Budyšin (CRM/SN). Měšćanski muzej Budyšin je njedawno wospjet na koncert mjez wustajenymi eksponatami přeprosył. Hižo wot 12. oktobra zašłeho lěta je w domje při Žitnych wikach reprezentatiwna wosebita wustajeńca z mólbami, grafikami, ilustracijemi a plakatami za dźiwadło a film tworjaceje wuměłče Jutty Mirtschinoweje zarjadowana. Narodźiwši so 1949 w tehdomnišim Karl-Marx-Stadće je wona w Budyšinje wotrostła a na bywšej Rozšěrjenej wyšej šuli Friedrich Schiller maturowała. W Lipsku a Berlinje studowaše wuměłstwo a bě mišterska šu­lerka Wernera Klemke. Pozdźišo přewza rady tohorunja nadawki w Ludowym nakładnistwje Domowina. Prěnička z jeje ilustracijemi běše „Kito husličkar“ Gerata Hendricha. Wopytowarjo wustajeńcy wuhladachu we witrinje tuž tež mnohe serbske titule. Dźakowano jeje wuměłstwu bu někotrežkuli ilustrowane wudaće za čas NDR jako najrjeńša kniha wuznamjenjene.

Njedawno přewjedźe naša rjadownja 7-1 Serbskeho gymnazija Budyšin při lěsu pola Lišeje Hory swój pućowanski dźeń. Tam sej wjetšina z nas z kolesom dojědźe. Po krótkim rozjasnjenju rozrjadowachmy so na dwě skupinje. Prěnja běše z hajnikom Michałom Zahonom w lěsu po puću a zhoni zajimawe fakty wo lěsu a jeho funkcijach. Mjeztym je druha skupina z Romanom Wjeselu, našim rjadowniskim wučerjom Měrkom Pohončom a dalšimi pomocnikami małe štomiki na kromje lěsa sadźeć započała.

Jako běše prěnja skupina zaso z lěsa wróćo, tamna hižo pilnje dźěłaše. Pozdźišo so skupinje měnještej. K dopołdnišej přestawce běchu wšitcy zaso zhromadźeni. Mužojo přinjesechu nam dwaj kašćikaj limonady jako mału překwapjenku. To nas wšitkich zwjeseli. Po přestawce so dachmy so zaso do dźěła. Jedyn wury dźěru, tamny sadźi štomik a pjeršć kruće stepta. Při dźěle bjesadowachmy a tak jedyn štomik po druhim do zemje sadźachmy.

Budyšin. We wobłuku wustajeńcy „Što rěka tu mjeńšina?“ přeprošuje Serbski muzej Budyšin na přednošk dr. Cordule Ratajczakoweje, nawodnicy rěčespyta projekta ZARI na temu „Wot bolostneho woněmjenja k ćežkemu wróćenju serbšćiny. Dohlad do rěčnych biografijow z ewangelskeje Hornjeje Łužicy“. Přednošk wotměje so srjedu, 16. apryla, w 19 hodź w Serbskim muzeju. Dr. Cordula Rataj­czakowa je so we wobłuku swojeho slědźenja z 30 wosobami ze serbskich kónčin Hornjeje Łužicy rozmołwjała, kotřiž serbšćinu w swójbje nawuknyli njejsu. Wona wobswětla wosobinske nazhonjenja a wužadanja, kotrež běchu z womjelknjenjom serbskeje rěče w swójbje zwjazane. Tež puć k wozrodźenju a nawrótej serbšćiny slědźerka tematizuje. Hižo we 18 hodź. su zajimowani wutrobnje na wodźenje po wustajeńcy z kuratorom dr. Robertom Lorencom přeprošeni.

W Rownom sćežory za wjesne wobswětlenje wottwarja

Rowno (CK/SN). W druhim połlěće maja so w Rownom, wjesnym dźělu Slepoho, milinowe kable zhubić. Tež k tomu słušace sćežory energijowy zastaraćel Mitnetz wotstroni. To so na wjesne wobswětlenje wuskutkuje. Kaž twarski nawoda Steffen Seidlich na zašłym posedźenju Slepjanskeje gmejnskeje rady informowaše, potom na Wjesnej dróze a na pódlanskich pućach kaž na přikład na Grodkowskej dróze ćma wostanje.