Budyšin (SN/jp). We wobłuku zhromadźizny rjemjeslniskeho zwjazka Budyskeho wokrjesa su čłonojo w aprylu nowe předstejićerstwo a wuběrki wuzwolili. Wšitke wólbokmane dźesać zjednoćenstwow wšelakorych rjemjesłow so na wólbach wobdźěli. Wokrjesny rjemjeslniski mišter, mějićel elektrofirmy Frank Scholze, je wo aktiwitach wokrjesneho rjemjeslnistwa w minjenej wólbnej dobje rozprawjał. Zdobom informowaše wo aktualnym stawje spěchowanskeho projekta „Rjemjesło ma widźomniše być“. Lětuši wjeršk budźe 30. meje wobdźělenje na dnju towarstwow we wobłuku Budyskeho nalěća. Wjacore zjednoćenstwa rjemjeslnistwa tam sobu skutkuja a aktiwity wot časoweje jězby frizerskeho zjednoćenstwa hač k předstajenju kowanja zjednoćenstwa metalotwarcow předstaja.

W tajnych wólbach bu Frank Scholze za dalšu wólbnu dobu jako předsyda rjemjeslniskeho zwjazka znowa woleny. Jeho zastupjerjej staj frizerska mišterka Szilvia Schiffel a třěchikryjerski mišter Tino Krupper. Blidarski mišter Ingo Palme a pjekarski mišter Andrè Fehrmann staj nowaj w předsydstwje.

Kamjenc (SN/MiR). W małej žurli Kamjenskeho dźiwadła knježeše wčera wječor wulka napjatosć. Zastupjerjo iniciatiwy Budyskich wokrjesnych radźićelow, z kotrychž su někotři tež Kamjenscy měšćanscy radźićeljo, rysowachu swój wid na šansu, porodźernju a gynekologiju w Kamjenskej chorowni swj. Jana zachować. Dotal njeje jednaćelstwo kliniki swój zaměr změniło, staciji njedźelu za tydźeń na přeco zawrěć. Kamjenski wyši měšćanosta Michael Preuß zwurazni: „Je wažne na region zhladować, nic jeničce na Kamjenc. Jenož tak stejimy politisce we fokusu. Pytamy za nošnym rozrisanjom.“

Wo nowowólbach rozsudźa

Njebjelčicy. Gmejnska rada w Njebjelčicach rozsudźi w juniju wo terminje za nowowólby wjesnjanosty, po tym zo je André­ Bulank připowědźił, zo 1. awgusta wotstupi. Kaž předsyda zarjadniskeho zwjazka Při Klóšterskej wodźe Stefan Anders našemu wječornikej wobkrući, maja so wólby najzašo 90 dnjow po rozsudźe gmejnskeje rady a najpozdźišo šěsć měsacow po wotstupje wjesnjanosty wotměć.

Dźiwadźelnik Křesćan Bart zemrěł

Hamburg. Serbski dźiwadźelnik Křesćan Bart je 15. meje w starobje 91 lět w Hamburgu zemrěł. To intendant Němsko-Serbskeho ludoweho dźiwadła Lutz Hillmann dźensa zdźěli. 4. julija 1934 rodźeny Delnjowujězdźan słušeše w lěće 1948 k załožerjam Serbskeho dźiwadła w Budyšinje. Wot hrajneje doby 1958/1959 hač do 2004/05 bě Křesćan Bart z krutym čłonom ansambla NSLDź był.

Warnuje před prawicarjemi

Wojerecy. Nad nowymi hašenskimi jězdźidłami typa LF 10 smědźa so wohnjowi wobornicy w gmejnje Sprjewiny Doł kaž tež w Halštrowje a Wojerecach wjeselić. Póndźelu su jim nowe awta we Wojerecach přepodali, kotrež běchu na zhromadnu skazanku třoch komunow wobstarali. Na to běchu so hižo před třomi lětami dojednali. Do třoch nowych jězdźidłow su cyłkownje 1,7 milionow eurow inwestowali. Budyski wokrjes je kóžde jězdźidło z něhdźe 240 000 eurami spěchował, rěka w nowinskej zdźělence města Wojerecy.

Swjedźeń z jubilejom

Šćeńca. Mjeztym 30. raz swjeća wot 22. hač do 24. meje w Šćeńcy (Steinitz) swjatkowny swjedźeń. Tamniša młodźina jón z wjele partnerami přihotuje. Pjatk wot 18 hodź. přeprošuja na koparsku hru tradiciskeho mustwa Dynama Drježdźany přećiwo wubrance Łazowskeje gmejny. Wječor budu reje z doublom Wolfganga Petryja. Sobotu wot 10 hodź. wubědźuja so wohnjowi wobornicy a dźěći­ smědźa so na swój wosebity swjedźeń wjeselić. Wječor budźe wulka party z wjacorymi sobuskutkowacymi. Njedźelu po Božej słužbje w stanje budźe swjedźeń za swójby z mnohimi poskitkami.