Budyšin (CS/SN). Mjeztym zo su nowinarjow wčera w Budyskej radnicy wo 642. Wjacławskich wikach informowali, pyšachu sobudźěłaćerjo elektrofirmy wonka hodowny štom z 80 Ochranowskimi hwězdami. Reckec swójba z Budyšina bě jón za lětuše wiki dariła. Njedźelu, 30. nowembra, připołdnju pjekarski mišter Martin Reck na zahajenju wikow wosušk nakraje. Wiki pak so hižo pjatk do toho započnu.
Swjedźenišćo rozpřestrěje so tradicionalnje na Žitne wiki, Bohatu hasu a Hłowne torhošćo. Wjace hač 80 wikowarjow poskići kulinariske dobroty a hodowne wudźěłki. Zo bychu wiki jednotny wobraz měli, maja wikowarjo wšelake předpisy za wonkowne wuhotowanje budkow dodźeržeć. Kulturny program wopřija wjace hač 120 poskitkow. Tež chór Budyšin a hudźbnicy Serbskeho ludoweho ansambla w nim sobu skutkuja. Wot lěta 2023 přewodźeja šulerjo z Radworja wustup swjateje Borbory 4. decembra.
