Policija (27.10.25)
Na pohrjebnišću kradnyła
Budyšin. Nazymski čas, hdyž ludźo rowy swojich přiwuznych wosebje rjenje pyša, přiwabi tež paduchow na pohrjebnišća a kěrchowy. Sobotu dopołdnja přistajena pohrjebnišća na Budyskim Hrodźišku wobkedźbowaše, kak cuza žona wšelake wěcy z jednoho z rowow bjerješe. Na to narěčana drje podhladna kwětku zaso wróćo połoži, seklu, kwěćel a plećeneho jandźela pak sobu wza. Přiwuzna zemrěteho pozdźišo policiju informowaše.
Přednošk wupadnje
Koncertuje klětu w Kamjencu
Sakrament firmowanja přijimowali
Wěža ma atrakcija być
Wulke inwesticije při Šibojskim jězoru zahajene
Wojerecy (KD/SN). Na zapadnym pobrjohu Šibojskeho jězora je město Wojerecy minjene dny wobšěrne twarske dźěła zahajiło. Z nimi ma so jězor w přichodnymaj lětomaj z turistiskim wjerškom łužiskeje jězoriny stać.
Při symboliskim prěnim zarywje dopominaše Wojerowski wyši měšćanosta Torsten Ruban-Zeh (SPD) na lěto 1984, jako bu wjes Šiboj brunicoweje jamy dla wusydlena a pozdźišo wotbagrowana. Po tym zo su tam 1996 poslednju brunicu wudobywali, započa so za jamu druhe žiwjenje. Hač do lěta 2011 napjelnichu ju z wodu. Dźensa ma Šibojski jězor dobru kwalitu wody, rjekny zamołwity za saněrowanje pola LMBV Gerd Richter. Hórnistwowy saněrowar je přetworjenje wot brunicoweje jamy k jězorej přewodźał a mjez druhim parkowanišćo, nuzniki a hrajkanišćo natwarił.
Budźetej firmje mjez mytowanymi?
Zawodaj ze sewjerneho regiona Budyskeho wokrjesa stej za předewzaćelske myto namjetowanej. Wobaj zawodaj stej dosć rozdźělnej. Wonej pak matej tež něšto wažneho zhromadnje.
Łuh/Rakecy (UM/SN). Heidanec elektrozawod z Łuha w Njeswačanskej gmejnje a předewzaće Purtec tzwr z Rakec stej we wubědźowanju „Sakski měznik 2025“ do druheho koła zaćahnyłoj. Wot dohromady 70 zajimcow je jenož 20 tónle krok zmištrowało, kaž sakska rukowaćelska banka jako wuhotowar wubědźowanja zdźěli. Mjena dobyćerjow chcedźa jutře wozjewić a jim na Mišnjanskim hrodźe Albrechtsburg požadane myta přepodać.
Wobě předewzaći z Budyskeho wokrjesa stej w kategoriji „eksterne naslědnistwo předewzaća“ namjetowanej. Elektrozawod we Łuze je 2024 Robert Bartsch přewzał. Před 20 lětami bě wón w zawodźe swoje wukubłanje zmištrował. Pozdźišo pak so powołansce hinak orientowaše. Prjedy hač zawod přewza, je so w nim połdra lěta zaso zažiwił. Při tym pomhał je jemu załožer a předchadnik Frank Heidan. Po nim so firma hač do dźensnišeho mjenuje.
Žłobik a pěstowarnja dróšej
Hory (AK/SN). Gmejna Halštrowska Hola w lěće 2026 staršiske přinoški za žłobik a pěstowarnju zwyši. To su gmejnscy radźićeljo na swojim zašłym posedźenju jednohłósnje wobzamknyli. „Pozadk je wotličenje kóštow wobhospodarjenja. Z toho wuchadźa, zo dyrbimy staršiske přinoški přiměrić“, nawoda hłowneho zarjada Alex Scholze na posedźenju rozłoži. Swobodny stat Sakska za staršiske přinoški wěste ramiki předpisuje. Tak ma na přikład přinošk za žłobik wob měsac znajmjeńša 15 procentow cyłkownych měsačnych kóštow wučinjeć. Gmejna Halštrowska Hola ma tři pěstowarnje w swójskim nošerstwje, a to na Horach, w Ptačecach a w Blunju.
Swoju kermušu su sej wčera w Chróšćanskej wosadźe znajmjeńša ...
Oest: Nowy plan za migraciju
Berlin/Zhorjelc (SN/mb). Łužiski zapósłanc CDU w zwjazkowym sejmje Florian Oest a Heiko Teggatz, naměstnik předsydy dźěłarnistwa policije DPolG, staj pjatk plan pjeć dypkow za krutu europsku migracisku politiku předstajiłoj. „Štóž nima prawo na azyl, ma so hižo na hranicy EU wotpokazać“, tak Teggatz. Zhorjelski zapósłanc Oest napomina, zo dyrbi Frontex, agentura za škit hranicow EU, skónčnje efektiwnje jednać. Tohodla w prěnimaj dypkomaj „robustny škit hranicow EU“ a přewjedowanje jednanjow wo próstwach na azyl tež zwonka EU namjetujetaj. Střeća chcetaj „masiwne zesylnjenje Frontexa“. Zeštwórta wočakuja wot zhromadneje politiki statow EU konsekwentne wotsuwanje, wšako njeje akceptabelne, zo dotal jenož jedyn wot pjećoch, kotřiž su winowaći woteńć, Europu woprawdźe wopušći. Zdobom pledujetaj za to, legalne připućowanje fachowcow a kwalifikowanych dźěłowych mocow wutwarić – to je pjaty dypk plana.
Krótkopowěsće (27.10.25)
Pruwuje prawniske kroki
Budyšin. Ronny Böhme, zadźěwany kandidat za wólby 2. Serbskeho sejma, kiž nima wólby sejma za płaćiwe, pruwuje dale prawniske kroki přećiwo zamołwitym sejma. Wólbna komisija je w nalěću mjez druhim wobzamknyła, zo jeho kandidatura zapozdźeneho zapodaća dla płaćiwa njeje. Böhme pak njebě informacije wo rozsudźe wo swojim pohóršku dóstał, wón kritizuje. Nimo toho paruje doskónčny posudk wólbneje komisije.
Hišće žadyn pad mrětwy w Sakskej Drježdźany. W zwisku z dźeń a bóle so rozšěrjacej pjeriznowej mrětwu (HPAI) namołwja sakska statna ministerka Petra Köpping plahowarjow pjerizny w Swobodnym staće k skedźbnosći. Štóž schorjeneho abo mortweho ptačka nadeńdźe, njech so jeho njedótknje a njech přizjewi pad nanajspěšnišo zamołwitemu weterinarnemu zarjadej. Dotal w Sakskej schorjenje na HPAI znate njeje.
Hudźba centralna tema
