Chorhoje jenož swjate dny
Kulowska měšćanska rada namjet AfD wotpokazała
Kulow (AK/SN). Před Kulowskej radnicu a před woběmaj šulomaj města njebudu w přichodźe stajnje chorhoje wisać. Tole su měšćanscy radźićeljo na swojim zašłym posedźenju wobzamknyli a z tym wotpowědny namjet frakcije AfD wotpokazali. Wona je němsku, saksku a serbsku chorhoj wobstajnje wupójsnyć chcyła. Po měnjenju měšćanosty Markusa Poscha (CDU) tči w tajkim rjadowanju skerje winowatosć dyžli wuznaće. Tohodla wón za to pledowaše, namjet wotpokazać. Lutz Döhler z frakcije AfD porno tomu argumentowaše, zo by z chorhojemi wjace statneje a regionalneje identity widźeć było. Nimo toho bychu chorhoje jednotu a měrliwe zhromadne žiwjenje w towaršnosći symbolizowali.
We wodarni bórze wěrowanja?
Wulkodubrawskej gmejnskej radźe a wjesnjanosće Hardyjej Glauschej so ideja lubi, wodarnju we wsy wobšěrnišo wužiwać. Za to pak dyrbja wjacore wuměnjenja spjelnjene być.
Wulka Dubrawa (UM/SN). Wodarnja słuša k Wulkej Dubrawje kaž Bohata wěža k Budyšinej. Wona je symbol industrijoweje wsy sewjernje Budyšina. Wonkownje drje je wodarnja w dobrym stawje, přiwšěm so zjawnosć přejara za nju njezajimuje. Hdys a hdys zarjaduja we wodarni wustajeńcy. Druhdy móža sej ju zajimcy na Dnju wotewrjeneho pomnika wobhladać. Twarjenje je z lěta 1926, lětsa je potajkim sto lět stare. Stawnica Juliane Barthe měješe ideju, wodarnju jako městnosć wěrowanjow za Malešanski stawniski wobwod wužiwać. Wobwodej přisłušatej tež Radworska a Wulkodubrawska gmejna. „Mnoho porow so dźensa jenož hišće stawnisce wěruje. Za to přeja sej wosebitu rumnosć“, je Juliane Barthe hižo w meji 2025 Wulkodubrawskemu wjesnjanosće Hardyjej Glauschej pisała, kaž z podłožkow posedźenja gmejnskeje rady loni w nowembru wuchadźa.
Wjace hač 30 žonow je póndźelu a wutoru na Rownjanskim Njepilic ...
Krótkopowěsće (18.02.26)
Brošurka wo folklorje w NDR
Budyšin. „Folklorezentren in der DDR – Dokumentation, Erforschung und Inwertsetzung kulturellen Erbes im Sozialismus“ je titul 39. zešiwka Małeho rjadu Serbskeho instituta. Tutón je wotnětka jako brošurka na předań resp. online zdarma přistupny. Mjez druhim wopřijima publikacija přinoški wudawaćelow Sönke Friedreicha, Theresy Jacobsoweje a Ines Kelleroweje.
Wjacławske wiki najwoblubowaniše
Budyšin. Budyske Wjacławske wiki je něhdźe 3 900 čitarjow digitalneho magacina „Zymske sony“ w online-wothłosowanju za najwoblubowaniše adwentne wiki w Sakskej wuzwoliło. Hižo něšto lět online-portal ze sydłom w Kölnje přehladku hodownych a adwentnych wikow w Němskej a po cyłym swěće zestaja, za čož lětne wothłosowanje přewjeduje.
Hejsuja po balkanskim
Pomniki města chcedźa zachować
Běła Woda (AK/SN). W Běłej Wodźe zasadźuje so čestnohamtsce dźěłaca pomnikowa komisija za škit a zachowanje kulturnych pomnikow. Na swojim zašłym posedźenju su měšćanscy radźićeljo sydom čłonow do tohole gremija powołali. Hač do 2029 skutkuja w nim Anne Petrick, Antonia Jahnke, Steffen Müller, Roland Ladusch, Sven Staub, Friedemann Tischer a Holger Duschek. Wažne kulturne pomniki a wuměłske twórby w Běłej Wodźe su na přikład Ludowy dom, wodowa wěža, studnja škleńčerjow při dwórnišću, plastika mórskeho lawa w pěstowarni „Ulja“, serbski nasćěnowy wobraz Dietera Dresslera na Wagenfeldowej, wopomnjenski kamjeń Luthera při ewangelskej Křižnej cyrkwi a pomnik Friedricha Ludwiga Jahna w Jahnowym parku.
Zhromadnje sej zahraja
Pančicy-Kukow. Na zhromadny hrajny wječor přeprošuje Domowinska skupina Pančicy-Kukow wšitkich swojich čłonow a dalšich zajimcow štwórtk, 19. februara, we 18 hodź. do Karstenoweje piwoweje stwički. Wšitcy móža swoje najlubše hry sobu přinjesć, wšojedne hač karty za škot a rommé abo kóstki a figury za deskowe hry. Karsten njezměje jenož napoje w poskitku, ale tež mały wuběr jědźow.
Serbski poskitk w Barće
Bart. Z přisłowom „Hdźež je dobra mysl, tam je ruma dosć“ wabi syć za serbsku rěč a regionalnu identitu Zari do Barta. W rjedźe „Rjana pisanosć“ wotměwaja so měsačne zarjadowanja. Štwórtk, 19. februara, wot 17.30 hodź. móža wopytowarjo w gratowni Bartskeje wohnjoweje wobory mjez druhim sušenki zhotowić.
Wiki jutrownych jejkow
Budyšin. Spěchowanski kruh za serbsku ludowu kulturu skedźbnja hižo nětko na 33. serbske jutrowne wiki. Te wotměja so po tradiciji druhi kónc tydźenja w póstnym času, potajkim sobotu, 28. februara, a njedźelu, 1. měrca. Na woběmaj dnjomaj budu wiki wot 10 do 18 hodź. w Budyskim Serbskim domje wotewrjene. Wšitcy zajimcy su k tomu wutrobnje witani.
Prěni dowolowy dom ponowja
Dźěwin (AK/SN). Dowolowe domy při lěsnym jězoru wuchodnje Dźěwina (Groß Düben) maja atraktiwniše być a wjace komforta skićić. Tole rjekny wjesnjanosta Sebastian Bertko (njestronjan) na zašłym posedźenju gmejnskeje rady. Tohodla chcedźa nalěto prěni z cyłkownje sydom dowolowych domow modernizować. Jednohłósnje su radźićeljo kalkulaciju a popłatki za 2026 wobzamknyli. Někotre pozicije budu w přichodźe dróše. Energija ma porno tomu tuńša być. Za přenocowanja chcedźa lětsa 40 000 eurow dochodow docpěć. Loni bě jich 38 000 eurow.
Dokelž móžachu so z dodawarjom energije na přijomniše kondicije dojednać, płaća dowolnicy wot lětušeho jenož hišće 21 centow na kilowattowu hodźinu. Dotal bě to 83 centow. We hłownej sezonje płaći přebytk w dowolowym domje město dotal 77 eurow nětko 90 eurow wob dźeń. Wotnajenje zwonka hłowneje sezony płaći wotnětka wob dźeń 70 eurow, to je tři eura wjac hač dotal.
Parada pisanych idejow
Ćah norow bě wčera wjeršk 320. póstniskeje sezony w Kulowje
Kulow. Z mócnym „Helaw!“ su nory zbliska a zdaloka wčera póstniski ćah na róžowej póndźeli a z tym wjeršk 320. póstniskeje sezony w Kulowje witali. Wote wšeho spočatka bě jasne, zo niske temperatury a sněh póstniskemu wjeselu zadźěwać njemóža. Něhdźe tysac ludźi ćehnješe po Kulowskich hasach hač na torhošćo před radnicu. Mjez nimi bě na wosebitym wozu princ Pětr, kotryž w tutej póstniskej sezonje ze swojej princesnu Lydiju knježi. Dohromady so 24 wozow na přećahu wobdźěli. Třo nowi twarcy wozow ze swojimi čerstwymi idejemi a wulkim angažementom přeswědčichu.
Zymsku pychu w přirodźe dožiwić
Krótkopowěsće (17.02.26)
Při Nysy „najfairniši festiwal“
Berlin. We wobłuku 76. Berlinale su Filmowemu festiwalej Nysa (NFF) wčera wuznamjenjenje Fair Festival Award 2025 spožčili. NFF smě so tuž lětsa „najfairniše zarjadowanje“ swojeho razu w Němskej mjenować. Wot dźěłarnistwa ver.di wupisane myto hódnoći na zakładźe anonymneho woprašowanja fairnu praksu festiwalow a ma w zjawnosći wědomje za dźěłowe wobstejnosće tam skutkowacych sobudźěłaćerkow a sobudźěłaćerjow šěrić.
Piwarz: Znjesliwy kompromis
Drježdźany. Dojednanje wo zwyšenju tarifa w zjawnej słužbje płaći Saksku lětsa 92 milionow eurow a w lětomaj 2027/28 dohromady dalšich 450 milionow. Lětny etat Sakskeje wučinja něhdźe 25 miliardow eurow. Sakski financny minister Christian Piwarz (CDU) ma zwyšenje wo 5,8 proc. w třoch kročelach w běhu 27 měsacow za znjesliwy kompromis. Kóšty su hižo do toho w běžnym budgeće kraja zaplanowali.
Češa kontroluja parkowanje
