Gmejna Wulka Dubrawa je swoju něhdyšu polikliniku młodymaj domoródnymaj inwestoromaj předała. Wonaj mataj naročne plany a chcetaj so nanajspěšnišo do dźěła dać.
Wulka Dubrawa (UM/SN). Jednoho z młodeju inwestorow Wulkodubrawčenjo derje znaja. Je to Robin Dorka, kotryž hižo dlěje w gmejnskim zarjedźe dźěła – hač do kónca 2025 jako manager za škit klimy, nětko w financnym wotrjedźe. Zo by swój projekt „Wjesny ambulatorij“ zwoprawdźić móhł, je hromadźe z přećelom předewzaće Sustineo wjesne srjedźišća tzwr załožił. Prěnjotny cil projekta je, noweho powšitkowneho lěkarja za Wulku Dubrawu namakać a jemu we wjesnym ambulatoriju wotpowědne rumnosće poskićić.
