Na wjesnym swjedźenju hosćom stawizny wsy znazornili
Prawoćicy. Minjeny kónc tydźenja woswjeći wjes Prawoćicy swoje 800lětne wobstaće z třidnjowskim swjedźenjom. Wot pjatka do njedźele su na łuce Langec swójby swjećili – z podpěru mnohich pomocnicow a pomocnikow ze wsy. Organizowało je swjedźeń wjesne towarstwo NuPraKo.
Wosebity wjeršk běštej historiskej wjedźeni po wsy pjatk a sobotu. Prawočance Anna Měrćinowa a Isabela Bulankowa běštej za to wjacore tydźenje rešeršowałoj a wjele zajimawych faktow ze stawiznow wjeski hromadu znosyłoj. Tak zhonichu wopytowarjo mjez druhim, zo woswjećištaj w lěće 1858 Hejnec mandźelskaj złoty kwas z dohromady 400 hosćimi, zo pochadźeše architekt Rudolf Cyž, kotryž je Chróšćansku kapałku naćisnył, z Prawoćic a zo bě prěni znaty serbski braška Bosćij Michał Wićaz Prawočan. Nowostka za někotrehožkuli wopytowarja běše, zo běštaj z Prawoćic tež dwaj měšnikaj wušłoj. Wodźeni po wsy zbudźištej wulki zajim a wjele ludźi bě so na nimaj wobdźěliło.
