Měsačk wobkedźbowarjow wobkuzłał
Wuchowanscy płuwarjo trěbni
Žana Romantica: Stejišćo wyšeho měšćanosty
Budyšin (SN). W zwisku ze zdźělenku towarstwa Nutřkowne město Budyšin minjeny tydźeń, zo wone nakupowansku nóc Romantica lětsa njepřewjedźe, je so Budyski wyši měšćanosta Karsten Vogt (CDU) pjatk w nowinskej zdźělence słowa jimał. Wón na to skedźbnja, zo njebě towarstwo wotprajenje ze zarjadom za porjad a ze zamołwitymi za hospodarske spěchowanje dorěčało. Dale Vogt wuzběhny, zo su spěchowanske srědki města bjez wobmjezowanja k dispoziciji stali a zo njeje wěrno, zo je město žadanja nastupajo wěstotne naprawy porno předlětu zwyšiło.
Měšćanski zarjad jara wobžaruje, zo bu woblubowane zarjadowanje wotprajenje.
Komuna nima pjenjezy
W Dźěwinje dyrbja wokrjesej koncept konsolidowanja předpołožić
Brězowka (AK/SN). „Hospodarska situacija Dźěwinskeje gmejny njeje dobra. Komuna nima financnych rezerwow a njeje likwidna.“ Tole zdźěli komornica Dana Piehl minjeny štwórtk na posedźenju gmejnskeje rady w Brězowce w swojej rozprawje wo lětušim hospodarskim planje.
„Planowany kredit za přitwar Brězowskeje wohnjoweje wobory dotal wzali njejsmy.“ Gmejna je tuchwilu z dohromady 421 000 eurami w minusu, a to mjez druhim staršich kreditow dla, komornica wopodstatni. Z tym gmejna financielnje wukonliwa dosć njeje. Prawniski dohlad Zhorjelskeho wokrjesa sej tohodla žada, zo ma hospodarsko-strukturny koncept nadźěłać a předpołožić.
Nowy etat za lěto 2026 dyrbi Dźěwinska gmejna najpozdźišo 30. nowembra wobzamknyć. „Hižo wot lěta 2015 pak nam pruwowane kónclětne wotličenja hišće njepředleža“, Dana Piehl rozłoži. „Tohodla mamy ćeže, staw etata konkretnje posudźować. Tež hladajo na doskónčny wuslědk lětušeho etata to njemóžemy“.
Prěni dźěl chroniki prezentowali
Nazornu zběrku wo stawiznach Slepoho je Hartmut Hantšo w pilnym dźěle zestajił. Wóndano su wobšěrnu dokumentaciju wsy w serbskej holi zjawnosći přepodali.
Za nowotwar Radlubina su wčera w Ralbicach zakładny kamjeń ...
Krótkopowěsće (08.09.25)
Hišće žadyn nowy wjesnjanosta
Njeswačidło. 327 hłosow je Martin Scholze z Bóšic po informacijach gmejnskeho zarjada na wólbach wjesnjanosty Njeswačidła wčera dóstał (49 procentow). 889 z 1 877 wólbokmanych (47 proc.) je drje so wobdźěliło, jenož 667 hłosow pak bě płaćiwych. Ludźo napisachu 56 dalšich mjenow na wólbny lisćik. Najwjac hłosow zdoby Juliane Mazalla z Łuha (105). Druhe wólbne koło budźe 28. septembra.
Mjezynarodny sympozij zahajili
Mały Wjelkow. „Kulturne herbstwo zwjazuje a twori přichod“ rěka mjezynarodny sympozij, kotryž město Budyšin wot dźensnišeho do zajutřišeje srjedy w Małowjelkowskej sotrowni wuhotuje. Program wopřijima přednoški wo stawiznach a wuznamje tamnišeje bratrowskeje jednoty, diskusije na podiju a wodźenja kaž tež ekskursiju do Niskeje. Patronatstwo wukonjeja wulkopósłancy Němskeje, Danskeje a Čěskeje.
Wokrjesny zwjazk BSW załožili
Do hwězdow hladać
Załom. Hwězdarnja „Bruno H. Bürgel“ w Załomju při Sprjewi přeprošuje jutře, sobotu, 6. septembra wot připołdnja w 12 hodź. na prěni němsko-čěski swjedźeń. Budźe-li njebjo jasne, wobsteji składnosć słónco wobkedźbować. Dale wabi wustajeńca wo dotalnych wobkedźbowanjach. Dźěći móža paslić abo z pomocu satelitow za pokładom pytać. W 14 hodź. wustupi intendant Němsko-Serbskeho ludoweho dźiwadła Lutz Hillmann. Wot 21.30 hodź. móža wopytowarjo měsačk a Saturn wobkedźbować.
Akcija za měrliwy swět
Kamjenc. W Kamjencu wotměje so njedźelu, 7. septembra popołdnjo za swójby ze spektakularnej wuměłskej akciju. Pod hesłom „Zhromadnje za měrliwy swět“ su wšitcy zajimcy wot 15 do 17 hodź. na Šulske naměsto do města přeprošeni. Na naměsće chcedźa puzzle zemje wukłasć, kotryž je 11 króć 16 metrow wulki a wobsteji z 72 pomolowanych płachtow. Rjećaz ludźi ma na kónc wójny po cyłym swěće a měrliwe dorozumjenje mjez narodami pokazać. Iniciatiwa Planet Budyšin, Kamjenski Zwjazk za měr kaž tež duwo Leichtfuß & Liederliesel změja pisanu zabawu a słódne chłóšćenki spřihotowane.
Měsačk wobkedźbować
Najmłódšich wobydlerjow witali
Romantica lětsa njebudźe
Budyšin (SN/CKn). Towarstwo Nutřkowne město Budyšin je zdźěliło, zo „Romantica“ lětsa njebudźe. Přičiny za rozsud su mjez druhim falowaca kooperacija z partnerami a nošerjemi, přiběrajcy ćežke financowanje, přiwótřene zarjadniske zawjazki a poćeženje rukowanja za čestnohamtskich sobuskutkowacych.
Wosebje zrudźace je wotprajenje, dokelž bě Romantica, wothladajo wot přestawki korony dla, nimale 25 lět kruty wobstatk kulturneho a hospodarskeho žiwjenja w Budyšinje, tak předsyda towarstwa René Meißner.
Wotprajenje wujewi, kak wažne čestnohamtsce organizowane swjedźenje, kaž staroměšćanski festiwal, jutrowne zarjadowanja abo Romantica za region su. Zdobom pak pokazuje tež na hranicy, kotrež so překroča, hdyž wulka zamołwitosć jeničce na ramjenjach čestnohamtskich wotpočuje.
Nutřkoměšćanske towarstwo nadźija so zrozumjenja měšćanow kaž tež akterow a wikowarjow a zasadźuje so nadal za žiwe měšćanske žiwjenje a za nawrót tajkich woblubowanych swjedźenjow do kóždolětnych wjerškow Budyšina.
