Na prózdninske dźěło
Chrósćicy. Serbske šulske towarstwo poskići młodostnym wot 15 lět, kotřiž maja zajim na dźěle jako kubłar/ka, prózdninske dźěło w swojich kubłanišćach w Hornjej a Delnjej Łužicy. Zajimcy njech so z krótkim požadanjom pod přizjewja.
Namjety zapodać
Budyšin. Lětuša schadźowanka ma so sobotu, 20. nowembra, w Budyskej „Krónje“ swjećić. Studowacy kaž tež wuknjacy Serbskeho gymnazija su nětko namołwjeni sej hłójčku łamać wo přinoškach, kotrež maja program wobohaćić. Ze strony Załožby za serbski lud zamołwita Jana Pětrowa planuje zhromadnje z Katku Pöpelec a Symanom Hejdušku tuchwilu „normalny“ live-program pod wuměnjenjemi 3G abo 2G. Dokładniše informacije hišće wozjewja. Hač do njedźele, 10. oktobra, přijimuja organizatorojo namjety. Wone měli wopřijeć informacije wo tym, štó so předstaji, po móžnosći hižo z temu. Při- noški za program njech zapodadźa zajim- cy e-mejlnje na abo .
Dźěłarnička Bjesadow
Kóžde lěto 3. oktobra zetkawa so dźěl wobydlerjow Dobrošic na ...
Z Mexika do Europy a k Serbam
Njebjelčicy/Rowno (SN/MiR). Składnostnje 500. róčnicy kolonizacije Mexika přebywa tuchwilu delegacija wottam w Europje. Su to přewažnje čłonojo indigenych ludow z tamnišeho oficielnje swobodneho a suwereneho zwjazkoweho stata Chiapas na juhowuchodźe Mexika. Hłownje přisłušeja woni capatistiskemu hibanju socialrewolucionarnych indigenych politiskich skupin, kotrež su předewšěm w Chiapasu zasydlene. Zaměr wšitkich zetkanjow mjez Mexičanami a Europjanami su wuměna nazhonjenjow, mjezsobne připosłuchanje a hódnoćenje paralelow. Capatisća su w staće Chiapas po lětdźesatki trajacym wobćežnym procesu docpěli, zo smědźa wo swojich naležnosćach sami postajeć. Jednotliwe skupiny delegacije, rozrjadowane stajnje na pjeć zajimcow, přebywaja we wšelakich kónčinach Europy. Jedna je dźensa a jutře we Łužicy, w Njebjelčicach a Rownom. Tele zetkanje změje za wobě wsy a wokolinu historiski wuznam.
Změna na čole Carity Hornjeje Łužicy
Wjace kedźbnosće turizmej
Gmejna prócuje so wo dołhodobne projekty za změnu strukturow
Trjebin (AK/SN). Wo přistup k zaměrowemu zwjazkej za Brězowski jězor chce so Trjebinska gmejna prócować, kaž wjesnjanosta Waldemar Locke (CDU) na wčerawšim posedźenju gmejnskeje rady podšmórny. „Brězowski jězor móhł přichodnje naš kluč za srědki ze zakonja wo sylnjenju strukturow być“, wón rjekny. Dotal přisłušatej zaměrowemu zwjazkej gmejnje Dźěwin a Slepo. Trjebin chce so sobu zapřijeć. Přichodnu wutoru, 12. oktobra, chcedźa jeho gmejnscy radźićeljo na wurjadnym zjawnym posedźenju wo přistupje wuradźować a jón po móžnosći hišće samsny dźeń wobzamknyć.
Krótkopowěsće (07.10.21)
Incidenca dale nad 100
Budyšin. Incidenca po Roberta Kochowym instituće je dźensa w Budyskim wokrjesu z hódnotu 102,7 zaso trochu woteběrała. Najebać to informowachu tam wčera wo 83 dalšich natyknjenjach z koronawirusom. W Zhorjelskim wokrjesu zwěsćichu 68 nowoinfekcijow. Tamniša incidenca je stupaca, RKI je dźensa hódnotu 88,6 podał.
Maja klětu wolić
Bóšicy. Wólby Bóščanskeho wjesnjanosty budu klětu 16. januara. Na to su so wčera wječor gmejnscy radźićeljo Bóšic na swojim rjadnym posedźenju dojednali. Budźe-li druhi termin trěbny, ma so tón 6. februara wotměć. Za lětuši nowember předwidźane wólby dyrbjachu prawniskich přičin dla přestorčić. Aktualna wólbna perioda traje hač do 20. februara 2022.
Z baterijemi ćěrjene ćahi
Policija (07.10.21)
Swójbna rozkora eskalěrowała
Běła Woda. Swójbneje rozkory dla dyrbjachu předwčerawšim wječor policiju w Běłej Wodźe wołać. Jako zastojnicy přijědźechu, 48lětny muž w bydlenju runje do dweju swójbneju biješe. Policisća chcychu jeho z bydlenja nuzować, na čož so bičk tež do nich da a jich křiwdźeše. Tak jim ničo druhe njezby, hač muža sputać a na policajski rewěr dowjezć. Tam so wukopa, zo bě wón dospołnje wopity. Pola njeho naměrichu 2,9 promilow alkohola w kreji. Nimo toho měješe muž zakazany nóž při sebi.
Lejnjanski stary móst zawrjeny
Via Regia a zdobom wjesna dróha přez stare Lejno stej tuchwilu přetorhnjenej, dokelž bu móst wobškodźenja přez Małowosyčansku rěku dla zawrjeny. Železne nošaki su přezerzawjene, tak zo su so kamjenje jězdnje pušćili.
Wohnjowa wobora, wuchowanske a zastaranske awta a dalše jězdźidła docpěwaja tam bydlacych nětko jenož hišće z wuchoda abo zapada wot statneje dróhi S 100 hač k rěčce. Za to je komunalny twarski zawod gmejny Pančicy-Kukow jězdnju w šěrokosći třoch metrow spřihotował.
Dalši móst w bjezposrědnjej bliskosći je tohorunja wobškodźeny. Tam pak město železnych nošakow dołhe zornowcowe stołpy přez rěku leža. Gmejnscy dźěłaćerjo powjerch mosta nětko z betonom wukidaja. Hdyž budźe dźěło zdokonjane, smědźa po nim jenož hišće hač do 3,5 tonow ćežke wozydła jězdźić.
Wobydlerjo Lejna so wězo nadźijeja, zo budźe stary móst Via Regije bórze zaso znowa natwarjeny, wšako je historiski puć w originalnej čarje přez wjes wosebity swědk stawiznow – nic jenož Lejna – a zdobom wažny wobchadny zwisk při njej bydlacym. Benedikt Cyž
Přihotuja nowu wustajeńcu
Kamjenc. W Kamjenskim Muzeju zapadneje Łužicy přihotuja tuchwilu nowu wosebitu wustajeńcu, kotraž wobswětla dobu před 90 milionami lět w Sakskej. Tele dny dóstachu tam někotre modele prazwěrjatow, jednu z hłownych atrakcijow přehladki. W krydowej dobje bě Europa móhłrjec kupowy swět. Na kraju počachu so rostliny z kćenjemi wuwiwać, w morjach žiwe běchu rybjace prazwěrjata. Pobrjóh morja bě potajkim snano tež před Kamjenskimi měšćanskimi wrotami. Jako wuslědk tohole časa nasta jedna z najrjeńšich krajinow Němskeje, Połobske pěskowčiny, lěpje znate jako Sakska Šwica. Oficialnje wotewrěć chcedźa přehladku pjatk, 15. oktobra w 19 hodź. w elementariju muzeja. Wot 16. oktobra budźe wona potom wšitkim zajimcam přistupna.
Jutře na kino do kluba
Wokrjes posledni dom za młodych ćěkancow zawrěł
Debrikecy (UM/SN). Budyski wokrjes je dom za njepřewodźanych njepołnolětnych ćěkancow w Budyskim měšćanskim dźělu Debrikecy zawrěł, kaž rěčnica krajnoradneho zarjada na naprašowanje wobkrući. Naposledk bydleše tam jenož hišće dźewjeć młodych ćěkancow. „Po zawrjenju Debrikečanskeho domu njeje w Budyskim wokrjesu hižo žanoho tajkeho zarjadnišća. Aktualnu potrjebu zamóžemy z wobstejacymi domami za pomoc młodostnym zawěsćić, štož tuchwilneje małeje ličby padow žadyn problem njeje. Tež indiwiduelna podpěra potrjechenym je zaručena.“ Při tym hraje šulska a powołanska perspektiwa runje tajku rólu kaž perspektiwa, zo smědźa młodostni tu wostać.
