Přihłosowanje bjez alternatiwy
Bóščanska gmejnska rada měješe so srjedu z prašenjom rozestajeć, hač dojednanju z komunalnej towaršnosću (KBO) přihłosuje. Dźe wo perspektiwu při zaručenju dotalnych dochodow z dobytkow zastaraćela z energiju.
Kmane jězdźidło namakali
Wjesna wohnjowa wobora dóstanje mustwowy transporter
Chrósćicy (JK/SN). K zawěsćenju wohnjoškita a zo bychu planej wohnjoškitneje potrjeby w gmejnje wotpowědowali, ma wjesna wohnjowa wobora Chrósćicy nowy mustwowy transporter dóstać. To su tamniši gmejnscy radźićeljo wčera wobzamknyli. Dokelž pak Budyski krajnoradny zarjad tuchwilu tajki transporter njespěchuje a nětčiše jězdźidło žane wuhlady na technisku dowolnosć TÜVa nima, so w Chrósćicach rozsudźichu, za kmanym trjebanym awtom so rozhladować. A mějachu wuspěch. W Parchimje w specielnym zawodźe, kotryž tajke jězdźidła poskića, su po wulkosći a płaćiznje kmane awto namakali. Radźićel Beno Hojer, kiž je sej z dalšimi wobornikami jězdźidło na městnje wobhladał, je swojim kolegam dobry techniski a wuhotowanski staw jězdźidła wobkrućił. Tuž gmejnska rada jednohłósnje wobzamkny, awto za nimale 26 000 eurow kupić. W hospodarskim planje dźě bě hižo 27 000 eurow za to zaplanowane.
Dobyćerjo jutrowneje křižowki
Zadołženje na wobydlerja dale woteběra
Radwor (SN/MkWj). Financne połoženje gmejny steješe w srjedźišću srjedowneho posedźenja Radworskeje gmejnskeje rady. Komornica Melanie Mihan měješe dosć wobšěrnu prezentaciju přihotowanu, zo by radźićelow a hosći informowała. Gmejna chcyła nimale runje telko wudać, kaž ma dochodow. Te ma gmejna předewšěm z klučowych připokazankow swobodneho stata, z podźěla na wjacehódnotowym dawku, z přemysłoweho dawka a z ležownostneho dawka. Koronapandemije dla su straty pola přemysłoweho dawka tónraz wosebje bolostne: Dochody woteběrachu loni wot 1,1 miliona na runje hišće 110 000 eurow, komornica rozłoži.
Krótkopowěsće (16.04.21)
Testować bjez přizjewjenja
Budyšin. Terminy za mobilne testowanske teamy w Budyskim wokrjesu online knihować njeje so wudaniło. Kaž krajnoradny zdźěli, móžeš so tam nětko bjez přizjewjenja testować dać. We wokrjesu rozprawjachu wčera wo 200 natyknjenjach z koronu. RKI mjenowaše dźensa incidencu 262,5. Zhorjelski wokrjes měješe wčera 123 infekcijow a štyri smjertne pady. Incidenca po RKI je 216,8.
Podpěra domizniskim muzejam
Budyšin. Předsydstwo župy „Jan Arnošt Smoler“ Budyšin ma za trěbne, zo ma so zamołwity wo serbske domizniske muzeje nastupajo koncept, nošerstwo a financy starać. Potrjechene su na přikład muzej Ćišinskeho w Pančicach, šulski muzej w Stróži a dom Měrćina Nowaka w Njechornju. Za to měli snadź nowe dźěłowe městno wutworić. Župa Budyšin wobroći so w naležnosći na radźićelow Załožby za serbski lud.
Biden–Putin w čěskej stolicy?
Policija (16.04.21)
Poskićena pomoc wobšudnistwo była
Chrjebja. 5 000 eurow škody poćerpjeł je muž w Chrjebi, kiž sta so z woporom wobšudnika po telefonje. Cuzy bě so jako serwisowy sobudźěłaćer za program Windows wudawał a zdźělił, zo bu konto 62lětneho manipulowane. Zo móhł to sporjadkować, měješe Chrjebjan swoje daty za onlinebanking sposrědkować, zo hodźała so wěstota konta přepruwować. Při telefonje 62lětnemu ničo njenapadny. Hakle wječor wón zwěsći, zo na jeho konće pjenjezy pobrachuja. Na to je wón konto nablaku zawrěć dał a policiju informował. Ta znowa před tym warnuje, wosobinske daty cuzym přeradźić.
Na awtodróze twarja
Horni Wujězd. Saněrowanskich dźěłow dla budźe wotjězd z awtodróhi A 4 w Hornim Wujězdźe přichodny tydźeń dwójce zawrjeny. Wutoru, 20. apryla, dźěłaja na wotbóčce do směra na Zhorjelc, nazajtra do směra na Drježdźany. Wobjězdka budźe wupisana, wona powjedźe do Zhorjelca přez Słonu Boršć a do Drježdźan přez Porchow.
Poskića kubłanski tydźeń
Smochćicy. Pod hesłom „Mjenje stresa – wjace wjesela“ přeproša Smochčanske kubłanišćo swj. Bena za tydźeń wot 28. awgusta do 4. septembra na swójbny kubłanski tydźeń. Nimo zetkanjow a hrow dóstanu starši pokiwy k wšědnemu dnjej w swójbje z dźěćimi wot třoch lět. Při tym póńdźe hłownje wo kubłanski stil a wo potrjeby dźěći. Tydźeń wobrubja z pisanym programom wšelakich akcijow, kotrež su temje wobsahowje přiměrjene. Za čas seminarow za staršich poskića dźěćom wosebity program. Přizjewjenja přijimuja internetnje pod www.bildungsgut-schmochtitz.de abo pod telefonowym čisłom 03 59 35 / 2 23 17.
W Nuknicy dźěłaja dale na swojej kapałce, nastawacej z bywšeje ...
Žadyn pozitiwny pad njezwěsćili
Budyšin (SN/JaW). Budyski krajnoradny zarjad je minjenej pjatk a sobotu na cyłkownje štyrjoch městnach lětušim křižerjam móžnosć poskićił, so hišće raz dobrowólnje na koronu testować dać. Kaž zarjad na naprašowanje dźěli, je so cyłkownje 278 křižerjow na tychle městnach testować dało. Dwanaćo dalši su so druhdźe testowali, na přikład na dźěle, a posrědkowachu wuslědk strowotniskemu zarjadej, z čimž wučinja ličba testowanych křižerjow cyłkownje 290, štož njeje ani třećina lětušich křižerjow. „We wobłuku wospjetneho testowanja křižerjow njejsmy ani jenički pozitiwny pad korony zwěsćili. To pokazuje na zamołwite wobchadźenje we wobłuku pandemije. Tež nastupajo kontaktne wosoby křižerjow njeje dotal žadyn pozitiwny pad natyknjenja na koronawirus znaty“, pisa nowinska rěčnica Mandy Noack na naprašowanje našeho wječornika.
Dróhotwar radźićelow zaběrał
Najebać problemy wutwar Jitkowskeho puća derje postupuje
Rakecy (JK/SN). W Rakečanskej gmejnje chcedźa lětsa šěsć komunalnych pućow ponowić. Nadawk we wobjimje 55 000 eurow přepodachu gmejnscy radźićeljo na swojim wčerawšim posedźenju firmje Kutter z durinskeho Plaue pola Arnstadta. Mjez druhim ponowja Krabatowy puć w Jitku a Pstruhowy puć w Psowjach. Wobmyslenja radźićelki Annemarie Rentsch (Njestronscy wolerjo), zo so planowana metoda saněrowanja njewudani, złahodźi wjesnjanosta Swen Nowotny (CDU) z dobrymi nazhonjenjemi, kotrež z firmu a jeje metodu hižo maja. Rakečanski puć k hatam ma firma ETD ze Sepic za 11 400 eurow skrućić.
