Projekt noweho wětrnikoweho parka w gmejnje Chrósćicy předstajili
Chrósćicy (JK/SN). Zajim wobydlerjow za móžny nowy wětrnikowy park sewjernje Chrósćic wčera w „Jednoće“ bě jara wulki a tamniša schadźowanska rumnosć bě nimale połna. Wjesnjanosta Marko Kliman (CDU) witaše zastupjerjow Drježdźanskeho předewzaća Sachsenkraft, kotrajž předstajištaj móžny projekt wětrnikoweho parka „Chrósćicy – sewjer“. Kaž wšudźe druhdźe su wobnowjomne energije tež w našich gmejnach dźeń a wuznamniše. We wuwićowym koncepće Chróšćanskeje gmejny so jedyn z klučowych projektow z tutej temu zaběra. Hižo wot lěta 2001 wětrnikaj pola Chrósćic milinu produkujetej, ale njewotpowědujetej hižo načasnym žadanjam efektiwity a wěstoty. Na wčerawšim zarjadowanju chcychu projekt jeničce předstajić a prěnje měnjenja wobydlerstwa zaznawać.
