Radwor (BB/SN). Čas žołtych zjawnych telefoniskich budkow drje je nimo. Mjeztym je Telekom nimale wšitke wottwa­riła, wšako ma takrjec kóždy šmóratko w zaku. Do mnohich budkow pak je nowe žiwjenje zaćahnyło. Na přikład, hdyž ludźo swoje knihi abo CDejki do nich stajeja, nastanje mała knihownja, w kotrejž móže so kóždy posłužować – darmotnje. Tež w Kamjenej tajka něhdyša telefoniska budka hižo steji, rjenje pomolowana a dwurěčnje popisana. Na zašłym posedźenju Radworskeje gmejnskeje rady wozjewichu, zo so we Łupoji a w Měrkowje bórze dalšej přidružitej.

Kontejnery za trjebanu drastu na wsach a w městach hižo dawno steja. W Radworju pak maja z nim swoje starosće. Kaž gmejnski radźićel Pětr Kliman rozprawješe, su cuzy njedawno rano zahe drastu z kontejnera zwućahali, sej wšelake wěcy zwuběrali a so potom z transporterom zminyli. Štož so jim po wšěm zdaću lubiło njeje, wosta na puću rozbrojene ležo. Štó drje njeznaći běchu, a za čo drastu z kontejnerow po wšěm zdaću kradnu?