Zašły tydźeń su dźěłaćerjo w Dobrošicach na wuchodnym dźělu wjeski do směra na Njeswačidło twar noweho milinowoda zahajili. Tón dosrjedź puća do zemje połoža. Za to je hoberska mašina asfaltowu worštu puća po dołhosći 300 metrow rozdrěła. Předewzaće Poick z Chelna chce nětko w mjeńšich wotrězkach hrjebju wuzběhnyć a nowy kabl zaryć. Ležownosće w tutym wotrězku potom na nowy kabl přizamknu. Dźěła budu w cyłku dwaj měsacaj trać. Foto: Hubertus Žur

Wojerecy. Na třihodźinske pućowanje po wšelakich dobach wjedźe awtorka Grit Lemke zajimcow přichodnu sobotu, 12. septembra wot 13 hodź. po Wojerecach. Při tym steja originalne městnosće w srjedźišću, kotrež su za jeje dokumentariski roman „Kinder von Hoy“ ćežišćowu rólu hrali. Składnosć to, we wobłuku měšćanskeho swjedźenja město z wosebiteje perspektiwy zeznać. Zajimcy njech so w turistiskej informaciji we Wojerecach pod telefoniskim čisłom 03571 2096170 abo z mejlku na přizjewja. Kołojězba z originalnym Ikarus-busom ze sydomdźesatych lět, kotryž je swój čas dźěłaćerjow na dźěło wozył, płaći 43 eurow. Jězdźidło wotpowěduje stawiznam generacije, kotraž je spočatk a kónc socialistiskeho bydlenskeho města dožiwiła.

Dźěćatstwo w bydlenskim kompleksu, młodźina a klubowa scena wokoło Gerharda Gundermanna, dźěło w změnach, přewrót, rasistiske wukročenja 1991, strukturny łamk a nowozapočatk – wo wšěm tym powěda Grit Lemke na při­kładźe markantnych městnow, kotrež stawizny špiheluja.

Spěchowanske towarstwo Serbskeho muzeja měješe zašłu sobotu swój lětny wulět, tutón raz do Chróšćanskeje ­kónčiny. Brigita Lawerowa z Hórkow wjedźeše skupinu dopołdnja po něhdyšej skałarskej­ wjesce.

Hórki. Dźowka transportneho předewzaćela Pawoła Bjeńša a wnučka jeho předchadnika Jakuba Šustera Brigita Lawerowa­ předstaješe nazornje wjesne stawizny. Tak skedźbni wona mjez druhim na kopolak za židowku Hanu Šěrcec. Zdobom naspomni Hórčanka přećelske zwiski swojeje maćerje k holcy, kotraž bu wot nacionalsocialistow zajata a wo kotrejž hač do dźensa njewěmy, hdźe je zemrěła. Dalše zajimawostki zhonichu wobdźělnicy ekskursije wo wjesnych kapałkach a wuznamnych serbskich spisowaćelach, kotřiž su w Hórkach žiwi byli abo tam tež skutkowali. Na wšě 14 skałow skićeše mjez lětami 1812 a 1974 dźěłowe městna za hač do 200 serbskich a němskich skałarjow z Hórkow a cyłeje wokoliny. Nic na kóncu naspomni Brigita Lauerowa, zo knježi we wsy hač do dźensnišeho dobra serbska zhromadnosć.

Wjacore sta ludźi dožiwi kónc tydźenja kołowokoło Hórčanskeho stadiona konjacy sport. 33. raz organizowaše tam konjace towarstwo­ Při Klóšterskej wodźe swój jěchanski a skakanski turněr. Nimo skakanja a dresury wubědźowachu so wobdźělnicy tež w přezpólnym jěchanju. Při tym dyrbjachu mjez druhim přez wodu jěchać kaž na wobrazu Franziska Bobkec ze swojim Quirlyjom. Miłočanka docpě na kóncu w sakskim mišterstwje w starobnej klasy U21 kaž hižo loni druhe městno. Foto: Syman Richter