Budyšin. Mjeztym 90. literarnu kofe­jownju Budyskeho ekumeniskeho tachantskeho wobchoda wuhotuja srjedu, 10. junija, w rumnosćach Budyskeje wo­krjesneje ludoweje uniwersity na Wulkej Bratrowskej 6. Započatk je w 19 hodź. Něhdyši intendant Serbskeho ludoweho ansambla Wolfgang Rögner předstaji swoju prěnju publikaciju „Die phan­tastischen Abenteuer des Malte Blomberg“. Je to kniha za dźěći, młodostnych a dorosćenych, kotřiž su młodźi wostali, kaž w připowědźenju rěka. Po čitanju změja zajimcy přiležnosć, sej knihu kupić a signować dać. Zastup je darmotny, proša pak wo dary.

W pincy so paliło

Rakecy. Wohnjowych wobornikow z Rakec, Psowjow, Njeswačidła, Minakała a Ralbic wołachu sobotu wječor k hašenju do Rakečanskeje platoweje štwórće. Tam so w pincy wjaceswójbneho domu paleše. Ze swojim spěšnym zasadźenjom kameradojo tomu zadźěwachu, zo so płomjenja dale rozpřestrěwaja. Žadyn z wobydlerjow so zranił njeje. Wobornicy twarjenje přewětrichu, tak zo móžachu podružnicy zaso do swojich bydlenjow. Policija pad ćežkeho zapalerstwa dla přepytuje. Wěcnu škodu trochuja na něhdźe 50 000 eurow. W zašłosći je stajnje zaso k zapalerstwu w platowych domach dóšło.

Gmejnska rada twarski nadawk ćěslistwu z Brězowki přepodała

Trjebin (AK/SN). Móst nad Sprjewju při Rulec młynje chce Trjebinska gmejna ponowić. Woblubowane wočerstwjenišćo, hdźež na přikład jězby z čołmikami poskićuja, drje je njedaloko Noweho Města nad Sprjewju, słuša pak po teritoriju do Trjebinskeje gmejny. Gmejnska rada je na swojim zašłym posedźenju jednohłósnje wobzamknyła, zo ma ćěslistwo z Brězowki nadawk we wobjimje 112 000 eurow dóstać a móst ponowić. Twarske dźěła maja so po wuprajenju wjesnjanosty Roberta Sprejza po móžnosći w awgusće zahajić. Ponowjenje chcyli hišće lětsa wotzamknyć.

Zo bychu so cyłkowne wudawki wobmjezowali, maja sobudźěłaćerjo gmejny někotre dźěła sami wobstarać. Mjez druhim wottwarja wobłoženje, z čimž 7 000 eurow zalutuja, wjesnjanosta rozłoži. Dale chcedźa bjez krana a tež bjez twarskich róštow wuńć, dokelž wšitke dźěła wothorjeka wukonjeja. „Cyłkownje zalutujemy štyri do pjeć dnjow dźěła“, wjesnjanosta wuswětla.

Budyšin (CS/SN). Wón je bohužel přerědko w swojim ródnym měsće Budyšinje, rjekny dźiwadźelnik Roman Knižka minjeny štwórtk wopytowarjam zarjadowanja „Ich hatte einst ein schönes Vaterland“ w Budyskim wopomnišću. Wone wotmě so we wobłuku Lěta židowskeje kultury w Sakskej TACHELES. Tacheles woznamjenja, wotewrjenje a cyle direktnje wo bytostnym rěčeć. Ze swojim programom, kotrehož hesło je wuprajenje Heinricha Heiny, zwjaza dźiwadźelnik čas wot 18. lětstotka hač do přitomnosće ze swědkami židowskeho žiwjenja w Němskej. Přewodźał je jeho kwintet Opus 45, kotryž interpretowaše židowsku hudźbu.