Prěni króć chlěb Boži přijimali
Lejnikec wila wostanje wažna
Slepo (AK/SN). Gmejna Slepo chce z twarskimi naprawami w jednotliwych wsach pokročować. Tole podšmórny Steffen Seidlich, nawoda zarjada za planowanje, twarstwo a hórnistwo w zarjadniskim zjednoćenstwje Slepo, tydźenja na posedźenju gmejnskeje rady. W Mułkecach su wobchadnu seklu za zawróćenje dotwarili. Předewzaće LEAG je za naprawu twarski płót přewostajiło, tak zo njemóža šoferojo hižo pódla jězdnje po polu jěć. Přichodnje chcedźa we wsy busowe zastanišća natwarić. Dźěła maja so po informaciji LEAG 18. meje zahajić. Na městnje twarnišća ma so jězdnja na jednym boku zawrěć a wobchad z amplu rjadować. Hat w Mułkecach je mjeztym twarsce tak wukmanjeny, zo hodźi so woda za hašenje wohenjow wužiwać.
Tři dny wulkotnje swjećili
Młodźina z Pančic-Kukowa je lětsa 35. mejemjetanje organizowała
Pančicy-Kukow (SN/jp). Za serbsku młodźinu je mejemjetanje start do sezony swjedźenjow pod hołym njebjom a kónctydźenskich wječornych wulětow.
Młodźina Pančic-Kukowa bě so lětsa na wosebity jubilej přihotowała. Přewjedźechu 35. raz mejemjetanje, kotrež běše z wjesnym swjedźenjom zwjazane. Tuž swjećeše tam na třidnjowskim wjeršku nalěća kóždy dźeń hač do zažneho ranja wulka syła młodostnych. Pjatk su młodostni dźěćinu na zhromadny kinowy wječork přeprosyli. K tomu poskićachu słódny popcorn, kotryž dźěći film hladajo hrymzachu a kotryž jim prózdne brjuchi pjelnješe. Po tym bě serbska młodźina na fejtu z DJjomaj prošena. DJ Thomas je party ze sylnymi zwukami zahajił a DJ Kober je wječor w pózdnjej nocy z tajkimi wuklinčeć dał.
Wutwar Małeje Sprjewje zakónčeny
Wutwar Małeje Sprjewje mjez Bórkhamorom a Sprjejcami je zakónčeny. Wotrjadnik za wuchodnu Saksku saněrowanskeho wobłuka Łužica pola předewzaća LMBV Karsten Handro je wjesnjanosće gmejny Sprjewiny Doł Marcej Beerej objekt minjeny tydźeń za zjawne wužiwanje přepodał.
Nowa Wjes (JoS/SN). Wotnětka wjedźetej nowej mosćikaj přez Mału Sprjewju, jedyn je za hospodarsku potrjebu a dalši za pěškow. Z tym je wutwar rěki mjez Bórkhamorom a Sprjejcami wotzamknjeny. „W lěću 2017 smy saněrowanje małeje Sprjewje na samsnym městnje zahajili, hdźež je dźensa móst hospodarskeho puća“, so Handro dopomina. Nalěto 2018 bě planowanski proces z dalšimi přihotowanskimi dźěłami zakónčeny. Nazymu samsneho lěta zahajichu přihoty za wutwar rěki. Fachowcy pytachu za powostankami wójnskich brónjow a je zrumowachu.
Dźesać porow młodźiny a wosom porow dźěći je njedźelu při ...
Krótkopowěsće (11.05.26)
Jednaćelka wuznamjenjena
Podstupim. Hižo štwórć lětstotka počesćuje Braniborska wusahowacy angažement za žiwu europsku mysl z Europskim wopismom. Mjez lětušimi 14 wuznamjenjenymi, kotrymž su dokument 8. meje přepodali, je jednaćelka Łužiskeho festiwala Maria Schulz. Ju wuznamjenichu za jeje kulturne dźěło, kiž zwjazuje, hranicy přewinje a regionej widźomnosć jako europski rum zetkawanja spožča.
Přistajeni protestowali
Čorna Pumpa. Přistajeni energijoweho koncerna LEAG su minjeny pjatk w Čornej Pumpje přećiwo planam zwjazkoweho hospodarskeho ministerstwa protestowali. Woni měnja, zo je wupisanje nowych płunowych milinarnjow njesprawne, dokelž jeničce zapadne kraje z toho profituja. Dotal je njewěste, hač smě LEAG w Čornej Pumpje nowu płunowu milinarnju natwarić.
Rěče mjeńšinow škitać
Ekonom so do debatow měša
Budyšin. Njedźela bjez awta, limit spěšnosće abo statne zasahnjenje do wikow – lědma druhi ekonom so tak zrozumliwje do aktualnych towaršnostnopolitiskich debatow měša kaž Marcel Fratzscher. Dźensa wječor w 19 hodź. porěči wón pod titlom „Technologija, globalizacija a polarizacija – kónc demokratije?“ we wobłuku Budyskich narěčow w Budyskej tachantskej cyrkwi.
Na swjedźeń do muzeja
Wojerecy. We Wojerowskim měšćanskim muzeju swjeća njedźelu wot 14 do 18 hodź. Dźeń maćerje. Wo dobru naladu stara so wokalna skupina Kontrapunkt kaž tež Wojerowske karnewalowe towarstwo.
Tango Sensations w muzeju
Budyšin. Sobotu, 9. meje, prezentujetaj Lysandre Donoso (bandoneon) a Friedemann Wuttke (klasiska gitara) w 19.30 hodź. w Budyskim Serbskim muzeju program „Tango Sensations“. Wonaj wěnujetaj so předewšěm twórbam komponista Astora Piazzolla, kotryž je tango do mjezynarodnych koncertnych žurlow wjedł a swójsku načasnu formu wuměłstwa stworił.
Měr jako tema koncerta
W Jaworje su wobydlerjo lětsa dźesaty króć po wozrodźenju ...
Nimale 30 družin chlěba a całtow
Na prěnich Budyskich chlěbowych wikach so Worklečanska pjekarnja wobdźěliła
Budyšin (MČ/SN). Wóń čerstweho chlěba je wutoru syły ludźi do Budyskeho wikowanišća ECE přiwabiła. 5. meje, na dnju chlěba, su pjekarscy mištrojo z regiona ze swojimi sobudźěłaćerjemi pokazali, kak bohaty poskitk tohole pječwa je. Prěni króć su so ze swójskimi wudźěłkami na centralnym wikowanišću sprjewineho města prezentowali. Tole su mnozy wopytowarjo wužili. W cyłku su předewzaća hač do 30 družin chlěba a całtow napjekli a slědnym hubam poručeli. Wiki chlěba su so lětsa prěni króć wotměli, byrnjež pruwowanje najlěpšich družin chlěba kaž tež wosuška hižo dlěje do protyki nakupowanskeho centruma na Žitnych wikach zapisane było. Iniciatiwu za prěnje chlěbowe wiki je centerowy management wuwił. Budyske pjekarske zjednoćenstwo je poskitk a šansu wužiło, rjemjesło pječenja zjawnje sylnić. Aktualnje přisłuša tudyšemu zjednoćenstwu 36 pjekarnjow, spočatk 1990tych lět bě jich hišće wjace hač 80.
Policija (08.05.26)
Statny škit přepytuje
Budyšin. W Nadźanecach na Krakečanskej dróze su zastojnicy policije srjedu popołdnju muža němskeho pochada lepili. 48lětny kolesowar pokazowaše kolesujo zakazanu gestu a je wjacore wuprajenja přećiwo wustawje formulował. Statny škit nětko pad přepytuje.
Simson pokradnyli
Kamjenc. Na Čornym puću w Kamjencu su paduši tele dny z kólnje moped marki Simson w hódnoće něhdźe 1 500 eurow pokradnyli. Wěcna škoda nastała njeje. Kriminalna policija slědźi.
