Štó chcył tykanc napjec?
Pančicy-Kukow. Domowinska skupina Pančicy-Kukow přewjedźe 23. awgusta swój swjedźeń za swójby w nowej komunikaciskej arenje na ležownosći něhdyšeho hosćenca. Za to pytaja hišće pomocnikow, kotřiž bychu tykanc napjekli. Štóž by k tomu zwólniwy był, njech přizjewi so sčasom pola jednoho z čłonow skupinskeho předsydstwa.
Muzej zaso dlěje wotewrjeny
Kamjenc. W muzeju zapadneje Łužicy w Kamjencu informuje, zo płaća tam wot spočatka tydźenja zaso regularne wotewrjenske časy. Muzej je nětko zaso wot wutory hač do njedźele stajnje wot 10 do 18 hodź. wotewrjeny. Personalnych přičin dla běchu wotewrjenske časy minjene tydźenje skrótšene.
Přihotuja ekskursiju
Swojemu zawodej dale swěrni
Wulka Dubrawa (MkWj/SN). Składnostnje swojeho 35lětneho wobstaća je spěchowanske towarstwo Wulkodubrawskeje elektropórclinownje „Margarećina hěta“ minjenu sobotu na dźeń wotewrjenych duri do swojeho muzeja we Wulkej Dubrawje přeprosyło. Něhdźe 50 bywšich sobudźěłaćerjow a dalšich zajimcow je přeprošenje sćěhowało. Zo njejsu swjedźeń kaž hewak njedźelu přewjedli, ma swoju přičinu, předsydka towarstwa Regina Bernstein rozłoži. Tón dźeń je w Braniborskej Dźeń industrijneje kultury. Tón wšak w Sakskej njeswjeća, ćim lěpše su tuž styki towarstwa do susodneho zwjazkoweho kraja. Na swjedźenske zarjadowanje we wulkej hali bywšeje elektriskeje pruwowarnje je tež Wulkodubrawski wjesnjanosta Hardy Glausch přichwatał.
Do Rotterdama a zaso wróćo
Na łódźi „Seelust“ maja dale program - ale bjez jězbow po jězorinje
Radwor/Klětno (SN/StŠ). Minjenu njedźelu dopołdnja je so Patrick Šmit, jedyn z mějićelow ŠmitecSchwarzec wozydłownistwa w Radworju, na nimale dwaj tysac kilometrow dołhu jězbu podał – z Radworja do Rotterdama, wottam do Lübecka a zaso wróćo do Radworja. Njebě pak to dowolowa jězba, kajkaž steji wona snano w katalogu a kotruž móhł pola Šmitec-Schwarzec knihować. Mandźelski Diany Šmitoweje je do Nižozemskeje jěł, zo by tam skóncowany dźěl Šmitec-Schwarzec łódźe „Seelust“, z kotrejž serbski zawod wot lěta 2025 hosći a turistow po Bjerwałdskim jězorje wozy, na reparaturu dowjezł „Dźěl ćěrjenja je so skóncował. Bych móhł z łódźu dale jězdźić, ale jenož runjewon. Skóncowaneho dźěla dla njehodźi so wona wjace dolěwa a doprawa wodźić“, tak Patrick Šmit.
Hudźo z tandemom po měsće
Hdyž měsačk słónco zakrywa
Štóž nima dźensa wječor hišće kruty termin, tomu móžu doporučić, so jednorje wonka na zahrodu posydnyć a do njebja hladać. Tam mjenujcy wočakuje nas dźensa wječor wosebitostka.
Hdyž so dźensniši dźeń nachila a słónco so chowa, potom móhli na njebju něšto dožiwić, štož přehusto na njebju njewuhladamy – tak mjenowane parcielne zaćmiće słónca (partielle Sonnenfinsternis).
Tutón wosebity fenomen nastanje, hdyž steja słónco, měsačk a zemja nimale dokładnje w jednej liniji. Měsačk potom pomału mjez zemju a słóncom ćehnje, štož za přihladowarjow na zemi wupada, jako by měsačk dźěl słónca zakrył.
Po informacijach wjedrarjow a astronomow budźe měsačk dźensa wječor něhdźe 80 do 90 procentow słónca zakryć. Štóž chce tutu wosebitosć na njebju sćěhować, dyrbjał sej sčasom dobry blečk – najlěpje trochu wyše ležace městno – ze swobodnym widom na horicont do zapada pytać.
Krótko po sedmich so dźensa „film“ pod hołym njebjom započnje. Nimale hodźinu móža zajimcy potom rědkemu předstajenju na njebju sćěhować. Po tym so słónco pomału chowa a zaćmiće hižo widźeć njebudźe.
Do Noweje Cale kolesowali
Radworscy firmowani su so wčera z kolesami na puć do Noweje Cale při pólskej mjezy podali. Rano wotjědźe 20 młodostnych z přewodom fararja Bena Jakubaša a štyrjoch dalšich wosadnych na 140 kilometrow dołhu jězbu podłu Nysy do Pólskeje, hdźež přenocowachu. Dźensa rano do 20 kilometrow zdaleneje Noweje Cale dojědźechu. W klóšterskej cyrkwi dopołdnja zhromadnje Božu mšu woswjećichu, k tomu so jim něhdźe 30 wěriwych přidruži. Kemše wobrubi skupina młodostnych z dujerskej hudźbu. Jutře so kolesowarjo zaso do domizny nawróća.
Foto: Martina Hančikowa
Krótkopowěsće (12.08.26)
Rietzschel mjez nominowanymi
Frankfurt n. M. Łužiski awtor Lukas Rietzschel je ze swojim romanom „Sanditz“ za Němske knižne myto 2026 nominowany. Mjez 20 titulemi steji jeho kniha na longlist nominacije. Dohromady bě 205 zapodatych romanow na wuběr. Shortlist šesćoch finalistow wozjewi so 8. septembra a 5. oktobra spožča myto we wobłuku Frankfurtskich knižnych wikow.
Trilex z wjac ćahami
Drježdźany. Krajna železnica wutwari swoju syć w Sakskej. Wot septembra zasadźi Trilex na čaromaj mjez Drježdźanami a Žitawu a mjez Drježdźanami a Zhorjelcom štyri přidatne ćahi. Z tym ma so stajnemu přepjelnjenju ćahow zadźěwać a napjata situacija wolóžić. Ćěridłowe wozy chcedźa wot Wuchodoněmskeje železniskeje towaršnosće wotnajeć.
Lěwanćikowe polo woblubowane
Nowačkow přizjewić
Suchota tež při Sprjewi wočiwidna
Pjaty raz barowy festiwal swjećili
Radwor. Kajki bě to wulki hołk a tołk minjeny kónc tydźenja w Radworju! Pjaty barowy festiwal młodźinskeho kluba je tójšto wopytowarjow přiwabił. Tydźenje dołho su čłonojo kluba swjedźeń přihotowali. Wuslědk bě wotměnjawy program za wšitke generacije.
Zazběh bě pjatk wječor z powitanjom a tradicionalnym natočenjom piwa. Po tym su woblubowany korčmowy kwis přewjedli. Něhdźe 250 wopytowarjow wobdźěli so na prěnim swjedźenskim wječoru. Kwisowe skupiny dyrbjachu na prašenja ze wšelakich temowych wobłukow wotmołwić. Wuhódać dyrbjachu mjez druhim znatych dźiwadźelnikow, spěwy abo zapřijeće z pomocu wobrazow po principje „Štyri wobrazy – jedne słowo“. Za čas wubědźowanja su wobdźělnicy wjele diskutowali a přemyslowali – hłowy so potajkim kurjachu. Na kóncu doby mustwo „Na wopyće“ z Danicu Hickec, Lindu, Lydiju a Marlene Matikec, kaž tež Linu Hannig. Po tym postara so DJ „Systhemfehler“ wo dobru naladu na rejowanišću. Hač do pózdnjeje nocy Radworčenjo a hosćo z wokoliny zhromadnje swjećachu.
