Daloku jězbu sobu dožiwili
Prapremjera noweje inscenacije NSLDź w Radworju přewšo wuspěšna
Radwor (SN/MkWj). Wupućowanje stow łužiskich Serbow do ameriskeho Texasa w lěće 1854 cyle direktnje sobu dožiwić móžachu wšitcy, kotřiž běchu předwčerawšim, sobotu, do hosćenca „Meja“ w Radworju přichwatali. Na kopaće pjelnjenej žurli prezentowaše Němsko-Serbske ludowe dźiwadło hornjoserbsku prapremjeru swojeje najnowšeje inscenacije „Won do swěta“. Na wšěch sto zajimcow je sej předstajenje wobhladało.
We wjacorych wobrazach rysowachu Anna-Maria Brankačkec, Julia Klingnerec, Katarina Krygarjec, Měrko Brankačk, Tomaš Cyž a Tasso Schille podawki tehdyšeho časa, kotrež běchu Serbow pohnuwali, do Texasa wupućować. W prěnim rjedźe běchu to špatne hospodarske a žiwjenske wobstejnosće. Listy hižo wupućowanych, kotřiž su w dalokej Awstralskej pječa hižo swoje zbožo namakali, polěkowachu žedźbje, druhdźe za nowym zbožom a nabožnej swobodu pytać. Přiběracych špatnych powěsćow z Awstralskeje dla su sej skónčnje Texas za swoju nowu domiznu wuzwolili.
Lipa z publikumom spěwała
Ćisk (JT/SN). Jedyn z lětušich nazymskich koncertow, kotrež wjele lět we Łužicy organizuja, je so wčera w Ćisku wotměł. Přijěł je tam chór Lipa z Pančic-Kukowa. Hromadźe ze swojimi dźěćimi a wnučkami, Lipkami, wuhotowachu spěwarki a spěwarjo hodźinski program na žurli hosćenca „K zelenemu wěncej“. Do toho wšak dyrbjachu hišće stólcy přistajić, zo by něhdźe 140 wopytowarjow městno měło. Kaž je to na mnohich nazymskich koncertach z wašnjom, zahajichu swój program ze spěwom „Ha widźu-li ptačata ćahnyć“. Tónle spěw drje su mnozy z připosłucharjow hišće ze swojeho šulskeho časa znali.
W swojej bróžni w Skanecach pola Malešec je Christoph Schuster ...
Krótkopowěsće (20.10.25)
Lay: CDU změnu wustawy nochce
Berlin. Łužiska zapósłanča Lěwicy w zwjazkowym sejmje Caren Lay je po wuradźowanju rozmołwneho koła „mjeńšiny“ nutřkowneho wuběrka parlamenta z mjeńšinowej radu zašły štwórtk zludana, dokelž CDU přiwzaće narodnych mjeńšin do zakładneho zakonja skeptisce wobhladuje. SPD wustupuje pačena, tak Lay napřećo SN. Karsten Hilse (AfD) pak je SN přihłosowanje frakcije AfD signalizował (hlej SN pjatk).
Měšćanosta sej konsekwency žada
Zhorjelc. Po tym zo su njeznaći knihi při pomniku za wopory fašizma w Zhorjelcu spalili, je sej wyši měšćanosta města Octavian Ursu (CDU) jasne konsekwency žadał. Zamołwitych dyrbjeli pochłostać, wón wuzběhny. Minjeny štwórtk je policija njeskutk zwěsćiła. Wo kotre knihi so jedna, znate njeje. Policija a statny škit pad přepytujetej.
Pytaja noweho nošerja
Woda za hašenje z cisterny
Podzemski zběrnik wjes w nuznym padźe zastaruje
Wulka Dubrawa (UM/SN). Lětdźesatki je Wulkodubrawska wodarnja zastaranju wsy z wodu słužiła, doniž wona tule funkciju njezhubi a jako tajka hižo trěbna njebě. Dźensa je wodarnja, kiž bu w lěće 1926 natwarjena, wonkowny symbol Wulkeje Dubrawy. Hdys a hdys so tam wustajeńcy zarjaduja. Wot njedawna ma w bliskosći wodarnje dźěl Wulkodubrawskeho wodoweho zastaranja swoje městno. Minjene měsacy su na terenje před wodarnju mjenujcy cisternu do zemje zaryli.
„Minjene lěta je gmejna Wulka Dubrawa při puću do Brěmjenja nowotwarsku štwórć wutworiła. Dyrbjachmy zaručić, zo je stajnje dosć wody k hašenju, dyrbjało-li so tam raz palić“, wjesnjanosta Hardy Glausch (njestronjan) rozłoži. Tež za dźěl bydlenskich domow, kotrež tam hižo dlěje steja, bě puć hač k přichodnemu hašenskemu hatej jara daloki. To woznamjenja, zo dyrbješe gmejna problem přidatnje trěbneje hašenskeje wody rozrisać.
Porěči wo serbskej drasće
Radwor. Chór Meja přeprošuje wutrobnje wšitkich zajimcow na přednošk wo „Serbskej katolskej narodnej drasće w běhu časa“ z Andreju Pawlikowej. Zarjadowanje wotměje so póndźelu, 20. oktobra, w 19.45 hodź. w Radworskim Słodeńku.
Nazymsku pychu paslić
Smjerdźaca. Serbske kubłanske srjedźišćo LIPA zarjaduje štwórtk, 23. oktobra, wot 9 do 11 hodź. a štwórtk, 30. oktobra, wot 18 do 20 hodź. w Smjedźacej nazymske paslenje z Róžu-Mariju Bernardowej. Wobdźělnicy budu předewšěm nazymske wěncy wić. Za to njech sej zela, moch a kwětki sobu přinjesu. Popłatk płaći na wosobu 20 eurow. Přizjewjenja přijimuja e-mailnje pod .
Porokuje njedostatk w muzeju
Z pokazku na po jeho měnjenju grawěrowacy wobsahowy njedostatk w Serbskim muzeju je so Günter Sodan na Serbske Nowiny wobroćił. Wón rozprawja wo slědowacym dožiwjenju.
Dobrošecy (SN/MWj). Před něšto časom bě Günter Sodan hromadźe z dalšimi bywšimi wjesnjanostami na wopyće w Budyskim Serbskim muzeju. Dokelž so w Dobrošecach pola Malešec bydlacy jara dokładnje ze załožerjom moderneho pčołarstwa Hadamom Bohuchwałom Šěrachom zaběra, bě wón optimistiski, zo wo tymle zasłužbnym prócowarju tež něšto w Serbskim muzeju zhoni.
Po Kulowskej kermuši minjeny kónc tydźenja slěduje njedźelu ...
Krótkopowěsće (17.10.25)
Sakscy šulerjo su najlěpši
Berlin. Sakscy šulerjo 9. lětnika su po cyłej Němskej w matematice a w přirodowědnych předmjetach najlěpši. Na to pokazuja wuslědki studije Instituta za wuwiwanje kwality (IQB) z lěta 2024, kiž je IQB w Berlinje předstajił. Sakska je w matematice 511 a w přirodowědnych předmjetach 505 do 513 dypkow docpěła, přerězk druhich zwjazkowych krajow wučinja 474 resp. 471 do 477 dypkow.
„Nadźija“: Prěni serbski podawk
Přiwćicy. Towarstwo w nastaću „Nadźija“ ma noweju městopředsydku a pokładnika, Helgu Döršelowu a Bruna Schumppa. Kaž rěčny motiwator Domowiny Lucian Kaulfürst zdźěli, su wčera tež premjerje serbskeje synchronizacije krótkofilma „Jako šće wódni mužojo běchu“ a serbskeho přełožka knižki Jurja Brězana „Powědki wo wodźe“ 15. nowembra na žurli hosćenca „Wódny muž“ přihotowali. Partner je SLA.
„Nachilenu cyrkej“ ponowili
