Njeswačidło (SN/mb). Najebać prózdnu wólbnu cedlku w druhim kole wólbow wjesnjanosty w Njeswačidle njedźelu, 28. septembra, je so tola wólbny bój ­zahajił. To je zasłužba třoch žonow, kotrež zjawnje wo wolerjow wabja. Anett Pötsch­ke ze Šešowa bu přez lisćinu „rjemjesło a přemysło“ jako gmejnska radźićelka wolena. Mišterka za wóčnu optiku z praksu w Rakecach a mobilom za optiku je našemu wječornikej zdobom in­formacije dalšeju kandidatkow sposrědkowała – cyle nowy to politiski stil. Silke Mickan-Ziesch z Njeswačidła dźěła jako hospodarka za strowotnistwo. Třeća w tutym zwjazku demokratkow je Juliane Mazalla z Łuha, swobodna rěčnica ­na kwasach a pohrjebach.

Spěchowanski kruh za serbsku ludowu kulturu je minjeny kónc tydźenja molowansku dźěłarničku z delnjoserbskim ćežišćom w Dešnje přewjedł. Pod wuměłskim nawodom Maje Nageloweje (3. wotlěwa) je so dwanaće wobdźělnikow mjez druhim z figurowymi a portretowymi studijemi z delnjoserbskej drastu zaběrało. W serbskej drasće skutkowaštej Irmgard Muchalina a jeje wnučka Lena (4. a 5. wotlěwa) jako modelej. Nimo toho molowachu a rysowachu wobdźělnicy wjesne napohlady a zeznachu so ze serbskimi stawiznami. Foto: Hanka Šěnec

Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Hanka Krawcowa je přeco hižo serbsce rěčeć chcyła.

Jako Johanna a jako Hanka sym w Hornjej Łužicy, w Delnim Wunjowje blisko Hodźija wotrostła. Nětko bydlu hižo wot lěta 1989 w Drježdźanach. Tehdy sym za wukubłanje na chorobnu sotru do Drježdźan šła. Pozdźišo złožich hišće studij za socialne dźěło/socialnu pedagogiku a dźěłach hač do lońšeho jako socialnowědomostnica na slědźerskim instituće Ewangelskeje wysokeje šule Drježdźany. Ćežišćo slědźenja bě přiswojenje pisomneje rěče a analfabetizm w Němskej. Tute slědźenje mi wuwědomi, kajke wužadanje ludźo zmištruja, hdyž něšto wuknu, štož so w jich žiwjenskim swěće njepraktikuje. Tuchwilu absolwuju sabatowe lěto, štož mi zmóžnja, so na projekće DOMOJ wobdźělić.

Po maturje najprjedy raz něšto druheho, je sej Celina Knopec mysliła. Tohodla 18lětna hižo wot spočatka měsaca redakciju Serbskich Nowin podpěruje. Dźeń wote dnja so wona tuž z Kozarc na puć do Budyšina nastaja. Maturowała je młodostna lětsa na Budyskim serbskim gymnaziju.

Do redakcije je wona přišła, „zo by dohlad do dźěła nowinarjow dóstała“. Předewšěm stara so Celina wo prezencu našeho wječornika na Instagramje a Facebooku. Tute dźěło ju wupjelnja. Přiwšěm pak so wona tež druhim temam wěnuje a je hižo někotryžkuli zajimawy přinošk nadźěłała. „Při tym sym nawuknyła, swój wobswět dokładnišo wobkedźbować“, 18lětna zwěsća.