Digitalny pakt zmóžnja Hodźijej dospołnje nowe wuhotowanje

Hodźij (CK/SN). Po móžnosći hišće lětsa chce Hodźijska gmejna swoju zakładnu šulu z nowej kompjuterowej techniku wuhotować. To je tamniša gmejnska rada na swojim wuradźowanju minjeny štwórtk jednohłósnje schwaliła. Komuna dóstanje za to 97 600 eurow ze spěchowanskeho programa „Digitalny pakt za šule“. Pjenjezy chcedźa po słowach nawodnicy hłowneho zarjada Simony Kilank tež dospołnje wužiwać. 5 000 eurow za digitalnu taflu je tak a tak hižo w hospodarskim planje zapisane.

Předwidźane je, dwanaće rjadowniskich rumnosćow do syće zwjazać a z internetnym přistupom wuhotować. Kupić chcedźa 25 tabletow, k tomu 18 notebookow a 30 PCjow. Pjeć z nich trjebaja za dźěło z interaktiwnymi taflemi. Zakładna šula hižo dwě tajkej ma, jednu z njeju běchu hakle loni kupili. Nětko ma dalše pjeć digitalnych taflow dotalne stare zelene narunać. Dale inwestuja do tak mjenowaneho medijoweho wozyčka, zo móhli mobilne nastroje w tym času, hdyž so njewužiwaja, z milinu a aktualnymi programami zastarać.

Hač drje je zapaler wina, zo maja wohnjowi wobornicy wokoło Hodźija tele dny wosebje wjele dźěła? Před něšto dnjemi paleše so při tamnišim młodźinskim klubje, hdźež policija zwěsći, zo běchu płomjenja z dweju městnow wuchadźeli. Minjeny štwórtk paleše so wosrjedź lěsa mjez Spytecami a Hodźijom. Tež tam běchu wohnjowi wobornicy zasadźeni. A w nocy na minjeny pjatk je so hižo zaso paliło, tónraz při dróze mjez Małej Prahu a Brězu (Birkau). Tam so wjacore awtowe wobruče palachu. K hašenju wołachu wobornikow z Hodźija, Spytec, Brězy a Prěčec. Dohromady bě 25 kameradow zasadźenych. Tež w tymle padźe policija přepytuje, hač jedna so snano wo zapalerstwo. Foto: Rocci Klein

We Wojerowskim zwěrjencu tuchwilu žanych wopytowarjow nimaja a tak tež žane dochody. Pjenježne wudawki pak wostanu. Přiwšěm spytaja ze situacije to najlěpše sčinić.

Wojerecy (SiR/SN). Na mnohich městnach we Wojerowskej coologiskej zahrodźe tuchwilu kćěje. Loni do zemje stykane kwětkowe cyble so nětko w najrjeńšej pyše pokazuja. Rjany napohlad měł wopytowarjow zwjeselić, wokomiknje pak je wón jeno sobudźěłaćerjam popřaty, kaž nawoda Eugène Bruins rozprawja. „Prózdny zwěrjenc ničo rjane njeje, to je cuze a njezwučene.“

A přiwšěm móže Bruins tež pozitiwne wěcy mjenować. Tak ma za něšto tydźenjow připrawa pinguinow doskónčnje saněrowana być. Mjeztym je znate, zo dóstanu pjeć pinguinow z Halle a dalše pjeć z francoskeho Beauvala. Twarske dźěła na wulkej insektowej lounge su tohorunja w dalokej měrje wotzamknjene. To wjeseli tež přichodnych wobydlerjow, kotrež so pola Silki Kühn zynčo přizjewjeja, hdyž zwěrjencowa pedagogowka insektowy hotel z bambusom, rohodźu a dalšimi maćizna wuhotuje.

Dohromady 35 000 škitnych zakryćow za nós a hubu je Budyski wokrjes minjene dny wšitkim šulam wokrjesa njewotwisnje wot nošerja rozdźělił. Organizowali a přewjedli su akciju sobudźěłaćerjo Techniskeho pomocneho skutka. Tež za Andreasa Heinricha a logistikarja Martina Lindemanna (wotlěwa) bě to organizatoriske wužadanje, dokelž su nimo toho desinfekciske srědki a gumijowe rukajcy rozwozyli. Foto: André Stickel