Budyšin (CRM/SN). Serbski ludowy ansambl je tele dny na portretowy koncert komponista klasiskeje moderny a hudźbneho dramaturga Jana Cyža přeprosył, kotryž běše 3. junija swoje sydomdźesaćiny woswjećił. Dom SLA na Wonkownej Lawskej dožiwi tón wječor bohaty wopyt z mnoho znatymi wosobinami zbliska a zdaloka. W swjedźenskej atmosferje předstajichu kedźbyhódny koncert z reprezentatiwnym wurězkom přehlada wo žiwjenskim skutku wuměłca. Cyž běše dlěje hač štyri lětdźesatki w tutym domje serbskeje hudźbneje kultury skutkował a swójske slědy zawostajił. Kaž něhdy tak so tež dźensa tohorunja zwonka serbsko-hudźbno-kulturneho wobłuka a zwonka Łužicy jako načasny reprezentant klasiskeje hudźby Serbow předstaja.