Nad nowym hrajkanišćom smědźa so dźěći w Hózku pola Kulowa ...
Madlenka Cyžec zaso w redakciji
Třeći króć Madlenka Cyžec z Kozarc tuchwilu prózdninske dźěło w redakciji Serbskich Nowin (SN) wukonja. Tele dny ju přewažnje za jednym z pisanskich blidow we wulkim běrowje widźiš, hdźež młodostni – pak přistajeni pak nachwilnje dźěłacy – dominuja. 16lětna chodźi na Serbski gymnazij a póńdźe po prózdninach do 12. lětnika. Dźesać lět je ze swójbu w Berlinje bydliła, doniž so w lěće 2019 do Łužicy njenawróći.
Žurnalistiske dźěło jej wulke wjeselo wobradźa. Tohodla tež za Radijo Satkula Serbskeho rozhłosa MDR dźěła. Do našeje redakcije je lětsa přinošk z fotom wo kulturnym zarjadowanju sobu přinjesła a spjelnja spušćomnje kóždy dźeń nadawki, kotrež na rańšim posedźenju dorěčimy. To saha wot přehladanja powěsćow přez přełožki hač ke komentaram, wšako běše wčerawši přilopk z jeje pjera.
Krótkopowěsće (22.07.26)
Projektowe próstwy zapodać!
Budyšin. Zarjad Załožby za serbski lud na to skedźbnja, zo so pjatk za tydźeń, 31. julija, doba zapodaća požadanjow wo projektowe spěchowanje kónči. Štóž chce klětu wjac hač 10 000 eurow ze srědkow załožby za projekt dóstać, njech tutón termin dodźerži. To płaći tež za próstwy wo spěchowanje z programa „Serbska rěč a kultura w strukturnej změnje“ za projekty w Swobodnym staće Sakskej.
ADFC kritizuje skrótšenja
Drježdźany. Kolesowarski klub Sakska (ADFC) kritizuje planowane skrótšenja za twar kolesowarskich šćežkow w naćisku etata za lěće 2027 a 2028. Po měnjenju ADFC skrótšenja hižo planowane projekty wohrožuja. Potrjechene su mjez druhim kolesowarske šćežki podłu S 95 (blisko Radeberga), S 109 (Budyska dróha w Malešecach) a B 156 we wokrjesu Budyšin. Jich zeskutkownjenje móže tuž dalše lěta trać.
Kamjenje přećiwo niskej wodźe
Serbske blido w Drježdźanach
Změja bórze spěšny internet
Zahaja dalši wotrězk wutwara škleńčnonićoweje syće
Pěskecy (JK/SN). Spěšny internet je dźensniši dźeń nimale samozrozumliwa wěc. We wsach Njebjelčanskeje gmejny pak tomu dotal tak njebě. Nětko zahaji Budyski wokrjes dalši wotrězk a wutwari cluster 15. To rěka, zo dóstanu wsy kaž Pěskecy, Njebjelčicy a Serbske Pazlicy přez škleńčnonićowy kabl w přichodnych měsacach spěšny internet ze spěšnosću hač do 1 000 Mbit – a to darmotnje.
Předewzaće Glasfaserplus, kotrež w nadawku Telekom wutwar syće přewozmje, je wobydlerjam wčera wječor w Pěskečanskim sportowym domje wotběh a nadrobnosće wutwarjenja syće předstajiło. Wšitke domjacnosće, kotrež su so za spěšny internet přizjewili, so ze škleńčnonićowym kablom syći přizamknu. Za to budu fachowe firmy podłu dróhow a pućow 383 kilometrow kabla do zemje połožić. Při tym maja so dróhi tak mało kaž móžno wobškodźić. Tež do domu a w domje hač k městnu, hdźež so router přizamknje, kabl darmotnje połoža. W domje zarjaduja 20 metrow darmotnje, wobsedźer ma jeničce trěbne dźěry přez murje abo wjerchi točić.
Awto so strašnje nachiliło
Wulki wjeršk w małym Lejpoldźe
Lejpold. Poprawom je Lejpold mjez Worklecami a tak mjenowanym serbskim highwayjom chětro měrna mała wjeska, hdźež so lědma što stawa. Runje nawopak bě tomu minjenu sobotu, jako swjećachu tam tak mjenowany „Räck Ättäck“ festiwal. Běše to hižo šesty króć, zo tutón festiwal w Lejpoldźe wuhotowachu.
Hudźbny festiwal měrješe so wosebje na zajimcow punk rock hudźby – woni běchu wutrobnje witani. Wustupili su tam štyri skupiny, mjenujcy „Lendenzorn Emada“, „Die letzten Streichhölzer“, „Die Pfandpiratten“ a skupina „Bang Mustang“. Hudźbnicy tutych skupin su so z přećelskich kruhow hromadźe namakali. Jich wotpohlad je zhromadnje hudźenje a zwuraznjenje antifašistiskeho politiskeho měnjenja, kaž je to wot punk rocka znate. Skupiny pochadźeja zwjetša z kónčin wokoło Drježdźan a Pirny, kaž wopytowarjo w běhu wječora zhonichu.
Stary Deutz z Hućiny wosebita parlička w Poršicach był
Poršicy (CS/SN). Tankowe hašenske jězdźidło typa Klöckner-H-Deutz z lěta 1965 je awto, na kotrež zawěrno rady pohladnješ. Něhdźe 30 lět so čłonojo spěchowanskeho towarstwa Hućinjanskeje wohnjoweje wobory mjeztym wo swój pokład staraja. Roland Mixel, Maik Lahode a jeho syn Niklas su z nim na tak mjenowane zetkanje módreje swěcy do Poršic přijěli. Jich jězdźidło bě jedyn ze sydom oldtimerow, kiž su so na kołojězbje wokoło Poršic wobdźělili.
Wočakowanja Otta Vorhölzera ze Zajimoweho zjednoćenstwa hornjołužiskich přećelow oldtimerow wšak so z tym spjelnili njejsu. Wón bě so nadźijał, zo so wjace starych jězdźidłow wobdźěli. Ale to wšak bě prěnje tajke zetkanje jězdźidłow z módrej swěcu. Poprawom organizuja přećeljo oldtimerow stajnje w oktobru wulke zetkanje oldtimerow a traktorow. Lětsa planuja je wot 2. hač do 4. oktobra. Dohromady wosom Poršičanskich přećelow oldtimerow so jónu wob měsac schadźuje. Rady tež nowych čłonow witaja.
