W muzeju na škleńcu molowali
Hdy posledni dźěl zwjazkoweje dróhi B 156 wutwarja?
Čelchow/Zdźěr (UM/SN). Štóž ze sewjera po zwjazkowej dróze B 156 do Budyšina jědźe, dyrbi kedźbować, zo swojim myslam přejara pućować njeda. Přetož južnje Delnjeho Wujězda je ze zwjazkoweje dróhi na 15 kilometrach jara komfortabelny puć nastał. Na nim dyrbiš so wědomje ke koncentraciji nuzować. Jenož někotre křiwicy a křižowanišća kaž tež Lěskej, Komorow, Zdźěr a Čelchow sej žadaja, zo spěšnosć na 70 resp. 50 km/h redukuješ. Nimo noweje kupy srjedź puća jědźeš do Zdźěrje, hdźež maš ze sewjerneho směra nalěwo kombinowany chódnik a kolesowanski puć, naprawo pak wosebitu jězdnu za kolesowarjow. Chětro wjele komforta za kolesowarjow, móhł sej wodźer awta myslić. Kumštnje nastata wuskosć pak šoferow nuzuje, předpisanu spěšnosć dodźeržeć.
W Čelchowje je hłowny puć přez wjes podobnje wuhotowany kaž w Zdźěri, mjenujcy ze srjedźnej kupu na kóždej kromje wsy, z kombinowanej šćežku za pěškow a kolesowarjow kaž tež z wosebitej jězdnej za kolesowarjow. We woběmaj wsomaj je gmejna Wulka Dubrawa składnosć wužiła, busowe zastanišća tak přetwarić, zo so zadźěwki zhubja.
Pokiw gymnaziastam
Budyšin. Nowi wobydlerjo internata Serbskeho gymnazija Budyšin móža njedźelu, dnja 16. awgusta, wot 18 do 21 hodź. do swojich stwow zaćahnyć. Póndźelu po wučbje w 13.30 hodź wotměje so za nowačkow zahajenska zhromadźizna. Dokelž dóstanu tam tež wažne podłožki a wobšěrne informacije, ma so kóždy na tym wobdźělić.
W holi fotografować
Połpica. Na zhromadne fotografowanje w holi přeprošujetej Njeswačanska přirodoškitna stacija a zarjadnistwo biosferoweho rezerwata Hornjołužiska hola a haty zajimcow njedźelu, 16. awgusta, wot 9 do 13 hodź. Wobdźělnicy zetkaja so w Połpicy nad Sprjewju (Halbendorf) při Šuli w zelenym. Wobdźělenje je darmotne. Zajimcy njech so pod telefonowym čisłom 035933/329 640 přizjewja. Něšto k jědźi a piću měli sej wšitcy sami sobu přinjesć a tohorunja na krute črije myslić.
Policija (14.08.26)
Pjenjezy zhubiła
Kulow. Wuměnkarka z Kulowa je so wutoru z woporom wobšudnikow stała. Njeznaty so jej při telefonje jako sobudźěłaćer kreditneho instituta předstaji. Z wumyslenej stawiznu so cuzemu poradźi, zo jemu žona daty swojeho konta a samo tajne čisło přeradźi. Na te wašnje móžeše wobšudnik 9 200 eurow wot jeje konta wotzběhnyć, kaž Zhorjelska policajska direkcija rozprawja. Wojerowski kriminalny rewěr nětko za njeznatym skućićelom slědźi.
Zejicy hotuja so na jubilej
W Zejicach přihotuja so na 675. jubilej naspomnjenja wjeski. Jutře za tydźeń, sobotu 22. awgusta, chcedźa jón z wjesnjanami a hosćimi z pisanym programom woswjećić.
Zejicy (SN/StŠ). „Před 25 lětami, jako bě tomu 650 lět, zo su so Zejicy prěni raz naspomnili, mějachmy druhe projekty, ja na přikład běch tehdom z nazwučowanjom a organizaciju pasionskeje hry w Chrósćicach zaběrany. Tohodla njebě chwile za swjedźeń. Dokelž pak su tež 75ćiny hódne swjećić, smy so rozsudźili, lětsa 675. róčnicu našeje wjeski woswjećić a za to wjetše zarjadowanje organizować“, wujasni Jurij Špitank pozadk swjedźenskeho dnja, sobotu 22. awgusta. Zarjadowanje wotměje so na Špitankec statoku, w tamnišej bróžni, kotraž je hižo z blidami a stólcami wuhotowana.
Wobornicy změja premjeru
Wopytowarjo swjedźenja swójbow dožiwja historisku ručnu sykawu
Pančicy-Kukow (SN/MWj). Historiska zajimawosć rozeznawa wohnjowu woboru Pančic-Kukowa wot druhich woborow. Tam maja nimo swojich modernych hašenskich jězdźidłow staru ručnu sykawu, pochadźacu z lěta 1908. Za hašenje ju wězo njewužiwaja, ale při wosebitych składnosćach z njej na stawizny wohnjoweje wobory skedźbnjeja.
Protestowacy filmowcow překwapili
Nowiny dale na kuchinskim blidźe
Šef statneje kenclije Sakskeje je so dźiwał, kelko młodych wobličow w redakciji našeho wječornika wuhlada. Tola bě hišće dalšich překwapjenkow, jako wón „wuznamny medij za Łužicu“ wopyta.
Budyšin (SN/mb). Prěnja stacija šefa sakskeje statneje kenclije dr. Andreasa Handschuha (bjezstronski) na wčerawšim wopyće w Ludowym nakładnistwje Domowina (LND) běše wobłuk rozšěrjenje. Tule jemu Marian Korjeńk, zamołwity za nowiny a časopisy, mjez druhim syć 56 roznošowarjow Serbskich Nowin (SN) rozkładźe. Woni so wo to staraja, zo ma serbski dźenik najskerje najspušćomniši system dodawanja nowin po cyłej Němskej.
Krótkopowěsće (14.08.26)
Nowe wětrniki nastaja
Mułkecy. Dohromady 21 wětrnikow chce předewzaće enercity wokoło Slepoho natwarić. W Mułkecach nastaja lětsa hišće štyri nowe wětrniki, kotrež maja wot klětušeho dźěłać. Tuchwilu twarja za to fundamenty, nazymu chcedźa z twarom sćežorow, gondlow a wokřidłow pokročować.
Ličba stolětnych spochi stupa
Praha. Ličba najstaršich wobydlerjow w Sakskej a Čěskej spochi přiběra. To zwisuje mjez druhim z boomom porodow po Druhej swětowej wójnje a z dobrej žiwjenskej kwalitu. W Čěskej je hiužo tuchwilu něhdźe 1030 ludźi sto lět a staršich, to je něhdźe jedna wosoba na 10 000 wobydlerjow. W Sakskej mamy na 10 000 wobydlerjow 2,6 ludźi w starobje sto abo wjace lět. Sakska je z tym mjeze zwjazkowymi krajemi Němskeje na druhim městnje za Hamburgom, hdźež su mjez 10 000 wobydlerjemi nimale třo w tutej najwyšej starobje.
Twarja skład miliny
Kino we wowčerni
Stróža. Dokumentaciju wo přirodźe „Das Flüstern der Wälder“ pokazaja jutře, pjatk, w 20 hodź. we wowčerni biosferoweho rezerwata Hornjołužiska hola a haty w Stróži pola Hućiny. Je to mjeztym šesty raz, zo zhromadnje z Budyskim Kamjentnym domom tajke kinowe wječory w awgusće wuhotuja. Wopytowarjam poskićuja chłódne napoje, słódnosće z grila a přikuski.
Bursa mineralijow
Hórnikecy. Na 21. łužisku bursu mineralijow su hromadźerjo a dalši zajimcy zbliska a zdaloka njedźelu, 16. awgusta do Hórnikečanskeje Energijoweje fabriki přeprošeni. Zarjadowanje organizuje Towarstwo přećelow mineralogije wuchodneje Sakskeje. Bursa wotměje so wot 10 hač do 16 hodź. Dźěći móža mjez druhim złoto pytać a mineralije wobdźěłać.
