Budyšin (CRM/SN). Do daloko znateho Budyskeho zahrodnistwa Steglich běše instrumentalny kruh Consonare, kotryž słuša k ewangelskeje wosadźe swj. Pětra, popołdnju njedźelu do Laetare na hodźinku nalětnjeho spěwanja přeprosył. Zajim Budyšankow a Budyšanow běše njewočakowano tak wulki, zo hosćićeljo k hižo přihotowanym rynkam w škleń­čanej zahrodniskej dźěłarni dalše stólcy přistajichu. Wotpowědnje radostnje a mócnje zaklinčachu potom tež ludowe spěwy, kotrež běchu nětčišej staršej generaciji po cyłej Němskej něhdy znate. Běše pytnyć, kak wočerstwjace zhromadne spěwanje z temperamentnym přewodom dujerskich, trubjerskich a smyčkowych instrumentow skutkowaše. Při tym wopokaza so něhdyša profesionalna hrajerka na róžku Evelyn Fiebiger znowa jako dobra nawodnica swojich instrumentalistow kaž tež cyłka zahoritych spěwarjow.