Jarobinka koncertuje
Přeprošuja na namšu
Zaběraja so z jabłukami
Bjedrichecy. Na akciski dźeń kołowokoło jabłuka přeprošuje biosferowy rezerwat Hornjołužiska hola a haty pjatk, 31. oktobra, do Bjedrichec we Łazowskej gmejnje. Wot 13 do 16 hodź. móža wopytowarjo žiwjenski rum sadowcoweje łuki zeznawać, wšelake družiny jabłukow woptawać, brěčku zhotowjeć a sadowcy sadźeć. Přihotowane budu hry a hódančka za cyłu swójbu. Zajimcy móža tež zwěsćić dać, kotre družiny jabłukow na swojej zahrodźe maja. Za to měli woni znajmjeńša tři jabłuka ze šišku a łopjenami sobu přinjesć. Při špatnym wjedrje zarjadowanje wupadnje. Zajimcy njech so do toho internetnje wobhonja.
Za jězbu so přizjewić
Přednošk wupadnje
Na kermušku
Chrósćicy. Na wosadnu kermušku su młodostni a dorosćeni dźensa, pjatk, do Hórnikoweho domu w Chrósćicach přeprošeni. W 20 hodź. zahaja wječor z Božej mšu a přiwzaćom do wosadneje młodźiny. Po tym, něhdźe wot 21 hodź. budu reje ze skupinu SerBeat. Zastup płaći pjeć eurow.
Chcedźa ryby wułójić
Běła Hora. Z Młynskeho hata w Běłej Horje (Belgern) chcedźa jutře, sobotu, wot 10 do 17 hodź. ryby wułójić. Změja tam delikatny poskitk přihotowany. Na předań budu čerstwa a kurjena ryba, soljanka a pražena ryba. A tež wo dalše přikuski, zabawu a hudźbu so Škodźic swójba stara. Wšitcy zajimcy su pod hesłom „Swjećće rady z nami!“ cyle wutrobnje přeprošeni.
Na interaktiwny přednošk
Bart. Přichodnu wutoru, 28. oktobra, w 19 hodź. wotměje so w gratowni wohnjoweje wobory w Barće na Hłownej 18 interaktiwny přednošk z dr. Christianu Piniekowej. Z tym zahaji wona rjad pod hesłom „Pisana serbskosć“. Jónu wob měsac chcedźa podobne přednoški we wšelakich wsach mjez Malešecami a Bukecami poskićeć, zdźěli syć za serbsku rěč a regionalnu identitu ZARI.
Nazymske wěncy paslić
Radźićeljo wuradźuja
Róžant. We wobłuku zarjadniskeho zwjazka Při Klóšterskej wodźe so štwórtk, 23. oktobra, hnydom tři gmejnske rady schadźuja. Delanscy parlamentownicy zetkaja so we 18.30 hodź. w Róžeńčanskej gmejnskej sydarni. Mjez druhim chcedźa naćisk noweho horta při Ralbičanskej šuli předstajić. Dale póńdźe wo twarske dźěła, z kotrymiž ma so něhdyši žłobik w Smjerdźacej na běrowowe rumnosće přetwarić.
Chrósćicy. Radźićeljo Chróšćanskeje gmejny wuradźuja wot 19 hodź. w gmejnskim a kulturnym centrumje. Hłowna tema budźe přetwar busowych zastanišćow na Hórnikowej w Chrósćicach.
Pančicy-Kukow. Radźićeljo gmejny Pančicy-Kukow schadźuja so jutře w 19 hodź. w Lejnjanskim hosćencu. Mjez druhim steji změna mjezy mjez Pančičanskej gmejnu a městom Halštrowom na dnjowym porjedźe.
Přewjedu kurs za yoga
Policist přednošuje
Pančicy-Kukow. Domowinska skupina Pančicy-Kukow přeprošuje na swoje přichodne zarjadowanje srjedu, 22. oktobra, w 19 hodź. do awle Šule Ćišinskeho. Přeprosyli su sej wobydlerskeho policista w gmejnach zarjadniskeho zwjazka Při Klóšterskej wodźe Andréja Kobera. Wón porěči wo swojim wšědnym dźěle a tež wo aktualnych strachach, hdyž na přikład wobšudnicy na ludźi zwonja a chcedźa jim pjenjezy wulišćić. Nimo skupinarjow su tež wšitcy dalši zajimcy na přednošk wutrobnje witani.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so srjedu, 22. oktobra, w 19 hodź. w tamnišej gratowni wohnjoweje wobory. Nimo ležownostnych prašenjow póńdźe mjez druhim wo to, hač partnerskej zrěčeni z madźarskej gmejnu Ladánybene a z gmejnu Ouidah w afriskim Beninje wupowědźa. Wopytowarjo drje smědźa na zajimawu diskusiju wćipni być.
Kak KI prawje wužiwać?
Policist přednošuje
Porěči wo serbskej drasće
Radwor. Chór Meja přeprošuje wutrobnje wšitkich zajimcow na přednošk wo „Serbskej katolskej narodnej drasće w běhu časa“ z Andreju Pawlikowej. Zarjadowanje wotměje so póndźelu, 20. oktobra, w 19.45 hodź. w Radworskim Słodeńku.
Nazymsku pychu paslić
Smjerdźaca. Serbske kubłanske srjedźišćo LIPA zarjaduje štwórtk, 23. oktobra, wot 9 do 11 hodź. a štwórtk, 30. oktobra, wot 18 do 20 hodź. w Smjedźacej nazymske paslenje z Róžu-Mariju Bernardowej. Wobdźělnicy budu předewšěm nazymske wěncy wić. Za to njech sej zela, moch a kwětki sobu přinjesu. Popłatk płaći na wosobu 20 eurow. Přizjewjenja přijimuja e-mailnje pod .
Lipa a Lipki zaspěwaja
Ćisk. Chór Lipa a jeho Lipki, dźěći spěwarjow chóra, wuhotuja njedźelu, 19. oktobra, w 16 hodź. nazymski koncert na žurli hosćenca „Zeleny wěnc“ w Ćisku. Zaklinča znate serbske pěsnički, twórby Kocora a Zejlerja, moderna popowa hudźba a kaž přeco premjera. Přewodźejo pěsničce pokazatej so hudźbnej wideji. Tež solisća z chóra zaspěwaja. Lipki pak přednjesu šibałe pěsnički. Nimo toho Lipa a Lipki jedyn woblubowany spěw zhromadnje zanjesu. Hižo wot 15 hodź. su hosćo na bjesadu při kofeju a přikusku přeprošeni. Zastup za koncert płaći sydom eurow (wot 16 lět). Přichodny wustup Lipy je na hodownym koncerće 28. decembra w Róžeńće.
Koncertuje na pišćelach
Łaz. Pišćelowy koncert wotměje so njedźelu, 19. oktobra, w 16.30 hodź. we Łazowskej cyrkwi. Hudźbne popołdnjo zarjaduje so do cyłoněmskeho festiwala Rühlmannowych pišćelow. Koncert we Łazu wuhotuje organist, pianist a harmonist Matthias Müller. Wón je namrěwc pišćelotwarskeje firmy Rühlmann. Zastup je darmotny, dary pak su witane.
