Dobra powěsć za Frizow

Leuwarden/Ljouwert. Na zetkanju narodnych mjeńšin bjez maćerneho kraja, na kotrymž so w nadawku Domowiny dr. Hartmut Leipner, Beno Bělk a Šarlota Kušcyc wobdźělichu, mějachu hosćićeljo zapadni Frizojo dobru powěsć: Wot nazymy budu wšitke wobchadne tafle, pućniki při wotbóčkach a dalše znamjenja podłu dróhow dwurěčne. Wjesne tafle su hižo nižozemsko-frizisce popisane (hlej rozmołwu na tutej stronje).

Dźensa rano so paliło

Choćebuz. Při wohenju w hali za skład w Choćebuzu je woheń wulku škodu naparało. Kaž rěčnik policije rozprawi, je w 2 500 kwadratnych metrow wulkej hali woheń rano wudyrił. Wohnjowa wobora je płomjenja hižo zhašała. Zranił so na zbožo nichtó njeje. Dwanaće wohnjowych woborow su tam zasadźili.

Wustajeńca na horje

Wjele pjenjez zhubiła

Běła Woda. Z woporom wobšudnikow je so minjene dny žona w Běłej Wodźe stała. Wona dósta najprjedy list a po tym wjacore telefonaty pozdatneho prawiznika. Wobšudnicy žonje napowědachu, zo je wona wjacore zrěčenja za hry wo zbožo wotzamknyła. Nětko sej „prawiznik“ štyricyfrowu sumu pjenjez žadaše, zo móhł zrěčenja zaso wupowědźić. Žona da so přerěčeć a přepokaza 8 600 eurow. Kriminalna policija pad wobšudnistwa dla přepytuje.

Awto so zwróćiło

Kača Korčma. Ćežke wobchadne njezbožo sta so srjedu mjez Kačej Korčmu a Komorowom. Tam je 19lětny wodźer Forda kontrolu nad swojim jězdźidłom zhubił, z puća zjěł a so zwróćił. Młodeho muža dowjezechu ćežko zranjeneho z helikopterom do chorownje. Swědkojo, kotřiž su njezbožo wobkedźbowali, njech přizjewja so telefonisce pod 03591 3670.

Worklecy. Dnjowa hladarnja Carity „Při Krabatowym puću“ we Worklecach zhladuje na swoje pjećlětne wobstaće. Tónle mały jubilej chcedźa zhromadnje z wobydlerjemi a dalšimi zajimcami wo­swje­ćić. Sobotu, 4. julija, přeprošuja wot 16 hodź. na wotewrjene popołdnjo a zabawnu hudźbu z kapału Horjany. Samsny dźeń wot 19 hodź. budźe tam zjawna proba spěwneho kwarteta PoŠtyrjoch. Tež jědź a napoje wopytowarjam poskića.

Zažne běrny w srjedźišću

Chrósćicy. Swjedźeń zažnych neplow wotměje so jutře, 4. julija, wot 14 hodź. na Wjeselic bioratarskim dworje w Chrósćicach. Tam cyłe popołdnjo swoje zažne neple poskićuja. Nimo toho móža sej wopytowarjo Wjeselic piwo, samodźěłane fritki a „Bozankowu Boženku“ słodźeć dać. Za dźěći změja skakanski hród přihotowany. Wječor zahudźa Chróšćanscy muzikanća.

Wustajeja wudźěłki blidarjow

Krótko do kónca šulskeho lěta dojědźechmy sej my wobdźělnicy kursa łaćonšćiny Budyskeho Serbskeho gymnazija do Drježdźan, hdźež so na slědy Herkulesa podachmy. Najprjedy strowješe wón nas pozłoćany z wěže radnicy, po tym zetkachmy jeho na pawiljonje w Zwingeru – pod ćežu zemskeje kule stuleneho.

We wosebitej wustajeńcy „Herkules: rjek abo anti-rjek“ wuslědźichmy, kak su wuměłcy w zašłosći a přitomnosći połboha Herkulesa zwobraznjeli. Wosebje napjate bě zhonić, kak je so Awgust Sylny­ jako „Hercules saxonicus“ prezentował, zo by druhich knježićelow a swojich poddanow jimał.

Při horcych temperaturach čujachmy so skónčnje tróšku kaž w Romje, jako Neptunowu studnju w měšćanskej štwórći Friedrichstadt wobdźiwachmy a sej zwobraznjenje bohow rěkow Tiber a Nil wobhladachmy.

Michaela Hojerowa,

wučerka łaćonšćiny