we 8 hodź. wot busoweho zastanišća při šuli. We Warnoćicach zeznaja wobdźělnicy wučbnu šćežku na slědach bywšich serbskich gymnaziastow. Po wobjedźe w piwarni wobhladaja sej w Rumburgu klóšter Loreto. Ducy domoj pozastanu w Kumwałdźe a wobhladaja sej najwjetšu wjesnu cyrkej Němskeje. Wokoło 18 hodź. wulětnicy zaso domoj dojědu. Za hosći płaći jězba 50 eurow. W płaćiznje zapřijate su jězba z busom, wobjed a wšitke wodźenja. Zajimcy njech přizjewja so spěšnje pod telefonowym čisłom 035796 96104.
Center swjeći narodniny
Budyšin. Swoje 25lětne wobstaće swjeći jutře, sobotu, Budyski Center na Žitnych wikach. Za to su tam pisany program zestajili. Wot 11 hodź. budźe modowa přehladka kwasneje drasty. Hodźinu pozdźišo zahudźi młodźinski dujerski orchester. W 14 hodź. přewjedu tombolu. Wot 15.30 hodź. móža so wopytowarjo z dźiwadźelnikami Němsko-Serbskeho ludoweho dźiwadła fotografować dać.
Plester ponowja
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady je dźensa, srjedu, w 19 hodź. w gratowni Njebjelčanskeje wohnjoweje wobory. Mjez druhim předstaja připrawu, w kotrejž chcedźa wotpadki nachwilnje składować a wobdźěłać. Dale zaběraja so radźićeljo z twarskej próstwu za składowansku halu žita w Miłoćicach. Nimo toho chcedźa wobzamknyć, zo Njebjelčanska gmejna z towarstwa IDOL wustupi. Towarstwo spěchuje styki wobydlerjow do druhich krajow.
Z krajnym radu so rozmołwjeć
Róžant. Dalše rozmołwne koło z Budyskim krajnym radu Udom Witschasom (CDU) budźe jutře, štwórtk, w 17.30 hodź w sydarni Róžeńčanskeho gmejnskeho zarjadnistwa. Tam móža zajimcy na njedostatki skedźbnić a swoje prašenja wotbyć. Zarjadowanje měri so hłownje na wobydlerjow gmejnow zarjadniskeho zwjazka Při Klóšterskej wodźe. Přizjewjenje trěbne njeje.
Peter Orloff spěwa
