Kwisowa wjechlawa nětko tež serbsce
Kamjenc. Kotre zwjazkowe kraje mjezuja ze Sakskej? Hdy so chorhoje před krajnym sejmom wupowěšeja? A z čim so poprawom peticiski wuběrk zaběra? Z tutymi a mnohimi dalšimi prašenjemi móža dźěći a młodostni swoju wědu kołowokoło parlamenta, Swobodneho stata Sakskeje a demokratije hrajo testować a pohłubšeć – a to wotnětka tež w serbšćinje. Na iniciatiwu zapósłanče krajneho sejma Elaine Jenčec (CDU) woblubowanu kwisowu wjechlawu Sakskeho krajneho sejma přichodnje tež w serbskej wersiji wudaja.
Na nastork, kwis tež serbsce wudać, stej Sakski krajny sejm a prezident krajneho sejma Alexander Dierks bjezposrědnje reagowałoj. Ideju njejsu jenož přiwzali, ale tež bjez komdźenja zwoprawdźili. Z tym sadźi krajny sejm widźomne znamjo za hódnoćenje a spěchowanje serbskeje rěče jako kruty wobstatk sakskeje identity. Prěnje eksemplary serbskeje kwisoweje wjechlawy je prezident krajneho sejma Alexander Dierks Elainje Jenčec přepodał.
Hrajkanišćo pěstowarnje přetwarja
Hory (AK/SN). Za nimale 80 000 eurow da gmejna Halštrowska Hola hrajkanišćo Blunjanskeje pěstowarnje, kotraž je w nošerstwje gmejny, přetwarić. „Za to je nětko přizwolenje spěchowanskich srědkow dóšło. Wo nje smy so we wobłuku Leaderoweho programa prócowali“, rozłoži komornica Stefanie Arndt na zašłym posedźenju gmejnskeje rady. Za přetwar hrajkanišća dóstachu 55 000 eurow spěchowanja, štož wučinja 70 procentow cyłkowneje twarskeje sumy.
Předwidźane dźěła potrjechja předewšěm areal kołowokoło jednotliwych hrajkanskich nastrojow. Tam natwarja tajke dno, na kotrymž so dźěći hnydom njezranja, hdyž raz padnu. Tež trawnik ma so ponowić. Dale ma za dźěći hrajkanski basenk z wodu nastać. Hač do meje 2027 ma wšitko hotowe być.
Planuja zastaranje z ćopłotu
Wo zmysle winowatostneho nadawka zarjadniskeho zwjazka diskutowali
Pančicy-Kukow (SN/MWj). Hač do lěta 2028 ma so za sobustawske gmejny zarjadniskeho zwjazka Při Klóšterskej wodźe komunalny plan zastaranja z ćopłotu zdźěłać. Na swojim zašłym posedźenju su čłonojo zhromadźizny zarjadniskeho zwjazka rozsudźili, zo ma firma z Drježdźan za něhdźe 32 000 eurow plan za to zdźěłać. Při tym njenastanje cyłkowny plan za cyły zwjazk, ale pjeć jednotliwych za kóždu gmejnu, předsyda zarjadniskeho zwjazka Stefan Anders rozłoži.
Přeprošuja na twarnišćo
Štóž hdys a hdys přez Čorny Chołmc jědźe, móže takrjec přihladować, kak tam wulki twarski kompleks nastawa. To je twarnišćo projekta Smart Mobility Lab (SML) Drježdźanskeje Techniskeje uniwersity. Njedźelu smě so tam kóždy rozhladować a informować.
Čorny Chołmc (SN/MWj). Na dźeń wotewrjeneho twarnišća su zajimcy njedźelu, 28. junija, wot 11 do 17 hodź. do Čorneho Chołmca přeprošeni. Tam dóstanu wopytowarjo prěni raz wobšěrny dohlad do po wšej Europje jónkrótneho slědźenišća Smart Mobility Lab za splećenu a awtonomnu mobilitu.
Lětni zawrót słónca bě předwčerawšim wjace hač 1 300 městam ...
Krótkopowěsće (23.06.26)
Choćebuz: pjenjezy njedosahaja
Choćebuz. Na cyłoněmskim akciskim dnju „komuny na limiće“ je so wčera tež město Choćebuz wobdźěliło. Zhromadnje ze stami komunow su zastupjerjo města na dramatiske financielne połoženje skedźbnili. Choćebuski wyši měšćanosta Tobias Schick (SPD) na to pokaza, zo drje město srědki ze zakonja za změnu strukturow dóstawa, za wšědne nadawki pak pjenjezy njedosahaja.
Tunl w nocy zawrjeny
Zhorjelc. Šoferojo dyrbja so na awtodróze mjez Zhorjelcom a Budyšinom znowa na haćenja nastajić. Mjez tunlom a Wósporkom přihotuja twarnišćo, dokelž je dróha dodźeržana. Tuchwilu je jenož jedna jězdna k dispoziciji. Zamołwići rozsudźichu, zo haćenje hnydom za hladanje tunla wužija, štož je we wěstych wotstawkach trěbne. Tuž budźe tunl pod Limasom hač do 26. junija stajnje w nocy zawrjeny.
Zwjazk z nowej jednaćelku
Jenož rostliny zběrać, kotrež dokładnje znaješ
Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (4)
Nětko, wokoło swjedźenja swj. Jana, so praji, zo maja dźiwje rostliny a hojenske zela najwjetšu skutkownosć. W juniju z jeho dołhimi dnjemi, na kotrychž słónco najdlěje swěći, steja rostliny w přirodźe w swojim najrjeńšim kćěwje. Wokoło 24. junija započina so tradicionalny čas zběranja lětnich zelow. Kćenja janskeho zela hodźa so wuběrnje za zhotowjenje tak mjenowaneho čerwjeneho wolija. Tón móže při depresiwnej naledźe, při špatnym sparje, ale tež po małych spalenjach sylneho słónca dla pomhać.
Za hornjołužisku šćežku hłosować
Zwučuja zjawnje
Worklecy. Chór Lipa pod wuměłskim nawodom Jadwigi Kaulfürstoweje přeprošuje na zjawnu probu wutoru, 23. junija, do Worklec na kupu. Je to zdobom poslednja proba spěwneho cyłka do jeho lěćneje přestawki. Zjawne spěwanje započnje so w 19 hodź. Wot 18 hodź. poskića Worklečenjo napoje a jědź.
Meja koncertuje
Radwor. Chór Meja přeprošuje na swój lětni koncert, kotryž budźe njedźelu, 28. junija, w 16 hodź. na farskej zahrodźe w Radworju. Wot 15.30 hodź. poskića swačinu. Jako hosći su sej lětsa dźěći rejwanskeje skupiny „Łužičanka“ přeprosyli.
Kino na rybarskim dworje
Mały Holešow. Njeswačanska přirodoškitna stacija a Budyski Kamjentny dom přeprošujetej jutře, wutoru, na kinowe předstajenje na rybarskim dworje w Małym Holešowje. Tam pokazaja film „Die geheime Welt der Tiere“. Wón spožča jónkrótne dohlady do dynamiki a do kołoběhow přirody a jeje wobydlerjow. Producent a režiser Axel Gebauer porěči wo nastaću filma a wo swojich dožiwjenjach. Započatk budźe w 20 hodź. Zastup płaći sydom eurow. Wobmjezowaneje ličby městnow dla je přizjewjenje trěbne pod telefonowym čisłom 035933 30077.
Horcota hosći njewottrašiła
Wjele poskitkow na klóšterskim a swójbnym swjedźenju
Pančicy-Kukow (SN/MWj). Při horcych temperaturach nad 30 stopnjemi je něhdźe 3 500 ludźi wčera klóšterski a swójbny swjedźeń w Pančicach-Kukowje dožiwiło. To bě po słowach Sonje Hejdušcyneje wot Křesćansko-socialneho kubłanskeho skutka (CSB) trochu mjenje hač loni. Nimo CSB su tež Budyski wokrjes, klóšter Marijina hwězda a gmejna Pančicy-Kukow swjedźeń sobu organizowali. Po cyłym klóšterskim dworje běchu stejnišća zarjadowane. Přez dwór konwenta, kotryž je hewak zawrjeny a hdźež běchu wčera dalše stejnišća, dóstachu so wopytowarjo nimo toho do klóšterskeje zahrody. Tež tam běchu wikowarjo stejnišća natwarili a swoje twory poskićowachu. Najpožadaniše pak běchu chłódkojte městna pod štomami kaž při Klóšterskej stwičce.
