Budyšin. Přirada za serbske naležnosće města Budyšin zetka so jutře, srjedu, w 17 hodź. w žurli Röhrscheidtoweje bašty Serbskeho ludoweho ansambla. Na dnjowym porjedźe steji mjez druhim rozprawa wo Budyskej powěsćowej šćežce. Mjez druhim chcedźa tam wo wuwiću ličby wopytowarjow a wo dalšich detailach rozprawjeć. Wo wuslědkach posedźenja drje štwórtk w Serbskich Nowinach informujemy, přiwšěm su zajimcy na zjawne posedźenje jako hosćo prošeni. Woni njech­ wužiwaja zachod při kasy SLA.

Hladar w zwěrjencu być

Wojerecy. Zwěrjenc we Wojerecach přeprošuje na wosebity projekt pod hesłom „jónu hladar w zwěrjencu być“. Zajimcy su sobotu, 5. septembra, přeprošeni, so na wšědnym dźěłowym dnju zwěrjenca wobdźělić. Mjez druhim budu zwěrjata picować. Štóž chce tole jónu dožiwić, měł so pola sobudźěłaćerki Silke Kühn přizjewić, a to telefonisce pod 03571 20937708 abo z mejlku na . Akcija traje něhdźe štyri hodźiny. Zajimcy měli znajmjeńša wosom lět stari być. Wobdźělić smě so maksimalnje wosom wosobow. 14. nowembra projekt wo­spjetuja.

Serbski swjedźeń składnostnje 725. róčnicy Grodka wuhotowali

Grodk (JoS/SN). Njezapomnity drje wostanje dźeń, kotryž je něhdyši jednaćel Grodkowskeje towaršnosće za kino a kulturu, Michael Apel, Grodkowčanam zašłu njedźelu wobradźił. Zhromadnje z ewangelskim cyrkwinskim kruhom Choćebuz a Domowinu wuhotowaše wón mjenujcy kołowokoło jewišća pod hołym njebjom pisany program z mnoho hudźbu, serbskimi drastami, němsko-serbskej Božej słužbu a serbskimi wikami. Sobuskutkowacych bě runja wopytowarjam dosć a nadosć. Mnohich wabješe krasne wjedro pózdnjeho lěća na areal kołowokoło jewišća. Nichtó z tych, kotřiž běchu přichwatali, drje so mjerzał njebě. Wospjet dopokaza město, kak kruće je serbske herbstwo w Grodku zakótwjene.

Wustup rejowanskeje skupiny z Barbuka, serbskeho kwasneho ćaha z Mosta, Grodkowskich holanskich muzikantow kaž tež koncert z Claru Werden a band Kula Bula běchu bjezdwěla wjerški­ swjedźenja. Mnohich zadźiwa tež designerka Sarah Gwiszcz zhromadnje ze swojimi modelemi. A to najwažniše: Wostudźiło so nikomu njeje.

Sandru Pjacynu sym jako wotewrjenu a aktiwnu wobdźělnicu kursa Domoj zeznała. Wona je jara pomocliwa a wšojedne wo čo dźe, Sandra so wo to stara a to organizuje. Wona pyta wuměnu a měri so na ludźi. Hdyž něšto njezrozumi, so za tym praša. To pomha jej a druhim při wuknjenju rěče.

Po tym zo je wjele lět we wukraju žiwa była a naposledk w Berlinje bydliła, je so ze swojej swójbu za Lichań jako nowu domiznu rozsudźiła. Jeje mandźelski kaž tež jeju synaj serbuja. W serbskej rěči chce so w přichodźe tež doma čuć.

Swojimaj dźěsćomaj chce wona z přikładom być. Wonej matej zmužiće a bjezstarostnje serbsce rěčeć. Wona chce zhromadnosći přinošować a serbšćinu jako samozrozumliwu zaznawać. Tež we wukraju (na př. w Słowakskej a Čěskej) je serbujo hižo tójšto pozitiwneho dožiwiła. Tak je tam na přikład spěšnje z ludźimi do rozmołwy přišła. Ze serbšćinu su so jej někotre durje wotewrěli.