Nowy zazběh we hwězdarni
Andreas Throniker ma tež cyle jednore dźěła na starosći
Budyšin (UM/SN). Do Budyskeje hwězdarnje je zaso wobstajne žiwjenje zaćahnyło. Andreas Throniker je wot 1. junija najprjedy raz hač do kónca lěta w towarstwje Ad Astra přistajeny. Hižo do toho bě so wón wjele lět čestnohamtsce w spěchowanskim towarstwje hwězdarnje angažował. Jeho nadawk je, „hwězdarnju zaso widźenjahódnu činić, ju do zjawnosće přinjesć, spěchowanske srědki wobstarać a z tym projekty nastorčić“, kaž to sam formuluje. Zmóžniła je to iniciatiwa frakcije Wobydlerskeho zwjazka Budyšin tudyšeje měšćanskeje rady z podpěru radźićelow tamnych frakcijow. To je na posedźenju w oktobru 2025 k wažnemu rozsudej wjedło. Z nim je město Budyšin swoju kóždolětnu přiražku wobdźělenskej a wobhospodarjenskej towaršnosći wot 20 000 na 60 000 eurow wob lěto zwyšiło. Z tym bě móžno, krute dźěłowe městno za dalewuwiće hwězdarnje wobsadźić.
Policija (16.07.26)
Na zapławjenej dróze znjezbožił
Trjebjeńca. Sylny dešćik njeje so předwčerawšim jenož wo někotre zapławjene pincy postarał, ale takrjec tež wobchadne njezbožo zawinił. Krótko do 17 hodź. bě na zwjazkowej dróze B 6 do směra na Trjebjeńcu (Steindörfel) 54lětny wodźer Škody po puću. Dokelž bě dróha połna wody, zajědźe muž z jězdnje, zrazy do dweju štomow a so přewali. Alarmowana wohnjowa wobora dyrbješe znjezboženeho z jeho awta wuswobodźić. Jězdźidło wuchowanskeje słužby dowjeze muža do chorownje. Wěcnu škodu trochuje policija na něhdźe 50 000 eurow. Zastojnicy policije njezbožo wobdźěłachu.
Zwěrjata wšědny dźeń porjeńšeja
Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (2)
Po měnjenju mnohich je kolesowanje jedna z najrjeńšich ...
Krótkopowěsće (16.07.26)
Wjesnjanosta rozsud cofnył
Malešecy. Wjesnjanosta Matthias Seidel (CDU) je po poroku AfD a kritice zarjada za prawniski dohlad nad komunami w Budyskim wokrjesu swoju próstwu wo srědki za financowanje twara zakładneje šule zaso cofnył. Gmejnscy radźićeljo AfD Malešanskemu wjesnjanosće wumjetowachu, zo bě w tutej naležnosći samowólnje bjez wothłosowanja z gmejnskej radu jednał.
Na zarjedźe wšitko digitalne
Choćebuz. Na Choćebuskim twarskim zarjedźe njewobdźěłuja sobudźěłaćerjo twarske próstwy wotnětka hižo w papjerjanej formje. Tajke zapodaća so jenož hišće digitalnje přiwozmu, kaž z měšćanskeho zarjadnistwa rěka. Tež wšitke dalše kročele su – inkluziwnje wotmołwow próstwystajerjam – ryzy digitalne.
Sta metrow kabla pokradnyli
Tři hodźiny dołho hromadźe dźěłali
Němcy so wuspěšnje na zwjazkowym finalu wubědźowanja „Naša wjes ma přichod“ wobdźělili
Kajki to dźeń za naše měrne Němcy! Pjatk, 26. junija, dojědźe sej jury zwjazkoweho finala 28. wubědźowanja „Naša wjes ma přichod“ k nam. Něhdźe 150 aktiwnych wobydlerjow mobilizowaše swoje mocy, zo bychu zwjazkowej hódnoćenskej komisiji z minucioznje přeplanowanym, třihodźinskim marathonom dopokazali, zo zasłuži sej naša wjes titul „Najrjeńša wjes Němskeje“. Jako wobydlerka, kotraž bě so wot prěnjeje mjeńšiny sobu nadźijała, móžu jenož rjec: Tutón dźeń do wjesnych stawiznow zapisamy!
Cyłkownje smy eksaktnje 13 stacijow přihotowali, na kotrychž pokazachmy najebać 36 stopnjow celsiusa, kak tradicija, hospodarska sylnosć a inowatiwne koncepty za přichod pola nas zhromadnje funguja.
Wjeta wostanje potajnstwo
Sulšecy hotuja so kónc tydźenja na wulki wjesny swjedźeń
Sulšecy (AK/SN). W Sulšecach so hižo wjacore tydźenje na swój lětuši wjesny swjedźeń přihotuja. Wón wotměje so wot zajutřišeho pjatka hač do slědowaceje njedźele. Tudyša młodźina swjedźeń zhromadnje z wjesnej radu, wjesnym klubom, wohnjowej woboru a mnohimi podpěraćelemi organizuje. Při tym nastanu tež lětsa zaso někotre překwapjenki. „Zastup budźe nowosć a něšto za woči“, přeradźa Johannes Čórlich. Dołhi tunl wočakuje hosći po puću na swjedźensku łuku. „Něšto nowe spytamy tohorunja z jewišćom. Tu su so naši technikarjo a twarcy jewišća jara prócowali. Wopytowarjo móža takrjec w kole wokoło DJja běžeć a jemu direktnje přez ramjo hladać, hdyž swoju hudźbu hraje.“
Wobrazy na zahrodźe skedźbnjeja na jubileje
Pančicy-Kukow (SN/MWj). Zawěrno wobkuzłaca nóc čaka sobotu, 18. julija na wopytowarjow zahrody klóštra Marijina hwězda w Pančicach-Kukowje, hdyž wuhotuja tam Nóc tysac swěčkow. Wot 19 hodź. Křesćansko-socialny kubłanski skutk (CSB), kiž je nošer zahrody, hosći přeprošuje, jónkrótnu atmosferu w swětle něhdźe 10 000 swěčkow dožiwić.
Po chowanju słónca swěčki zaswěća a stworja tak najwšelakoriše wobrazy, poćahowace so na aktualne jubileje. Wopytowarjo smědźa swěčki sobu zaswěćeć. Do toho móža so wot pisaneho jewišćoweho programa zabawjeć dać a regionalne speciality woptać. Mjez druhim chce kuzłar a mentalist Thomas Majka publikum ze swojimi kmanosćemi fascinować. Duwo Helena & Jan předstaji ze spěwom a klawěrnym přewodom cunje zynki. Nimo toho pokaza rejwanska skupina Łužičanska rapsodija temperamentne reje. Z ćmičkanjom wotwjeduje wohnjowa show cyłka Las Fuegas wopytowarjow do magiskeho swěta. A skónčnje witaja na zahrodźe Michaela Schönfeldera a jeho cirkus k sobučinjenju. Předewšěm změja składnosć, so raz jako mali artisća wuspytać.
Na škleńcu molować
Budyšin. Serbski muzej w Budyšinje přihotuje prózdninski poskitk „Zaškleńčne molowanje“, kiž ma so 11. awgusta wot 10 do 12.30 hodź. wotměć. Wobdźělnicy nałožuja krok po kroku wosebitu wuměłsku techniku, tak zo nastanje na škleńcy a nic na łopjenje hotowa molowanka. Wobdźělić móža so dźěći w starobje znajmjeńša sydom lět. Wobdźělenje płaći 6,50 eurow. Někotre městna su hišće swobodne. Přizjewjenja přijimuja z mejlku na abo telefonisce pod čo. 03591 2708700.
Pytaja zajimcow
Njeswačidło. Štóž chce so po šuli w přirodoškiće angažować a při tym praktiske nazhonjenja zběrać, móže to we wobłuku dobrowólneho ekologiskeho lěta w Njeswačanskej přirodoškitnej staciji činić. Kaž wottam zdźěla, maja za to hišće swobodne městna za wšitkich, kiž rady wonka dźěłaja, so za přirodu a wobswět zajimuja a swójsku iniciatiwu pokazuja. Zajimcy njech přizjewja so w Njeswačanskej přirodoškitnej staciji telefonisce pod čo. 035933 30077.
Za turněr so přizjewić
Nowina posledni raz wušła
Róžant (SN/MWj). Z julijskim wudaćom je w Delanach minjene dny po 36 lětach posledni raz gmejnska nowina gmejny Ralbicy-Róžant wušła. Po tym zo je gmejnska rada kónc junija wobzamknyła, dalše wuchadźenje nowiny kónc julija zastajić, mějachu wobydlerjo nětko swoju gmejnsku nowinu posledni raz w listowym kašćiku. Na titulnej stronje je wjesnjanosta Hubertus Ryćer (njestronjan) někotre delanske impresije zašłych lět wozjewił, mjez druhim wobraz křižerjow, foto ze 100. jubileja Sokoła Ralbicy-Hórki a dopomnjenku na přepodaće noweje Ralbičanskeje pěstowarnje.
Po wobsahu ničo na to njepokaza, zo jedna so wo poslednje wudaće. Tak zhonja čitarjo wo wupisanju městna za běrow wjesnjanosty, wo darowanskej namołwje k saněrowanju twjerdeho hrajnišća w Ralbičanskim stadionje Jurja Frencla, wo šulskich nowačkach a wo rozžohnowanju z wjelelětnej nawodnicu kaž tež z wučerkomaj Ralbičanskeje zakładneje šule.
