Delanska gmejnska rada so z wjacorymi twarskimi nadawkami zaběrała

Róžant (JK/SN). Nowotwar horta při Ralbičanskej šuli nabywa poněčim jasne kontury. Na wčerawšim posedźenju tamnišeje gmejnskeje rady informowaše wjesnjanosta Hubertus Ryćer (njestronjan) wo aktualnym stawje přihotow. Tučasnje dochadźeja prěnje poskitki za wupisane hłubokotwarske dźěła. Na přichodnym posedźenju gmejnskeje rady w meji chcedźa firmam konkretne nadawki přepodać. Wčera dorozumichu so wo nadawku za planowanje nutřkowneho wuhotowanja. Na wupisanje je zarjadniski zwjazk tři poskitki dóstał. Hospodarsce najlěpši bě inženjerski běrow pwd z Kamjenca zapodał. Samsny běrow je nowotwar horta planował a cyły twarski projekt přewodźa. Tak jemu nadawk we wobjimje 20 000 eurow přepodachu. Twarske dźěła maja so w lěću zahajić. W zwisku z twarom chcedźa při horće mobilnu cisternu za hašensku wodu nastajić. Woda z hydrantow w Ralbicach za hašenje wohenjow njedosaha. Tuž je přidatny skład hašenskeje wody trěbny.