Twarja nowy ličenski centrum
Lubnjow. Z prěnim zarywom je koncern Dietera Schwarza, kotremuž mjez druhim znatej discounteraj Lidl a Kaufland přisłušatej, dźensa twar noweho ličenskeho centruma w Lubnjowje zahajił. W lěće 2027 ma zarjadnišćo z cyłkownym wukonom 200 megawattow swoje dźěło zahajić.
Wjace łososow w Sakskej
Bad Schandau. Ličba łososow w Sakskej je chětro přiběrała. To Krajny zarjad za wobswět, ratarstwo a geologiju (LfULG) wčera zdźěli. Hač do 14. nowembra su fachowcy při monitoringu we wodźiznach Hornjeho Łobja w Połobskich pěskowčinach 15 łososow a 19 jamow za jerkanje zwěsćili. W Sakskej so fachowcy zaměrnje wo to prócuja, zo so łosos do wodźiznow nawróći.
Wabja wo šeflěkarja
Rumburk. We Łužiskej chorowni w Rumburku, kotraž je jenička we wotležanym Šluknovskim wuběžku, trjebaja nuznje šeflěkarja wotrjada za gynekologiju a porody. Potencielnemu zajimcej chcedźa tuž nadměrnu mzdu a wotrunanje poskićić: 200 000 krónow (to je wjace hač 8 000 eurow) měsačnje. Kwalifikowany lěkar zasłuža regularnje něhdźe połojcu toho.
Štyri medalje za Hórčanku
