Přeprošuja na ponowjeny statok
Ralbicy (AK/SN). Hižo cyłe lěto móžeš pódla Ralbičanskeje fary a tamnišeho Radlubina wulke twarnišćo wobkedźbować. Frenclec mandźelskaj Angelika a Steffen tam bywši Konjechtec statok wutwarjataj. Mjeztym bě na dworje wjacore lěta molerska firma Steffena Frencla zaměstnjena. Minjene měsacy je so wjele noweho přidružiło. Nětko su twarske dźěła tak daloko pokročowali, zo móža wjesnjanam a dalšim zajimcam pokazać, što je na wulkim statoku nastało. Sobotu, 5. apryla, w 14 hodź. wosadny farar Šćěpan Delan statok požohnuje. K tomu su wšitcy wutrobnje přeprošeni.
Wot přichodneje póndźele Melcherec fyzioterapija w nowych rumnosćach w Ralbicach swoje posłužby poskićuje. Janina Wjeselina a Christina Lipičowa ze Šunowa a Antje Korchowa z Konjec chcedźa so wo to starać, zo budźe w praksy serbšćina wobchadna rěč. Kaž mějićel Hagen Melcher přeradźi, maja sobudźěłaćerki wosebite kwalifikacije, tak zo móža najwšelakoriše terapije přewjesć.
Drježdźansko-Mišnjanski biskop Heinrich Timmerevers (naprawo) ...
Krótkopowěsće (04.04.25)
Nowe towarstwo załožili
Pančicy-Kukow. W awli Pančičanskeje zakładneje šule bu wčera spěchowanske towarstwo za tamnišu serbsku šulu załožene. Cyłkownje 24 čłonow chce w přichodźe šulske žiwjenje wobohaćić. Podpěrać chcedźa zdobom wjacore projekty, mjez druhim stej to natwar noweje biblioteki a šulska zahroda, za čož měli so tež wo spěchowanske srědki prócować.
Šulerjo z Ralbic wuspěšni
Drježdźany. Šulerka 8. lětnika Serbskeje wyšeje šule Ralbicy Vanessa Rjenčec je wčera 2. městno na sakskej olympiadźe rušćiny w Drježdźanach docpěła. Třeće městno wubědźowanja wyšich šulow wudoby sej Patricia Dittrichec a Jason Domš docpě predikat „z wuspěchom“. Wobaj stej tohorunja šulerjej w Ralbicach. W sakskej stolicy běchu so wuknjacy wyšich šulow w štyrjoch cuzych rěčach wubědźowali.
Z ćahom w třoch krajach po puću
Policija (03.04.25)
Pazoraka wuchował
Jitro. Ze swojim chrobłym jednanjom je póndźelu wječor 31lětny muž zranjeneho pazoraka w Jitru (Milstrich) we Wóslinčanskej gmejnje wuchował. Najprjedy muž policiji rozprawješe, zo je zranjene zwěrjo na lěsnym puću blisko wsy namakał. Hišće prjedy hač wobsadka policajskeho awta tam přijědźe, so młody muž zwaži a pazoraka popadny. Policisća přepodachu ptaka na to skótnej lěkarce, kotraž jeho pozdźišo lěkarsce zastara.
Wjace wěstoty za wšitkich
Mjez Chwaćicami a Ješicami ma nowa kolesowanska šćežka nastać
Chwaćicy (SN/MWj). Štóž wokoło Budyskeho spjateho jězora rady kolesuje, móže tam w přichodźe nowu kolesowansku šćežku wužiwać. Kaž Sakska krajna direkcija (LDS) informuje, je wona twarej noweje šćežki za kolesowarjow a pěškow podłu statneje dróhi S 107 mjez Chwaćicami a Ješicami we Wulkodubrawskej gmejnje přizwoliła. 560 metrow dołhi puć ma sewjernje dróhi nastać a wobě wsy zwjazować. Naprawa je dźěl koncepcije nastupajo kolesowanski wobchad w Swobodnym staće Sakskej z lěta 2014. „Myslu sej, zo je to dobra powěsć. Tak budu kolesowarjo a pěškojo na swójskim puću mjez Chwaćicami a Ješicami po puću“, praji prezident krajneje direkcije Béla Bélafi.
Nóc bibliotekow w instituće
Budyšin. Serbska centralna biblioteka (SCB) wobdźěli so prěni raz na cyłoněmskej nocy bibliotekow. Ju wotměja pjatk, 4. apryla, wot 18 hodź. pod hesłom „Wědu dźělić a sej wotkryć“ w BudyskimSerbskim instituće na Dwórnišćowej 6. We 18 hodź. wotewru tam kabinetnu wustajeńcu wo dźěławosći nakładnistwa Lusatia. Dale předstaji dr. Robert Lorenc Mukowu „Statistiku łužiskich Serbow“ z lěta 1886 (w němskej rěči). Sćěhuja krótke a zabawne čitanja powědkow, krimijow a lyriki z wobstatka biblioteki serbsce a němsce. Čitaja Madleńka Šołćic, Měrćin Wjenk, Anja Pohončowa a Měrana Cušcyna. W sydarni předstaji młode towarstwo Serbska murja swoje wideja wo serbskich stawiznach a přeprošuje zajimcow, so w hrě „QuizSerb“ wubědźować. Zajimcy su wutrobnje witani.
... a w gmejnje
Wosrjedź kamelijow spěwali
Budyšin (CRM/SN). Do daloko znateho Budyskeho zahrodnistwa Steglich běše instrumentalny kruh Consonare, kotryž słuša k ewangelskeje wosadźe swj. Pětra, popołdnju njedźelu do Laetare na hodźinku nalětnjeho spěwanja přeprosył. Zajim Budyšankow a Budyšanow běše njewočakowano tak wulki, zo hosćićeljo k hižo přihotowanym rynkam w škleńčanej zahrodniskej dźěłarni dalše stólcy přistajichu. Wotpowědnje radostnje a mócnje zaklinčachu potom tež ludowe spěwy, kotrež běchu nětčišej staršej generaciji po cyłej Němskej něhdy znate. Běše pytnyć, kak wočerstwjace zhromadne spěwanje z temperamentnym přewodom dujerskich, trubjerskich a smyčkowych instrumentow skutkowaše. Při tym wopokaza so něhdyša profesionalna hrajerka na róžku Evelyn Fiebiger znowa jako dobra nawodnica swojich instrumentalistow kaž tež cyłka zahoritych spěwarjow.
Wulka zwada wětrnikow dla
Slepo (AK/SN). Loni wot Zhorjelskeho wokrjesa schwaleny plan wužiwanja ležownosćow Slepjanskeho zarjadniskeho zjednoćenstwa dale płaći. Wón tež wšitkim prawniskim předpisam wotpowěduje. Tole rjekny komunalny poradźowar Slepjanskeje gmejny dr. Stefan Vetter póndźelu na wurjadnym posedźenju tamnišeje gmejnskeje rady. Na dnjowym porjedźe radźićelow steješe zběhnjenje wustawkow za plan wužiwanja ležownosćow. Sydom radźićelow hłosowaše za to, wustawki zběhnyć, runje telko bě přećiwo tomu. Dokelž by za namjet wjetšina trěbna była, bu wón wotpokazany. Tuž smědźa so na Mułkečanskich nasypach dale milinowe wětrniki a solarne parki planować. Štyrjo radźićeljo zajimoweho zjednoćenstwa Mułkečanske nasypy a AfD běchu wotpowědny namjet zapodali. Wjace hač 70 wobydlerjow bě na posedźenje přišło.
Poněčim widźiš nětko hižo wšudźe, zo so nalěćo předrěje a ...
Krótkopowěsće (03.04.25)
Choćebuz bórze cyle dwurěčny
Choćebuz. Hišće w tutym lětdźesatku móhli wšě mjenowe taflički dróhow a naměstow w Choćebuzu dwurěčne němsko-serbske być. To připowědźi społnomócnjena za serbske naležnosće města Anna Kosacojc-Kozelowa w swojej rozprawje. Wona chwali, zo móžeš na hłownym dwórnišću awtomaty za jězdźenki delnjoserbsce wužić.
Föhrska frizišćina za wšěch
Alkersum. Frizišćinu, kotruž domoródni wobydlerjo na kupje Föhrje na sewjernym morju nałožuja, móžeš wot dźensnišeho w 17 hodź. z awtomatizowanym programom za přełožowanje z němčiny a jendźelšćiny zeznać. Na https://auersaater.de prezentuje Ferringowa załožba, kotraž frizisku rěč a kulturu na kupomaj Föhrje a Amrumje podpěruje, nowy poskitk.
Wopušća socialnu syć X
