Kamjenc (SN/hn). Njewočakowana powěsć wo zawrěću porodneje stacije Kamjenskeje chorownje je wjele ludźi chětro šokowała. W tymle zwisku su wo­bydlerjo „Zwjazk za přichod“ załožili. Zaměr zjednoćenstwa je, „porodowu staciju wobchować, transparencu hladajo na rozsud zaručić a zhromadnje z politiskimi zastupjerjemi rozrisanja za přichod zastaranja wuwiwać“, zwurazni akterka­ Jolyn Schenderlein. Zwjazk kritizuje předewšěm ,,njewočakowany rozsud wo zawrjenju a wotpowědnje krótki čas za reagowanje“, tak zo dyrbja so samodruhe žony krótkodobnje za hinašu chorownju rozsudźić. Zo by „potrjechenosć a zwjazanosć w ludnosći widźomna była“, přewjedźe zwjazk zajutřišim, 1. meje, wot 10 hodź. demonstraciju na Kamjenskim torhošću.

Poprawom chcyše Kathrin Spiesec swoje druhe dźěćo, kotrež tuchwilu wočakuje, spočatk junija w Kamjenskej chorowni swj. Jana porodźić. Z toho nětko bohužel ničo njebudźe. Staciju za porodnu pomoc chorownja 31. meje zawrěje. „Wo tym sym wot přećelki zhoniła, kotraž w Kamjenskej radnicy dźěła. Wona je mi stejišćo wyšeho měšćanosty Michaela Preußa sposrědkowała. Hakle po tym sym informacije chorownje na wědomje brała“, wona wuswětla. 1. apryla je so Miłočanka na informaciskim wječorku w chorowni wobdźěliła. Dr. Bosćij Šurk je přichodnym staršim tam rozdźělne móžnosće porodźenja rozkładował. Dwě babje wodźeštej jich po porodnej staciji. Wonej wustupowaštej kompetentnje a wotewrjenje, tak zo bě za Katrin Spiesec jasne, zo ma so tež jeje druhe dźěćo w Kamjencu narodźić, hdźež je atmosfera swójbna. Wězo hraje při rozsudźe tež rolu, zo njeje puć wot doma do kliniki daloki.