Policija (10.09.25)
Roboter pokradnył
Wojerecy. Kaž policiji hakle póndźelu zdźělichu, je njeznaty paduch hižo pjatk minjeneho tydźenja z Wojerowskeje kupnicy roboter za syčenje pokradnył. Paduch bě sej zapakowany roboter hrabnył, nuzowy wuchod kupnicy wočinił a so na to zminył. Škoda wučinja 770 eurow.
W kružnym wobchadźe znjezbožiła
Chelno. Wobchadne njezbožo bě wčera rano w kružnym wobchadźe pola Chelna. Z dotal njeznateje přičiny zajědźe 47lětna wodźerka Forda přejara na kromu jězdnje a wosta tam stejo. Ju dowjezechu ze snadnymi zranjenjemi do chorownje. Škoda wučinja wjace hač 20 000 eurow. Jako zastojnicy njezbožo přepytowachu, zajědźe nakładne awto do nastajeneho warnowanskeho třiróžka.
„Najměrniše městno“
Tež lětsa měješe Astrocentrum Łužica zbožo z wjedrom, jako poskići ludźom kołbasu, bracle, piwo, limo a informacije wo aktualnym stawje swětłownje změny strukturow.
Krótkopowěsće (10.09.25)
Hasinger: Sylny signal za Łužicu
Zhorjelc. Astrocentrum Łužica (DZA) wuhotuje přichodny tydźeń w Zhorjelcu mjezynarodne zeńdźenje Astronomiskeje towaršnosće pod hesłom „The restless Universe“ (njeměrne swětnišćo). Posledni raz je towaršnosć 1924 na schadźowanje w Lipsku přeprosyła. Tohodla widźi direktor DZA, prof. Günther Hasinger, podawk jako sylny signal za Łužicu.
Energija z wětra zaběra sejm
Drježdźany. W Sakskim krajnym sejmje su so dźensa, w prěnim posedźenju po lěćnej přestawce, z naćiskom zakonja wo financielnym wobdźělenju gmejnow na dobytkach zdobywanja energije z wětra zaběrali. Jón běchu frakcije CDU, SPD a BSW wudźěłali. Mjez druhim zwyša wot lěta 2026 winowatostny wotedawk na produkowanu kilowattnu hodźinu wo 0,1 cent na 0,3 cent.
Wulke plany Toyoty
Wobdźěla so na domchowance
Ćisk (JT/SN). Ze swjedźenskim wozom, předstajacy žně, wobdźěli so Ćišćanska serbska rejwanska skupina přichodnu njedźelu wot 13 hodź. na swjedźenskim ćahu na krajnej domchowance we Wojerecach. Nimo žnjenskeje króny a snopa budźe na wozu tohorunja dwanaće metrow dołha słomjana pletwa widźeć. Ju su čłonojo rejwanskeje skupiny tele dny na Forchec statoku nawili. Při tym měještaj Jan Kašpor a Susann Sulkowa wotežki w rukach. Do pletwy zaplećechu kumštne kwětki w serbskich barbach.
Słomu za pletwu a snop běštaj Heinz Forche a Kark-Heinz Zink hižo před tydźenjemi na žitnišću posykłoj. Dohlad do ćežkeho ratarskeho dźěła poda rejwanska skupina hižo sobotu wot 15 hodź. na jewišću na Łužiskim naměsće ze swojej rejwanskej hru „Žne“.
„Dohromady wobdźěli so 15 regionalnych skupin ze serbskimi temami na krajnej domchowance“, powěda županka Wojerowskeje župy Gabriela Linakowa. Předstaja mjez druhim serbski kwasny ćah a serbske křćizna.
Serbske drohoćinki zeznali a łapanje kokota dožiwili
Je z rjanej tradiciju, zo zarjaduje Budyska župa „Jan Arnošt Smoler“ započatk septembra kubłansku jězbu. Minjenu sobotu wulećachu sej Serbja z Budyšina, Worcyna, Rakec a wokolnych wsow do Choćebuza a Drjenowa, zo bychu tam Delnjoserbow zetkali a z nimi hłubje do rozmołwy přišli. Najprjedy pozastachmy při bywšim hrodźišću w Choćebuzu. Tam powita nas Werner Měškank a pokaza nam dźěle Choćebuza, kotrež maja něšto ze Serbstwom činić. Jemu připosłuchać bě jara zajimawe, wšako rozprawješe nam angažowany Serb wo stajnym a zmužitym wosobinskim boju wo prawa Serbow w tutym měsće. Při tym njezaby wón swojich swěrnych serbskich sobuwojowarjow pomjenować. Dźak wšitkim tež z našeje strony!
Werner Měškank powědaše wo dobytych sudniskich jednanjach abo wótrych a chutnych rozestajenjach z jednotliwymi zamołwitymi města, kotřiž mějachu w poslednich pjeć lětdźesatkach poprawom zamołwitosć za runoprawosć Serbow, z njej pak zwjetša liwko wobchadźachu. Zwjeselace je, zo móžachmy přiwšěm wjacore serbske wuměłske dźěła Jana Buka, Jürgena von Woyskeho a druhich wobdźiwać.
W Malešecach před 200 lětami
Napjate wólby w Njeswačidle
Njewšědne wuslědki w prěnim kole – štó budźe nowy wjesnjanosta?
Njeswačidło (SN/mb). Wólby naslědnika wjelelětneho wjesnjanosty Gerda Schustera njedźelu njemějachu jasny wuslědk (hlej tež powěsć we wčerawšich SN). Na wólbnej cedlce steješe drje jenož jedne mjeno, Martin Scholze z Bóšic. Tón pak je jenož 48 procentow dóstał, dokładnje 327 wot 677 płaćiwych hłosow.
Wobdźěliło je so 889 wot 1 877 wólbokmanych, 47 procentow. Nimale 24 procentow wolerjow, 212 ludźo, njeje płaćiwy hłós wotedało. Napadnje, zo su wolerjo 56 mjenow na wólbnu cedlku pisali. Hdyž je jenož jeničkeho kandidata, maš prawo, faworita napisać. Tak dósta Juliane Mazalla z Łuha 105 hłosow a Anett Pötschke ze Šešowa 67.
Policija (09.09.25)
Njezbožo z tragiskim wukóncom
Běła Woda. Tři smjertne wopory a dwě ćežko zranjenej wosobje su wuslědk wobchadneho njezboža wčera do připołdnja na zwjazkowej dróze B 156 mjez Běłej Wodu a Hamorom. Dwě jězdźidle tam frontalnje do so zrazyštej. 66lětna wodźerka Nissana zemrě na sćěhi swojich zranjenjow w chorowni. Jeje sobujěducej w starobje 13 a šěsć lět dowjezechu do chorownje. 87lětny wodźer Suzukija a jeho 86lětna sobujěduca hišće na městnje njezboža zemrěštaj. Po informacijach policije wučinja wěcna škoda něhdźe 35 000 eurow. B 156 su něhdźe pjeć hodźin dospołnje zawrěli.
Swjedźeń za wšitke generacije
Ralbicy (MČu/SN). Stajnje prěni kónc tydźenja septembra Ralbicy wožiwja. Potom swjeći wjes babylěćo. Podawk charakterizuja zhromadnosć, tradicija a žiwjenska radosć. Lětsa spominachu na 777. róčnicu prěnjeho naspomnjenja wsy.
Swjedźeń zahajichu pjatk z tradicionalnym wubědźowanjom wohnjowych woborow, na kotrymž so dźewjeć woborow wobdźěli. Na kóncu zawěsćichu sej kameradojo ze Salowa prěnje městno před wobornikami z Debricy/Wysokeje a Sulšec. Wječor bě stan wulke rejowanišćo jako DJjojo „systemfehler & LEDZIBEATZ“ masy zwjeselachu.
Nalada bě tež sobotu wječor přewšo dobra. Kóždolětny wječorny program, kotryž wjesna zhromadnosć wuhotuje, přićahowaše tójšto ludźi. „Cyły stan bě połny ludźi“, rozprawja Christoph Wowčerk jako jedyn z hłownych organizatorow a čłon wjesneho towarstwa Ralbicy z.t. Wjace hač 30 ludźi – najmłódši wobydlerjo, młodźina kaž tež starša generacija – skutkowaše w programje sobu. Christoph Wowčerk wjeseleše so nad zwjazanosću: „Móžachmy so na wšitkich spušćeć. Wot mnohich ludźi žnějachmy wjele dźaka a chwalby.“
