Rakecy. Wot wčerawšeho móža zajimcy w Rakečanskej ewangelskej cyrkwi spirituelnu zwukowu instalaciju z titulom „Dobry pastyr“ dožiwić. Hač do 2. februara 2025 pokazuja pjatnaćemjeńšinsku twórbu z pjeć mjeńšinow trajacej přestawku stajnje w času mjez 9 a 20 hodź. Zastup do cyrkwje je darmotny.
Přednošk „Technologija a rěč“
Budyšin. Budyski Serbski institut (SI) přeprošuje jutře, 28. nowembra, w 19 hodź. na přednošk pod hesłom „Technologija a rěč – Předčitanska funkcija za delnjo- a hornjoserbšćinu“. Zarjadowanje budźe w Budyskim Serbskim muzeju. Fonetikarka dr. Astrid Schmiedelowa a rěčespytnikaj Lechosław Jocz ph.d. a Jan Měškank (wšitcy SI) předstaja mjez druhim wuslědki projekta SI, w kotrymž su předčitansku funkciju wuwili.
Adwentne pěsnje zaklinča
Malešecy. Chór Židźino přeprošuje sobotu, 30. nowembra, w 15.30 hodź. wutrobnje do Malešanskeje ewangelskeje cyrkwje, w kotrejž chce publikum z adwentnymi pěsnjemi zawjeselić.
Bože narodki ze wšeho swěta
