Dodawk ke koncertej
Bukecy. W zwisku z powěsću wo nazymskim koncerće w Bukecach na prěnjej stronje wčerawšeho wudaća SN organizator Bukečanskeje Bjesady Mato Krygaŕ na to skedźbnja, zo wotmě so zarjadowanje w Bukečanskej Wjesnej hospodźe, nic w tamnišim Koncertowym a balowym domje. Za zmylk prosymy wo wodaće. Wutrobnje dźakuje so Mato Krygaŕ pomocnikam kołowokoło Domaša Žura, čłona Kulturu spěchowaceho towarstwa w Bukecach za organizaciju koncerta. „Bjez jich pomocy njeby tutón kulturny wjeršk wjace móžny był. Tež pokročowanje nałožka w Bukecach budźe jenož na tute wašnje móžne“, wón pisa.
Na čitanje generacijow
Zarjadniski zwjazk přeprošuje
Pančicy-Kukow. Zarjadniski zwjazk „Při Klóšterskej wodźe“ přeprošuje wutrobnje na zjawnu zhromadźiznu, kotraž wotměje so jutře, 5. nowembra, w sydarni twarjenja Zarjadniskeho zwjazka w Pančicach-Kukowje. Započatk zjawneho dźěla posedźenja je w 19 hodź.
Z Argonawtami na dyrdomdej
Budyšin. We wobłuku swojeho rjadu zarjadowanjow „Stawizny hwězdow“ přeprošuje Budyska hwězdarnja sobotu, 9. nowembra, cyłu swójbu na přednošk wo grjekskej powěsći wo Argonawtach. Dyrdomdej započina so w 19.30 hodź. Zastup za dorosćenych płaći 10 a za dźěći hač do staroby 17 lět 5 eurow.
Na Kilimandźaro so podać
Łaz. Pod titulom „Třo přećeljo, jedyn Awstričan a zhromadny dyrdomdej“ rozprawja Łazowski wjesnjanosta Thomas Leberecht (CDU) pjatk, 8. nowembra, we Łazowskej radnicy wo „jednym z najwjetšich dyrdomdejow swojeho žiwjenja“, kaž sam praji: Wo postupje na Kilimandźaro, najwyšu horu Afriki. Spěchowanske towarstwo Zetkanišćo Dom Zejlerja a Smolerja wšitkich zajimcow wutrobnje na wobrazowy přednošk přeprošuje. Spočatk je we 18 hodź.
Star-Wars-dźeń w bibliotece
Běrow zapósłanče wopytać
Kamjenc. Elaine Jenčec, nowa zapósłanča CDU w Sakskim krajnym sejmje, kotraž zastupuje region kołowokoło Kamjenca, přeprošuje wšitkich zajimowanych na „dźeń wotewrjeneho běrowa“ štwórtk, 7. nowembra, wot 15 do 17 hodź. na Zapadnej 4 w Kamjencu. Wona wjeseli so na zabawne popołdnjo při kofeju a tykancu a přeje sej „diskusiju, wuměnu nazhonjenjow a dobru mjezsobnosć na wužitk našeje domizny“. Přeprosyła je wona tež něhdyšeho sakskeho ministerskeho prezidenta prof. dr. Georga Milbradta, kiž bě wot 1994 do 2009 zapósłanc samsneho wólbneho wokrjesa. Přizjewjenja za tutón dźeń trěbne njejsu.
Zhromadnje spěwać
Budyšin. Zwjazk serbskich spěwarskich towarstwow přeprosy wšitkich zajimcow wutrobnje na přichodne zhromadne spěwanje do rumnosćow Serbskeho ludoweho ansambla a to wutoru, 5. nowembra, wot 18 hodź. Dalši termin je za 3. december planowany.
Zarjadniski zwjazk přeprošuje
Škleńca objekt wustajeńcy
Kamjenc. Na wotewrjenje pućowanskeje wustajeńcy pod hesłom „Glas – Handlungen & Resonanzen“ přeprošuja wuměłče Iona Dutz, Heidi Morgenstern a Anne Munka do Elementarija Kamjenskeho Muzeja zapadneje Łužicy a to pjatk, 1. nowembra, w 16 hodź. Wustajeńca skići dokumentariske dohlady do łužiskeje industrijneje kultury škleńčerstwa kaž tež do načasneho wuměłstwa, kotrež so ze škleńcu zaběra. Zastup je darmotny.
Hamburgčan zahudźi we Łazu
Łaz. Thomas Steinlein, spěwar, pěsnjer, pianist a hudźbny pedagoga z Hamburga, wuhotuje pjatk, 1. nowembra, w 19 hodź. koncert pod titulom „Zeitgleise“ we Łazowskej cyrkwi. Jeho wosobinske teksty swědča wo krutym zakótwjenju we wěrje. Zastup je darmotny. Wo pjenježny dar so prosy.
Wuslědki na škoće seniorow
Pančicy-Kukow. Dobyćer na wčerawšim serbskim škoće seniorow w Pančicach-Kukowje je Eckerhard Krautwurst z 2 594 dypkami před Uwe Sieglerom z 2 586 dypkami. Třeće městno docpě Józef Brězan z 2 491 dypkami. Cyłkownu tabulku nawjeduje dale Wolfgang Kühn z 24 039 dypkami.
Na rekwiem Luigija Cherubinija
Měrana Cušcyna čita
Budyšin. Serbska basnica Měrana Cušcyna čita pjatk, 1. nowembra, we 18.30 hodź. ze swojeje loni wušłeje němskeje zběrki basnjow a krótkoprozy „innen bröckelt die schicht“ w Ekumeniskim tachantskim knižnym wobchodźe. Wo hudźbne wobrubjeneje na mjeztym hižo 79. wudaću Literarneho kofeja postara so hudźbna terapeutka Claudia Steidte na akordeonje.
Přednošk wo rěčnej krajinje
Budyšin. Maćica Serbska přeprošuje dźensa wječor w 19 hodź. na přednošk we wobłuku Maćičneje akademije do Serbskeho domu. Referent Evan Bleakly rozjima rólu hornjoserbskeje rěče w rěčnymaj krajinomaj Ralbicy-Róžant a Rakecy a to z wosebitym fokusom na diskursy, w kotrych so hornjoserbske teksty we woběmaj gmejnomaj jewja. Zastup je darmotny. Zajimcy móža přednošk tež online sćěhować. Link namakaja na internetnej stronje Maćicy pod rubriku „aktualne“.
Halloween na hrodźe
Seniorojo škotuja
Posledni dwójny koncert
Budyšin. Dołhe, rjane lěćo je nimo. Tež towarstwo „Dźěłań dźeń“ w dźěłarni na Sukelnskej 18 chce je štwórtk, 31. oktobra, wot 19 hodź. z poslednim dwójnym koncertom zakónčić. Zastup je darmotny. Zarjadowanje zahaji hudźbna skupina z Ulma I SAW DAYLIGHT ze swojej hudźbu w stilu melodic hardcore. Hudźbny cyłk je so w lěće 2011 załožił a je po cyłej Němskej po puću. Po tym chce duwo Mamba ze Zhorjelca publikum ze swojim wotměnjawym hudźbnym stilom tak mjenowaneho punch-rocka zahorić a do soburejowanja pohnuć.
Na wiki karjerow do Wojerec
Wojerecy. We Wojerowskim Łužiskim centerje wotměwaja so dźensa a jutře wot 10 do 16 hodź. druhi raz wiki karjerow, na kotrymž so dohromady 40 regionalnych dźěłodawarjow předstaja. Zajimcy namakaja tu poskitki nastupajo wukubłanske kaž tež dźěłowe městna a móža so na městnje poradźować dać. Tež poradźowanje nastupajo samostatne dźěło abo dalekubłanje poskićuja.
Ludowe spěwy w nowym płašću
Finisaža wustajeńcy w muzeju
Budyšin. Serbski muzej w Budyšinje přeprošuje njedźelu, 27. oktobra, w 15 hodź. na finisažu wosebiteje wustajeńcy „Twarski inženjer Eberhard Dučman. Mjez łužiskej drjewowej architekturu a industrielnym twarjenjom“, kotraž wěnowaše so žiwjenju a skutkowanju dotal hišće mało znatemu serbsko-němskemu twarskemu specialistej. Zhromadnje z kuratorku a dźowku inženjera dr. Betinu Kaunowej zhladuja muzejownicy w ramiku wjedźenja a přednoška hišće raz na Dučmanowe (1926–2005) wusahowace regionalne a nadregionalne wukony na polu twarstwa a pomnikoškita.
Čita z noweje kriminalki
Łaz. Spěchowanske towarstwo Zetkanišćo dom Zejlerja a Smolerja we Łazu přeprošuje wšitkich zajimcow wutrobnje na čitanje z knihi „Der Wassermann-Räuber. Ein Oberlausitzkrimi“. Serbski awtor Christian Schneider z Hrubjelčic je kriminalny roman hižo na lětušich Lipšćanskich knižnych wikach šěršemu publikumej předstajił. Nětko chce swoju twórbu tež zajimcam we Łužicy zbližić a to pjatk, 25. oktobra, we 18 hodź.
Herkuleskeule w Budyšinje
Dohlady do šulskich stawiznow
Z přirodu swoje mocy měrić
Sprjewje. Na wosebite dožiwjenje za cyłu swójbu přeprošuje přirodoškitna stacija wuchodna Hornja Łužica do hrodu w Sprjewjach a to njedźelu, 27. oktobra, wot 10 do 14 hodź. Pod hesłom „Přiroda je sylna – sy ty sylniši?“ chce mjez dźěćimi a młodźinu zahoritosć za přirodu budźić. Mjez druhim nawuknu, kak sej z přirodnych materialijow přirodny dešćowy škit natwarja, sami woheń zapala abo so bjeze šmóratka w lěsu orientuja. Dalše informacije dóstanjeće pod tel. čo. 035893 508571 abo z mejlku na .
Gmejnska rada we Worklecach
Worklecy. Wjesnjanosta gmejny Worklecy Clemens Poldrack přeprošuje wutrobnje na zhromadźiznu gmejnskeje rady, kotraž wotměje so jutře, 23. oktobra, w rjadowni čo. 10 šule „Michał Hórnik“ we Worklecach. Započatk zjawneho dźěla posedźenja je we 18.30 hodź.
Koncert w awli gymnazija
