Wojerecy (AK/SN). Ze swojim mnohostronskim dźěłom, zaběracym so ze stawiznami, hladanjom pomnikow a z tworjacym wuměłstwom, wobohaća Wojerowski kulturny zwjazk měšćanske žiwjenje. „Prócujemy so wo zhromadne dźěło z druhimi towarstwami, štož je na kóncu wšitkim na dobro“, praji čłonka předsydstwa Petra Strobel tele dny składnostnje 80lětneho wobstaća kulturneho zwjazka. Něhdźe 50 čłonow jemu dźensa přisłuša. Swoje sydło ma towarstwo na Dołhej dróze we Wojerowskim starym měsće. Tam je tež historiska šewcownja „Hans Sachs“ zaměstnjena.

Z wosobinskimi dopomnjenkami hódnoćachu čłonojo dołhe stawizny kulturneho zwjazka. Henry Reeb na přikład bě jemu hižo 1976 jako šuler přistupił a po přewróće znowa puć do towarstwa namakał. Wón so předewšěm za to za­sadźuje, zo bychu so najwšelakoriše pomniki w měsće zachowali. Wjelelětna čłonka Ingrid Tempel dopominaše na molerja Kurta Klinkerta. W swojich mólbach je wón motiwy z města a wokoliny zwěčnił. Dźensa je jedna z Wojerowskich hasow po nim pomjenowana.