Fukov (CS/SN). Rjana tradicija je, zo so němscy a čěscy wobydlerjo we wjesce zetkawaja, kotraž wjace njeeksistuje. Fukov, němsce Fugau, je wjesny dźěl Šluknova. Tule nichtó wjace njebydli, přetož něhdy sudetska wjes bu 1945 najprjedy zaso Čěskej přirjadowana, ale lěta 1960 ze wšej infrastrukturu zničena. Wo němskich stawiznach w Čěskej lětdźesatki ­ničo wědźeć nochcychu. Ale po politiskim přewróće 1989 je so to změniło. Mjeztym hižo něšto lět so na historiskim městnje domizniske zetkanje wotměwa. Na nje přichadźeja bywši němscy wo­bydlerjo Fukova, kotřiž su mjeztym we wysokej starobje, ze swojimi čěskimi susodami. Jedyn z nich je Peter Giebelhäuser. Wón bydli w Budyšinje a bě wjele lět předsyda tudyšeho staroměšćanskeho towarstwa. Na jeho prjedownikow dopomina na bywšim pohrjebnišću Fukova narowny kamjeń. Runje tam wotmě so minjene dny němsko-čěska Boža mša z duchownymi z Leutersdorfa a Litoměřic. Pohrjebnišćo su před něšto lětami zaso do porjadka stajili a tež pódla na arealu, hdźež je ně­hdy cyrkej stała, su dźiwju kerčinu zwutorhali. Hač do klětušeho lěća ma tam wuhladna wěža nastać.