Budyšin (SN/mb). Halena Jancyna je swoje dźěło jako społnomócnjena Budyskeho wokrjesa za serbske naležnosće jara derje wukonjała, to je jej krajny rada Udo Witschas­ (CDU) wčera hišće zjawnje wobkrućił. Tohodla njejsu na dodźerženju wupowědźenskeho časa wobstali, hdyž je so wona za nowy nadawk rozsudźiła. Ale wuhladow na naslědnicu abo naslědnika tež poł lěta po jeje wotchadźe njeje. To je so wčera w rozmołwje z Witschasom wukopało. Kónc januara bě rěčnica krajnoradneho zarjada našemu wječornikej na naprašowanje zdźěliła, zo hišće rozmołwy wo nowowobsadźenju městna wjedu. Jeli njebudu wone wuspěšne, sćěhuje zjawne wupisanje. Zaměr běše powołanje społnomócnjeneje přez wokrjesny sejmik 31. měrca.

Na dnjowym porjedźe wčerawšeho posedźenja sejmika tón dypk pobrachowaše. Tohodla chcychmy na kóncu nowinskeje konferency krajneho rady do wuradźowanja wědźeć, čehodla tomu tak je. Wšako krajny rada temu narěčał njeje.